Dapat Kitang Mangatorogan

NANGANGATOROGAN daw kamo? Daing makontra sa pagpamugtak na iyo, huli ta kita gabos nangangatorogan mantang natotorog, dawa kun sabihon niato na dai kita nangangatorogan. Kinarkulo na an labi sa 95 porsiento kan gabos na pangatorogan dai nagigirumdoman. Arin an nagigirumdoman nindo? Sa aktuwal, an parate niatong nagigirumdoman iyo idtong napapangatorogan niato bago kita mapagmata.

Nadiskobre nin mga imbestigador sa pangatorogan na an pagtorog progresibong proseso na pinakananok sa naeenot na pirang oras dangan nagigin hababaw sa huri. An pangatorogan nangorognang nangyayari sa mga peryodo nin marikas na paghiro kan mata (sa Ingles, rapid eye movement), na inaapod torog na may REM. Sarusalida ini saka an torog na mayong REM. An kada siklo nin torog na mayong REM/may REM minalawig nin mga 90 minutos, asin an mga siklong ini naootro nin lima o anom na beses durante kan banggi, na an ultimo nangyayari bago kita mapagmata.

Salang isipon na an saindong hotok nasa hababang grado nin aktibidad durante nin pagtorog. Nadiskobre na an hotok mas aktibo sa mga pangatorogan kisa sa nagkapirang kamugtakan nin pagigin mata, apuera an nagkapirang neurona sa pinakapoon kan hotok, na konektado sa pag-atento asin memorya. An mga ini garo nagpapahingalo durante nin torog na may REM. Alagad sa pankagabsan an mga selula kan nerbios sa hotok padagos an komunikasyon sa pag-oltanan nin mga selula.

An satong hotok makangangalas an pagkakomplikado na parte kan hawak na may binilyon na elemento na pinaghahalean nin mga senyal na mga sanggatos sagkod dos sientos o tres sientos kada segundo. Mas dakol an elemento sa sarong hotok nin tawo kisa sa tawo digdi sa daga. Kinakarkulo nin nagkapirang parasiyasat na iyan may poon sa 20 bilyones sagkod sa labi sa 50 bilyones na elemento. An pagkakomplikado kaiyan nagpapatunay sa isinabi kan parasurat sa Biblia na si David manongod sa hawak nin tawo: “Ika oomawon ko huli ta sa makangingirhat na paagi ako makangangalas na ginibo. Makangangalas an saimong mga gibo.”​—Salmo 139:14.

An Kinaban nin mga Pangatorogan

Sa mga oras na kita mata, an lima niatong sentido daing ontok na nagtatao sa hotok nin impormasyon asin porma nin mga bagay, alagad bakong arog kaini durante nin pagtorog. An hotok nagpapaluwas nin mga porma nin mga bagay sa laog nia mismo na mayong ano man na panluwas na tabang kan mga sentido. Kun siring, an naheheling niato sa mga pangatorogan asin an mga aksion na naeeksperyensiahan niato dian kun beses garo mga imahinasyon. Pinapangyayari kita kaini na gumibo nin mga bagay na paglapas sa natural na mga ley, arog baga kan paglayog kapareho kan aki sa estoryang si Peter Pan o pagkaholog hale sa kantil na dai naaano. Tibaad mawara sa normal na kamugtakan an panahon kaya an nakaagi garo presente. O kun naghihingoa kitang dumulag, garo baga dai niato makontrol an satong hiro​—habong humiro an satong mga tabay. Siempre, an mapuersang mga impresyon asin eksperyensia niato sa mga oras na kita mata puedeng makaapektar sa satong mga pangatorogan. An dakol na nakaeksperyensia kan grabe kamakatatakot na mga kabikoan nin guerra dai basta na sana nalilingawan iyan, ni kaya man na lingawan nin iba an pagmate na sinda sinasalakay nin sarong kriminal. An siring na nakariribok sa isip na mga eksperyensia mantang kita mata puedeng lumuwas sa satong mga pangatorogan, na ginigikanan nin mga pangum-um. An ordinaryong mga bagay na nasa satong isip kun kita minatorog puedeng lumataw sa satong mga pangatorogan.

Kun beses kun naghihingoa kitang resolberan an sarong problema, an solusyon minasabong sa isip niato mantang natotorog. Ini puedeng magparisa na bakong gabos na nangyayari sa pagtorog pangatorogan. An sarong kabtang kaiyan pag-isip-isip.

An sarong libro manongod sa mga pangatorogan asin sa satong hotok nagsasabi: “An pinakakomun na porma nin mental na aktibidad sa pagtorog bakong pangatorogan kundi pag-isip-isip. An pag-isip-isip mantang natotorog daing kaibang imahinasyon hale sa mga sentido asin bakong pambihira. Iyan may tendensiang magin ordinaryo sana, na parateng manongod sa mga pangyayari sa tunay na buhay kasuodma o sa aga, asin parateng daing kabuhaybuhay, daing kaimaimahinasyon, asin paorootro.”

An iba naghohona na an mga tema kan saindang mga pangatorogan may espesyal na mga mensahe para sa sainda. Tangani na ikapainterpretar an mga pangatorogan, permi sindang may suratan sa kataed kan saindang katre tangani na ikasurat ninda iyan pagmata ninda. Mapadapit sa pakinabang sa mga libro na nagpoprobar na tawan nin kahulogan an mga simbolo sa pangatorogan, an The Dream Game, ni Ann Faraday, nagsasabi: “An mga libro sa pangatorogan na dian hehelingon mo an mga kahulogan nin mga tema asin simbolo sa pangatorogan parehong daing pakinabang, baga man iyan tradisyonal o basado sa sarong modernong sikolohikong teoriya.”

Mantang minalataw na an mga pangatorogan sa pangenot gikan sa laog kan hotok, bakong rasonable na isipon na iyan may espesyal na mga mensahe sa sato. Maninigo na ibilang niato iyan na normal na pagpunsionar kan hotok na nakatatabang na mapagdanay iyan sa marahay na kamugtakan.

Alagad kumusta man an mga nagsasabi na napangatorogan ninda an pagkagadan nin sarong paryente o katood asin naaraman ninda kan sumunod na aldaw na an tawo nagadan? Bako daw na ipinaririsa kaiyan na ikinahuhula nin mga pangatorogan an ngapit? Sa minasunod na artikulo, pag-oolayan niato kun ano an nasa likod nin makahulang mga pangatorogan.