Mga Sirkero kan Kakakantilan sa Bukid

NASA kalabaan kan solnopan na baybayon kan Gadan na Dagat an suanoy na siudad asin nakapalibot na kaawagan na inaapod En-gedi. An magapong mga paso asin ampas kan lugar na iyan pinakamarahay na erokan para sa kanding na bukidnon sa Dagang Panuga, kapareho kan mga maheheling digdi.

An hayop na ini na segurado an tindog kabilang sa mga ngangalasan sa linalang na mga hayop. Buksan niato an Biblia asin masdan na marhay an kawiliwiling hayop na ini.

“An Haralangkaw na Bukid Para sa mga Kanding na Bukidnon”

Siring kaiyan an awit kan salmista. (Salmo 104:18) An mga kanding na bukidnon may kakayahan na marhay na mamuhay sa haralangkaw na lugar! An mga iyan maliksing marhay, na naglalakaw sa garang-gasangon na daga na may dakulang kompiansa asin rikas. An sarong dahelan kaini iyo an pagkagibo sa mga kuko kaiyan. An baak kaiyan puedeng bumuka sa gabat kan kanding, na pinangyayari an hayop na marigon kun nagtitindog o naglalakaw sa hayakpit na mga nakauldot na gapo.

An mga kanding na bukidnon igwa man nin ekstraordinaryong panimbang. Puede iyan na lumukso nin hararayo asin humugpa sa sarong gati na haros tama sana na makatongtong an apat na bitis. Sarong beses an biologong si Douglas Chadwick naobserbaran an saro pang klase nin kanding na bukidnon na ginagamit an panimbang kaiyan tanganing dai malaom sa sarong gati na hayakpit na gayo tangani na makabirik iyan. Sia nagsasabi: “Pakatapos na masalimbadan an sunod na gati sa ibaba na mga 120 metros an rayo, masarig na itinongtong kan kanding an mga bitis kaiyan na nasa enotan asin luway-luway na tuminuwad na garo iyan nag-iitok. Mantang pogol ko an sakong paghangos, nagpadagos an kanding sagkod na an mga bitis kaiyan na nasa hudian humugpa kaya iyan nakabirik na.” (National Geographic) Bakong makangangalas na an mga kanding na bukidnon inapod na “mga sirkero kan kakakantilan sa bukid”!

‘Aram daw Nindo Kun Noarin Nangangaki an mga Kanding na Bukidnon?’

Masosopgon na hayop an mga kanding na bukidnon. Mas gusto nindang mag-erok na suhay sa tawo. Sa katunayan, nasasakitan an mga tawo na makarani nin igo tangani na maobserbaran iyan sa natural na kamugtakan kaiyan. Sa siring, an Kagsadiri kan “mga hayop sa rinibong kabukidan” tama sanang makahapot sa tawong si Job: “Ano naaraman mo na an itinalaan na panahon para sa pangangaki kan mga kanding na bukidnon kan kantil?”​—Salmo 50:​10; Job 39:1.

An naturalesa na itinao nin Dios nagsasabi sa kanding na babae na bukidnon kun noarin panahon nang mangaki. Naghahanap sia nin ligtas na lugar asin nangangaki nin saro o duwang ogbon, na sa parate sa katapusan kan Mayo o sa Hunyo. An bagong mamundag na mga ogbon nagigin segurado an tindog sa laog sana nin pirang aldaw.

“Sarong Makawiwiling Usang Babae Asin Magayon na Kanding na Bukidnon”

An madonong na si Hadeng Salomon sinadol an mga agom na lalaki: “Mag-ogma ka sa agom na babae kan saimong pagkabarobata, sarong makawiwiling usang babae asin magayon na kanding na bukidnon.” (Talinhaga 5:​18, 19) Bakong katuyohan kaini na menuson an mga babae. Minalataw na nasasambitan ni Salomon an kagayonan, gayon nin hiro, asin iba pang nangongorog na mga kualidad kan mga hayop na ini.

Kabilang an kanding na bukidnon sa kadakol na ‘nabubuhay na kalag’ na nagtatao nin dakulaon na patotoo sa kadonongan kan Kaglalang. (Genesis 1:​24, 25) Dai daw kita naoogma na pinalibotan kita nin Dios nin kadakol na kawiliwiling linalang?

[Pasasalamat para sa pinagkuanan kan retrato sa pahina 24]

Sa karahayan nin boot kan Unibersidad nin Atenas