“An Bilog na Katongdan nin Tawo”
“Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—ECLESIASTES 12:13.
1, 2. Taano ta tama na estudyaran an satong katongdan sa Dios?
“ANONG balos an hinahagad sa saimo ni Jehova?” Ihinapot iyan nin sarong suanoy na propeta. Dangan isinabi nia nin malinaw kun ano an hinahagad ni Jehova—gumibo nin hustisya, mamoot sa kabootan, asin magin hababa an boot sa paglakaw sa kaibahan nin Dios.—Miqueas 6:8.
2 Sa aldaw na ini nin indibiduwalidad asin independensia, dakol an dai nagugustohan an ideya na an Dios may hinahagad sa sainda. Habo nindang magin obligado. Alagad kumusta an nagin konklusyon ni Salomon sa Eclesiastes? “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13.
3. Taano ta maninigo niatong seryosong isipon an librong Eclesiastes?
3 Ano man an satong mga kamugtakan asin punto de vista sa buhay, dakula an mapakikinabangan niato kun eestudyaran niato an kamugtakan sa likod kan konklusyon na iyan. Inestudyaran ni Hadeng Salomon, an kagsurat kan ipinasabong na librong ini, an nagkapira sa mismong mga bagay na kabtang kan satong buhay sa aroaldaw. An nagkapira tibaad magkonklusyon tolos na sa pundamental an saiyang pag-analisar negatibo. Pero iyan ipinasabong nin Dios asin makatatabang sa sato na pagturotimbangon an satong mga aktibidad asin ipinaoorog, na an resulta orog na kagayagayahan.
Pag-atubang sa Pangenot na mga Interes sa Buhay
4. Ano an siniyasat asin ipinaliwanag ni Salomon sa Eclesiastes?
4 Hararom na siniyasat ni Salomon ‘an okupasyon kan mga aki nin katawohan.’ “Itinalaga ko an sakong puso na hanapon asin siyasaton an kadonongan may koneksion sa gabos na bagay na ginibo sa sirong kan kalangitan.” Sa “okupasyon” bako man na trabaho, o empleyo, an boot sabihon ni Salomon, kundi imbes an gabos na aktibidad na dian okupado an mga lalaki asin babae sa bilog nindang buhay. (Eclesiastes 1:13) Estudyaran niato an nagkapirang mayor na interes, o okupasyon, dangan ikomparar niato an sadiri niatong mga aktibidad asin ipinaoorog.
5. Ano an saro sa pangenot na okupasyon nin mga tawo?
5 Tunay na an kuarta pinakasentro nin dakol na interes asin aktibidad nin mga tawo. Mayo nin may katanosan na makasasabi na si Salomon igwa kan indiperenteng punto de vista manongod sa kuarta na yaon sa nagkapirang mayayaman. Daing pag-alangan na inadmitir nia an pangangaipo nin kuarta; an pagkaigwa nin bastanteng kuarta mas marahay kisa sa buhay na tipid o dukha. (Eclesiastes 7:11, 12) Alagad segurado na naheling na nindo na an kuarta, kaiba kan mga rogaring na nababakal kaiyan, puedeng magin an primerong kamawotan sa buhay—para sa dukha saka sa mayaman.
6. Ano an manonodan niato manongod sa kuarta sa saro kan mga ilustrasyon ni Jesus asin sa sadiring eksperyensia ni Salomon?
6 Girumdoma an ilustrasyon ni Jesus manongod sa mayaman na, huli ta nungkang naninigoan, nagtrabaho tanganing magkaigwa pa nin mas dakol. Hinokoman sia nin Dios bilang lolong. Taano? Huli ta ‘an satong buhay dai minagikan sa mga bagay na satong nasasadirihan.’ (Lucas 12:15-21) An eksperyensia ni Salomon—na mas mahiwas gayod kisa kan sa sato—pinatutunayan an mga tataramon ni Jesus. Basaha an paglaladawan sa Eclesiastes 2:4-9. Sa halipot na panahon si Salomon nagmasibot sa pagtipon nin kayamanan. Nagtogdok sia nin mga harong asin hardin na magayonon an pagkagibo. Kaya niang magkaigwa asin nagkaigwa man nanggad nin magagayon na babae. Nakatao daw nin hararom na pagkakontento, nin pakamate na may totoong nagibo, asin nin kahulogan sa saiyang buhay an kayamanan asin an nagibo nia huli kaiyan? Suminimbag sia nin prangka: “Hineling ko an gabos na ginibo ko na hinaman kan sakong mga kamot asin an kahigosan na pinaghigosan kong magibo, asin, uya! an gabos daing kamanungdanan asin paglapag sa doros, asin mayo nin ano man na pakinabang sa sirong kan aldaw.”—Eclesiastes 2:11; 4:8.
7. (a) Ano an pinatutunayan nin eksperyensia kun dapit sa halaga nin kuarta? (b) Ano an personal nindong naheling na nagpapatunay sa konklusyon ni Salomon?
7 Iyan realistiko, sarong katotoohan na pinatutunayan sa dakol na buhay. Kaipuhan na admitiron niato na an pagkaigwa nin mas dakol na kuarta talagang dai nakareresolber sa gabos na problema. Nareresolberan kaiyan an nagkapira, arog baga kan pagpagin mas pasil kan paghanap nin kakanon asin gubing. Alagad ta saro-saro man sanang gubing an ikasusulot asin may sokol sana an nakakakan asin naiinom nin sarong tawo. Asin nababasa nindo an manongod sa mayayaman na an buhay dinadamat nin diborsio, inomon na de alkohol o pagdodroga, asin mapait na pagkakalaban nin magpaparyente. An multimilyonaryong si J. P. Getty nagsabi: “An kuarta mayo man nin koneksion sa kaogmahan. Tibaad sa kamondoan.” May marahay na dahelan, klinasipikar ni Salomon na daing kamanungdanan an pagkamoot sa pirak. Ikomparar an kalaenan kan bagay na iyan sa obserbasyon ni Salomon: “Mahamis an pagtorog kan sarong naglilingkod, minsan pa kadikit o dakol an saiyang kinakakan; alagad an kadakolan kan mayaman dai nagpapatorog sa saiya.”—Eclesiastes 5:10-12.
8. Ano an dahelan na dai dapat na pasobrahan an halaga nin kuarta?
8 An kuarta asin mga rogaring dai man nagtatao nin pagkakontento kun dapit sa ngapit. Kun mas dakol an saindong kuarta asin mga rogaring, posible na madudugangan an saindong kapurisawan manongod sa pagprotehir dian, asin dai pa man giraray nindo maaaraman kun ano an mangyayari sa aga. Posible daw na iyan gabos mawara, kaiba an saindong buhay? (Eclesiastes 5:13-17; 9:11, 12) Huli kaini, bakong depisil na masabotan kun taano an satong buhay, o okupasyon, ta maninigong magkaigwa nin mas halangkaw, mas nagdadanay na kahulogan kisa sa kuarta asin mga rogaring.
Pamilya, Kabantogan, Asin Kapangyarihan
9. Taano an buhay pampamilya ta tama sanang naglataw sa pagsiyasat ni Salomon?
9 Kaiba sa pag-analisar ni Salomon sa buhay an manongod sa pagkapreokupado sa pamilya. Itinatampok kan Biblia an buhay pampamilya, kabale na an kagayagayahan sa pagkaigwa nin asin pagpadakula sa mga aki. (Genesis 2:22-24; Salmo 127:3-5; Talinhaga 5:15, 18-20; 6:20; Marcos 10:6-9; Efeso 5:22-33) Pero, iyan daw an ultimong aspekto nin buhay? Garo baga iyan an paghona nin dakol, kun kokonsideraron an pagdodoon nin nagkapirang kultura sa pag-agom, mga aki, asin bogkos nin pamilya. Pero ipinaheheling kan Eclesiastes 6:3 na minsan an pagkaigwa nin sanggatos na aki bakong importanteng marhay sa pagkakontento sa buhay. Isip-isipa kun pirang magurang an nagsakripisyo para sa saindang mga aki tanganing matawan sinda nin marahay na kapinonan asin pagianon an saindang buhay. Minsan ngani iyan noble, segurado na dai boot sabihon kan satong Kaglalang na an mayor na katuyohan kan satong pag-eksister magtao sana nin buhay sa masunod na kapag-arakian, arog kan kanaturalan na ginigibo nin mga hayop tanganing magpadagos an klase ninda.
10. Taano ta puedeng magin daing kamanungdanan an sobrang pagkonsentrar sa pamilya?
10 May pagrisa na pinalataw ni Salomon an nagkapirang katunayan nin buhay pampamilya. Halimbawa, an sarong tawo tibaad magkonsentrar sa pagtagama para sa saiyang mga aki asin makoapo. Alagad magigin daw sindang madonong? O magigin daw sindang mangmang manongod sa pinagmaigotan niang tiponon para sa sainda? Kun ining ikaduwa an mangyari, iyan magigin nanggad “daing kamanungdanan asin dakulang kalamidad”!—Eclesiastes 2:18-21; 1 Hade 12:8; 2 Cronica 12:1-4, 9.
11, 12. (a) Sa anong mga pinag-aaabot sa buhay nagkokonsentrar an nagkapira? (b) Taano ta masasabi na an paghihingoang magin prominente “paglapag sa doros”?
11 Sa ibong na pagpalabilabi, dakol na ginibong segunda an normal na buhay pampamilya sa determinasyon ninda na magkamit nin kabantogan o kapangyarihan sa iba. Tibaad ini sala na mas lakop sa mga lalaki. Naheling na daw nindo ini sa saindong mga kaeskuela, katrabaho, o kataraed? Dakol an desesperadong nakikipagdinaogan tanganing marisa, magin tawong may sinasabi, o magkapot nin autoridad sa iba. Alagad gurano nanggad kamakahulogan ini?
12 Isip-isipa kun gurano an pakipagdinaogan nin nagkapira tanganing magin bantog, baga man sa sadit o sa dakulang sokol. Naheheling niato iyan sa eskuelahan, sa satong pagtaraed, asin sa laen-laen na grupo sosyal. Iyan man an nagtutulod sa mga gustong mamidbid sa kinaban nin arte, pag-aling-aling, asin politika. Pero bako daw na sa pundamental iyan daing kamanungdanan na paghihingoa? Tama an pagkaapod dian ni Salomon na “paglapag sa doros.” (Eclesiastes 4:4) Dawa kun an sarong hoben magin prominente sa sarong klab, grupo sa isport, o grupo sa musika—o may lalaki o babae na magkaigwa nin reputasyon sa sarong negosyo o komunidad—pira talaga an nakaaaram manongod kaiyan? An kadaklan daw na tawo sa ibong na lado kan kinaban (o minsan sa nasyon man sanang iyan) nakaaaram na nabubuhay an tawong iyan? O sinda daw nagpapadagos sana sa buhay na biyong dai nag-aaram sa ano man na kadikit na kabantogan nia? Asin iyan masasabi man manongod sa ano man na kapangyarihan o autoridad na nakakamtan nin sarong tawo sa trabaho, sa sarong banwaan, o sa tahaw nin sarong grupo.
13. (a) Paano kita tinatabangan kan Eclesiastes 9:4, 5 na magkaigwa nin tamang punto de vista manongod sa pagmamaigot na kamtan an pagkaprominente o kapangyarihan? (b) Anong mga katunayan an maninigong atubangon niato kun iyo sana ini an buhay? (Helingon an nota sa ibaba.)
13 Sa katapustapusi ano an halaga kan siring na pagkaprominente o autoridad? Sa paglihis nin sarong kapag-arakian asin pag-abot nin saro pa, an mga prominente o makapangyarihan nagagadan asin nalilingawan. Totoo iyan sa mga konstruktor, musiko asin iba pang eksperto sa arte, repormador sosyal, asin iba pa, kun paanong iyan totoo manongod sa kadaklan na politiko asin namomoon sa militar. Sa mga okupasyon na iyan, pirang espesipikong indibiduwal an midbid nindo na nabuhay sa pag-oltanan kan mga taon 1700 asin 1800? Tama an pagkatasar ni Salomon sa mga bagay, na sinasabi: “An buhay na ayam mas marahay kisa sa gadan na leon. Huli ta an buhay nakaaaram na sinda magagadan; alagad kun dapit sa mga gadan, mayo man lamang sinda nin pakaaram, . . . an pakagirumdom sa sainda nalingawan na.” (Eclesiastes 9:4, 5) Asin kun iyo sana ini an buhay, kun siring an pagmamaigot na kamtan an pagkaprominente o kapangyarihan talagang daing kamanungdanan.a
An Sentro kan Satong Atension Asin an Satong Katongdan
14. Taano ta maninigong makatabang sa sato personalmente an librong Eclesiastes?
14 Si Salomon dai nagkomento manongod sa dakol na aktibidad, kamawotan, asin kasiraman na dian isinesentro nin mga tawo an saindang buhay. Pero, supisyente na an saiyang isinurat. An pag-estudyar niato sa libro dai kaipuhan na magin garo baga mapungaw o negatibo, ta realistiko niatong rinepaso an sarong libro kan Biblia na tuyong ipinasabong ni Jehova Dios para sa kapakinabangan niato. Iyan makatatabang sa lambang saro sa sato na itanos an satong punto de vista sa buhay asin sa kun ano an ginigibo niatong sentro kan satong atension. (Eclesiastes 7:2; 2 Timoteo 3:16, 17) Iyan nangorogna huli sa mga nagin konklusyon ni Salomon sa tabang ni Jehova.
15, 16. (a) Ano an punto de vista ni Salomon manongod sa pag-ogma sa buhay? (b) Anong tamang limitasyon an ibinugtak ni Salomon sa pagkaogma sa buhay?
15 An sarong punto na paorootrong pinalataw ni Salomon iyo na an mga lingkod kan tunay na Dios maninigong makanompong nin kagayagayahan sa saindang mga aktibidad sa atubangan Nia. “Namidbid ko na mayong orog karahay para sa sainda kisa sa maggayagaya asin gumibo nin marahay sa panahon kan pagkabuhay nin saro; asin siring man na an lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.” (Eclesiastes 2:24; 3:12, 13; 5:18; 8:15) Mangnoha na si Salomon dai nag-eenkaminar nin sobrang kaogmahan; ni nag-aprobar man sia sa aktitud na ‘Magkarakan, mag-irinom, asin mag-orogma kita, huli ta sa aga magagadan kita.’ (1 Corinto 15:14, 32-34) An boot niang sabihon maogma kita sa normal na mga kasiraman, arog baga kan pagkakan asin pag-inom, mantang kita ‘naggigibo nin marahay sa panahon kan satong pagkabuhay.’ Daing duda na isinesentro kaiyan an satong buhay sa kabotan kan Kaglalang, na iyong nagdedeterminar kun ano an talagang marahay.—Salmo 25:8; Eclesiastes 9:1; Marcos 10:17, 18; Roma 12:2.
16 Si Salomon nagsurat: “Lakaw, kakana an saimong kakanon na may paggayagaya asin inoma an saimong arak na may maogmang puso, huli ta an tunay na Dios nawiwili na sa saimong mga gibo.” (Eclesiastes 9:7-9) Iyo, an lalaki o babae na talagang mabungang marhay asin nakakokontento an buhay aktibo sa mga gibo na kinawiwilihan ni Jehova. Hinahagad kaiyan sa sato na permi siang konsideraron. An punto de vistang ini laen na marhay kan sa mayoriya nin mga tawo, na an pananaw sa buhay basado sa mga pangangatanosan nin tawo!
17, 18. (a) Ano an reaksion nin dakol na tawo sa mga katunayan nin buhay? (b) Anong resulta an maninigo na permi niatong girumdomon?
17 Minsan ngani an nagkapirang relihion nagtotokdo manongod sa buhay pagkagadan, dakol na tawo an naniniwala na sa buhay sanang ini sinda nakaseseguro. Tibaad naheling na nindo an reaksion ninda na arog kan ilinadawan ni Salomon: “Huli ta an silot sa maraot na gibo dai tolos ginibo, kaya an puso kan mga aki nin tawo nagin nang biyong matagas sa paggibo nin maraot.” (Eclesiastes 8:11) Minsan an mga dai nagigin sagom sa marigsok na mga gibo nagpapaheling na orog kisa sa ano pa man sinda interesado sa presente. Iyan an sarong dahelan kun taano ta an kuarta, mga rogaring, pagigin midbid, autoridad sa iba, pamilya, o iba pang interes na siring nagigin sobra kahalaga para sa sainda. Minsan siring, dai dian nagtapos si Salomon. Idinugang nia: “Minsan pa an parakasala tibaad naggigibo nin maraot nin sanggatos na beses asin nagpapadagos nin haloy sono sa gusto nia, pero aram ko man na marahay an mangyayari sa mga natatakot sa tunay na Dios, huli ta sinda may takot sa saiya. Alagad mayo nin mangyayaring marahay sa maraot, ni mapalalawig man nia an saiyang mga aldaw na siring sa anino, huli ta sia mayo nin takot sa Dios.” (Eclesiastes 8:12, 13) Malinaw, kombensido si Salomon na marahay an mangyayari sa sato kun kita “natatakot sa tunay na Dios.” Gurano karahay? Manonompongan niato an simbag sa pagkakalaen na sinabi nia. Kaya ni Jehova na ‘palawigon an satong mga aldaw.’
18 An mga hoben pa nangorogna na kaipuhan na turotimbangon an biyong masasarigan na katunayan na marahay an mangyayari sa sainda kun sinda natatakot sa Dios. Arog kan tibaad personal nindong naheling, an pinakamarikas na paradalagan puedeng masingkog asin madaog sa paorumbasan. An sarong mapuersang hukbo puedeng madaog. An madonong na negosyante puedeng magin dukha. Asin huli sa dakol na iba pang kadaihan nin kasegurohan an buhay dai masabi an kaaabtan. Alagad ta maseseguro nindo nin biyo an bagay na ini: An pinakamadonong asin pinakaseguradong dalan maogma sa buhay mantang kamo naggigibo nin marahay sa laog kan moral na mga ley nin Dios asin sono sa saiyang kabotan. (Eclesiastes 9:11) Kaiba digdi an pakanood sa Biblia kun ano an kabotan nin Dios, pagdusay kan buhay sa saiya, asin pagigin bautisadong Kristiano.—Mateo 28:19, 20.
19. Paano magagamit nin mga hoben an saindang buhay, alagad ta ano an madonong na dalan?
19 Dai pipiriton kan Kaglalang an mga hoben o iba pa na sumunod sa saiyang paggiya. Puede sindang mabangkag sa edukasyon, tibaad nagigin mga estudyante pa kan daing kabilangan na libro sa kadonongan nin tawo sa bilog nindang buhay. Iyan sa kahurihurihi magigin mapagal sa laman. O puede sindang maglakaw sa dalan kan saindang bakong sangkap na puso nin tawo o sumunod sa nakaaakit sa mga mata. Sierto na iyan magbubunga nin pagkauyam, asin an buhay na ginamit sa siring na paagi pag-abot nin panahon magigin daing kamanungdanan sana. (Eclesiastes 11:9–12:12; 1 Juan 2:15-17) Kaya si Salomon nakiolay sa mga hoben—pakiolay na maninigo na pakapensaron niato, ano man an satong edad: “Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkabarobata, bago umabot an maraot na mga aldaw, o dumatong an mga taon na ika masabi: ‘Mayo ako nin kawilihan sa sainda.’”—Eclesiastes 12:1.
20. Ano an timbang na pagmansay sa mensahe sa Eclesiastes?
20 Kun siring, ano an konklusyon niato? Bueno, kumusta an konklusyon ni Salomon? Saiyang hineling, o siniyasat, “an gabos na gibo na ginigibo sa sirong kan aldaw, asin, uya! an gabos daing kamanungdanan asin paglapag sa doros.” (Eclesiastes 1:14) Dai niato nanonompongan sa librong Eclesiastes an mga tataramon nin sarong tawong tatsador o disgustado. Iyan kabtang kan ipinasabong na Tataramon nin Dios asin maninigo niatong estudyaran.
21, 22. (a) Anong mga aspekto nin buhay an inestudyaran ni Salomon? (b) Ano an madonong niang ikinonklusyon? (c) Ano an epekto sa saindo kan pagsiyasat sa mga laog kan Eclesiastes?
21 Pinagmasdan ni Salomon an pagpapagal, mga pagsakit, asin ambisyon nin tawo. Pinag-isip-isip nia kun ano an nangyayari sa normal na dalagan nin mga pangyayari, an nakapanluluya sa boot asin daing direksion na resulta na naeeksperyensiahan nin kadakol na tawo. Inestudyaran nia an katunayan kan pagkabakong sangkap nin tawo asin an bungang kagadanan. Asin kinonsiderar nia an tao nin Dios na kaaraman manongod sa kamugtakan kan mga gadan asin sa mga oportunidad para sa ano man na buhay sa ngapit. Ini gabos pinagturotimbang nin sarong tawo na an kadonongan dinugangan nin Dios, iyo, saro sa pinakamadonong na tawo na nabuhay kasuarin man. Dangan an nagin konklusyon nia iiniba sa Banal na Kasuratan para sa kapakinabangan kan gabos na gusto nin tunay na makahulogan na buhay. Dai daw kita maninigong umoyon?
22 “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo. Huli ta an tunay na Dios mismo dadarahon an gabos na gibo sa paghokom mapadapit sa gabos na hilom na bagay, kun baga iyan marahay o maraot.”—Eclesiastes 12:13, 14.
[Nota sa Ibaba]
a Sarong beses an The Watchtower nagsabi kan may pakarorop na komentong ini: “Dai niato maninigong sayangon an buhay na ini sa mga daing kamanungdanan . . . Kun iyo sana ini an buhay, mayo nin ano man na mahalaga. An buhay na ini garo bola na idinadaklag paitaas na dai nahahaloy nahoholog giraray sa kabokabo. Iyan anino na madaling mawara, burak na naluluyos, doot na inaawan asin naaalang sa madali. . . . Sa timbangan nin panahon na daing sagkod an lawig kan satong buhay haros dai marisang tuldok. Sa sulog nin panahon iyan bako man lamang ngani na dakulang toro. Tunay na tama [si Salomon] kan repasohon nia an dakol na interes asin aktibidad nin tawo sa buhay asin sinabi na iyan daing kamanungdanan. Madalion kitang nawawara na marahay pa na dai kita noarin man namundag, saro sa binilyon na namumundag asin nawawara, na pira-pira sana an nakaaaram na kita nabuhay. An punto de vistang ini bakong mapagtuya o mamondo o mapungaw o makangingiri. Iyan katotoohan, sarong katunayan, praktikal na punto de vista, kun iyo sana ini an buhay.”—Agosto 1, 1957, pahina 472.
Nagigirumdoman daw Nindo?
◻ Ano an madonong na ebalwasyon sa kabtang nin mga rogaring sa saindong buhay?
◻ Taano ta dai niato maninigong tawan nin sobrang pagdodoon an pamilya, kabantogan, o autoridad sa iba?
◻ Anong aktitud nin Dios sa pag-ogma an iinenkaminar ni Salomon?
◻ Paano kamo nakinabang sa pag-estudyar sa librong Eclesiastes?
[Mga retrato sa pahina 15]
An kuarta asin mga rogaring bakong garantiya sa pagkakontento
[Retrato sa pahina 17]
An mga hoben makasisierto na marahay an mangyayari sa sainda kun sinda matatakot sa Dios