Pagbaya sa Dakol Karibay nin Sarong Bagay na Mas Dakula

ISINAYSAY NI JULIUS OWO BELLO

Sa laog nin 32 na taon saro akong Aladura.a Nagtubod ako na an pagpaomay paagi sa pagtubod asin mga pamibi maresolber sa gabos kong problema asin mabobolong an gabos na helang. Dai ako noarin man nagbakal nin ano man na bolong, maski mga pampahale nin kolog. Durante kan mga taon na idto, mayo ni saro sa sakong pamilya na naospital kasuarin man. Kun magkahelang an siisay man sa mga aki ko, ipinamimibi ko sinda aldaw-banggi sagkod na marahay sinda. Nagtubod ako na sinisimbag nin Dios an sakong mga pamibi asin binebendisyonan ako.

KABILANG ako sa Egbe Jolly, an pinakaprominenteng sosyal klab sa Akure, sarong banwaan sa solnopan na Nigeria. An mga katood ko an pinakamayaman asin pinakamakapangyarihan na mga tawo sa samong komunidad. An Deji, an hade sa Akure, parate akong dinadalaw sa sakong harong.

Saro man akong poligamo, na may anom na agom asin dakol na sambay. Nag-asenso an sakong negosyo. Marahay an kamugtakan ko. Pero, arog kan nagbibiaheng parabariwas sa ilustrasyon ni Jesus dapit sa perlas, nanompongan ko an sarong bagay na mahalagang marhay kaya binayaan ko an lima sa mga agom ko, an sakong mga sambay, iglesia, sosyal klab, asin kinabanon na pagkaprominente karibay kaiyan.​—Mateo 13:​45, 46.

Kun Paano Ako Nagin Aladura

Enot kong nabaretaan an dapit sa mga Aladura kan 1936, kan ako 13 anyos. An sarong katood na an ngaran Gabriel nagsabi sa sako: “Kun magduman ka sa Iglesia Apostolika ni Cristo, madadangog mo an Dios na nagtataram.”

“Paano nagtataram an Dios?” an hapot ko sa saiya.

Sinabi nia: “Madia, asin maheheling mo.”

Gustong-gusto kong maghinanyog sa Dios. Kaya kan bangging idto, uminiba ako ki Gabriel pasiring sa simbahan. An sadit na edipisyo pano nin mga nagsasamba. An kongregasyon nagpoon na kumanta: “Madia, kamo! Yaon digdi si Jesus!”

Durante kan pagkantang ini, may nagkurahaw: “Humilig ka, banal na espiritu!” May saro pang nagbagting, asin an kongregasyon suminilensio. Sunod, sarong babae an nagpoon na magparasatsat nin palaen na tataramon. Bigla siang kuminurahaw: “Hinanyoga nindo an mensahe nin Dios, kamo! Ini an sinabi nin Dios: ‘Ipamibi nindo an mga paraayam tanganing dai sinda gumadan nin mga tawo!’” Nangibabaw an emosyon.

Nagtubod ako na an Dios nagtaram paagi sa saiya, kaya kan sumunod na taon binautismohan ako bilang miembro kan Iglesia Apostolika ni Cristo.

Enot na Pakanompong sa mga Saksi ni Jehova

Kan 1951, inako ko an sarong kopya kan magasin na An Torrengbantayan hale sa sarong Saksi na an ngaran Adedeji Boboye. Interesante an magasin, kaya nagsuskribe ako kaiyan asin binasa iyan nin regular. Kan 1952, nag-atender ako sa apat na aldaw na pandistritong kombension kan Mga Saksi ni Jehova sa Ado Ekiti.

Naghanga ako sa naheling ko sa kombension. Inisip-isip kong marhay an manongod sa pagigin saro sa Mga Saksi ni Jehova alagad liningawan ko an ideyang iyan. An problema ko iyo na ako may tolong agom asin sarong sambay kan panahon na idto. Inisip ko na dai ako mabubuhay na saro sana an agom.

Pagbalik ko sa Akure, sinabihan ko si Adedeji na pumondo na sa pagsongko sa sako, asin dai ko na inotro an suskripsion ko sa An Torrengbantayan. Orog na nagin aktibo ako sa sakong iglesia. Total, an rason ko, binebendisyonan ako nin Dios poon kan umayon ako sa Iglesia Apostolika ni Cristo. Tolong agom an pinakasalan ko asin dakol akong nagin aki. Nagtogdok ako nin sadiri kong harong. Dai ako noarin man naospital. Huling garo baga sinisimbag nin Dios an sakong mga pamibi, taano ta maliwat ako nin relihion?

Orog na Pagigin Prominente Kadungan nin Pagkadisganar

Nagpoon akong magdonar nin dakol na kuarta sa iglesia. Dai nahaloy ginibo ninda akong magurang sa iglesia, sarong posisyon na nagpangyari sa sako na maheling an mas nasa laog na mga ginigibo kan iglesia. Ikinaribok kan isip ko an sakong naheling. An pastor asin “mga propeta” may pagkamoot sa kuarta; nakubhanan ako sa kahanaban ninda.

Halimbawa, kan Marso 1967 nagkaigwa ako nin tolong aki sa tolong laen-laen na agom. Kaugalean sa iglesia na magkaigwa nin seremonya sa pagtao nin ngaran sa aki. Kaya nagdara ako nin mga regalo sa pastor​—sira, lemonada, asin mga soft drink na nasa bote—​bilang preparasyon para sa seremonya.

Kan aldaw kan seremonya sa simbahan, an pastor nagsabi sa atubangan kan bilog na kongregasyon: “Binigla ako kan mayayaman na tawo sa iglesiang ini. Gusto nindang magkaigwa nin seremonya sa pagtao nin ngaran, asin an dara sana ninda mga soft drink asin sira. Mayong karne! Mayong kanding! Isip-isipa nindo! Si Cain nagdolot sa Dios nin atang na darakulang ubi, pero dai inako nin Dios an atang na idto huling mayo iyan nin dugo. Gusto nin Dios nin mga bagay na may dugo. Si Abel nagdara nin hayop, asin inako an saiyang atang.”

Huli kaiyan, tuminindog ako asin anggot na luminuwas. Minsan siring, nag-aatender pa giraray ako sa simbahan. Padakol nang padakol an panahon na ginamit ko sa pakipagtipontipon asin pag-atender sa mga miting sa sakong klab. Kun beses nag-aatender ako sa mga pagtiripon sa Kingdom Hall, asin inotro ko an sakong suskripsion sa An Torrengbantayan. Minsan siring, bako pa akong andam na magin saro sa Mga Saksi ni Jehova.

An Desisyon na Maglingkod ki Jehova

An mahalagang pagkaliwat sa sako nangyari kan 1968. Sarong aldaw pinonan kong basahon an artikulo sa An Torrengbantayan na naglaladawan sa maringis na paglamag sa Mga Saksi ni Jehova sa Malawi. Isinaysay kaiyan an dapit sa sarong 15 anyos na aking babae na iginapos sa kahoy asin linugos nin anom na beses huli ta habo niang ikompromiso an saiyang pagtubod. Nakubhanan na marhay, binutasan ko an magasin, alagad padagos kong hinorophorop iyan. Narealisar ko na mayo nin aking babae sa sakong iglesia na mapaheling kan siring na klase nin pagtubod. Paghaloyhaloy kan bangging idto, kinua ko an magasin asin binasa liwat an pahinang idto.

Pinonan ko nin odok na pag-adalan an Biblia. Mantang nag-ooswag an sakong kaaraman, nagpoon na maheling ko kun gurano kami linagalag kan iglesia. Kun paanong totoo sa suanoy na mga panahon, an samong mga padi ‘mayo nin ginibo kundi malaswang gawe.’ (Oseas 6:9) An siring na mga lalaki kabilang sa falsong mga propeta na manongod dian nagpatanid si Jesus! (Mateo 24:24) Dai na ako nagtutubod sa saindang mga bisyon asin mapangyaring mga gibo. Nagdesisyon akong tumalingkas sa falsong relihion asin tabangan an iba na gibohon man iyan.

Mga Paghihingoa na Papagdanayon Ako sa Iglesia

Kan maaraman kan mga magurang sa iglesia na desidido akong bayaan an iglesia, nagpadara sinda nin sarong delegasyon tanganing pakiolayan ako. Habo nindang mawara an sarong mahalagang gikanan nin entrada. Nag-alok sinda na gibohon akong Baba Egbe, an padrino kan saro sa mga iglesia Apostolika ni Cristo sa Akure.

Sinayumahan ko sinda asin sinabi ko sa sainda kun taano. “Nagpuputik sa sato an iglesia,” an sabi ko. “Sinasabi ninda na an gabos na marahay na tawo maduman sa langit. Alagad nabasa ko an Biblia, asin kombensido ako na 144,000 katawo sana an maduman sa langit. An ibang matanos na tawo mabubuhay sa sarong paraisong daga.”​—Mateo 5:​5; Kapahayagan 14:​1, 3.

Hiningoa kan pastor na patumangon sa sako an mga agom ko. Sinabihan nia sinda na pogolan an Mga Saksi ni Jehova sa pagparaduman sa samong harong. An saro sa mga agom ko linagan nin hilo an sakong pagkakan. An duwa sa sainda pinatanidan ako manongod sa sarong bisyon na naheling ninda sa simbahan. Ipinaheling kan bisyon na magagadan ako kun bayaan ko an iglesia. Sa ibong kaiyan, padagos akong nagpatotoo sa sakong mga agom, na inaagda sindang umatender sa mga pagtiripon kaiba ko. “Makakukua kamo nin ibang agom duman,” an sabi ko. Minsan siring, mayo ni saro sa sainda na nagpaheling nin ano man na interes, asin padagos nindang hiningoa na paluyahon an boot ko.

Sa katapustapusi, kan Pebrero 2, 1970, pagpuli ko hale sa pagbiahe sa sarong kataed na banwaan, nanompongan ko na mayo nang tawo sa harong. An gabos kong agom nagralayas na kaiba an mga aki.

Pagdadanay na Kaiba nin Sarong Agom

‘Puede ko nang itanos ngonyan an kamugtakan kan sakong pag-agom,’ an naisip ko. Inagda ko an enot kong agom, si Janet, na bumalik sa harong. Uminoyon sia. Minsan siring, kontrang marhay an saiyang pamilya sa ideyang idto. Kan mabaretaan kan iba pang agom ko na pinabalik ko si Janet, nagduman sinda sa harong kan saiyang ama asin nagprobar sinda na hampakon sia. Dangan ipinaapod ako kan saiyang pamilya para sa sarong miting.

Mga 80 katawo an presente para sa miting. An amaon ni Janet, na iyo an payo kan pamilya, nagsabi: “Kun gusto mong pakasalan giraray an aki mi, kun siring kaipuhan na kuanon mo giraray an iba pang mga babae. Alagad kun gusto mong gibohon an bagong relihion mo asin makiiba sa sarong agom, kun siring humanap ka na nin ibang babae. Kun babawion mo si Janet, gagadanon sia kan iba pang agom mo, asin habo ming magadan an aki mi.”

Pakatapos nin halawig na orolay, narealisar kan pamilya na desidido ako na magkaigwa nin saro sanang agom. Sa katapustapusi nagpahunod sinda. An amaon nagsabi: “Dai mi na kukuanon sa saimo an saimong agom. Puede mo na siang iiba.”

Kan Mayo 21, 1970, kami ni Janet kinasal sa legal na paagi. Pakalihis nin 9 na aldaw binautismohan ako bilang saro sa Mga Saksi ni Jehova. Kan Disyembre kan taon man sanang idto, si Janet binautismohan man.

Pagkamit nin mga Bendisyon ni Jehova

Ihinula kan samong dating mga karelihion na kun kami magin Saksi, magagadan kami. Iyan kaidto pang haros 30 taon na an nakaagi. Dawa kun magadan ako ngonyan, iyan daw huli ta ako nagin saro sa Mga Saksi ni Jehova? Kun an sakong agom magadan ngonyan, may makapagsasabi daw na iyan huli ta sia nagin saro sa Mga Saksi ni Jehova?

Nagmaigot ako na itokdo sa sakong 17 aki an dalan kan katotoohan. Minsan ngani an kadaklan sa sainda adulto na kan panahon na ako magin Saksi, pinarigon ko an saindang boot na mag-adal sa Biblia asin iiniba ko sinda sa mga pagtiripon asin kombension. Kagayagayahan kong makaiba an lima sa sainda na maglingkod ki Jehova. An saro naglilingkod kaiba ko bilang magurang sa kongregasyon. An saro ministeryal na lingkod sa kataed na kongregasyon. An duwa sa sakong mga aki naglilingkod bilang regular payunir.

Kun nagsasalingoy ako, napapangalas ako sa dai na kutana maninigong kabootan ni Jehova sa pagtabang sa sako na magin lingkod nia. Kanigoan katotoo kan mga tataramon ni Jesus: “Dai nin nakadodolok sa sako kun dai sia dagkahon kan Ama na nagsugo sa sako”!​—Juan 6:44.

[Nota sa Ibaba]