An Biblia—Sarong Libro na Daing Kaagid

Iyan inapod na an pina-kamabentang libro sa kina-ban, asin tama nanggad. An Biblia orog na binabasa asin minamahal kisa sa ano man na iba pang libro. Sagkod sa ngonyan, kinakarkulo na apat na bilyon na kopya kaiyan an ikinawaras (bilog o kabtang sana) sa labing 2,000 na lenguahe.

Minsan siring, orog na interesante kisa sa sirkulasyon kan Biblia an paghihingako kaiyan na an autor kaiyan iyo an Dios. “An gabos na Kasuratan ipinasabong nin Dios,” an isinurat kan Kristianong apostol na si Pablo. (2 Timoteo 3:16) Ano daw an boot sabihon kaini? An fraseng “ipinasabong nin Dios” (sa Griego, the·oʹpneu·stos) sa literal nangangahulogan “hinangosan nin Dios.” An sarong kaagid na termino sa Griego, na pneuʹma, nangangahulogan “espiritu.” Huli kaini, an paghingako iyo na an banal na espiritu nin Dios an nagpahiro sa mga kagsurat na tawo, na garo baga hinahangosan sinda, kaya an resulta totoong maaapod na Tataramon nin Dios, bakong nin tawo. Sa katunayan, an dakol na nag-adal sa Biblia napapangalas sa pankagabsan na armoniya kaiyan, sa pagkaeksakto kaiyan sa siensia, sa pagkaonesto asin pagkasadiosan kan mga kagsurat kaiyan, asin pinakamahalaga, sa naotob na mga hula kaiyan​—na gabos nakakombensir sa minilyon na intelihenteng parabasa na an ginikanan kan librong ini superyor kisa sa tawo.a

Alagad gurano kaestriktong giniyahan nin Dios an pagsurat kan Biblia? May mga nagsasabi na idinikta nia an Biblia nin termino por termino. An iba nagsasabi na an ipinasabong sana nia iyo an mga ideya na yaon sa Biblia, bakong an mga tataramon. Pero an totoo, an pagpasabong dai puedeng limitaran sa saro sanang proseso, huli ta an Dios nagtaram “sa dakol na paagi sa satong mga apoon paagi sa mga propeta.” (Hebreo 1:1; ikomparar an 1 Corinto 12:6.) Sa minasunod na artikulo, sisiyasaton niato an mga paagi na an Dios nagtaram sa mga 40 kagsurat na tawo na nagsurat kan Biblia.

[Nota sa Ibaba]