Ginibo Ninda an Kabotan ni Jehova

Naolang nin Sarong Babae na May Marahay na Paghusgar an Grabeng Kapahamakan

AN SARONG babae na marahay an kaisipan napangagom nin sarong daing kamanungdanan na lalaki​—iyan an kamugtakan ni Abigail asin ni Nabal. Si Abigail “marahay an paghusgar asin magayon an itsura.” Sa kabaliktaran, si Nabal “daing herak asin maraot sa saiyang mga gibo.” (1 Samuel 25:3) An mga pangyayaring may labot sa sala an pagkapadis na mag-agom na ini nagpangyari na an saindang ngaran permanenteng makaiba sa kasaysayan nin Biblia. Helingon niato kun paano.

Sarong Kabootan na Pinagbasangbasang

Ika-11 siglo B.C.E. kaidto. Si David linahidan bilang hade sa ngapit nin Israel, alagad imbes na mamahala sia nagdudulag. An namamahalang hade, si Saul, determinadong gadanon sia. Bilang resulta, si David napiritan na mamuhay bilang dulag. Sia asin an saiyang mga 600 na kairiba sa katapustapusi nakanompong nin pailihan sa kaawagan nin Paran, sa timog nin Juda asin pasiring sa kaawagan nin Sinai.​—1 Samuel 23:13; 25:1.

Mantang yaon duman, nakanuparan ninda an mga pastor na nagtatrabaho sa sarong lalaki na an ngaran Nabal. An mayaman na gikan na ini ni Caleb igwa nin 3,000 na karnero asin 1,000 kanding, asin pinatutusaran nia an saiyang mga karnero sa Carmelo, sarong siudad sa timog kan Hebron asin tibaad mga 40 kilometros sana hale sa Paran.a Tinabangan ni David asin kan saiyang mga tawohan an mga pastor ni Nabal na guardiahan an saindang mga aripompon tumang sa mga parahabon na naglalagawlagaw sa kaawagan.​—1 Samuel 25:​14-​16.

Mientras tanto, nagpoon na an pagtusar sa mga karnero sa Carmelo. Ini sarong garo fiestang okasyon, kaagid kan panahon nin pag-ani para sa mga paraoma. Iyan panahon man nin buka an palad na pagkamatinao, na an mga kagsadiri nin karnero binabalosan an mga nagtrabaho para sa sainda. Kaya si David bakong pangahas kan isugo nia an sampulong lalaki sa siudad nin Carmelo na maghagad nin kakanon ki Nabal bilang kabayadan sa paglilingkod na ginibo ninda para sa saiyang mga aripompon.​—1 Samuel 25:​4-9.

An simbag ni Nabal harayong marhay sa pagkamatinao. “Siisay si David?” an pagtuya nia. Dangan, ipinaririsa na si David asin an saiyang mga tawohan hamak sanang nagdurulag na surugoon, sia naghapot: “Kaipuhan ko daw na kuanon an sakong tinapay asin an sakong tubig asin an sakong karne na sakong binuno para sa sakong mga paratusar patin itao iyan sa mga tawo na dai ko ngani aram kun baga saen nagharale?” Kan madangog ini ni David, sinabi nia sa saiyang mga tawohan: “Ihagkos kan lambang saro an saiyang espada!” Mga 400 na lalaki an inandam an sadiri sa ralaban.​—1 Samuel 25:​10-​13.

An Marahay na Paghusgar ni Abigail

An mapan-insultong mga tataramon ni Nabal naaraman kan saiyang agom na babae, si Abigail. Posibleng ini bakong an primerong pangyayari na kinaipuhan niang mangoltanan asin makipagkatoninongan para ki Nabal. Sa paano man, si Abigail tolos-tolos na naghiro. Dai ipinaaram ki Nabal, sia nagtipon nin probisyones​—kabale an limang karnero asin bastanteng kakanon—​asin huminale tanganing sabaton si David sa kaawagan.​—1 Samuel 25:​18-​20.

Kan maheling ni Abigail si David, sia tolos-tolos na naghorohod sa atubangan nia. “Dai logod ipagbugtak kan sakuyang kagurangnan an saiyang puso sa daing kamanungdanan na tawong si Nabal,” an pakiolay nia sa saiya. “Kun manongod sa regalong ini nin bendisyon na dinara kan saimong surugoon na babae sa sakuyang kagurangnan, iyan dapat na itao sa hoben na mga lalaki na nagsusurunod sa sakuyang kagurangnan.” Idinugang nia: “Dai logod ini [an situwasyon manongod ki Nabal] magin dahelan nin pagripaydipay para sa saimo o ikasisingkog sa puso kan sakuyang kagurangnan.” An Hebreong termino digdi na trinadusir na “pagripaydipay” nagpaparisa nin pagkakonsensia. Kaya pinatanidan ni Abigail si David tumang sa pabiglabiglang paghiro na pagbabasolan nia sa huri.​—1 Samuel 25:​23-​31.

Si David naghinanyog ki Abigail. “Pag-omawon an saimong marahay na kaisipan, asin pag-omawon ka na suminagang sa sako sa aldaw na ini na dai magkasala sa dugo,” an sabi nia sa saiya. “Kun dai ka naghidale tangani na sabaton ako, sierto na mayo kutana nin natada ki Nabal sagkod na mag-aga nin siisay man na nag-iihi sa lanob.”b​—1 Samuel 25:​32-​34.

Mga Leksion Para sa Sato

An pagkasaysay na ini sa Biblia nagpapaheling na bako nanggad na sala para sa sarong diosnon na babae na gumibo nin angay na pagsadiring boot kun iyan kinakaipuhan. Si Abigail naghiro tumang sa mga kagustohan kan saiyang agom na lalaki, si Nabal, alagad dai sia kinokondenar kan Biblia sa bagay na ini. Al kontraryo, inoomaw sia kaiyan bilang sarong babae na igwa nin marahay na paghusgar asin marahay na kaisipan. Paagi sa pagsadiring boot sa kritikal na situwasyon na ini, ilinigtas ni Abigail an buhay nin dakol.

Minsan ngani sa pankagabsan an agom na babae maninigong magpaheling nin espiritu nin diosnon na pagpapasakop, puede na sia tama sanang dai umoyon sa saiyang agom na lalaki kun nakataya an tanos na mga prinsipyo. Siempre, maninigo siang magmaigot na padanayon an “mahoyo asin maboot na espiritu” asin dai maninigong independienteng humiro huli sana sa pagsudosudo, kapalangkawan, o pagrebelde. (1 Pedro 3:4) Minsan siring, an sarong diosnon na agom na babae dai maninigong mapiritan na gumibo nin ano man na bagay na aram nia na bako nanggad na madonong o nagbabalgar sa mga prinsipyo kan Biblia. Tunay nanggad, an kasaysayan ni Abigail nagtatao nin sarong solidong argumento tumang sa mga nag-iinsister na ilinaladawan kan Biblia an mga babae na mga oripon sana.

An pagkasaysay na ini nagtotokdo man sa sato manongod sa pagpopogol sa sadiri. Kun beses, ipinaheling nin lubos ni David an kualidad na ini. Halimbawa, sia nagsayumang gadanon an benggatibong si Hadeng Saul, dawa ngani sia igwa nin dakol na oportunidad na gibohon an siring asin an kagadanan ni Saul mataong katoninongan ki David. (1 Samuel 24:​2-7) Kabaliktaran, kan sia mapan-insultong sinayumahan ni Nabal, si David dai nagin puka asin nagsumpa na mabalos. Ini malinaw na patanid sa mga Kristiano, na nagmamaigot na ‘dai magbalos nin maraot sa maraot sa kiisay man.’ Sa gabos na sirkumstansia, sinda maninigong sumunod sa konseho ni Pablo: “Kun mahihimo, sagkod na iyan nasa saindo, makipagkatoninongan sa gabos na tawo. Dai kamo magbalos, mga namomotan, kundi magtao nin lugar sa karatan.”​—Roma 12:​17-​19.

[Mga Nota sa Ibaba]

[Retrato sa pahina 15]

Si Abigail nagdadara nin mga regalo ki David