Bareta kan mga Parabalangibog kan Kahadean
‘An Sarong Dakulang Tata na Pasiring sa Gibohon Binukasan’ sa Cuba
SI APOSTOL Pablo sarong lataw na parahulit kan maogmang bareta kan Kahadean nin Dios. Ginamit nia an gabos na oportunidad na ihiras sa iba an mga panuga kan Kaglalang na buhay na daing katapusan para sa makinuyog na katawohan. Kan sinosongko an suanoy na Efeso, namidbid ni Pablo an bagong situwasyon na matogot sa saiya na tabangan an mas dakol pang tawo. Sia nagsabi: “Ako magdadanay sa Efeso . . . , huli ta an sarong dakulang tata na pasiring sa gibohon binukasan sa sakuya.”—1 Corinto 16:8, 9.
An Mga Saksi ni Jehova sa Cuba nasa bago man na situwasyon. Minsan ngani dai pa opisyal na rehistrado, hayag na ngonyan na ikinahihiras kan mga Saksi an saindang paglaom sa Biblia sa saindang mga kahimanwa. Bago pa sana an gobyerno sa Cuba nagpahayag nin odok na interes sa pagtogot sa laen-laen na grupo relihioso na talingkas na makapunsionar. Nasambitan ni Presidente Castro sa publiko an Mga Saksi ni Jehova bilang sarong grupo relihioso na may mas marahay na relasyon ngonyan an gobyerno nin Cuba.
An bagong situwasyon na ini nakabukas nin “sarong dakulang tata na pasiring sa gibohon” para sa mga Saksi. Halimbawa, bago pa sanang nagbukas nin opisina an Mga Saksi ni Jehova sa Cuba, na nakatatabang sa sainda na organisaron an saindang paghuhulit sa nasyon na iyan. Labi sa 65,000 na Saksi an nagtatabang sa mga tawo na adalan asin saboton an Biblia. Ginagamit ninda an mga babasahon sa Biblia, arog kan mga magasin na An Torrengbantayan asin Awake! An dakol na Cubano na gusto sa katanosan nakikinabang sa pag-adal kan Biblia kaiba kan Mga Saksi ni Jehova.
An mga Saksi naggigibo man nin regular na mga pagtiripon sa saradit na grupo sa bilog na isla. Kun beses nagkakapribilehio pa ngani sinda na magkaigwa nin darakulang asamblea sa mga grupo nin mga 150. Inaapresyar nanggad ninda an permisong inako ninda sa mga autoridad nin Cuba, na nagtatao sa sainda kan oportunidad na makipagtipon sa saindang espirituwal na mga tugang na lalaki asin babae, na nag-aawit nin mga pag-omaw sa Dios, asin namimibi nin iriba.
Bago pa sana an “Diosnon na Takot” na Pandistritong Kombension ginibo nin labing 1,000 beses sa laog sana nin tolong katapusan nin semana. An sarong report nagsasabi na “an areglo, disiplina, asin katoninongan” risa sa kada kombension. Pinelisitar kan mga autoridad an mga Saksi huli sa bagay na ini.
Sa bilog na kinaban, an tunay na mga Kristiano naghihingoa na otobon an pagboot sa sainda nin Dios na ihulit an maogmang bareta kan Kahadean nin Dios. Kadungan kaiyan, sinda naghihingoa na mapagdanay an matoninong na relasyon sa mga autoridad nin gobyerno. (Tito 3:1) Kinukuyog kan Mga Saksi ni Jehova an hatol ni apostol Pablo, na nagsurat: “Kun siring ako nagsasadol, enot sa gabos, na an mga pagngayongayo, an mga pamibi, an mga pakimaherak, an mga pagpasalamat, gibohon manongod sa gabos na tawo, manongod sa mga hade asin sa gabos na nasa halangkaw na katongdan; tangani kitang makapamuhay nin tiwasay asin toninong na may lubos na diosnon na debosyon asin kapormalan.”—1 Timoteo 2:1, 2.