Binutasan kan Katotoohan

SA Estados Unidos, labi sa sarong milyon katawo an nasa mga bilanggoan. Sa mga ini, haros tres mil an sinentensiahan na magadan. Imahinara na yaon kamo sa situwasyon na iyan. Ano an mamamatean nindo? Tunay na makatatakot isipon an siring na posibilidad. Pero, sa sarong sentido, an gabos na tawo nasa kaparehong kamugtakan. An Biblia nagsasabi: “An gabos nagkasala asin nagkulang sa kamurawayan nin Dios.” (Roma 3:23) Iyo, bilang mga gikan ni Adan, kita “ibinilanggo” nin makasalan na kamugtakan. (Roma 5:12) Namamatean ta aroaldaw an mga epekto nin satong pagkabilanggo, siring kan namatean kan Kristianong apostol na si Pablo, na nagsurat: “Nakaheheling ako nin laen na ley sa mga kabtang kan sakong hawak na minatumang sa ley kan sakong isip asin dinadara ako sa pagkabihag sa ley nin kasalan na yaon sa mga kabtang kan sakong hawak.”​—Roma 7:23.

Bilang resulta nin satong makasalan na naturalesa, an lambang saro sa sato garo man sana sentensiado nin kagadanan, huli ta an Biblia nagsasabi: “An ibinabayad nin kasalan kagadanan.” (Roma 6:23) Marahay an pagkaladawan sa satong situwasyon kan salmistang si Moises: “Igwa sana kami nin pitong polong taon​—walong polong taon, kun kami makosog; pero an itinatao sana kaiyan sa samo kasakitan asin kamondoan; dai nahahaloy an buhay natatapos, asin kami nawawara.”​—Salmo 90:​10, Today’s English Version; ikomparar an Santiago 4:​14.

Nasa isip an pagkaoripon sa kasalan asin kagadanan nin katawohan kaya si Jesus nagsabi sa saiyang mga parasunod: “Bubutasan kamo kan katotoohan.” (Juan 8:32) Paagi sa mga tataramon na iyan, ipinaaabot ni Jesus sa saiyang mga parasunod an paglaom sa sarong bagay na orog kadakula kisa sa katalingkasan sa pamamahala kan Roma​—itinatao nia sa sainda an kapatawadan sa kasalan asin pakabutas sa kagadanan! Paano ini itatao sa sainda? “Kun butasan kamo kan Aki,” an sabi sa sainda ni Jesus, “kamo magigin tunay na butas.” (Juan 8:36) Iyo, paagi sa pagtao kan saiyang buhay, an “Aki,” si Jesus, nagserbing pampagian nin boot na atang tanganing balukaton an iwinara ni Adan. (1 Juan 4:10) Binuksan kaini an dalan para sa gabos na makinuyog na katawohan na mabutasan sa pagkaoripon sa kasalan asin kagadanan. An bugtong na Aki nin Dios nagadan “tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.”​—Juan 3:16.

Kaya an katotoohan na makabubutas sa sato nakasentro ki Jesu-Cristo. An mga nagsunod sa saiyang gira igwa kan paglaom na makalda sa kasalan asin kagadanan kun an Kahadean nin Dios iyo na an lubos na mamahala sa mga aktibidad digdi sa daga. Minsan ngonyan, an mga inaako an katotoohan kan Tataramon nin Dios nakamamate nin tunay na katalingkasan. Sa anong mga paagi?

Katalingkasan sa Pagkatakot sa mga Gadan

Minilyon ngonyan an nabubuhay na igwa nin pagkatakot sa mga gadan. Taano? Huling tinokdoan sinda kan relihion ninda na may kalag na minaluwas sa hawak pagkagadan asin minaduman sa rona nin mga espiritu. Iyan an dahelan kun taano ta nakaugalean na sa nagkapirang kadagaan na an mga paryente kan nagadan naglalamay nin nagkapirang aldaw asin banggi. Sa parate ini may kaibang makosog na karantahan asin pagtogtog nin mga bombo. Naniniwala an mga nagmomondo na makapaoogma ini sa nagadan asin makaoolang sa pagbalik kan saiyang espiritu tanganing dalawon an mga buhay. An falsong mga katokdoan nin Kakristianohan manongod sa gadan orog sanang nagpangyari na magpadagos an tradisyon na ini.

Minsan siring, ihinahayag kan Biblia an katotoohan manongod sa kamugtakan kan mga gadan. Malinaw na sinasabi kaiyan na an saindong kalag kamo mismo, bakong misteryosong kabtang nindo na padagos na nabubuhay pagkagadan. (Genesis 2:7; Ezequiel 18:4) Dugang pa, an mga gadan dai pinasasakitan sa sarong nagkakalayong impierno, ni sinda kabtang nin sarong rona nin mga espiritu na puedeng makaapektar sa mga buhay. “Kun dapit sa mga gadan,” sabi kan Biblia, “mayo man lamang sinda nin pakaaram . . . Mayo nin gibohon ni pagplano ni kaaraman ni kadonongan sa Sheol [an lolobngan], an lugar na saimong padudumanan.”​—Eclesiastes 9:​5, 10.

An mga katotoohan na ini sa Biblia binutasan an dakol na tawo sa pagkatakot sa mga gadan. Dai na sinda nagdodolot nin makantidad na mga atang tanganing sirosiroon an saindang mga apoon, ni sinda naghahadit na an saindang mga namomotan daing herak na pinasasakitan huli sa saindang mga sala. Nanodan ninda na an Biblia nagtatao nin makangangalas na paglaom sa mga nagadan, huli ta sinasabi kaiyan sa sato na sa itinalaan na panahon nin Dios, magkakaigwa nin “pagkabuhay liwat kapwa an mga matanos asin an mga bakong matanos.” (Gibo 24:15; Juan 5:​28, 29) Sa siring, an mga gadan nagpapahingalo sana ngonyan, na garo baga nanok an torog.​—Ikomparar an Juan 11:​11-14.

An katotoohan manongod sa kamugtakan kan mga gadan asin an paglaom na pagkabuhay liwat puedeng ilikay kita sa pagkadesesperar na tibaad dara nin kagadanan. An siring na paglaom nakasustenir sa sarong mag-agom sa Estados Unidos kan magadan sa aksidente an saindang kuatro anyos na aking lalaki. “May kakulangan sa samong buhay na dai mapaninigoan sagkod na maheling mi na giraray an samong aki paagi sa pagkabuhay liwat,” an inadmitir kan saiyang ina. “Alagad aram mi na temporaryo sana an samong kakologan, huling may panuga si Jehova na papahidon an satong mga luha nin kamondoan.”​—Kapahayagan 21:​3, 4.

Katalingkasan sa Pagkatakot sa Ngapit

Ano an natatagama sa ngapit? Masosolo daw an satong daga paagi sa nuklear na pagkatunaw? An pagraot daw kan palibot kan daga magpapangyari sa satong planeta na dai na puedeng istaran? An pagbagsak daw nin moral magiya sa anarkiya asin kariribokan? An mga ini tunay na ikinatatakot nin dakol ngonyan.

Minsan siring, an Biblia nagtatao nin katalingkasan sa siring na makangingiring mga takot. Sinisierto kaiyan sa sato na “an daga magdadanay sagkod sa panahon na daing katapusan.” (Eclesiastes 1:4) An satong planeta dai linalang ni Jehova tangani sanang maheling iyan na linaglag nin iresponsableng mga tawo. (Isaias 45:18) Imbes, linalang ni Jehova an daga tanganing magserbing paraisong erokan para sa nagkakasararong pamilya nin tawo. (Genesis 1:​27, 28) Dai nagliwat an saiyang katuyohan. Sinasabi sa sato kan Biblia na an Dios ‘lalaglagon an mga naglalaglag kan daga.’ (Kapahayagan 11:18) Pakatapos kaiyan, “an mga mahoyo mismo magmamana kan daga,” sabi kan Biblia, “asin sinda nanggad magkakararanga nin labi-labi sa nagsosopay na katoninongan.”​—Salmo 37:11.

Mapagtitiwalaan an panugang ini, huli ta an Dios dai nagpuputik. Si Jehova nagsabi paagi sa saiyang propetang si Isaias: “An sakong tataramon na magluwas sa sakong ngoso . . . dai . . . mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.” (Isaias 55:11; Tito 1:2) Kun siring, kita may kompiansang makatatanaw sa enotan sa kaotoban kan panuga nin Dios na isinurat sa Biblia sa 2 Pedro 3:13: “Igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay.”

Katalingkasan sa Pagkatakot sa Tawo

An Biblia nagtatao sa sato nin marahayon na mga halimbawa nin mga lalaki asin babae na nagpaheling nin kadaihan nin takot sa saindang debosyon sa Dios. Kabale digdi sinda Gedeon, Barac, Debora, Daniel, Ester, Jeremias, Abigail, asin Jael​—sa pagsambit sana sa nagkapira. Ipinaheling kan fiel na mga lalaki asin babaeng ini an kaisipan kan salmista na nagsurat: “Sa Dios ako nagtiwala. Dai ako matatakot. Ano an magigibo sakuya nin daganon na tawo?”​—Salmo 56:11.

Kan enot na siglo, sinda apostol Pedro asin Juan nagpaheling nin kaparehong kapusoan kan pagbotan sinda nin relihiosong mga autoridad na umontok sa paghuhulit. “Kun para sa samo,” an simbag ninda, “dai kami puedeng mag-ontok sa pagtaram dapit sa mga bagay na samong naheling asin nadangog.” Bilang resulta kan saindang marigon na paninindogan, kan huri ibinilanggo si Pedro asin Juan. Pakatapos na sinda milagrosong makaluwas, buminalik sinda asin padagos na “nagtaram kan tataramon nin Dios na may kapusoan.” Dai nahaloy si Pedro asin an iba pang apostol iinatubang sa Judiong Sanhedrin. “Kami depinidong nagboot sa saindo na dai magparatokdo basado sa ngaran na ini,” an sabi sa sainda kan halangkaw na saserdote, “alagad ta, uya! pinano na nindo an Jerusalem kan saindong katokdoan.” Si Pedro asin an iba pang apostol suminimbag: “Kami kaipuhan na magkuyog sa Dios bilang namamahala kisa sa mga tawo.”​—Gibo 4:16, 17, 19, 20, 31; 5:​18-20, 27-29.

Sa saindang paghuhulit kan maogmang bareta kan Kahadean nin Dios, an Mga Saksi ni Jehova ngonyan nagmamaigot na arogon an kaigotan kan mga Kristiano kan enot na siglo. Maski an mga hoben sa tahaw ninda parateng pinatutunayan na sinda daing takot paagi sa pagtaram sa iba manongod sa saindang pagtubod. Helinga an nagkapirang halimbawa.

Si Stacie, sarong tin-edyer, natural na masosopgon. Bilang resulta, an pakikipag-olay sa iba manongod sa saiyang pagtubod kan primero sarong angat. Ano an saiyang ginibo tanganing mapangganahan an saiyang pagkamasosopgon? “Pinag-adalan ko an Biblia asin sinierto ko na nasasabotan ko an sinasabi ko,” an sabi nia. “Nagin mas pasil iyan, asin orog akong nagkaigwa nin kompiansa sa sadiri ko.” An marahay na dangog ni Stacie napabareta sa lokal na peryodiko. An artikulo, na isinurat nin sarong maestra sa saiyang eskuelahan, nagkomento: “An pagtubod [ni Stacie] iyo an garo baga nagtao sa saiya kan kosog na labanan an dakol na pangigipit na namamatean nin kadaklan na tin-edyer. . . . Namamatean nia na an paglilingkod sa Dios maninigo na magin pangenot sa saiyang isip.”

Si Tommy nagpoon na makanood manongod sa Biblia sa saiyang mga magurang kan sia singko anyos pa sana. Minsan ngani akion pa, nanindogan sia nin marigon para sa tunay na pagsamba. Mantang an saiyang hoben pang mga kaklase nagdodrowing nin mga retrato nin kapiestahan, an dinodrowing ni Tommy mga tanawon sa Paraiso na ipinanuga nin Dios. Bilang tin-edyer, narisa ni Tommy na an kadaklan sa mga estudyante nag-iisip na marhay manongod sa mga paniniwala kan Mga Saksi ni Jehova. Imbes na sumilensio huli sa takot, ihinapot nia sa saro kan saiyang mga maestro kun puede siang magkondukta nin hapot-simbagan na pakikipag-olay sa saiyang klase tanganing masimbag nia saro-saro an gabos nindang hapot. Tinogotan ini, asin sarong marahay na patotoo an ikinatao.

Kan sia 17 anyos, naheling ni Markietta an sarong ekselenteng oportunidad na makipag-olay sa ibang kaklase nia manongod sa saiyang pagtubod. “Tinawan kami nin asignasyon na gumibo nin pahayag,” an sabi nia. “Pinili ko an sakong tema hale sa librong Questions Young People Ask​—Answers That Work.a Nagkua ako nin limang kapitulo sa libro asin isinurat ko an mga titulo sa pisara. Ipinaklasipikar ko an mga ini sa klase sono sa pagkasunodsunod na pinaghohona nindang pinakamahalaga.” Suminunod an pag-orolay na may partisipasyon an klase. “Ipinaheling ko sa klase an libro,” an pagtapos ni Markietta, “asin an nagkapirang estudyante naghagad nin kopya. Pati an sakong maestra nagsabi na gusto man nia.”

Puede Kamong Butasan kan Katotoohan

Siring sa satong naheling, an katotoohan na yaon sa Biblia igwa nin nakakakaldang epekto sa gabos ano man an edad na nag-aadal kaiyan asin isinasapuso an mensahe kaiyan. Kinakalda sinda kaiyan sa pagkatakot sa mga gadan, pagkatakot sa ngapit, asin pagkatakot sa tawo. Sa katapustapusi, bubutasan kan pantubos ni Jesus an makinuyog na katawohan sa kasalan asin kagadanan. Abaa kagayagaya na mabuhay sagkod lamang sa sarong paraisong daga, na bako nang bilanggo kan satong minanang makasalan na kamugtakan!​—Salmo 37:29.

Boot daw nindong makanood nin dakol pa manongod sa mga bendisyon na ipinanuga nin Dios? Kun iyo, ano an maninigo nindong gibohon? Si Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Kaya kun boot nindong maeksperyensiahan an katalingkasan na ipinanuga ni Jesus sa saiyang mga disipulo, dapat kamong makanood manongod ki Jehova Dios asin sa saiyang Aki. Kaipuhan nindong maaraman kun ano an kabotan nin Dios dangan gibohon iyan, huli ta sinasabi kan Biblia: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”​—1 Juan 2:17.

[Nota sa Ibaba]

[Retrato sa pahina 7]

Sa irarom kan Kahadean nin Dios, sa katapustapusi an katawohan bubutasan sa kasalan asin kagadanan