Ginibo Ninda an Kabotan ni Jehova

Binalosan an Pagtubod nin mga Magurang

PARA sa mga Israelita, an pagkamundag nin sarong aking lalaki nagtatao nin dakulang kagayagayahan. Nangahulogan iyan na an linahe magpapadagos asin na an pamanang daga magdadanay sa pamilya. Alagad kan mga taon nin 1593 B.C.E., an pagkaaki nin lalaki tibaad garo baga sarong sumpa imbes na bendisyon para sa mga Hebreo. Taano? Huli ta an Faraon kan Egipto, na nahahandal dapit sa marikas na pagdakol kan Judiong populasyon sa teritoryo na pinamamahalaan nia, nagboot na gadanon an gabos nindang aking lalaki na bagong mamundag.​—Exodo 1:​12, 15-​22.

Durante kan makababaldeng pagprobar na ini na paraon an bilog na rasa na sinda Amram asin Jocabed, mag-agom na Hebreo, nangaki nin sarong magayon na aking lalaki. Pasil imahinaron kun paano an saindang kagayagayahan natahoban nin grabeng takot kan magirumdoman ninda an dekreto ni Faraon. Pero, mantang pinagmamasdan ninda Amram asin Jocabed an saindang aking lalaki, marigon sindang nagdesisyon na dai sia pabayaan, ano man an mangyari.​—Exodo 2:​1, 2; 6:20.

Paghiro na May Pagtubod

Sa laog nin tolong bulan itinago ninda Amram asin Jocabed an saindang aki. (Exodo 2:2) Minsan siring, peligroso ini huling an mga Hebreo asin Egipcio magkararaning marhay an istaran. An siisay man na madiskobre na nagpoprobar na ebitaran an dekreto ni Faraon posibleng padusahan nin kagadanan​—asin magagadan man an aki. Kun siring, ano an puedeng gibohon kan debotong mga magurang na ini tangani na magdanay na buhay an saindang aking lalaki asin sinda mismo?

Nangua si Jocabed nin mga sanga nin papiro. An papiro sarong makunat na tangbo, na kaagid nin kawayan, asin may hawak na tolo an gilid na arog kahibog nin moro. Iyan puedeng umabot nin sagkod sa 6 metros an langkaw. Ginagamit kan mga Egipcio an tanom na ini sa paggibo nin papel, mga banig, layag, sandalyas, asin magian na mga baroto.

Puminorma si Jocabed gikan sa mga hawak nin papiro nin sarong lalagan na igo an sokol tangani na paglagan kan saiyang aki. Dangan linahidan nia iyan nin betun asin pulot tangani na pagdukotdukoton an lalagan asin dai iyan laogon nin tubig. Dangan ibinugtak ni Jocabed an saiyang aki sa laog kan lalagan asin ibinugtak iyan sa kagagahoan sa pangpang kan Salog Nilo.​—Exodo 2:3.

Naheling an Omboy

An aking babae ni Jocabed, si Miriam, puminuesto sa harani tangani na maheling an masunod na mangyayari. Dangan an aking babae ni Faraon duminatong sa Nilo tangani na magkarigos.a Tibaad aram ni Jocabed na an prinsesa parateng minaduman sa parteng idto kan Nilo asin tuyo niang iwinalat an lalagan kun saen madali sana iyan na maheling. Maski paano, dai nahaloy nariparo kan aking babae ni Faraon an lalagan na natatago sa kagagahoan, asin inapod nia an saro sa saiyang mga katabang tangani na kuanon iyan. Kan maheling nia sa laog an aking naghihibi, naherak sia. Narisa nia na ini sarong aking Hebreo. Pero, paano nia ikapagagadan an siring kagayon na aki? Apuera sa sa-tawong kabootan, tibaad naimpluwensiahan an aking babae ni Faraon kan popular na paniniwala nin mga Egipcio na an pakalaog sa langit depende sa rekord nin maboot na mga gibo sa bilog na pagkabuhay nin saro.b​—Exodo 2:​5, 6.

Si Miriam, na nagmamasid sa harayo, dinolok an aking babae ni Faraon. “Maduman daw po ako asin espesyalmenteng iaapod ko kamo nin sarong paraaling gikan sa mga babaeng Hebreo tangani na atamanon nia an aki para sa saindo?” an hapot nia. Nagsimbag an prinsesa: “Lakaw!” Duminalagan si Miriam pasiring sa saiyang ina. Dai nahaloy, nagtitindog na si Jocabed sa atubangan kan aking babae ni Faraon. “Darahon mo an aking ini asin atamana sia para sa sako,” an sabi kan prinsesa sa saiya, “asin ako mismo an matao sa saimo kan saimong sueldo.” Tibaad sa oras na ini narealisar na kan aking babae ni Faraon na si Jocabed an ina kan omboy.​—Exodo 2:​7-9.

Inataman ni Jocabed an saiyang aki sagkod na butason sia sa pagsuso.c Tinawan sia kaini nin dakol na mahalagang marhay na oportunidad na tokdoan an aki dapit sa tunay na Dios, si Jehova. Dangan ibinalik ni Jocabed an aki sa aking babae ni Faraon, na nginaranan an aking lalaki na Moises, na nangangahulogan “ilinigtas hale sa tubig.”​—Exodo 2:10, nota sa ibaba.

Leksion Para sa Sato

Lubos na inaprobetsaran ninda Amram asin Jocabed an halipot na oportunidad ninda na tokdoan an saindang aking lalaki kan mga prinsipyo nin dalisay na pagsamba. An mga magurang ngonyan maninigo man na gibohon iyan. Sa katunayan, kaipuhan na gibohon ninda iyan. Si Satanas na Diablo “naglalakaw na siring sa nagngangarob na leon, na naghahanap nin masisiba.” (1 Pedro 5:8) Gustong-gusto niang magin saiyang mga biktima an mahal na marhay na mga hoben​—aking lalaki asin babae—​na may paglaom na magin marahay na mga lingkod ni Jehova. Mayo sia nin pakikidamay para sa mga hoben! Huli kaini, sinasanay nin madonong na mga magurang an saindang sadit na mga aki na matakot sa tunay na Dios, si Jehova.​—Talinhaga 22:​6; 2 Timoteo 3:​14, 15.

Sa Hebreo 11:​23, an paghihingoa ninda Amram asin Jocabed na itago an saindang omboy durante kan enot na tolong bulan kan saiyang buhay nakatala bilang sarong akto nin pagtubod. An mga magurang na ini na may takot sa Dios pareho nagpaheling nin pagtitiwala sa kapangyarihan ni Jehova na magligtas paagi sa pagsayumang pabayaan an saindang aki, asin huli kaini binendisyonan sinda. Kita man maninigong magpaheling nin estriktong pagsusog sa mga ley asin prinsipyo ni Jehova, na kompiado na an ano man na itinotogot ni Jehova na mangyari sa sato pag-abot nin panahon magigin para sa satong daing sagkod na karahayan asin kaogmahan.​—Roma 8:28.

[Mga nota sa ibaba]