Mga Hapot Hale sa mga Parabasa
“An Torrengbantayan” kan Agosto 15, 1996, nagsabi: “Sa ultimong kabtang kan kahorasaan, makaliligtas an ‘laman’ na duminulag pasiring sa lado ni Jehova.” Isinusuherir daw kaiyan na pakatapos kan enot na kabtang kan dakulang kahorasaan, dakol na bagohan an mapasiring sa lado nin Dios?
Bako iyan an boot sabihon.
An mga tataramon ni Jesus na yaon sa Mateo 24:22 sa pangenot maootob sa ngapit paagi sa pakaligtas sa enot na kabtang kan maabot na dakulang kahorasaan, an pagsalakay sa relihion. An artikulo nagsabi: “Girumdoma na an ‘laman,’ kapwa kan linahidan na natatada asin kan ‘dakulang kadaklan,’ nakaligtas na kun an Dakulang Babilonya bigla asin biyong laglagon sa enot na kabtang kan kahorasaan.”
An siring na mga fiel dai mamemeligro kun si Jesus asin an saiyang langitnon na hukbo humiro na sa ultimong kabtang kan kahorasaan. Alagad sairisay kun siring an mga makaliligtas sa kabtang na iyan kan kahorasaan? Ipinaheheling kan Kapahayagan 7:9, 14 na makaliligtas an sarong dakulang kadaklan na igwa nin daganon na paglaom. Kumusta man an mga Kristianong linahidan nin espiritu? An “Questions From Readers” sa The Watchtower kan Agosto 15, 1990, nagpaliwanag kun taano ta dai kita puedeng magin dogmatiko manongod sa kun noarin dadarahon sa langit an natatada sa mga linahidan. Kaya an dai pa sana nahahaloy na artikulo (Agosto 15, 1996) bakong depinido manongod sa bagay, na itinatao an pankagabsan na komento: “Sa kaagid na paagi sa ultimong kabtang kan kahorasaan, makaliligtas an ‘laman’ na duminulag pasiring sa lado ni Jehova.”
Kun dapit sa kun baga may mga bagohan na makanonood kan katotoohan asin mapasiring sa lado nin Dios pakatapos na magpoon an dakulang kahorasaan, mangnoha an mga tataramon ni Jesus na nasusurat sa Mateo 24:29-31. Pakatapos kan biglang pag-abot kan kahorasaan, malataw an tanda kan Aki nin tawo. Sinabi ni Jesus na an gabos na tribo kan daga mananangis asin mag-aagrangay. Mayo siang sinabi manongod sa mga tawo na magigimata manongod sa situwasyon, magsosolsol, maninindogan sa lado nin Dios, asin magigin tunay na mga disipulo.
Kaagid kaiyan, sa parabola dapit sa mga karnero asin kanding, malataw an Aki nin tawo asin pagbubulagbulagon sa hudisyal na paagi an mga tawo basado sa saindang ginibo o dai ginibo kaidto. Mayong sinabi si Jesus manongod sa mga tawo na haloy nang nagpapaheling nin arog-kanding na mga kualidad na biglang mabakle asin magigin arog sa karnero. Madatong sia tanganing maghokom basado sa kun nagin ano na an mga tawo.—Mateo 25:31-46.
Alagad, sa giraray, mayo nin rason na magin dogmatiko dapit sa puntong ini. An banwaan nin Dios, kapwa an mga kabilang sa linahidan asin dakulang kadaklan, nakaaaram kun ano an dapat nindang gibohon ngonyan—maghulit asin gumibo nin mga disipulo. (Mateo 28:19, 20; Marcos 13:10) Ngonyan na mismo an panahon na isapuso niato an sadol: “Sa paggibo sa kaibanan nia, nakikimaherak man kami sa saindo na dai nindo akoon an dai na kutana maninigong kabootan nin Dios asin lipasan an katuyohan kaiyan. Huli ta sia nagsasabi: ‘Sa panahon nin pag-ako dinangog taka, asin sa aldaw nin kaligtasan tinabangan taka.’ Uya! Ngonyan na an espesyalmenteng panahon nin pag-ako. Uya! Ngonyan na an aldaw nin kaligtasan.”—2 Corinto 6:1, 2.