Magmapuso Kamo Mantang Naghaharani Na an Pagliligtas
“‘Ako nasa saimo,’ an sabi ni Jehova, ‘tanganing iligtas ka.’”
1, 2. Taano ta kaipuhan kan pamilya nin tawo an pagliligtas?
PAGLILIGTAS! Abaa kanakararangang tataramon! An pagigin ilinigtas nangangahulogan na sinukorohan, hinale sa sarong maraot, mamondong situwasyon. Kabale digdi an ideya nin pagigin dinara pasiring sa mas marahay, mas maogmang kamugtakan.
2 Kanigoan kadakula kan pangangaipo kan pamilya nin tawo nin siring na pagliligtas sa panahon na ini! An mga tawo sa gabos na lugar nagagabatan asin pinanluluyahan nin boot huli sa masakit na mga problema—sa ekonomiya, sosyal, pisikal, mental, asin emosyonal. An dakulang mayoriya bakong kontento asin nadedesganar sa dalagan kan kinaban asin gusto nin pagbago para sa ikararahay.—Isaias 60:2; Mateo 9:36.
“Delikadong mga Panahon na Masakit Pakibagayan”
3, 4. Taano ta mas dakula an pangangaipo para sa pagliligtas ngonyan?
3 Mantang an ika-20 siglong ini nakamate nin mas grabeng pagsakit kisa sa arin man na ibang panahon, mas dakula an pangangaipo para sa pagliligtas ngonyan kisa kasuarin pa man. Ngonyan, labi sa sarong bilyon katawo an namumuhay sa grabeng kadukhaan, asin an bilang na iyan nadudugangan nin mga 25 milyones taon-taon. Kada taon mga 13 milyones na aki an nagagadan sa malnutrisyon o iba pang causa na konektado sa kadukhaan—labing 35,000 kada aldaw! Asin minilyon na may edad nang mga tawo an nagagadan na mayo pa sa panahon huli sa laen-laen na helang.—Lucas 21:11; Kapahayagan 6:8.
4 An mga ralaban asin pagkariribok sibil nagin dahelan nin dai mabilang na pagsakit. An librong Death by Government nagsasabi na an mga ralaban, iriwal nin rasa asin relihion, asin lagduan na paggadan nin mga gobyerno sa sainda mismong mga siudadano “guminadan nin labing 203 milyones katawo sa siglong ini.” Iyan nagsasabi pa: “An mga nagadan puedeng haros 360 milyones katawo. Garo man sana kita linaglag nin sarong modernong Itom na Damat. Asin tunay na iyan linaglag, alagad nin damat na Kapangyarihan, bakong nin mga mikrobyo.” An parasurat na si Richard Harwood nagkomento: “An barbarong mga ralaban kan nakalihis na mga siglo mga labolabo sana sa eskinita kun ikokomparar.”—Mateo 24:6, 7; Kapahayagan 6:4.
5, 6. Ano an minagibo sa satong panahon na nakapupurisaw na marhay?
5 Nakadadagdag sa nakapupurisaw na mga kamugtakan sa dai pa sana nahahaloy na mga taon an dakulaon na aumento sa madahas na krimen, inmoralidad, asin pagkalaglag nin pamilya. An dating Sekretaryo nin Edukasyon kan Estados Unidos na si William Bennett nagsabi na sa laog nin 30 taon an populasyon nin E.U. luminangkaw nin 41 porsiento, alagad an madahas na krimen luminangkaw nin 560 porsiento, an mga aki sa luwas 400 porsiento, an diborsio 300 porsiento, asin an bilang nin mga tin-edyer na naghuhugot 200 porsiento. Si Propesor John DiIulio, Jr., kan Unibersidad nin Princeton nagpatanid dapit sa nagdadakol na grupo nin mga hoben na “pinakagrabeng mambiktima,” na “nangagadan, nananalakay, nanlulugos, nanhahabon, nananalakat asin naggigibo nin magabat na mga problema sa komunidad. Dai ninda ikinatatakot an kasopganan nin pagkaaresto, an kakologan nin pagkapreso, o an mga pagkaribok nin konsensia.” Sa nasyon na iyan, an omisidyo iyo ngonyan an ikaduwang pangenot na causa nin pagkagadan kan mga 15 sagkod 19 anyos. Asin mas dakol na aki na mayo pang kuatro anyos an nagagadan huli sa pagmaltrato kisa sa helang.
6 An siring na krimen asin kadahasan bako sanang sa sarong nasyon. An kadaklan na kadagaan nagbabareta nin kaparehong dalagan nin mga pangyayari. Nakakokontribwir digdi an biglang nagdakol na paggamit nin ilegal na droga na nakararaot sa minilyon. An Sydney Morning Herald sa Australia nagsabi: “An internasyonal na negosyo nin droga nagin ikaduwang pinakamaganansiang negosyo sa kinaban kasunod kan negosyo sa mga armas.” An saro pang dahelan iyo an kadahasan asin inmoralidad na lakop ngonyan sa telebisyon. Sa dakol na nasyon, pag-18 anyos nin sarong aki, nakaheling na sia nin manampulong ribong akto nin kadahasan sa TV asin nin dai mabilang na inmoral na mga akto. Iyan sarong dakulang nakararaot na impluwensia, huli ta an satong personalidad pinoporma kan dayaday na ilinalaog niato sa satong isip.—Roma 12:2; Efeso 5:3, 4.
7. Paano ihinula kan Biblia an presenteng maraot na mga kamugtakan?
7 Eksaktong ihinula kan Biblia an makatatakot na dalagan na ini nin mga pangyayari sa satong siglo. Iyan nagsabi na magkakaigwa nin pambilog na globong mga ralaban, epidemya nin helang, kakulangan sa kakanon, asin pagdakol nin katampalasanan. (Mateo 24:7-12; Lucas 21:10, 11) Asin kun hinohorophorop niato an hula na nasusurat sa 2 Timoteo 3:1-5, garo man sana kita naghihinanyog sa mga bareta aroaldaw. Ipinamimidbid kaiyan an satong panahon bilang an “huring mga aldaw” asin ilinaladawan an mga tawo na ‘mga mamomoton sa sainda man sana, mga mamomoton sa kuarta, mga masumbikal sa mga magurang, bakong maimbod, dai nin natural na kapadangatan, mayong pagpopogol sa sadiri, maringis, mga mahambog, mga mamomoton sa kasingawan imbes na mga mamomoton sa Dios.’ Arog nanggad kaiyan an kinaban ngonyan. Siring sa inadmitir ni William Bennett: “Kadakol nanggad nin tanda kan . . . pagkalapa nin sibilisasyon.” Sinabi pa ngani na an sibilisasyon natapos kadungan kan enot na guerra mundial.
8. Taano ta pinangyari nin Dios an Baha kan kaaldawan ni Noe, asin paano ini konektado sa satong kaaldawan?
8 An situwasyon ngonyan mas grabe pa ngani kisa kaidtong bago an Baha kan kaaldawan ni Noe, kan “an daga napano nin kadahasan.” Kaidto, an kadaklan na tawo habong magsolsol sa saindang maraot na mga dalan. Sa siring, an Dios nagsabi: “An daga pano nin kadahasan huli sa sainda; asin uya lalaglagon ko sinda.” An Delubyo an tuminapos sa madahas na kinaban na idto.—Genesis 6:11, 13; 7:17-24.
Dai Makapagliligtas an mga Tawo
9, 10. Taano ta maninigo na dai niato paglaoman an mga tawo na iyo an magtao nin pagliligtas?
9 Ikaliligtas daw kita kan mga paghihingoa nin tawo sa maraot na mga kamugtakan na ini? An Tataramon nin Dios minasimbag: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan.” “Mayo sa tawong naglalakaw an kakayahan na giyahan man lamang an saiyang lakad.” (Salmo 146:3; Jeremias 10:23) Rinibong taon na kasaysayan an nagpatunay sa mga katotoohan na iyan. Prinobaran nin mga tawo an gabos na politikal, ekonomiko, asin sosyal na sistema na maiimahinar, alagad naggagrabe an mga kamugtakan. Kun igwa kutana nin solusyon an tawo, risa na kutana iyan ngonyan. Imbes, an katunayan iyo na “an tawo nagsakop sa tawo sa saiyang ikararaot.”—Eclesiastes 8:9; Talinhaga 29:2; Jeremias 17:5, 6.
10 Pirang taon na an nakaagi, an dating parakonseho sa nasyonal na seguridad kan E.U. na si Zbigniew Brzezinski nagsabi: “An dai malilikayan na konklusyon nin ano man na daing kinakampihan na pag-analisar sa dalagan nin mga pangyayari sa bilog na globo iyo na an sosyal na karibarawan, kariribokan sa politika, krisis sa ekonomiya, asin internasyonal na iriwal may posibilidad na orog pang maglakop.” Idinugang pa nia: “An peligro na napapaatubang sa katawohan [iyo an] anarkiya na lakop sa bilog na globo.” An paghusgar na iyan sa mga kamugtakan kan kinaban orog pa nganing balido ngonyan. Sa pagkomento dapit sa panahon na ini nin nag-orog na kadahasan, an sarong editoryal sa Register kan New Haven, Connecticut, nagpahayag: “Garo baga grabe nang marhay an satong kamugtakan tanganing mapapondo iyan.” Dai, dai mapapopondo an pagruro kan kinaban na ini, huli ta an hula manongod sa “huring mga aldaw” na ini nagsabi man: “An mga maraot asin madaya orog na magraraot, na nanlalagalag asin ikinalalagalag.”—2 Timoteo 3:13.
11. Taano an naggagrabeng mga kamugtakan ta dai mapaaatras kan mga paghihingoa nin tawo?
11 Dai na mapaaatras nin mga tawo an dalagan na ini nin mga pangyayari huli ta si Satanas iyo an “dios kan palakaw na ini nin mga bagay.” (2 Corinto 4:4) Iyo, “an bilog na kinaban namumugtak sa kapangyarihan kan maraot.” (1 Juan 5:19; helingon man an Juan 14:30.) Tama sanang sabihon kan Biblia dapit sa satong kaaldawan: “Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Aram ni Satanas na an saiyang pamamahala asin an saiyang kinaban madali nang matapos, kaya siring sia sa “nagngangarob na leon, na naghahanap nin masisiba.”—1 Pedro 5:8.
Harani Na an Pagliligtas—Para Kiisay?
12. Para kiisay naghaharani na an pagliligtas?
12 An paorog nang paorog kasakit na mga kamugtakan digdi sa daga risang marhay na ebidensia na an sarong mahiwas na pagliliwat—sa katotoohan, sarong dakulang pagliligtas—haranihon na! Para kiisay? An pagliligtas naghaharani na para duman sa mga nagtataong atension sa nagpapatanid na mga senyal asin naggigibo nin tamang paghiro. Ipinaheheling kan 1 Juan 2:17 an dapat na gibohon: “An kinaban [an palakaw nin mga bagay ni Satanas] maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—Helingon man an 2 Pedro 3:10-13.
13, 14. Paano idinoon ni Jesus an pangangaipong magpuka?
13 Ihinula ni Jesus na an maraot na sosyedad sa presente madali nang paraon sa sarong panahon nin kasakitan na “dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Iyan an dahelan na sia nagpatanid: “Atenderan an saindong sadiri na an saindong mga puso dai mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari.”—Lucas 21:34-36.
14 An mga ‘inaatenderan’ an sadiri asin ‘nagpupuka’ aaramon an kabotan nin Dios asin gigibohon iyan. (Talinhaga 2:1-5; Roma 12:2) An mga ini an magigin “mapanggana sa pagdulag” sa kalaglagan na madali nang papangyarihon sa palakaw ni Satanas. Asin puede sindang magkaigwa nin lubos na kompiansa na sinda ililigtas.—Salmo 34:15; Talinhaga 10:28-30.
An Pangenot na Paraligtas
15, 16. Siisay an pangenot na Paraligtas, asin taano ta nakaseseguro kita na magigin matanos an saiyang mga paghokom?
15 Tanganing ikaligtas an mga lingkod nin Dios, si Satanas asin an saiyang enterong palakaw nin mga bagay sa bilog na kinaban kaipuhan na haleon. Nangangaipo ini nin gikanan nin pagliligtas na orog pang makapangyarihan kisa sa mga tawo. An gikanan na iyan iyo si Jehova Dios, an Supremong Soberano, an makakamhan sa gabos na Kaglalang kan makangingirhat na uniberso. Sia an pangenot na Paraligtas: “Ako—ako si Jehova, asin laen sa sako dai nin paraligtas.”—Isaias 43:11; Talinhaga 18:10.
16 Yaon ki Jehova an pinakahalangkaw na sokol nin kapangyarihan, kadonongan, hustisya, asin pagkamoot. (Salmo 147:5; Talinhaga 2:6; Isaias 61:8; 1 Juan 4:8) Kaya kun gibohon nia an saiyang mga paghokom, makaseseguro kita na an saiyang mga paghiro magigin matanos. Si Abraham naghapot: “Dai daw magibo kan tama an Hokom sa bilog na daga?” (Genesis 18:24-33) Si Pablo nagkagsing: “Igwa daw nin inhustisya sa Dios? Nungka logod na mangyari iyan!” (Roma 9:14) Si Juan nagsurat: “Iyo, Jehova Dios, an Makakamhan sa gabos, totoo asin matanos an saimong hudisyal na mga desisyon.”—Kapahayagan 16:7.
17. Paano an mga lingkod ni Jehova kaidto nagpahayag nin kompiansa sa saiyang mga panuga?
17 Kun manuga si Jehova nin pagliligtas, siertong gigibohon nia iyan. Si Josue nagsabi: “Mayo ni sarong panuga an nasudya sa gabos na marahay na ipinanuga ni Jehova.” (Josue 21:45) Si Salomon nagsabi: “Mayo nin nasudya ni sarong tataramon sa gabos niang marahay na panuga na saiyang ipinanuga.” (1 Hade 8:56) Ipinaliwanag ni apostol Pablo na si Abraham ‘dai nagduwaduwa huli sa kakulangan nin pagtubod, na biyo an panarig na an ipinanuga nin Dios kaya niang gibohon.’ Kaagid kaiyan si Sara “ibinilang na fiel [an Dios na] nanuga.”—Roma 4:20, 21; Hebreo 11:11.
18. Taano an mga lingkod ni Jehova ngonyan ta makakokompiar na sinda ililigtas?
18 Bakong arog nin mga tawo, si Jehova mapagtitiwalaan nin lubos, inootob an saiyang tataramon. “Si Jehova nin mga hukbo nanumpa, na an sabi: ‘Sierto nanggad na siring sa sakong dinesisyonan, iyan an dapat na mangyari; asin siring sa sakong isinabi, iyan an maootob.’” (Isaias 14:24) Kaya kun sinasabi kan Biblia na “si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon,” puede kitang magkaigwa nin lubos na kompiansa na ini mangyayari. (2 Pedro 2:9) Dawa kun hinuhumang laglagon nin mapuersang mga kaiwal, an mga lingkod ni Jehova nagmamapuso huli sa saiyang saboot, na ipinabanaag sa saiyang panuga sa saro kan saiyang mga propeta: “Sierto na matumang sinda sa saimo, alagad ta dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’”—Jeremias 1:19; Salmo 33:18, 19; Tito 1:2.
Mga Pagliligtas Kaidto
19. Paano ilinigtas ni Jehova si Lot, na may anong kaagid sa satong panahon?
19 Maparirigon na marhay an satong boot paagi sa pagsaysay kan nagkapirang nakaaging mga pagliligtas ni Jehova. Halimbawa, si Lot kaidto “napupurisaw na gayo” huli sa karatan kan Sodoma asin Gomorra. Alagad minangno ni Jehova “an kurahaw nin reklamo” tumang sa mga siudad na idto. Sa tamang panahon, nagsugo sia nin mga mensahero tanganing sadolon si Lot asin an saiyang pamilya na humale tolos sa lugar na iyan. An resulta? ‘Ilinigtas ni Jehova an matanos na si Lot,’ na ‘ginibo an siudad nin Sodoma asin Gomorra na magin abo.’ (2 Pedro 2:6-8; Genesis 18:20, 21) Ngonyan man, naririparo ni Jehova an kurahaw nin reklamo mapadapit sa grabeng karatan kan kinaban na ini. Kun matapos na kan saiyang mga mensahero sa presenteng aldaw an saindang apuradong pagpapatotoo sagkod sa sokol na gusto nia, sia mahiro tumang sa kinaban na ini asin ililigtas nia an saiyang mga lingkod siring kan ginibo nia ki Lot.—Mateo 24:14.
20. Iladawan an pagliligtas ni Jehova sa suanoy na Israel hale sa Egipto.
20 Sa suanoy na Egipto minilyon sa banwaan nin Dios an inoripon. Si Jehova nagsabi manongod sa sainda: “Nadangog ko an saindang kinurahaw . . . Aram kong gayo an kakologan na saindang tinitios. Asin ako mahilig tanganing iligtas ko sinda.” (Exodo 3:7, 8) Minsan siring, pakatogoting humale an banwaan nin Dios, nagbago an isip ni Faraon asin linapag nia sinda kaiba an saiyang mapuersang hukbo. An mga Israelita garo baga nasalikopan sa Dagat na Pula. Pero si Moises nagsabi: “Dai kamo matakot. Tumindog kamo nin marigon asin helingon an pagliligtas ni Jehova, na gigibohon nia para sa saindo ngonyan.” (Exodo 14:8-14) Binanga ni Jehova an Dagat na Pula, asin duminulag an mga Israelita. Linapag sinda kan mga hukbo ni Faraon, alagad ginamit ni Jehova an saiyang kapangyarihan kaya “linantopan sinda kan dagat; tuminundag sinda siring sa timga sa nakagugulat na katubigan.” Pakatapos kaiyan, si Moises naggayagaya nin labi-labi paagi sa awit ki Jehova: “Siisay an siring sa saimo, na pinatunayan an saimong sadiri na makosog sa kabanalan? An Saro na dapat katakotan paagi sa mga awit nin pag-omaw, an Saro na naggigibo nin mga ngangalasan.”—Exodo 15:4-12, 19.
21. Paano ilinigtas an banwaan ni Jehova hale sa Amon, Moab, asin Seir?
21 Sa saro pang okasyon, an kaiwal na mga nasyon nin Amon, Moab, asin Seir (Edom) hinumang laglagon an banwaan ni Jehova. Si Jehova nagsabi: “Dai kamo matakot o matikbahan huli sa dakulang [kaiwal na] kadaklan na ini; huli ta bakong saindo an laban, kundi sa Dios. . . . Dai kamo kaipuhan na makipaglaban . . . Dai kamo maghiro asin helingon an pagliligtas ni Jehova sa saindo.” Ilinigtas ni Jehova an saiyang banwaan paagi sa pagribaraw sa mga kaiwal kaya sinda naggaradanan.—2 Cronica 20:15-23.
22. Anong milagrosong pagliligtas hale sa Asiria an itinao ni Jehova sa Israel?
22 Kan an Kapangyarihan Pankinaban nin Asiria makipaglaban sa Jerusalem, dinuhagi ni Hadeng Senaquerib si Jehova paagi sa pagsabi sa banwaan na yaon duman sa lanob: “Siisay duman sa gabos na dios kan mga dagang ini [na sakuyang dinaog] an nagligtas kan saindang daga sa sakuyang kamot kaya ililigtas ni Jehova an Jerusalem sa sakuyang kamot?” Sa mga lingkod nin Dios sinabi nia: “Dai nindo pagtogotan si Ezequias na papagtiwalaon kamo ki Jehova, na sinasabi: ‘Sierto nanggad na ililigtas kita ni Jehova.’” Dangan si Ezequias odok na namibi para sa pagliligtas, “tanganing an gabos na kahadean sa daga makamidbid na ika, O Jehova, iyo sana an Dios.” Ginadan ni Jehova an 185,000 na soldados na Asirio, asin ilinigtas an mga lingkod nin Dios. Pagkatapos, mantang si Senaquerib nagsasamba sa saiyang falsong dios, inasesinar sia kan saiyang mga aking lalaki.—Isaias, kapitulo 36 asin 37.
23. Anong mga hapot an kaipuhan na simbagon manongod sa pagliligtas ngonyan?
23 Siertong magkakaigwa kita nin kapusoan kun naheheling ta kun paano ilinigtas kaidto ni Jehova sa makangangalas na paagi an saiyang banwaan. Kumusta man ngonyan? Sa anong peligrosong situwasyon madali nang mamugtak an saiyang fiel na mga lingkod na magkakaipo kan saiyang milagrosong pagliligtas? Taano ta naghalat sia sagkod ngonyan na papangyarihon an pagliligtas sa sainda? Ano an magigin kaotoban kan mga tataramon ni Jesus: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na”? (Lucas 21:28) Asin paano madatong an pagliligtas para sa mga lingkod nin Dios na nagadan na? Sisiyasaton kan minasunod na artikulo an mga hapot na ini.
Mga Hapot sa Repaso
◻ Taano ta igwa nin dakulang pangangaipo para sa pagliligtas?
◻ Taano ta maninigo na dai niato paglaoman an mga tawo para sa pagliligtas?
◻ Para kiisay harani na an pagliligtas?
◻ Taano ta makakokompiar kita sa pagliligtas ni Jehova?
◻ Anong mga halimbawa nin nakaaging mga pagliligtas an nakaparirigon sa boot?
[Retrato sa pahina 10]
Si Abraham kabilang sa mga nagkaigwa nin lubos na kompiansa ki Jehova