“Minsan Ngani Sia dai Nindo Noarin Man Naheling, Kamo Namomoot sa Saiya”
“Minsan ngani sia dai nindo noarin man naheling, kamo namomoot sa saiya. Minsan ngani sia dai nindo pinagheheling sa presente, alagad ta kamo nagtutubod sa saiya asin naggagayagayang marhay.”—1 PEDRO 1:8.
1. Minsan ngani mayo ni saro sa ibabaw nin daga ngonyan na nakaheling ki Jesus, paano an nagkapirang relihiosong tawo nagmamaigot na ipaheling an debosyon sa saiya?
MAYO ni saro na nabubuhay ngonyan digdi sa daga na nakaheling kasuarin man ki Jesu-Cristo. Pero, minilyon na tawo an naghihingako na namomoot sa saiya. Taon-taon pag-abot nin Enero 9, sa Manila, Pilipinas, an sarong estatuwa ni Jesu-Cristo na arog kadakula nin tawo na may pasan na krus ginuguyod sa mga kalye sa inapod na pinakadakula, pinakapambihirang kapahayagan nin popular na relihion sa nasyon. An emosyonal na marhay na kadaklan nagtuturuldangan asin nagtuturuklangan; an mga tawo nagtitinurungtongan pa ngani sa abaga sa natatarantang paghihingoa na makapotan an imahen. An dakol na yaon sa pagmiron kaini sa pangenot naaakit kan garo may piestang prosisyon. Pero, an iba sa sainda daing duwa-duwa na mga tawo na sinserong naaakit ki Jesus. Bilang ebidensia kaiyan, sinda tibaad may sulot na krus o tibaad dayaday na nagsisimba. Minsan siring, ikabibilang daw na tunay na pagsamba an siring na idolatriya?
2, 3. (a) Sairisay sa mga parasunod ni Jesus an aktuwal na nakaheling asin nakadangog sa saiya? (b) Sairisay pa an iba kaidtong enot na siglo na namoot ki Jesus asin tuminubod sa saiya, minsan ngani sia noarin man dai ninda personal na naheling?
2 Kan enot na siglo, may rinibo sa Romanong mga probinsia nin Judea, Samaria, Perea, asin Galilea na personal na nakaheling asin nakadangog talaga ki Jesu-Cristo. Naghinanyog sinda mantang ipinaliliwanag nia an nakaoogmang mga katotoohan manongod sa Kahadean nin Dios. Sinda nakaheling mismo sa mga milagrong ginibo nia. An iba sa mga ini nagin saiyang debotong mga disipulo, na kombensido na sia “an Cristo, an Aki kan nabubuhay na Dios.” (Mateo 16:16) Minsan siring, dai nakabilang digdi an mga sinuratan ni apostol Pedro kan enot niang ipinasabong na surat.
3 An mga sinuratan ni Pedro yaon sa Romanong probinsia nin Ponto, Galacia, Capadocia, Asia, asin Bitinia—gabos yaon sa lugar kan Turkiya sa presenteng aldaw. Sa sainda si Pedro nagsurat: “Minsan ngani sia dai nindo noarin man naheling, kamo namomoot sa saiya. Minsan ngani sia dai nindo pinagheheling sa presente, alagad ta kamo nagtutubod sa saiya asin naggagayagayang marhay sa dai ikaladawan asin mamuraway na kagayagayahan.” (1 Pedro 1:1, 8) Paano ninda namidbid si Jesu-Cristo sagkod na mamoot sa saiya asin tumubod sa saiya?
4, 5. Paano an mga tawong idto na dai noarin man nakaheling ki Jesus nakanood nin bastante manongod sa saiya tangani na kamotan sia asin tubodon sia?
4 Minalataw na an nagkapira yaon sa Jerusalem kan si apostol Pedro magpatotoo sa kadaklan na nag-atender sa kapiestahan nin Pentecostes kan 33 C.E. Pakatapos kan kapiestahan an dakol na disipulo nagdanay sa Jerusalem tanganing umako nin dugang na pagtotokdo sa mga apostol. (Gibo 2:9, 41, 42; ikomparar an 1 Pedro 1:1.) Sa paorootrong pagbiahe sa pagmimisyonero, si apostol Pablo guminibo man nin maigot na ministeryo sa tahaw kan mga tawo na nag-iistar sa lugar na kan huri pinadarahan ni Pedro kan enot na surat sa Biblia na inapod sa ngaran nia.—Gibo 18:23; 19:10; Galacia 1:1, 2.
5 Taano an mga tawong idto, na noarin man dai nakaheling ki Jesus, ta naakit na marhay sa saiya? Sa satong kaaldawan, taano ta minilyon pa, sa bilog na globo, an namomoot na marhay sa saiya?
An mga Bagay na Saindang Nadangog
6. (a) Kun nadangog nindo si Pedro na nagpatotoo manongod ki Jesus kaidtong Pentecostes kan 33 C.E., ano an nanodan kutana nindo? (b) Ano an epekto kaini sa mga 3,000 na presente?
6 Kun yaon kamo kaidto sa Jerusalem kan si Pedro magtaram sa kadaklan na idto na nagpipiesta kan 33 C.E., ano daw an nanodan kutana nindo manongod ki Jesus? Dai nanggad mapagdududahan na an mga milagrong ginibo nia nagpaheling na sia isinugo nin Dios. Na, minsan ngani si Jesus ginadan nin makasalan na mga tawo, sia mayo na sa lolobngan kundi binuhay na liwat dangan pinamuraway sa langit sa toong kamot nin Dios. Na si Jesus man nanggad an Cristo, an Mesiyas na manongod sa saiya nagsurat an mga propeta. Na paagi ki Jesu-Cristo, ibinubo an banal na espiritu sa saiyang mga parasunod kaya sinda tolos-tolos na nakapagpatotoo sa mga tawo hale sa dakol na nasyon manongod sa kahangahangang mga bagay na ginigibo nin Dios paagi sa saiyang Aki. Napahirong marhay an puso nin dakol na nakadangog ki Pedro kan okasyon na idto, asin mga 3,000 an nagpabautismo bilang Kristianong mga disipulo. (Gibo 2:14-42) Kun yaon kamo kaidto, guminibo daw kutana kamo kan dai mapagdududahan na aksion na idto?
7. (a) Kun yaon kamo kaidto sa Antioquia kan maghulit duman si apostol Pablo, ano daw an nanodan kutana nindo? (b) Taano an nagkapira sa kadaklan ta nagturubod asin naghiras sa iba kan maogmang bareta?
7 Kun kabilang kamo sa mga presente kan si apostol Pablo magtokdo sa Antioquia sa Romanong probinsia nin Galacia, ano pa daw an nanodan kutana nindo manongod ki Jesus? Nadangog kutana nindo na ipinaliliwanag ni Pablo na an pagkondenar ki Jesus sa kagadanan kan mga namamahala sa Jerusalem ihinula kan mga propeta. Nadangog man kutana nindo an ebidensia kan pagkabuhay liwat ni Jesus gikan sa mga nakaheling mismo. Segurado na naapektaran kutana kamo kan paliwanag ni Pablo na paagi sa pagbuhay liwat ki Jesus hale sa mga gadan, pinatunayan ni Jehova na an sarong ini talagang iyo an Aki nin Dios. Asin dai daw napaogma kutana an saindong puso sa pakaaram nindo na an kapatawadan nin mga kasalan na pinapangyari kan pagtubod ki Jesus puedeng gumiya pasiring sa buhay na daing katapusan? (Gibo 13:16-41, 46, 47; Roma 1:4) Mantang namidbid an kahulogan kan saindang nadadangog, an nagkapira sa Antioquia nagin mga disipulo, na aktibong ihinihiras sa iba an maogmang bareta, minsan ngani an paggibo kaiyan nangahulogan na sinda mapaaatubang sa grabeng paglamag.—Gibo 13:42, 43, 48-52; 14:1-7, 21-23.
8. Kun yaon kamo sa pagtiripon kan kongregasyon sa Efeso kan maresibi an surat ni Pablo sa sainda, ano daw an nanodan kutana nindo?
8 Ano kun asosyado kamo sa Kristianong kongregasyon sa Efeso, sa Romanong probinsia nin Asia, kan maresibi duman an ipinasabong na surat ni Pablo sa mga disipulo? Ano daw an nanodan kutana nindo dian manongod sa kabtang ni Jesus sa katuyohan nin Dios? Sa surat na iyan ipinaliwanag ni Pablo na paagi ki Cristo an gabos na bagay sa langit asin digdi sa daga iooyon giraray sa Dios, na an balaog nin Dios paagi ki Cristo abot sa mga tawo kan gabos na nasyon, na an mga indibiduwal na gadan kaidto sa pagheling nin Dios huli sa saindang mga kalapasan binubuhay paagi sa pagtubod ki Cristo, asin na bilang resulta kan probisyon na ini, posible na naman para sa mga tawo na magin namomotan na marhay na mga aki nin Dios.—Efeso 1:1, 5-10; 2:4, 5, 11-13.
9. (a) Ano an makatatabang sa saindo na mamansayan kun baga personal nindong nasasabotan an kahulogan kan isinurat ni Pablo sa mga taga-Efeso? (b) Paano naapektaran an mga tugang sa Romanong mga probinsia na nasambitan ni Pedro kan nanonodan ninda manongod ki Jesus?
9 An pag-apresyar daw sa gabos na ini nakapararom kutana sa saindong pagkamoot sa Aki nin Dios? An pagkamoot daw na iyan nakaimpluwensia kutana sa saindong pamumuhay sa aroaldaw, arog kan iinenkaminar ni apostol Pablo sa kapitulo 4 sagkod 6 kan Efeso? An pag-apresyar daw na iyan nakapahiro kutana sa saindo na maingat na siyasaton an mga ipinaoorog nindo sa buhay? Huli sa pagkamoot sa Dios asin pagpasalamat sa saiyang Aki, guminibo daw kutana kamo nin mga pagliwat tangani na an paggibo kan kabotan nin Dios iyo an talagang pinakasentro kan saindong buhay? (Efeso 5:15-17) Mapadapit sa epekto sa mga Kristiano na yaon sa Asia, Galacia, asin iba pang Romanong probinsia kan saindang nanonodan, si apostol Pedro nagsurat sa sainda: “Minsan ngani [si Jesu-Cristo] dai nindo noarin man naheling, kamo namomoot sa saiya. . . . Kamo nagtutubod sa saiya asin naggagayagayang marhay sa dai ikaladawan asin mamuraway na kagayagayahan.”—1 Pedro 1:8.
10. (a) Ano an daing duwa-duwa na nakakontribwir sa pagkamoot ki Jesus kan enot na mga Kristiano? (b) Paano man kita makikinabang?
10 Igwa pa nin sarong bagay na daing duwa-duwa na nakakontribwir sa pagkamoot sa Aki nin Dios na namatean kan enot na mga Kristianong idto na sinuratan ni Pedro. Ano idto? Kaidtong isurat ni Pedro an enot niang surat, kisuerra duwa sa mga Ebanghelyo—an Mateo asin Lucas—nasa sirkulasyon na. An mga Kristiano kan enot na siglo na dai noarin man nakaheling ki Jesus puedeng basahon an mga Ebanghelyong idto. Kita puede man. An mga Ebanghelyo bakong mga estorya na inimbento sana; yaon dian an gabos na tanda nin pinakamasasarigan na historya. Sa ipinasabong na mga rekord na iyan, dakol kitang manonompongan na nagpapararom kan satong pagkamoot sa Aki nin Dios.
An Espiritu na Ipinaheling Nia
11, 12. Ano sa espiritu na ipinaheling ni Jesus sa ibang tawo an nagpapahiro sa saindo na kamotan sia?
11 Dian sa nasusurat na rekord kan buhay ni Jesus, nanonodan niato kun paano nia trinatar an ibang tawo. An espiritung ipinaheling nia nakapahihiro sa puso nin mga tawo minsan ngonyan, labing 1,960 taon pagkagadan nia. An gabos na nabubuhay pinagagabatan kan mga epekto nin kasalan. An minilyon biktima nin inhustisya, nasasakitan sa helang, o sa ibang dahelan nakamamate nin magabaton na pagkadesganar. Sa gabos na siring, si Jesus nagsasabi: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin mapakumbaba sa puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.
12 Si Jesus nagpaheling nin mapagrisa sa iba na pagmakolog sa mga dukha, nagugutom, asin nagmomondo. Kan hinagad nin mga kamugtakan, pinakakan pa ngani nia an darakulang kadaklan sa milagrosong paagi. (Lucas 9:12-17) Kinalda nia sinda sa mga tradisyon na nangongoripon. Pinarigon man nia an saindang pagtubod sa probisyon nin Dios na taposon an politikal asin ekonomikong pan-aapi. Dai biyong pinapanluya ni Jesus an espiritu kan mga dati nang inaapi. May pagpadangat asin pagkamoot, eksperto niang pinakarhay an kamugtakan kan mga mahoyo. Pinaginhawa nia an mga garo nalanog na gaho na nabari asin an mga garo nagbabagang mitsang lino na madali nang maparong. Sagkod sa presente, an ngaran nia nakapupukaw nin paglaom, minsan sa puso kan mga dai pa noarin man nakaheling sa saiya.—Mateo 12:15-21; 15:3-10.
13. Taano ta nakaaakit sa mga tawo an pagtratar ni Jesus sa mga parakasala?
13 Si Jesus dai oyon sa paggibo nin sala, pero nagpaheling sia nin pagsabot sa mga tawo na nakaginibo nin mga sala sa buhay alagad nagpaheling nin pagsolsol asin nagdolok sa saiya para sa tabang. (Lucas 7:36-50) Sia minatukaw sa pagkakan kaiba nin mga tawo na dinuduhagi sa komunidad kun namamatean nia na ini makatatao nin oportunidad na tabangan sinda sa espirituwal. (Mateo 9:9-13) Bilang resulta kan espiritu na saiyang ipinaheling, an minilyon na tawo na nasa kaagid na mga kamugtakan na dai pa noarin man naheling si Jesus napahiro na midbidon sia asin tumubod sa saiya.
14. Ano an nakaaakit sa saindo manongod sa paagi nin pagtabang ni Jesus sa mga tawo na maluya an salud, baldado, o nagadanan?
14 An pagtratar ni Jesus sa mga tawo na maluya an salud o baldado nagtatao nin ebidensia kan saiyang init asin pakikidamay saka kan saiyang abilidad na paginhawahon sinda. Sa siring, kan an may helang na tawo na pano nin lepra dumolok sa saiya asin makimaherak na tabangan, si Jesus dai nabalde sa naheling nia. Asin dai nia sinabihan an tawo na, minsan ngani sia naheherak sa saiya, an helang grabe nang marhay asin mayo na nin magigibong tabang. An tawo nakimaherak: “Kagurangnan, kun boot mo sana, mapalilinig mo ako.” Daing pag-alangan, inunat ni Jesus an saiyang kamot asin dinuotan an leproso, na sinasabi: “Boot ko. Luminig ka.” (Mateo 8:2, 3) Sa saro pang okasyon an sarong babae naghingoa na maomayan paagi sa daing gayo risa na pagtikwil sa kabingkabing kan saiyang gubing. Maboot asin nakapakokosog liwat sa boot an pagtratar sa saiya ni Jesus. (Lucas 8:43-48) Asin kan matuparan nia an sarong prosisyon sa gadan, napahiro sia nin pagkaherak sa nagmomondong balo na nagadanan kan solo niang aki. Minsan ngani nagsayuma si Jesus na gamiton an saiyang kapangyarihan na tao nin Dios sa milagrosong pagtagama nin pagkakan para sa saiyang sadiri, iyan suelto niang ginamit sa pagbuhay liwat kan gadan na idto asin pagpabalik kaini sa saiyang ina.—Lucas 4:2-4; 7:11-16.
15. Ano an epekto sa saindo kan pagbasa kan mga kasaysayan manongod ki Jesus asin paghorophorop dian?
15 Mantang binabasa niato an mga kasaysayan na ini asin hinohorophorop an espiritu na ipinaheling ni Jesus, minararom an satong pagkamoot para sa sarong ini na nagtao kan saiyang buhay nin tawo tangani na kita mabuhay sagkod lamang. Minsan ngani sia dai niato noarin man naheling, kita naaakit sa saiya, asin gusto niatong sumunod sa saiyang mga gira.—1 Pedro 2:21.
An Saiyang Mapakumbabang Pagsarig sa Dios
16. Kiisay isinentro ni Jesus an pangenot na atension, asin inenkaminar nia kitang gibohon an ano?
16 Orog sa gabos, isinentro ni Jesus an atension nia asin niato sa saiyang langitnon na Ama, si Jehova Dios. Isinabi nia kun ano an nakalalabi sa gabos na togon sa Ley, na sinasabi: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:36, 37) Sinadol nia an saiyang mga disipulo: “Magtubod kamo sa Dios.” (Marcos 11:22) Kan napapaatubang sa sainda an magabat na pagbalo sa saindang pagtubod, sinadol nia sinda: “Padagos na mamibi.”—Mateo 26:41.
17, 18. (a) Paano ipinaheling ni Jesus an saiyang mapakumbabang pagsarig sa saiyang Ama? (b) Taano ta mahalagang marhay para sa sato an saiyang ginibo?
17 Si Jesus mismo nagtao kan halimbawa. An pamibi mahalagang kabtang kan saiyang buhay. (Mateo 14:23; Lucas 9:28; 18:1) Kan umabot na an panahon na pipilion na nia an saiyang mga apostol, si Jesus dai sana nagsarig sa sadiri niang paghusgar, minsan ngani dati an gabos na anghel sa langit nasa irarom kan saiyang pagdirehir. Mapakumbaba na sia bilog na bangging namibi sa saiyang Ama. (Lucas 6:12, 13) Kan napapaatubang sia sa pag-arestar asin makolog na kagadanan, si Jesus nagdolok giraray sa saiyang Ama, na odok na namimibi. Dai sia nagkaigwa kan punto de vista na midbid niang marhay si Satanas asin makakaya nia nin pasil sana an ano man na ipakana kan maraot na iyan. Aram ni Jesus kun gurano kahalaga na dai sia magkulang. Magigin kanigoan na katuyawan an pagkukulang para sa saiyang Ama! Asin kanigoan na kapierdihan para sa katawohan, na an esperansa sa buhay depende sa atang na idodolot ni Jesus!
18 Si Jesus paorootrong namibi—kan kaiba kan saiyang mga apostol sa sarong kuarto sa itaas duman sa Jerusalem asin orog pa nganing sinsero sa tatamnan nin Getsemani. (Mateo 26:36-44; Juan 17:1-26; Hebreo 5:7) Kan nagsasakit sa hariging pasakitan, dai nia minuda an mga nagduduhagi sa saiya. Imbes, ipinamibi nia an mga naggigibo kaini huli sa ignoransia: “Ama, patawada sinda, huli ta dai ninda naaaraman an saindang ginigibo.” (Lucas 23:34) Isinentro nia an saiyang isip sa saiyang Ama, “na nagdolot kan saiyang sadiri sa naghohokom nin matanos.” An ultimong mga tataramon nia sa hariging pasakitan pamibi sa saiyang Ama. (1 Pedro 2:23; Lucas 23:46) Kita nagpapasalamat nanggad na, may bilog na pagsarig ki Jehova, fiel na tinapos ni Jesus an asignasyon na ipinagkatiwala sa saiya kan saiyang Ama! Minsan ngani dai niato noarin man naheling si Jesu-Cristo, kanigoan kararom kan pagkamoot niato sa saiya huli sa saiyang ginibo!
Pagpahayag kan Satong Pagkamoot Para sa Saiya
19. Sa pagpahayag nin pagkamoot ki Jesus, anong mga kaugalean an lilikayan niato bilang biyong dai maninigo?
19 Paano kita makatatao nin ebidensia na an pagkamoot na hinihingako niato bakong sa tataramon sana? Mantang an saiyang Ama, na namomotan ni Jesus, nangalad kan paggibo nin mga imahen dangan pagkonsiderar sa mga ini na dapat tawan nin debosyon, sierto na dai kita makatatao nin onra ki Jesus paagi sa pagsulot nin siring na imahen sa sarong kuintas sa satong liog o pagparopasan kaiyan sa mga tinampo. (Exodo 20:4, 5; Juan 4:24) Bakong pagtaong onra ki Jesus na kita umatender sa relihiosong mga serbisyo, na pirang beses pa ngani sa sarong semana, kun sa ibang aldaw kan semana dai kita namumuhay sono sa saiyang mga katokdoan. Si Jesus nagsabi: “An igwa kan sakong mga togon asin minaotob kaiyan, an sarong iyan iyo an namomoot sa sako. Asin an namomoot sa sako mamomotan man kan sakong Ama.”—Juan 14:21, 23; 15:10.
20. Ano an nagkapirang bagay na magpapaheling kun baga talagang namomotan niato si Jesus?
20 Anong mga togon an itinao nia sa sato? Enot, sambahon an tunay na Dios, si Jehova, asin sia sana. (Mateo 4:10; Juan 17:3) Huli sa saiyang kabtang sa katuyohan nin Dios, itinokdo man ni Jesus na kaipuhan na kita tumubod sa saiya bilang Aki nin Dios asin na kaipuhan na ipaheling niato iyan paagi sa pagrayo sa maraot na mga gibo asin paagi sa paglakaw sa liwanag. (Juan 3:16-21) Hinatolan nia kita na hanapon nguna an Kahadean nin Dios asin an saiyang katanosan, na ineenot ini sa pagkahadit manongod sa pisikal na mga pangangaipo. (Mateo 6:31-33) Ipinagboot nia na magkaminorootmootan kita arog kan pagkamoot nia sa sato. (Juan 13:34; 1 Pedro 1:22) Asin isinugo nia kita na magin mga saksi mapadapit sa katuyohan nin Dios, arog nia. (Mateo 24:14; 28:19, 20; Kapahayagan 3:14) Minsan ngani dai ninda noarin man naheling si Jesus, an mga limang milyon na Saksi ni Jehova ngonyan pinahihiro nin tunay na pagkamoot sa saiya na otobon an mga togon na iyan. An dai ninda personal na pakaheling ki Jesus dai nanggad nakapaluluya sa saindang determinasyon na magin makinuyog. Ginigirumdom ninda an sinabi kan saindang Kagurangnan ki apostol Tomas: “Huli ta naheling mo ako kaya tuminubod ka? Maogma an mga dai nakaheheling pero nagtutubod.”—Juan 20:29.
21. Paano kita nakikinabang sa pag-atender sa Memorial kan kagadanan ni Cristo, na seselebraron ngonyan na taon sa Domingo, Marso 23?
21 Linalaoman na kabilang kamo sa mga yaon sa bilog na kinaban na magtitiripon sa mga Kingdom Hall nin Mga Saksi ni Jehova pagkasolnop kan saldang sa Domingo, Marso 23, 1997, sa paggirumdom sa nakalalabi sa gabos na kapahayagan kan pagkamoot nin Dios sa katawohan asin sa pagselebrar kan kagadanan kan saiyang maimbod na Aki, si Jesu-Cristo. An sasabihon asin gigibohon sa okasyon na iyan maninigong magpararom sa pagkamoot ki Jehova asin sa saiyang Aki asin sa siring dugangan an kamawotan na otobon an mga togon nin Dios.—1 Juan 5:3.
Ano an Isisimbag Nindo?
◻ Paano an mga sinuratan kan enot na libro ni Pedro nakamidbid asin namoot ki Jesus?
◻ Ano an nagkapira sa mga bagay na nadangog nin enot na mga Kristiano na nakaaapektar sa saindo?
◻ Ano sa espiritu na ipinaheling ni Jesus an nakaparararom sa saindong pagkamoot sa saiya?
◻ Taano ta mahalagang marhay sa sato an mapakumbabang pagsarig ni Jesus sa Dios?
◻ Paano niato ikapaheheling an satong pagkamoot ki Jesu-Cristo?
[Mga retrato sa pahina 16, 17]
Naaakit kita ki Jesus huli sa espiritu na saiyang ipinaheling