Kadakoldakol na Pagsakit

“TAANO ta yaon an gabos na ining makatatakot na pagsakit nin mga indibiduwal asin grupo . . . ? An Dios kutana an dapat na personipikasyon nin gabos na katuyohan alagad ta kadakoldakol kan bagay na daing kamanungdanan sa kinaban na ini, kadakoldakol na daing kahulogan na pagsakit asin rungaw na kasalan. An Dios daw na ini tibaad arog kan isinasahot sa saiya ni Nietzsche na: hade-hadean, impostor, tikas, parakastigo?”​—On Being a Christian, ni Hans Küng.

Maheheling nindo na iinaatubang sana kan Katolikong teologo na si Hans Küng an sarong problema na ikinariribaraw nin dakol​—taano an sarong makapangyarihan sa gabos, mamomoton na Dios ta tinotogotan an kadakoldakol na pagsakit? Dai daw nindo nadadangog an mga tawo na ihinahapot iyan? An siisay man na may pakikidamay mamomondo sa ilinaladawan ni Küng na “sarong daing katapusan na sapa nin dugo, ganot asin luha, kolog, kamondoan asin takot, kapungawan asin kagadanan.” An totoo, iyan mas nakaaagid sa makosogon na sulog, sarong baha nin makuring takot asin labi-labing kamondoan na nanraot sa buhay nin minilyon sa bilog na kasaysayan.​—Job 14:1.

Pano nin “Kasakitan Asin Makolog na mga Bagay”

Isip-isipa an pagsakit na bunga nin guerra, an kolog na namatean bako sanang kan mismong mga biktima kundi pati kan mga nawalat tanganing magmondo, arog baga kan mga magurang asin paryente nin mga biktimang aki asin iba pa na ginibohan nin karingisan. “Kan nakaaging 10 taon,” an sabi kan Red Cross kasuarin pa sana, “1.5 milyon na aki an nagadan sa armadong ralaban.” Sa Rwanda kan 1994, an ibinareta kan Red Cross, “ginatos na ribong lalaki, babae asin aki an ginadan sa mabangis asin sistematikong paagi.”

Dai man niato maninigong lingawan an kolog na dara nin mga nan-aabuso nin aki sa seksuwal na paagi. An sabi nin sarong nagmomondong ina, na nagsabi na an saiyang aking lalaki naghugot pakatapos na abusohon nin sarong nagtatrabaho sa pag-ataman sa mga aki: “An lalaki na uminabuso sa sakong aki . . . ipinahamak sia asin an nagkapirang iba pang aking lalaki sa pinakasistematiko, pinakamaraot na paaging maiimahinar.” Asin kumusta man an pangumum nin kolog na namatean kan mga biktima nin daing herak na mga paragadan o mga naggigibo nin sunod-sunod na pangadan, arog kan mga nadakop sa Britania na “nankidnap, nanlugos, nagpasakit asin nangadan na dai napapadusahan sa laog nin 25 taon”? Sa bilog na kasaysayan garo baga mayo nin limitasyon an ginigibo nin mga lalaki asin babae sa kada saro paagi sa kolog asin pagsakit.​—Eclesiastes 4:​1-3.

Idagdag pa digdi an pagsakit dahelan sa emosyonal asin pisikal na mga kamatean patin an makatatakot na kolog nin kamondoan na nandadanyar sa mga pamilya kun an mga namomotan magadan na mayo pa sa panahon. Yaon man an labi-labing kamondoan na namamatean kan mga biktima nin gutom o iba pa daang natural na mga kalamidad. Pipira an makikidiskutir sa mga tataramon ni Moises na an satong 70 o 80 taon pano nin “kasakitan asin makolog na mga bagay.”​—Salmo 90:10.

Kabtang kan Disenyo nin Dios?

Puede daw na, siring sa hiningako nin nagkapira, an dai matapostapos na pagsakit na ini kabtang nin dai marorop na disenyo nin Dios? Kaipuhan daw kitang magsakit ngonyan tanganing masabotan an buhay sa ‘masunod na kinaban’? Totoo daw, siring sa paniniwala kan Pranses na pilosopong si Teilhard de Chardin, na an “pagsakit na nakagagadan asin nakalalapa, kaipuhan nin tawo tanganing iyan mabuhay asin magin espiritu”? (The Religion of Teilhard de Chardin; samo an italiko.) Sierto nanggad na dai!

Tuyo daw na malalang nin nakagagadan na palibot an sarong makonsiderasyon na paradisenyo dangan maghihingako na madinamayon kun ilinigtas nia an mga tawo sa mga epekto kaiyan? Bako nanggad! Taano ta gigibohon nin sarong mamomoton na Dios an siring na bagay? Kaya taano ta tinotogotan nin Dios an pagsakit? Matatapos pa daw an pagsakit? Ipaliliwanag kan sunod na artikulo an mga hapot na ini.

[Pasasalamat para sa pinagkuanan kan retrato sa pahina 3]

Retrato kan WHO ni P. Almasy