Kun Taano ta Dai Nagpapatalubo nin Pagtubod an mga Milagro Sana
MANINIWALA ako kun maheling ko. Iyan an punto de vista nin dakol. An nagkapira nagsasabi na maniniwala sinda sa Dios kun ihahayag nia an saiyang sadiri sa milagrosong paagi. Seguro totoo iyan, alagad an siring daw na paniniwala magbubunga nin tunay na pagtubod?
Horophoropa an mga Israelitang sinda Core, Datan, asin Abiram. Ipinaheheling kan Biblia na naheling mismo ninda an nakapupukaw nin hararom na paggalang na mga milagrong ini hale sa Dios: an sampulong damat sa Egipto, an pagdulag kan nasyon nin Israel na uminagi sa Dagat na Pula, asin an pagpara sa Faraon nin Egipto asin sa saiyang hukbong militar. (Exodo 7:19–11:10; 12:29-32; Salmo 136:15) Nadangog man ninda Core, Datan, asin Abiram si Jehova na nagtataram hale sa langit sa Bukid nin Sinai. (Deuteronomio 4:11, 12) Pero, dai nahaloy pakatapos na mangyari an mga milagrong ini, an tolong lalaki nagsutsut nin rebelyon tumang ki Jehova asin sa saiyang nombradong mga lingkod.—Bilang 16:1-35; Salmo 106:16-18.
Mga 40 taon an nakalihis, an sarong propeta na an ngaran Balaam nakaheling man mismo nin milagro. Minsan an pag-interbenir nin anghel dai nakaolang sa saiya sa pagkampi sa mga kaiwal nin Dios, an mga Moabita. Apisar kan milagrong iyan, nagpadagos si Balaam asin nanindogan tumang ki Jehova Dios asin sa Saiyang banwaan. (Bilang 22:1-35; 2 Pedro 2:15, 16) Minsan siring, an kadaihan nin pagtubod ni Balaam saditon kisa kan ki Judas Iscariote. Apisar na nagin dayupot na kaibaiba ni Jesus asin nakaheling mismo nin sunod-sunod na ekstraordinaryong mga milagro, pinasaloiban ni Judas si Cristo sa halagang treintang pidaso nin pirak.—Mateo 26:14-16, 47-50; 27:3-5.
Aram man kan Judiong mga namomoon sa relihion an dakol na milagro ni Jesus. Pakatapos na buhayon nia liwat si Lazaro, inadmitir pa ngani ninda: “An tawong ini naggigibo nin dakol na tanda.” Alagad nakapalomoy daw sa saindang puso asin nakatao nin pagtubod an pakaheling sa buhay na ngonyan na si Lazaro? Dai nanggad. Imbes, nagpakana sinda na gadanon pareho si Jesus asin si Lazaro!—Juan 11:47-53; 12:10.
Minsan an direktang pag-interbenir nin Dios dai nakapaluwas nin pagtubod sa maraot na mga tawong idto. Mantang si Jesus yaon sa patyo kan templo sa sarong okasyon, namibi sia nin makosog: “Ama, pamurawaya an saimong ngaran.” Si Jehova nagsimbag paagi sa sarong tingog hale sa langit: “Iyan pinamuraway ko na asin papamurawayon ko liwat iyan.” Pero, an milagrosong pangyayaring ini dai nagpaluwas nin pagtubod sa puso kaidtong mga yaon duman. Sabi kan Biblia: “Minsan sia guminibo nin kadakoldakol na tanda sa atubangan ninda, dai sinda minatubod sa saiya.”—Juan 12:28-30, 37; ikomparar an Efeso 3:17.
Kun Taano ta Dai Nagpatalubo nin Pagtubod an mga Milagro
Paano nagkaigwa nin siring na kadaihan nin pagtubod apisar na may mga milagro? An pagsikwal ki Jesus kan Judiong mga namomoon sa relihion garo baga nangorognang masakit isipon kun pepensaron nindo na sa mismong panahon na pinonan nia an saiyang ministeryo, an mga Judio sa kabilogan “naghahalat” sa “Cristo,” o Mesiyas. (Lucas 3:15) Minsan siring, an problema yaon sa kun ano an mga hinahalat na idto. An leksikograpo na si W. E. Vine kinotar an sarong bantog na iskolar sa Biblia na nagsasabi na an mga Judio nababangkag sa ideya dapit sa sarong Mesiyas na matao sa sainda nin “daganon na kapangganahan” asin “materyal na prosperidad.” Huli kaini, bako sindang andam para sa mapakumbaba, bakong makipolitika na Jesus nin Nazaret, na nagtunga sa tahaw ninda bilang an tunay na Mesiyas kan 29 C.E. Natakot man an mga namomoon sa relihion na an mga katokdoan ni Jesus makadidisturbo sa nag-eeksister na kamugtakan nin mga bagay asin magsasapeligro kan saindang prominenteng mga posisyon. (Juan 11:48) Binuta sinda sa kahulogan kan mga milagro ni Jesus kan saindang dati nang nasa isip na mga ideya asin kapasloan.
Kan huri isinikwal kan Judiong mga namomoon sa relihion asin iba pa an milagrosong patotoo na an mga parasunod ni Jesus igwang pag-oyon nin Dios. Halimbawa, kan paomayan kan saiyang mga apostol an sarong lalaki na pilay poon pa kan mamundag, an anggot na mga miembro kan Judiong korte suprema naghapot: “Ano an gigibohon ta sa mga tawong ini? Huli ta, an totoo, may nangyaring mahalagang tanda paagi sa sainda, saro na hayag sa gabos na nag-oontok sa Jerusalem; asin dai ta iyan mapaiindahan. Minsan siring, tanganing dai na iyan orog pang makabuyagyag sa mga tawo, sabihan ta sinda na may mga patakot na magpoon ngonyan dai na sinda magtaram basado sa ngaran na ini sa kiisay man.” (Gibo 3:1-8; 4:13-17) Malinaw nanggad, an makangangalas na milagrong ini dai nagpatalubo o nagpaluwas nin pagtubod sa puso kan mga tawong idto.
An ambisyon, kapalangkawan, asin kahanaban mga bagay na nagpahiro sa dakol na sirrahan an mga tata kan saindang puso. Minalataw na ini an nangyari ki Core, Datan, asin Abiram, na sinambit sa enotan. An iba naolang nin pag-imon, takot, asin dakol na iba pang nakararaot na ugale. Ipinagigirumdom man sa sato an sumbikalan na mga anghel, an mga demonyo, na dati igwang pribilehio na magheling sa mismong lalauogon nin Dios. (Mateo 18:10) Dai ninda pinagdududahan an pag-eksister nin Dios. Iyo nanggad, “an mga demonyo naniniwala asin nagtatakig.” (Santiago 2:19) Pero, mayo sindang pagtubod sa Dios.
An Kahulogan nin Tunay na Pagtubod
An pagtubod labi pa sa paniniwala sana. Iyan labi pa man sa madali sanang emosyonal na reaksion sa sarong milagro. Sabi kan Hebreo 11:1: “An pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” An sarong indibiduwal na igwa nin pagtubod kombensido sa saiyang puso na an gabos na ipinanunuga ni Jehova Dios garo man sana naotob na. Saro pa, an dai manenegaran na patotoo kan dai naheheling na mga katunayan mapuersang marhay kaya an pagtubod mismo sinasabing katimbang kan ebidensiang iyan. Iyo, an pagtubod basado sa ebidensia. Asin kan nakaaging mga panahon, an mga milagro nagkaigwa nin kabtang sa pagpaoswag nin pagtubod o pagpatalubo kaiyan. An mga tanda na ginibo ni Jesus nakatabang na makombensir an iba na sia an ipinanugang Mesiyas. (Mateo 8:16, 17; Hebreo 2:2-4) Kaagid kaiyan, an mga balaog kan banal na espiritu, o puersa aktiba, nin Dios na arog baga kan milagrosong pagpaomay asin pagtaram nin laen-laen na tataramon nagpatunay na mayo na sa mga Judio an pabor ni Jehova kundi na an saiyang pag-oyon yaon na ngonyan sa Kristianong kongregasyon, na tinindog kan saiyang Aki, si Jesu-Cristo.—1 Corinto 12:7-11.
Kabale sa milagrosong mga balaog kan espiritu an kakayahan na humula. Kan maheling kan mga dai nagtutubod an milagrong ini, an nagkapira napahirong sumamba ki Jehova, na nagpapahayag: “An Dios tunay nanggad na yaon sa saindo.” (1 Corinto 14:22-25) Minsan siring, bakong intension ni Jehova Dios na an mga milagro magin permanenteng kabtang kan Kristianong pagsamba. Huli kaiyan, si apostol Pablo nagsurat: “Minsan kun igwang mga balaog nin paghula, iyan mapapara; minsan igwang mga tataramon, iyan maontok.” (1 Corinto 13:8) An mga balaog na ini malinaw na uminontok kadungan kan pagkagadan kan mga apostol asin kan mga nag-ako nin siring na mga balaog paagi sa sainda.
Pababayaan na daw an mga tawo na mayo nin basehan sa pagtubod? Dai, huli ta si Pablo nagsabi: ‘Dai pinabayaan nin Dios an saiyang sadiri na dai nin saksi sa bagay na sia guminibo nin marahay, na tinatawan kamo nin oran hale sa langit asin mabungang mga panahon, na biyong binabasog an saindong mga puso nin kakanon asin kaogmahan.’ (Gibo 14:17) Tunay nanggad, para sa mga sadiosan an puso na andam na buksan an saindang isip asin puso sa ebidensiang nakapalibot sa sato, ‘an dai naheheling na mga kualidad ni Jehova Dios malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios, kaya dai sinda [an mga nagpapainda sa Dios] nin sarahotan.’—Roma 1:20.
Bako sanang paniniwala sa pag-eksister nin Dios an kaipuhan. Si Pablo nagsadol: “Dai kamo maglakaw na arog sa palakaw na ini nin mga bagay, kundi maliwat kamo huli kan pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) Magigibo ini paagi sa mahigos na pag-adal sa Kasuratan sa tabang nin Kristianong mga publikasyon, arog kan magasin na ini. An pagtubod na basado sa tamang kaaraman sa Tataramon nin Dios, an Biblia, bakong maluya o hababaw. An mga nakamansay kan kabotan nin Dios asin ginigibo iyan na may pagtubod nagtatao nin sagradong paglilingkod sa Dios.—Roma 12:1.
Nagtutubod Minsan Ngani Dai Nakaheheling
An apostol na si Tomas nasakitan na gumibo nin pagtubod sa pagkabuhay liwat ni Jesus hale sa mga gadan. “Sagkod na dai ko naheheling sa saiyang mga kamot an marka kan mga pako asin ikalaog an sakong moro sa marka kan mga pako asin ikalaog an sakong kamot sa saiyang hirog, dai nanggad ako matubod,” an ipinahayag ni Tomas. Kan sa huri magmateryalisar si Jesus sa sarong hawak na nagpaheling kan mga lugad sa pagpako sa saiya, si Tomas tuminubod sa milagrong ini. Minsan siring, si Jesus nagsabi: “Maogma an mga dai nakaheheling pero nagtutubod.”—Juan 20:25-29.
Ngonyan, an minilyon na Saksi ni Jehova “naglalakaw paagi sa pagtubod, bakong paagi sa pakaheling.” (2 Corinto 5:7) Minsan ngani dai ninda naheling an mga milagrong isinurat sa Biblia, marigon sindang nagtutubod na nangyari an mga ini. An mga Saksi naggigibo nin pagtubod sa Dios asin sa saiyang Tataramon. Sa tabang kan saiyang espiritu, nasasabotan ninda an mga katokdoan kan Biblia asin an pangenot na tema kaiyan—an pagbindikar sa soberaniya ni Jehova Dios paagi sa saiyang langitnon na Kahadean. (Mateo 6:9, 10; 2 Timoteo 3:16, 17) May dakulang pakinabang sa saindang sadiri, iinaaplikar kan tunay na mga Kristianong ini sa buhay an madonong na hatol kan Biblia. (Salmo 119:105; Isaias 48:17, 18) Inaako ninda an dai mapahihimutikan na patotoo na an mga hula sa Biblia ipinamimidbid an satong panahon bilang an “huring mga aldaw,” asin may pagtubod sinda na harani na an ipinanuga nin Dios na bagong kinaban. (2 Timoteo 3:1-5; Mateo 24:3-14; 2 Pedro 3:13) Para sa sainda sarong kagayagayahan na ihiras sa iba an kaaraman nin Dios. (Talinhaga 2:1-5) Aram ninda na paagi sana sa pag-adal kan Kasuratan na idtong mga naghahanap sa Dios tunay na makanonompong sa saiya.—Gibo 17:26, 27.
Nagigirumdoman daw nindo si Albert, na nasambitan sa sinundan na artikulo? Pakalihis nin pirang aldaw na dai sinimbag an saiyang pamibi na tawan nin milagro, sinongko sia nin saro sa Mga Saksi ni Jehova, sarong gurang na babae na nagwalat sa saiya nin nagkapirang babasahon na basado sa Biblia. Pakalihis kaiyan si Albert nag-ako nin daing bayad na pag-adal sa Biblia sa harong. Mantang sia orog na nagigin pamilyar sa mensahe kan Biblia, an saiyang pagkadesganar nagin kaogmahan. Nagpoon siang makarealisar na nanompongan man giraray nia palan an Dios.
An Kasuratan nagsasadol: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa.” (Isaias 55:6) Magigibo nindo ini, bakong paagi sa paghalat nin milagro sa presenteng aldaw hale sa Dios, kundi paagi sa pagkua nin tamang kaaraman sa saiyang Tataramon. Kaipuhan ini, huli ta an milagro sana dai nagpapatalubo nin pagtubod.
[Retrato sa pahina 5]
Minsan an milagrosong pagbuhay liwat ki Lazaro dai nagpahiro sa mga kaiwal ni Jesus na gumibo nin pagtubod
[Mga retrato sa pahina 7]
An pagtubod dapat na basado sa tamang kaaraman sa Biblia