“Dai Pababayaan ni Jehova an Saiyang Banwaan”
“Dakol nanggayod an kalamidad kan matanos, alagad sa gabos na iyan iliniligtas sia ni Jehova.”—SALMO 34:19.
1, 2. (a) Paano binebendisyonan ni Jehova an saiyang banwaan ngonyan? (b) Ano an napapaatubang sa dakol na Kristiano, asin anong mga hapot an minalataw?
BILANG kaotoban nin hula sa Biblia, an mga parasamba ki Jehova nag-eerok sa sarong espirituwal na paraiso. (2 Corinto 12:1-4) An Mga Saksi ni Jehova kabtang nin sarong internasyonal na kasararoan na mamimidbid sa pagkamoot asin pagkasararo. (Juan 13:35) Igwa sinda nin hararom asin mahiwas na kaaraman sa mga katotoohan kan Biblia. (Isaias 54:13) Kanigoan an pasasalamat ninda ki Jehova na tinatawan nia sinda kan pribilehio na magin mga bisita sa saiyang espirituwal na tolda!—Salmo 15:1.
2 Minsan ngani an gabos sa organisasyon ni Jehova nagkakamit nin espirituwal na prosperidad, an nagkapira garo baga namumuhay na medyo matoninong asin trangkilo mantang an iba nag-aagi nin laen-laen na klase nin makuring sakit. An dakol na Kristiano haloy na panahon na nasa makaheherak na kamugtakan asin daing natatanaw na kaginhawahan. Natural sana an panluluya nin boot sa siring na mga sirkumstansia. (Talinhaga 13:12) An mga kalamidad daw ebidensia nin pagkaanggot nin Dios? Si Jehova daw nagtatao nin espesyal na proteksion sa nagkapirang Kristiano mantang pinababayaan an iba?
3. (a) Si Jehova daw an responsable sa mga kasakitan na inaagihan kan saiyang banwaan? (b) Taano ta inaagihan minsan kan fiel na mga parasamba ki Jehova an pagdusa nin tawo?
3 An Biblia minasimbag: “Kun binabalo, dai nin siisay man na magsabi: ‘Binabalo ako nin Dios.’ Huli ta paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Si Jehova an Paraingat asin Parasuportar sa saiyang banwaan. (Salmo 91:2-6) “Dai pababayaan ni Jehova an saiyang banwaan.” (Salmo 94:14) Dai boot sabihon kaini na an fiel na mga parasamba dai mag-aagi nin pagdusa. An presenteng palakaw nin mga bagay sa kinaban pinamamahalaan nin mga indibiduwal na bakong sangkap. An dakol nasosobornohan, asin an nagkapira talagang maraot. Mayo ni saro sa sainda an naglalaom ki Jehova para sa kadonongan. Ini nagbubunga nin grabeng pagdusa nin tawo. Linilinaw kan Biblia na dai perming malilikayan kan banwaan ni Jehova an mamondong mga epekto kan pagkabakong sangkap asin karatan nin tawo.—Gibo 14:22.
An Maimbod na mga Kristiano Naglalaom na Magdusa
4. Ano an malalaoman kan gabos na Kristiano sagkod na sinda nabubuhay sa maraot na palakaw na ini nin mga bagay, asin taano?
4 Minsan ngani bakong kabtang kan kinaban, an mga parasunod ni Jesus namumuhay sa tahaw kan palakaw na ini nin mga bagay. (Juan 17:15, 16) Si Satanas ibinubuyagyag sa Biblia bilang an nangingibabaw na puersa sa likod kan kinaban na ini. (1 Juan 5:19) Huli kaini, makalalaom an gabos na Kristiano na maabot an panahon na kaipuhan na atubangon ninda an magagabat na problema. Nasa isip iyan, si apostol Pedro nagsasabi: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba. Alagad tumangon sia nindo, na marigon sa pagtubod, sa pakaaram na an siring man na mga pagdusa nangyayari sa bilog na kasararoan nin saindong mga tugang sa kinaban.” (1 Pedro 5:8, 9) Iyo, an bilog na kasararoan nin mga Kristiano makalalaom nin mga pagdusa.
5. Paano lininaw ni Jesus na an fiel na mga Kristiano mag-aagi nin mamondong mga bagay sa buhay?
5 Dawa kun hararom an pagkamoot niato ki Jehova asin maimbod kita sa saiyang mga prinsipyo, mag-aagi kita nin mamondong mga bagay sa buhay. Lininaw ini ni Jesus sa saiyang ilustrasyon na nasusurat sa Mateo 7:24-27, na dian pinaglaen nia an mga nagkukuyog sa saiyang mga tataramon asin an mga dai nagkukuyog. Ikinomparar nia an makinuyog na mga disipulo sa sarong madonong na tawo na nagtotogdok nin harong sa ibabaw nin matagas na gapo. An mga dai nagkukuyog sa saiyang mga tataramon ibinaing nia sa sarong lolong na tawo na nagtotogdok kan saiyang harong sa baybay. Pakatapos nin sarong makosog na bagyo, solamente an harong na natotogdok sa ibabaw kan gapo an nagdanay. Mangnoha na sa kaso kan harong kan madonong na tawo, “buminulos an oran asin nagdatong an baha asin nagdoros patin hinampak nin makuri an harong na idto, alagad ta iyan dai nagaba.” Si Jesus dai nanuga na an madonong na tawo perming magigin matoninong asin trangkilo. Imbes, an kadonongan kan tawong iyan aandamon sia na sagupaon an bagyo. An kaagid na ideya ipinasasabot sa ilustrasyon kan parasabwag. Dian ipinaliliwanag ni Jesus na minsan an makinuyog na mga parasamba na “igwa nin marahay asin matanos na puso” ‘magbubunga na may pakatagal.’—Lucas 8:4-15.
6. Sa ilustrasyon ni Pablo dapit sa bakong masosoloon na materyales, siisay an nag-aagi sa malaad na pagbalo?
6 Sa pagsurat sa mga taga-Corinto, si apostol Pablo naggamit nin metaporikong pananaram tanganing iilustrar an pangangaipo nin durableng mga kualidad na makatatabang sa sato na atubangon an mga pagbalo. An bakong masosoloon na materyales na arog baga nin bulawan, pirak, asin mamahalon na mga gapo katimbang nin diosnon na mga kualidad. (Ikomparar an Talinhaga 3:13-15; 1 Pedro 1:6, 7.) Sa ibong na lado, an makalaman na mga ugale ibinabaing sa nasosolong materyales. Dangan sinabi ni Pablo: “An gibo nin lambang saro mahahayag, huli ta an aldaw an mapahayag kaiyan, huli ta iyan mahahayag paagi sa kalayo; asin an kalayo man sana an mabatid kun baga ano an gibo nin lambang saro. Kun an gibo nin siisay man na saiyang itinogdok dian magdanay, sia maako nin balos.” (1 Corinto 3:10-14) Digdi liwat, ipinaliliwanag kan Biblia na kita gabos seguradong mapapaatubang sa sarong klase nin malaad na pagbalo.
7. Sono sa Roma 15:4, paano makatatabang sa sato an Kasuratan na matagalan an mga pagbalo?
7 Kadakol kan pagkasaysay sa Biblia dapit sa maimbod na mga lingkod nin Dios na kinaipuhan na magtagal nin mga kalamidad, na kun beses sa halawig na mga panahon. Pero, dai sinda pinabayaan ni Jehova. Posible na an mga halimbawang iyan an nasa isip ni apostol Pablo kan sabihon nia: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) Estudyare an mga halimbawa nin tolong lalaki na, minsan ngani dayupot an relasyon sa Dios, nagdusa nin dakol na kalamidad.
Kun Ano an Satong Manonodan sa mga Pagkasaysay sa Biblia
8. Ano an tinogotan ni Jehova na mangyari sa kaso ni Jose, asin gurano kahaloy?
8 An aki ni Jacob na si Jose tinawan ni Jehova nin pabor poon sa pagkaaki. Pero, minsan ngani bako niang sala, nagdusa sia nin sunod-sunod na kalamidad. Sia dinukot asin pinagringisan kan saiya mismong mga tugang. Ipinabakal sia bilang oripon sa ibang daga kun saen sia putik na sinahotan asin ‘ibinilanggo.’ (Genesis 40:15) Duman, “paagi sa mga ramal pinasakitan ninda an saiyang mga bitis, namugtak sa mga batbat an saiyang kalag.” (Salmo 105:17, 18) Durante kan saiyang pagkaoripon asin pagkabilanggo, daing duwa-duwa na si Jose paorootrong nakimaherak ki Jehova na logod makalda sia. Pero, sa laog nin mga 13 taon, minsan ngani pinakosog ni Jehova sa laen-laen na paagi, nagmamata sia kada aga na saro pa man giraray na oripon o bilanggo.—Genesis 37:2; 41:46.
9. Ano an kinaipuhan na tagalan ni David sa laog nin nagkapirang taon?
9 An sarong kaagid na kaso iyo an ki David. Kan si Jehova nagpipili nin kualipikadong lalaki na mamamahala sa Israel, sia nagsabi: “Nakua ko si David na aki ni Jese, lalaking nakaoyon sa sakong puso.” (Gibo 13:22) Sa ibong kan saiyang may pabor na kamugtakan sa mga mata ni Jehova, grabe an pagdusa ni David. Huli sa peligrong puedeng ikagadan, pirang taon siang nagtago sa kaawagan, sa mga lungib, sa mga gatak, asin sa ibang daga. Hinahanap na garo layas na hayop, nakamate sia nin panluluya nin boot asin takot. Minsan siring, nagtagal sia paagi sa kosog ni Jehova. Tamang makasasabi si David gikan sa saiya mismong eksperyensia: “Dakol nanggayod an kalamidad kan matanos, alagad sa gabos na iyan iliniligtas sia ni Jehova.”—Salmo 34:19.
10. Anong grabeng kalamidad an nangyari ki Nabot asin sa saiyang pamilya?
10 Kan kaaldawan ni propeta Elias, 7,000 sana sa Israel an dai nagluhod sa falsong dios na si Baal. (1 Hade 19:18; Roma 11:4) Si Nabot, na posibleng saro sa sainda, nagin biktima nin teribleng inhustisya. Namatean niang mapasopog huli sa sahot na paglanghad. Napatunayan na may sala, sinentensiahan sia paagi sa dekreto nin hade na magadan paagi sa paggapo, asin an saiyang dugo dinilaan nin mga ayam. Pati an saiyang mga aki ginadan! Pero, inosente sia sa sahot. An mga saksi tumang sa saiya putikon. An bilog na pangyayari pakana ni Reyna Jezabel tanganing masadiri kan hade an ubasan ni Nabot.—1 Hade 21:1-19; 2 Hade 9:26.
11. Ano an sinasabi sa sato ni apostol Pablo manongod sa fiel na mga lalaki asin babae sa kasaysayan kan Biblia?
11 Si Jose, David, asin Nabot tolo sana sa dakol na fiel na lalaki asin babae na sinambit sa Biblia na nagdusa nin mga kalamidad. Si apostol Pablo nagsurat nin makasaysayan na pagrepaso kan mga lingkod ni Jehova sa nag-aging mga panahon. Dian nagtaram sia dapit sa mga “inako . . . an pagbalo sa sainda paagi sa mga pag-olog-olog asin paglatigo, sa katotoohan, labi pa kaiyan, paagi sa mga gapos asin mga bilanggoan. Sinda ginapo, sinda pinagbista, sinda pinaglagadi, sinda nagadan paagi sa espada, naggurubing sinda nin anit nin karnero, nin anit nin kanding, mantang sinda nasa kadukhaan, nasa kahorasaan, minamaltrato; asin an kinaban bakong maninigo sa sainda. Sinda naglagawlagaw sa mga desierto asin kabukidan asin mga lungib patin mga kueba kan daga.” (Hebreo 11:36-38) Alagad ta dai sinda pinabayaan ni Jehova.
Si Jehova May Pagmakolog sa mga Nagdudusa
12. Ano an pira sa makuring mga sakit na inaagihan kan Mga Saksi ni Jehova ngonyan?
12 Kumusta man an banwaan ni Jehova ngonyan? Bilang sarong organisasyon, kita makasasarig na poprotehiran kita nin Dios asin ligtas na makababalyo sa huring mga aldaw saka sa dakulang kahorasaan. (Isaias 54:17; Kapahayagan 7:9-17) Minsan siring, bilang mga indibiduwal, rekonosido niato na “an panahon asin pagkanorongod” nangyayari sa gabos na tawo. (Eclesiastes 9:11) Ngonyan kadakol na fiel na Kristiano an nagdudusa nin mga kalamidad. An iba nagtatagal nin grabeng kadukhaan. An Biblia nagtataram dapit sa Kristianong “mga ilo asin babaeng balo” na may kahorasaan. (Santiago 1:27) An iba nagdudusa dahelan sa natural na mga kalamidad, guerra, krimen, pag-abuso sa kapangyarihan, helang, asin kagadanan.
13. Anong masakit na mga eksperyensia an bago pa sanang irineport?
13 Halimbawa, sa saindang 1996 na report sa Namamahalang Grupo kan Mga Saksi ni Jehova, an mga sangang opisina kan Watch Tower nagsaysay na an nagkapira sa satong mga tugang na lalaki asin babae nabibilanggo sa makamomondong marhay na mga kamugtakan huli sa saindang pagsusog sa mga prinsipyo kan Biblia. Tolong kongregasyon sa sarong nasyon sa Amerika del Sur an nawara kan an ginatos na Saksi puersahon kan mga grupong gerilya na mag-ebakwit. Sa sarong nasyon sa Solnopan na Aprika, nagadan an nagkapirang Saksi na naabotan kan bakbakan nin guerra sibil. Sa sarong nasyon sa Amerika Sentral, an dati nang kritikal na situwasyon sa pinansial kan nagkapirang tugang naggrabe huli sa bagyo. Sa iba pang mga lugar na an kadukhaan asin mga kakulangan nin kakanon tibaad bakong magabat na mga problema, an maraot na mga impluwensia tibaad magpaluya kan kagayagayahan nin nagkapira. An iba nagagabatan sa sakit nin pagbuhay sa presenteng aldaw. Huli sa pagkaindiperente kan publiko, an iba pa tibaad manluya an boot kun sinda naghuhulit kan maogmang bareta kan Kahadean.
14. (a) Ano an manonodan ta sa halimbawa ni Job? (b) Imbes na mag-isip nin negatibo, ano an maninigo niatong gibohon kun kita napupurisaw?
14 An mga situwasyon na ini dai dapat na interpretaron bilang ebidensia kan pagkaanggot nin Dios. Girumdoma an kaso ni Job asin an dakol na kasakitan na pinagdusahan nia. Sia “lalaking daing kasalan asin matanos.” (Job 1:8) Siertong pinanluyahan nin boot si Job kan sahotan sia ni Elifas nin salang gibo! (Job, kapitulo 4, 5, 22) Habo niatong magin marikas sa pagkonklusyon na kita nag-aagi nin mga kalamidad huli ta minsan paano nasudya an linalaoman sa sato ni Jehova o huli ta hinale na ni Jehova an saiyang bendisyon. An negatibong kaisipan sa atubangan nin kahorasaan puedeng magpaluya sa satong pagtubod. (1 Tesalonica 3:1-3, 5) Kun napupurisaw, pinakamarahay na horophoropon an bagay na si Jehova asin si Jesus harani sa mga matanos ano man an mangyari.
15. Paano niato naaaraman na hararom an pagmakolog ni Jehova manongod sa mga kalamidad na pinagdudusahan kan saiyang banwaan?
15 Pinakokosog ni apostol Pablo an satong boot kan sia magsabi: “Siisay an mabulag sa sato sa pagkamoot kan Cristo? An kahorasaan daw o kasakitan o paglamag o gutom o kahubaan o panganib o espada? . . . Ako naniniwala na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang makapasusuhay sa sato hale sa pagkamoot nin Dios na yaon dian ki Cristo Jesus na satong Kagurangnan.” (Roma 8:35, 38, 39) Hararom an pagmakolog ni Jehova sa sato asin aram nia an satong mga pagdusa. Mantang sarong dulag, si David nagsurat: “An mga mata ni Jehova nakatorohok sa mga matanos, asin an saiyang mga talinga nagdadangog sa saindang mga pag-agrangay. Si Jehova harani sa mga nababaak an puso.” (Salmo 34:15, 18; Mateo 18:6, 14) An satong langitnon na Ama may pagmakolog sa sato asin naheherak sa mga nagdudusa. (1 Pedro 5:6, 7) Itinatao nia an satong kaipuhan tanganing makatagal, ano man an pagdusa na tibaad agihan niato.
An mga Balaog ni Jehova Nagsusustenir sa Sato
16. Anong probisyon hale ki Jehova an nakatatabang sa sato na makatagal, asin paano?
16 Minsan ngani dai kita makalalaom nin buhay na daing kasakitan sa daan na palakaw na ini nin mga bagay, kita “dai pinababayaan.” (2 Corinto 4:8, 9) Si Jesus nanuga na tatawan an saiyang mga parasunod nin sarong paratabang. Sia nagsabi: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang, an espiritu kan katotoohan.” (Juan 14:16, 17) Kan Pentecostes 33 C.E., sinabi ni apostol Pedro sa mga naghihinanyog sa saiya na puede nindang akoon “an daing bayad na regalo nin banal na espiritu.” (Gibo 2:38) Tinatabangan daw kita ngonyan kan banal na espiritu? Iyo! An puersa aktiba ni Jehova tinatawan kita nin makangangalas na mga bunga: “Pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Galacia 5:22, 23) Ini gabos mahalagang marhay na mga kualidad na nagtatabang sa sato na makatagal.
17. Ano an nagkapirang katotoohan sa Biblia na nagpaparigon sa satong pagtubod asin determinasyon na mapasensiang maghalat ki Jehova?
17 An banal na espiritu tinatabangan man kitang masabotan na an presenteng mga kahorasaan “naagi sana asin magian” kun ikokomparar sa balos na buhay na daing katapusan. (2 Corinto 4:16-18) Kombensido kita na dai lilingawan nin Dios an satong mga ginibo asin an pagkamoot na ipinaheheling niato para sa saiya. (Hebreo 6:9-12) Sa pagbasa kan ipinasabong na mga tataramon kan Biblia, nararanga kita kan mga halimbawa nin fiel na mga lingkod kan suanoy na nagtagal nin dakol na kalamidad alagad inapod na maogma. Si Santiago nagsurat: “Mga tugang, gibohon na arogan sa pagdusa nin karatan asin sa paggibo nin pagpapasensia an mga propeta, na nagtaram sa ngaran ni Jehova. Uya! Inaapod tang maogma idtong mga nakatagal.” (Santiago 5:10, 11) An Biblia nanunuga nin “kapangyarihan na lihis sa ordinaryo” tanganing tumabang sa sato na matagalan an mga pagbalo. Binebendisyonan man kita ni Jehova kan paglaom na pagkabuhay liwat. (2 Corinto 1:8-10; 4:7) Paagi sa pagbasa kan Biblia aroaldaw asin paghorophorop sa mga panugang ini, pakokosogon niato an satong pagtubod asin an satong determinasyon na mapasensiang maghalat sa Dios.—Salmo 42:5.
18. (a) Sa 2 Corinto 1:3, 4, ano an iineenkaminar na gibohon niato? (b) Paano magigin gikanan nin karangahan asin kaginhawahan an Kristianong mga paraataman?
18 Dugang pa, itinao sa sato ni Jehova an espirituwal na paraiso na dian makakamtan ta an tunay na pagkamoot kan satong Kristianong mga tugang na lalaki asin babae. Kita gabos may kabtang sa pagranga sa kada saro. (2 Corinto 1:3, 4) Partikularmente an Kristianong mga paraataman puedeng magin pangenot na gikanan nin karangahan asin kaginhawahan. (Isaias 32:2) Bilang “balaog na mga lalaki,” isinugo sinda na magparigon sa mga nagdudusa, “magtaram na may pagranga sa mga kalag na nagmomondo nin makuri,” asin ‘magsuportar sa mga maluya.’ (Efeso 4:8, 11, 12; 1 Tesalonica 5:14) An kamagurangan ineenkaminar na gamiton nin marahay an mga magasin na Torrengbantayan asin Awake!, siring man an iba pang publikasyon na itinatao kan “fiel asin madonong na oripon.” (Mateo 24:45-47) An mga ini bastante sa hatol na basado sa Biblia na makatatabang sa sato na resolberan—asin ebitaran pa ngani—an nagkapira sa mga problema na nagpapahadit sa sato. Arogon logod niato si Jehova paagi sa pagranga asin pagparigon sa boot kan kada saro sa masakit na mga panahon!
19. (a) Ano an nakatatabang sa sato na malikayan an nagkapirang kasakitan? (b) Sa katapustapusi, kiisay kita dapat na magtiwala, asin ano an magpapangyari sa sato na atubangon an mga pagbalo?
19 Mantang kita orog na naghahaloy sa huring mga aldaw asin naggagrabe an mga kamugtakan sa presenteng palakaw nin mga bagay, ginigibo kan mga Kristiano an makakaya ninda na malikayan an mga kalamidad. (Talinhaga 22:3) An marahay na paghusgar, marahay na kaisipan, asin kaaraman sa mga prinsipyo kan Biblia makatatabang sa sato na gumibo nin madonong na mga desisyon. (Talinhaga 3:21, 22) Kita naghihinanyog sa Tataramon ni Jehova asin nagkukuyog dian tanganing malikayan an paggibo nin dai kaipuhan na mga sala. (Salmo 38:4) Minsan siring, narerealisar niato na dai biyong mahahale kan minsan guranong paghihingoa niato an pagdusa sa satong buhay. Sa palakaw na ini nin mga bagay, an dakol na matanos napapaatubang sa grabeng mga kasakitan. Minsan siring, kaya niatong atubangon an mga pagbalo sa sato na may lubos na kompiansa na “dai pababayaan ni Jehova an saiyang banwaan.” (Salmo 94:14) Asin aram ta na an palakaw na ini nin mga bagay asin an makuring mga sakit dian madali nang mawara. Kun siring, magdesisyon logod kita na “dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.”—Galacia 6:9.
Ano an Satong Nanodan?
◻ Anong mga pagbalo an inaagihan kan bilog na kasararoan nin mga Kristiano?
◻ Anong mga halimbawa sa Biblia an nakatatabang sa sato na masabotan na an mga kalamidad bakong ebidensia nin pagkaanggot ni Jehova?
◻ Ano an namamatean ni Jehova manongod sa mga kasakitan na pinagdudusahan kan saiyang banwaan?
◻ Ano an nagkapira sa mga balaog gikan ki Jehova na nakatatabang sa sato na matagalan an mga pagbalo?
[Mga retrato sa pahina 10]
Si David, Nabot, asin Jose tolo na nagdusa nin mga kalamidad