Bareta kan mga Parabalangibog kan Kahadean
An mga Katotoohan sa Biblia Padagos na Ihinuhulit sa Irlandia
SA DAI pa sana nahahaloy na mga taon an magayon an tanawon na nasyon nin Irlandia nagin pinangyarihan nin darudakulang kariribokan. Kadungan kaiyan, an mga Irlandes naghimate sa mensahe nin paglaom kan Biblia na dinadara sa sainda kan Mga Saksi ni Jehova. An minasunod na mga eksperyensia hale sa Irlandia nagpapatunay kaini.
◼ Sa Dublin an saro sa Mga Saksi ni Jehova asin an saiyang aking daragita nakikikabtang sa paghuhulit sa harong-harong. Nanompongan ninda an sarong babae na an ngaran Cathy na sibot-sibot sa saiyang dakol na aki. Naghapot an Saksi kun puede na an saiyang aking daragita, na nag-aadal na maghulit, maghiras sa saiya nin halipot sanang mensahe. Uminoyon si Cathy, asin an daragita nagtao nin malinaw, inandam na marhay na pag-atubang. Napangalas si Cathy sa risang sinseridad asin pagkamagalang kan daragita, asin saiyang inako an alok na pulyeto sa Biblia.
Kan huri pinaghorophorop ni Cathy an marahay na pag-andam asin ugale kan bisita niang daragita. “Napahanga ako na an sarong daragita puedeng makahiras nin siring kainteresanteng mensahe na dai nag-aapod nin atension sa saiyang sadiri,” an sabi nia. “Nagdesisyon ako na sa sunod na pagsongko kan Mga Saksi ni Jehova, maghihinanyog ako sa sainda.”
Mientras tanto buminalyo si Cathy sa sarong sadit na banwaan sa timog-sirangan na Irlandia harani sa linderos kan distrito nin Cork asin Kerry. Paghaloyhaloy an Mga Saksi ni Jehova nagsongko sa saiya, asin pinadagos nia sinda. Nag-ako sia nin regular na pag-adal sa Biblia asin nag-aatender na ngonyan sa mga pagtiripon kan kongregasyon kaiba an nagkapira sa saiyang mga aki. Nagpapasalamat si Cathy sa tunay na kamawotan kan daragita na ihiras sa saiya an maogmang bareta.
◼ Sa lugar nin Tullamore, an mga Saksi nagkaigwa na nin mga pakipag-olay sa Biblia sa sarong babae na an ngaran Jean sa laog nin pitong taon. Kun beses nagpapaheling sia nin interes asin nag-aako nin babasahon, alagad sa ibang mga panahon nagluluya an saiyang interes. Sarong aldaw, kan an sarong Saksi na an ngaran Frances asin sarong kaiba magsongko ki Jean, inabotan ninda sia na maraot na marhay an timplada kan payo. “Ano man an sabihon mi,” an bareta kan Saksi, “orog siang nauuyam. Sa katapustapusi, sinabihan nia kaming humale asin pinalagapak an pinto.”
Pinag-isip-isip ni Frances kun baga pareho man sana an magigin reaksion sa padagos pang mga pagsongko. ‘Seguro mayo nang pakinabang na sumongko sa saiya kun talagang bako siang interesado sa mensahe,’ an inisip ni Frances. Minsan siring, ipinakipag-olay nia an bagay sa saiyang agom, si Thomas, asin mas naglalaom ini. Kan sunod na pagduman ninda sa lugar, sinongko liwat si Jean. Makikatood sia asin nag-ako nin mga kopya kan magasin na An Torrengbantayan asin Awake! Siring kaiyan karahay an sunod na mga pagsongko, asin pinonan ni Thomas asin Frances an pakipag-adal sa saiya sa Biblia sa harong.
Taano ta nagbago? Nagpaliwanag si Jean na kan panahon na maraoton an ugale nia sa mga Saksi, bago pa sana siang mangaki asin nagluwas pa sana sa ospital. Huli sa pagpasuso sa saiyang bagong mamundag asin pagpakakan sa mas matua niang omboy, saro may kabangang oras sana siang nakakatorog kun banggi. “An ultimong bagay na gusto kong gibohon,” sabi ni Jean, “makipag-olay manongod sa relihion.”
Mayo pang duwang bulan si Jean nag-aatender na sa gabos na pagtiripon kan kongregasyon, asin mayo pang apat na bulan nakikikabtang na sia sa ministeryo sa langtad. Sampulong bulan poon kan sia magpoon sa saiyang pag-adal sa Biblia, nabautismohan sia. Ngonyan an eksperyensia mismo ni Jean nakatatabang sa saiya sa ministeryo. Nagsasaysay sia: “Kun may nanonompongan akong maraoton an ugale, hinihingoa kong magin mas mapagsabot. Permi kong isinusurat iyan. Seguro magigin iba na an situwasyon pagbalik ko; an tawo tibaad mas marahay na an pagmate asin mas maghihimate na.”