An Gabos Magpamuraway Logod ki Jehova!

“Sa rehion nin liwanag sinda dapat na magpamuraway ki Jehova.”​—ISAIAS 24:15.

1. Ano an pagheling sa ngaran ni Jehova kan saiyang mga propeta, na kabaliktaran kan anong aktitud sa Kakristianohan ngonyan?

JEHOVA​—an bantog na ngaran nin Dios! Kanigoan an kagayagayahan kan fiel na mga propeta kan suanoy na magtaram sa ngaran na iyan! May labi-labing kagayagayahan pinamuraway ninda an saindang Soberanong Kagurangnan, si Jehova, na an ngaran nagpapamidbid sa saiya bilang an Dakulang Paramukna. (Isaias 40:​5; Jeremias 10:​6, 10; Ezequiel 36:23) Minsan an inaapod na mas sadit na mga propeta matinaram na marhay sa pagpamuraway ki Jehova. An saro digdi iyo si Haggeo. Sa librong Haggeo, na kompuesto nin 38 sanang bersikulo, an ngaran nin Dios ginamit nin 35 beses. An hulang iyan garo daing kabuhaybuhay kun an mahalagang marhay na ngaran na Jehova sinasalidahan kan titulong “Kagurangnan,” arog kan pagkatradusir dian kan labi-labi karahay na mga apostol nin Kakristianohan sa saindang mga traduksion kan Biblia.​—Ikomparar an 2 Corinto 11:5.

2, 3. (a) Paano naotob an sarong pambihirang hula mapadapit sa pagbabalik kan Israel? (b) Sa anong kagayagayahan nakikabtang an Judiong natatada asin an saindang kairiba?

² Sa Isaias 12:​2, ginagamit an duwang porma kan ngaran.a An propeta nagsasabi: “Uya! an Dios iyo an sakong kaligtasan. Magtitiwala ako asin dai ako matatakot; huli ta si Jah Jehova iyo an sakong kakosogan asin an sakong poder, asin sia an nagin sakong kaligtasan.” (Helingon man an Isaias 26:4.) Sa siring, mga 200 na taon bago makalda an Israel sa pagkabihag sa Babilonya, si Jah Jehova nagtatao na nin pagpasarig sa boot paagi sa saiyang propetang si Isaias na sia an saindang makakamhan na Paraligtas. An pagkabihag na iyan malawig poon 607 sagkod 537 B.C.E. Si Isaias nagsurat man: “Ako, si Jehova, an naggigibo kan gabos na bagay, . . . an Saro na nagsasabi dapit ki Ciro, ‘Sia an sakong pastor, asin an gabos na sakong ikinaoogma saiyang lubos na ootobon’; minsan sa sakuyang pagsabi manongod sa Jerusalem, ‘Hihirahayon sia,’ asin manongod sa templo, ‘Itotogdok an saimong pundasyon.’” Siisay ining si Ciro? Pambihira nanggad, sia napatunayan na iyo si Hadeng Ciro nin Persia, na duminaog sa Babilonya kan 539 B.C.E.​—Isaias 44:​24, 28.

³ Bilang kaotoban kan mga tataramon ni Jehova na isinurat ni Isaias, si Ciro nagtao sa bihag na Israel kan dekreto: “An siisay man sa saindo na kabtang kan saiyang bilog na banwaan, ibahan logod sia kan saiyang Dios. Kaya tumukad sia sa Jerusalem, na yaon sa Juda, asin itogdok liwat an harong ni Jehova na Dios nin Israel​—sia iyo an tunay na Dios—​na idtoon sa Jerusalem.” An ogmahon na Judiong natatada kaiba an bakong Israelitang mga Netineo asin an mga aki kan mga oripon ni Salomon nagbuelta sa Jerusalem. Sinda nag-abot nin tamang-tama tanganing selebraron an Kapiestahan nin mga Payag-Payag kan 537 B.C.E. saka mag-atang ki Jehova sa saiyang altar. Kan sumunod na taon, sa ikaduwang bulan, ibinugtak ninda an pundasyon kan ikaduwang templo, sa tahaw nin makosog na mga kurahaw nin kagayagayahan asin pag-omaw ki Jehova.​—Esdras 1:​1-4; 2:​1, 2, 43, 55; 3:​1-6, 8, 10-13.

4. Paano nagin totoo an Isaias kapitulo 35 asin 55?

⁴ An hula ni Jehova manongod sa pagbabalik mamuraway na maootob sa Israel: “An kaawagan asin an alang na lugar magpapakagayagaya, saka an desierto maggagayagaya asin mamumurak arog kan azafran. . . . Igwa nin mga makaheheling kan kamurawayan ni Jehova, kan kagayonan kan satong Dios.” “May paggayagaya kamo maruluwas, asin kamo ibabalik na may katoninongan. An mismong kabukidan asin mga bolod mag-oogma sa atubangan nindo na may magayagayang kurahaw . . . Asin iyan magigin bagay na kabantogan para ki Jehova, sarong tanda sagkod sa panahon na daing katapusan na dai mapapara.”​—Isaias 35:​1, 2; 55:​12, 13.

5. Taano ta temporaryo sana an kagayagayahan kan Israel?

⁵ Minsan siring, temporaryo sana an kagayagayahan na idto. An kataraed na banwaan gustong magkaigwa nin alyansang pag-iribaiba nin relihion para sa pagtogdok kan templo. Kan primero nanindogan an mga Judio, na sinasabi: “Mayo kamo nin labot sa samo sa pagtogdok nin harong para sa samong Dios, huli ta kami sana an matogdok para ki Jehova na Dios nin Israel, arog kan ipinagboot sa samo ni Hadeng Ciro na hade nin Persia.” An kataraed na idto nagin ngonyan anggot na marhay na mga parakontra. Sinda “daing ontok na pinaluluya an kamot kan mga taga-Juda asin pinaluluya an saindang boot sa pagtogdok.” Pinagmisrepresentar man ninda an situwasyon sa kasalihid ni Ciro, si Artajerjes, na nagpaluwas nin pagprohibir sa pagtogdok kan templo. (Esdras 4:​1-24) Sa laog nin 17 taon napondo an gibohon. Makamomondo, an mga Judio nagin materyalistiko an pamumuhay sa panahon na iyan.

Nagtaram si “Jehova nin mga Hukbo”

6. (a) Ano an nagin reaksion ni Jehova sa situwasyon sa Israel? (b) Taano ta tamang-tama an minalataw na kahulogan kan ngaran ni Haggeo?

⁶ Dawa siring, ipinaheling ni Jehova ‘an saiyang kakosogan asin an saiyang poder’ para sa Israel paagi sa pagsugo nin mga propeta, nangorogna si Haggeo asin Zacarias, tanganing pukawon an mga Judio sa saindang mga paninimbagan. An ngaran ni Haggeo may koneksion sa kapiestahan, huli ta iyan minalataw na nangangahulogan “Namundag sa Kapiestahan.” Tamang-tama, nagpoon siang maghula sa enot na aldaw kan bulan kan Kapiestahan nin mga Payag-Payag, na sa panahon na iyan an mga Judio obligadong “magin daing iba kundi magayagaya.” (Deuteronomio 16:15) Paagi ki Haggeo, nagtao si Jehova nin apat na mensahe sa laog nin 112 aldaw.​—Haggeo 1:​1; 2:​1, 10, 20.

7. Paano maninigong makaparigon sa satong boot an pambukas na mga tataramon ni Haggeo?

⁷ Sa pag-introdusir kan saiyang hula, si Haggeo nagsabi: “Iyo ini an isinabi ni Jehova nin mga hukbo.” (Haggeo 1:2a) Sairisay daw an “mga hukbong” idto? Sinda an kadakoldakol na anghel ni Jehova, na kun beses inaapod sa Biblia na mga puersa militar. (Job 1:​6; 2:​1; Salmo 103:​20, 21; Mateo 26:53) Dai daw nakaparirigon sa boot niato ngonyan na an Soberanong Kagurangnan na si Jehova mismo ginagamit an daing kadaogan na mga hukbong ini sa langit na magdirehir sa gibohon niato na pagbabalik kan tunay na pagsamba digdi sa daga?​—Ikomparar an 2 Hade 6:​15-17.

8. Anong punto-de-vista an nakaapektar sa Israel, asin may anong resulta?

⁸ Ano an laog kan enot na mensahe ni Haggeo? Sinabi kan banwaan: “Dai pa nag-abot an panahon, an panahon kan harong ni Jehova, tangani na iyan itogdok.” An pagtogdok kan templo, na nagrerepresentar sa pagbabalik kan pagsamba sa Dios, bako nang iyo an pangenot nindang interes. An ginigibo na ninda ngonyan pagtogdok nin garo palasyong mga harong para sa sainda man sana. An materyalistikong punto-de-vista nagpaluya sa saindang entusiasmo para sa pagsamba ki Jehova. Bilang resulta, hinale an saiyang bendisyon. Bako nang mabunga an saindang kaomahan, asin kulang sinda nin gubing para sa masakit na panahon nin tiglipot. Duminikit an entrada ninda, asin an nangyayari garo naglalaog sinda nin kuarta sa supot na pano nin labot.​—Haggeo 1:​2b-6.

9. Anong mapuersa, nakaparirigon na konseho an itinao ni Jehova?

⁹ Duwang beses, itinao ni Jehova an mapuersang konseho: “Isapuso nindo an saindong mga dalan.” Malinaw na si Zorobabel, an gobernador sa Jerusalem, asin an halangkaw na saserdoteng si Josueb naghimate asin mapusong pinarigon an boot kan bilog na banwaan “na maghinanyog sa tingog ni Jehova na saindang Dios, asin sa mga tataramon ni Haggeo na propeta, ta sia isinugo ni Jehova na saindang Dios; asin an banwaan nagpoon na matakot huli ki Jehova.” Dugang pa, “si Haggeo na mensahero ni Jehova nagsabi sa banwaan sono sa pagkasugo ni Jehova sa mensahero, na sinasabi: ‘“Ako nasa kaibanan nindo,” an sabi ni Jehova.’”​—Haggeo 1:​5, 7-14.

10. Paano ginamit ni Jehova an saiyang kapangyarihan para sa Israel?

¹⁰ An ibang gurang na sa Jerusalem tibaad naghona na an kamurawayan kan templong itinogdok liwat magigin “daing halaga” kun ikokomparar sa kamurawayan kan naenot na templo. Minsan siring, pakalihis nin mga 51 aldaw, si Haggeo pinahiro ni Jehova na magpahayag nin ikaduwang mensahe. Ibinalangibog nia: “‘Magmakosog ka, O Zorobabel,’ an sabi ni Jehova, ‘asin magmakosog ka, O Josue na aking lalaki ni Josadac na halangkaw na saserdote. Asin magmakosog kamo, kamong bilog na banwaan sa daga,’ an sabi ni Jehova, ‘asin paggibo kamo. Huli ta ako nasa kaibanan nindo,’ sabi ni Jehova nin mga hukbo. . . . ‘Dai kamo matakot.’” Si Jehova, na pag-abot nin panahon gagamiton an saiyang kapangyarihan na makakamhan sa gabos sa ‘pagyugyug sa langit asin daga,’ sinierto na mapangganahan an gabos na oposisyon, pati an pagprohibir kan emperador. Sa laog nin limang taon an pagtogdok kan templo mapangganang natapos.​—Haggeo 2:​3-6.

11. Paano pinano nin Dios nin ‘orog na kamurawayan’ an ikaduwang templo?

¹¹ Naotob kaidto an sarong pambihirang panuga: “‘An kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini,’ an sabi ni Jehova nin mga hukbo.” (Haggeo 2:7) An “kawiliwiling mga bagay” na idto mga bakong Israelita na suminamba sa templong idto, mantang ipinababanaag kaiyan an kamurawayan kan saiyang presensiang may dignidad. Ano an komparasyon kan itinogdok liwat na templong ini sa itinogdok kaidtong kaaldawan ni Salomon? Nagsabi an propeta nin Dios: “‘An kamurawayan kan nahuring harong na ini magigin orog kisa kan sa naenot,’ an sabi ni Jehova nin mga hukbo.” (Haggeo 2:9) Sa enot na kaotoban kan hula, an templong itinogdok liwat mas haloy an idinanay kisa sa enot na harong. Yaon pa iyan kan lumataw an Mesiyas kan 29 C.E. Dugang pa, bago sia ipagadan kan saiyang apostatang mga enemigo kan 33 C.E., an Mesiyas mismo nagdara dian nin kamurawayan kan sia maghulit dian nin katotoohan.

12. Anong katuyohan an naotob kan enot na duwang templo?

¹² An enot asin ikaduwang templo sa Jerusalem nakaotob sa sarong mahalagang marhay na katuyohan sa pagserbing anino nin mahahalagang nagpapamidbid na kabtang kan paglilingkod kan Mesiyas bilang saserdote asin sa pagpapadanay na buhay sa daga kan dalisay na pagsamba ki Jehova sagkod kan aktuwal na paglataw kan Mesiyas.​—Hebreo 10:1.

An Mamuraway na Espirituwal na Templo

13. (a) Ano an mga nangyari mapadapit sa espirituwal na templo poon kan 29 sagkod 33 C.E.? (b) Ano an nagin mahalagang marhay na kabtang kan pantubos na atang ni Jesus sa mga pangyayaring ini?

¹³ Igwa daw nin espesyal na kahulogan para sa mas huring mga panahon an hula ni Haggeo manongod sa pagbabalik? Iyo nanggad! An itinogdok liwat na templo sa Jerusalem nagin an sentro kan gabos na tunay na pagsamba digdi sa daga. Alagad ta ipinanganino kaiyan an mas mamuraway na espirituwal na templo. Ini nagpoon na magpunsionar kan 29 C.E. kaidtong, kan bautismohan si Jesus sa Salog nin Jordan, si Jesus linahidan ni Jehova bilang Halangkaw na Saserdote, na naghilig sa saiya siring sa sarong salampati an banal na espiritu. (Mateo 3:16) Kan matapos na ni Jesus an saiyang ministeryo digdi sa daga paagi sa pagkagadan bilang atang, sia binuhay liwat pasiring sa langit, na ilinadawan kan Kabanalbanale kan templo, asin duman iprinesentar nia ki Jehova an merito kan saiyang atang. Ini nagserbing pantubos, na tinatahoban an mga kasalan kan saiyang mga disipulo, asin binukasan an dalan na lahidan sinda, kan aldaw nin Pentecostes 33 C.E., bilang katabang na mga saserdote sa espirituwal na templo ni Jehova. An saindang fiel na ministeryo sagkod sa kagadanan sa patyo kan templo digdi sa daga magiya pasiring sa langitnon na pagkabuhay liwat sa ngapit, para sa padagos na paglilingkod bilang saserdote.

14. (a) Nagkaigwa nin anong kagayagayahan an maigot na aktibidad kan enot na Kristianong kongregasyon? (b) Taano ta temporaryo sana an paggayagayang ini?

¹⁴ An rinibong nagsosolsol na Judio​—asin kan huri Hentil—​nagburunyog sa Kristianong kongregasyon na iyan asin nakikabtang sa pagpahayag kan maogmang bareta kan maabot na pamamahala kan Kahadean nin Dios sa bilog na daga. Pakalihis nin mga 30 taon, nasabi ni apostol Pablo na an maogmang bareta ikinahulit na “sa gabos na linalang sa sirong nin langit.” (Colosas 1:23) Alagad pagkagadan kan mga apostol, naestablisar an lakop na apostasiya, asin nagpoon na magpirawpitaw an liwanag nin katotoohan. An tunay na Kristianismo natahoban kan sektaryanismo nin Kakristianohan, na basado sa paganong mga katokdoan asin pilosopiya.​—Gibo 20:​29, 30.

15, 16. (a) Paano naotob an hula kan 1914? (b) Nagkaigwa nin anong pagtitipon kan paghinanapos kan ika-19 asin kapinonan kan ika-20 mga siglo?

¹⁵ Uminagi an mga siglo. Dangan kan mga taon nin 1870, an sarong grupo nin sinserong mga Kristiano nagpoon na adalan an Biblia na may pakarorop. Gikan sa Kasuratan, naaraman ninda nin eksakto na an taon 1914 nagsesenyalar kan pagtatapos kan “itinalaan na mga panahon kan mga nasyon.” Kan panahon na idto na natapos an pitong simbolikong “panahon” (2,520 taon nin garo sa hayop na pamamahala nin tawo) paagi sa langitnon na pagpatukaw sa trono ki Cristo Jesus​—an Saro na igwa kan “legal na katanosan” bilang an Mesiyanikong Hade kan daga. (Lucas 21:​24; Daniel 4:​25; Ezequiel 21:​26, 27) Partikularmente poon kan 1919 padagos, ining Mga Estudyante sa Biblia, na ngonyan midbid bilang Mga Saksi ni Jehova, naggigibo nin entusiastikong pagpalakop sa bilog na daga kan maogmang bareta kan madatong na Kahadean. Kan 1919 na an pira sanang ribo kan mga ini suminimbag sa pangapodan para sa paghiro na ginibo sa kombension sa Cedar Point, Ohio, E.U.A. Sinda duminakol sagkod kan taon 1935 kan 56,153 an nagreport nin paglilingkod sa langtad. Kan taon na iyan, 52,465 an nakikabtang sa mga emblemang tinapay asin arak sa taonan na Memorial kan kagadanan ni Jesus, sa siring sinisimbolisaran an saindang paglaom na magin mga saserdote kaiba ni Cristo Jesus sa langitnon na kabtang kan dakulang espirituwal na templo ni Jehova. Maglilingkod man sinda kaiba nia bilang asosyadong mga hade sa saiyang Mesiyanikong Kahadean.​—Lucas 22:​29, 30; Roma 8:​15-​17.

¹⁶ Minsan siring, ipinaheheling kan Kapahayagan 7:​4-8 asin 14:​1-4 na an total na kabilangan kan linahidan na mga Kristianong ini limitado sana sa 144,000, na an kadaklan natipon durante kan enot na siglo bago naestablisar an lakop na apostasiya. Poon sa katapusan kan ika-19 siglo asin padagos sa ika-20, kinokompleto na ni Jehova an pagtipon sa grupong ini na nalilinigan kan tubig kan saiyang Tataramon, ipinahahayag na matanos paagi sa pagtubod sa nakatutubos na atang ni Jesus, asin sa katapustapusi tinatatakan bilang linahidan na mga Kristiano tangani na kumompuesto kan kompletong kabilangan na 144,000.

17. (a) Anong pagtitipon an nangyayari poon kan mga taon nin 1930? (b) Taano ta interesante digdi an Juan 3:30? (Helingon man an Lucas 7:28.)

¹⁷ Ano an masunod kun napili na an gabos na linahidan? Kan 1935, sa sarong dai malilingawan na kombension sa Washington, D.C., E.U.A., ipinaisi na an “dakulang kadaklan” kan Kapahayagan 7:​9-​17 sarong grupo na mamimidbid “kasunod” kan 144,000 asin an kaaabtan buhay na daing katapusan sa sarong paraisong daga. Pakatapos na malinaw na ikapamidbid an linahidan na si Jesus, si Juan na Bautisador, na an pagkabuhay liwat magigin digdi sa daga bilang saro sa “ibang karnero,” nagsabi manongod sa Mesiyas: “An sarong iyan kaipuhan na magdakol, alagad ako kaipuhan na mag-ina.” (Juan 1:​29; 3:​30; 10:16; Mateo 11:​11) Natatapos na kaidto an gibohon ni Juan na Bautisador na pag-andam nin mga disipulo para sa Mesiyas mantang si Jesus na an nagpipili nin padakol nang padakol na makakabilang sa 144,000. Kan mga taon nin 1930 kabaliktaran an nangyari. Mas kadikit an “inapod asin pinili” na makabilang sa 144,000 mantang nagpoon an pambihirang pagdakol kan “dakulang kadaklan” nin “ibang karnero.” An dakulang kadaklan na ini padagos na nagdadakol mantang an maraot na palakaw kan kinaban nagdadangadang sa katapusan kaiyan sa Armagedon.​—Kapahayagan 17:​14b.

18. (a) Taano ta may kompiansa na kita makalalaom na “an minilyon na nabubuhay ngonyan dai na noarin man magagadan”? (b) Taano ta maninigo na maigot niatong himateon an Haggeo 2:4?

¹⁸ Kan enot na mga taon nin 1920, an sarong tampok na pampublikong pahayag na itinao kan Mga Saksi ni Jehova may titulong “An Minilyon na Nabubuhay Ngonyan Dai Na Noarin Man Magagadan.” Ini tibaad nagparisa nin sobrang paglaom sa marahay na ibubunga kan panahon na idto. Alagad ngonyan an deklarasyon na iyan ikasasabi na may bilog na kompiansa. An nag-oorog na liwanag sa hula kan Biblia asin an anarkiya kan naghihigagdan na kinaban na ini kapwa nagpaparisang marhay na an katapusan kan palakaw ni Satanas haranihon na! Ipinaheheling kan report sa Memorial para sa 1996 na 12,921,933 an nag-atender, na 8,757 sana (.068 porsiento) an nagparisa kan saindang langitnon na paglaom paagi sa pakikakabtang sa mga emblema. An pagbabalik kan tunay na pagsamba madali nang matapos. Alagad ta dai kita noarin man manluya sa gibohon na iyan. Iyo, an Haggeo 2:​4 nagsasabi: “‘Magmakosog kamo, kamong bilog na banwaan sa daga,’ an sabi ni Jehova, ‘asin paggibo kamo. Huli ta ako nasa kaibanan nindo,’ sabi ni Jehova nin mga hukbo.” Kita logod magin determinado na mayo nin gira nin materyalismo o pagkakinabanon na noarin man makapaluluya sa satong kaigotan para sa gibohon ni Jehova!​—1 Juan 2:​15-17.

19. Paano kita makapakikikabtang sa kaotoban kan Haggeo 2:​6, 7?

¹⁹ Magayagaya an pribilehio niato na makikabtang sa kaotoban sa presenteng aldaw kan Haggeo 2:​6, 7: “Iyo ini an isinabi ni Jehova nin mga hukbo, ‘Alagad ta sarong beses​—iyan dai mahahaloy—​asin yuyugyugon ko an kalangitan asin an daga asin an dagat patin an marang daga. Asin yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini,’ an sabi ni Jehova nin mga hukbo.” An kahanaban, karatan, asin pagkaongis lakop sa bilog na kinaban na ini sa ika-20 siglo. Iyan tunay na nasa huring mga aldaw na kaiyan, asin pinonan na ni Jehova na ‘yugyugon’ iyan paagi sa pagsugo sa saiyang mga Saksi na ‘ibalangibog an saiyang aldaw nin pamalos.’ (Isaias 61:2) An maeenot na pagyugyug na ini makaaabot sa kulminasyon paagi sa paglaglag sa kinaban sa Armagedon, alagad bago kan panahon na iyan, tinitipon ni Jehova tanganing maglingkod sa saiya “an kawiliwiling mga bagay kan gabos na nasyon”​—an mahoyo, arog-karnerong mga tawo sa daga. (Juan 6:44) An “dakulang kadaklan” na ini ‘nagtatao nin sagradong paglilingkod’ ngonyan sa daganon na patyo kan saiyang harong nin pagsamba.​—Kapahayagan 7:​9, 15.

20. Saen manonompongan an pinakamahalagang marhay na kayamanan?

²⁰ An paglilingkod sa espirituwal na templo ni Jehova nagbubunga nin pakinabang na mas mahalagang marhay kisa sa ano pa man na materyal na kayamanan. (Talinhaga 2:​1-6; 3:​13, 14; Mateo 6:​19-​21) Dugang pa, an Haggeo 2:​9 nagsasabi: “‘An kamurawayan kan nahuring harong na ini magigin orog kisa kan sa naenot,’ an sabi ni Jehova nin mga hukbo. ‘Asin sa lugar na ini matao ako nin katoninongan,’ an sabi ni Jehova nin mga hukbo.” Ano daw an kahulogan kan mga tataramon na ini para sa sato ngonyan? Isasabi iyan kan kasunod na artikulo.

[Mga Nota sa Ibaba]

Mga Hapot Para sa Pagrepaso

◻ Anong halimbawa kan mga propeta an maninigo niatong arogon mapadapit sa ngaran ni Jehova?

◻ Anong pagparigon sa boot an inaako niato gikan sa mapuersang mensahe ni Jehova sa nakabalik na Israel?

◻ Anong mamuraway na espirituwal na templo an nagpupunsionar ngonyan?

◻ Anong mga pagtitipon an magkasunod na nangyari durante kan ika-19 asin ika-20 mga siglo, na may anong marahayon na tinatanaw?

[Mga retrato sa pahina 7]

An langitnon na mga hukbo ni Jehova nagdidirehir asin nagsusuportar sa saiyang mga Saksi digdi sa daga