Kamo daw Magigin Fiel Arog ni Elias?
“Isosobol ko sa saindo si Elias na propeta bago umabot an dakula asin makangingirhat na aldaw ni Jehova.”—MALAQUIAS 4:5.
1. Anong krisis an nangyari pakapag-istar kan Israel nin mga 500 na taon sa Dagang Panuga?
“DAGA na nagbobolos nin gatas asin tangguli.” (Exodo 3:7, 8) Iyan an itinao ni Jehova Dios sa mga Israelita pakapatalingkasa nia sa sainda sa pagkaoripon sa Egipto kan ika-16 na siglo B.C.E. Alagad uya! Limang siglo na an nag-agi, asin ngonyan an sampulong tribong kahadean nin Israel nasa makuring kakulangan nin kakanon. Masakit na makakua nin ano man na berdeng doot. Nagagadan an mga hayop, asin tolo may kabangang taon nang dai nag-ooran. (1 Hade 18:5; Lucas 4:25) Ano an responsable sa kalamidad na ini?
2. Ano an dahelan kan nasyonal na krisis sa Israel?
2 Apostasiya an dahelan kan krisis na ini. Linalapas an Ley nin Dios, inagom ni Hadeng Acab an prinsesa nin Canaan na si Jezabel asin tinogotan nia ini na ilaog sa Israel an pagsamba ki Baal. Mas maraot pa, iginibo nia nin templo an falsong dios na ini sa Samaria, an kabiserang siudad. Tara, an mga Israelita napatubod na an pagsamba ki Baal matao sa sainda nin bastanteng ani! Minsan siring, siring sa ipinatanid ni Jehova, namemeligro sinda ngonyan na ‘malaglag sa saindang marahay na daga.’—Deuteronomio 7:3, 4; 11:16, 17; 1 Hade 16:30-33.
Sarong Pambihirang Pagbalo sa Pagka-Dios
3. Paano dinara ni propeta Elias an atension sa tunay na problema kan Israel?
3 Kan magpoon an makuring kakulangan nin kakanon, an fiel na propeta nin Dios na si Elias sinabihan si Hadeng Acab: “Mantang nabubuhay si Jehova na Dios nin Israel na sa saiyang atubangan ako nagtitindog, dai magkakaigwa nin ambon ni oran sa mga taon na ini, apuera sana sa pagboot kan sakuyang tataramon!” (1 Hade 17:1) Pakatapos na maeksperyensiahan an teribleng katotoohan kan kapahayagan na ini, binasol kan hade si Elias huli sa pagdara nin ostrasismo sa Israel. Alagad si Elias nagsimbag na si Acab asin an saiyang harong an dapat basolon huli sa saindang apostasiya bilang mga parasamba ki Baal. Tanganing resolberan an isyu, sinadol kan propeta ni Jehova si Hadeng Acab na tiponon an bilog na Israel sa Bukid nin Carmelo kaiba an 450 propeta ni Baal asin 400 na propeta kan sagradong palo. Si Acab asin an saiyang mga sakop nagtiripon duman, na posibleng naglalaom na an okasyon na iyan an matapos sa tigmara. Alagad dinara ni Elias an atension sa mas importanteng isyu. “Sagkod noarin,” an hapot nia, “kamo mag-uurong-sulong sa duwang magkalaen na opinyon? Kun si Jehova an tunay na Dios, sumunod kamo sa saiya; alagad kun si Baal, sumunod kamo sa saiya.” Dai aram kan mga Israelita kun ano an sasabihon.—1 Hade 18:18-21.
4. Tanganing resolberan an isyu dapit sa pagka-Dios, ano an iprinoponer ni Elias?
4 Dakol nang taon na prinobaran kan mga Israelita na isalak an pagsamba ki Jehova sa Baalismo. Tanganing resolberan an isyu sa pagka-Dios, nagproponer ngonyan si Elias nin sarong kompetisyon. Sarong tarnera an aandamon nia para sa pag-atang, asin maandam man nin saro an mga propeta ni Baal. Dangan nagsabi si Elias: “Dapat kamong mag-arang sa ngaran kan saindong dios, asin ako man maarang sa ngaran ni Jehova; asin mangyari na an tunay na Dios na sumimbag paagi sa kalayo iyo an tunay na Dios.” (1 Hade 18:23, 24) Imahinara an kalayong naghihilig hale sa langit bilang simbag sa sarong pamibi!
5. Paano ibinuyagyag an kadaihan nin kamanungdanan kan pagsamba ki Baal?
5 Pinapoon ni Elias an mga propeta ni Baal. Inandam ninda an sarong tarnera para sa pag-atang asin ibinugtak iyan sa ibabaw kan altar. Dangan nagkiangkiang sinda sa palibot kan altar, na namimibi: “O Baal, simbaga kami!” Ini nagpadagos “poon aga sagkod odto.” “Pag-apod kamo sa pinakamakosog nindong tingog,” an pagduhagi ni Elias. Seguradong may importanteng pinagkakasibotan si Baal, o “tibaad sia natotorog asin kaipuhan na magmata!” Dai nahaloy nagkakatararanta na an mga propeta ni Baal. Uya! Ginugurot ninda nin daga an saindang sadiri, asin nagboborolos an dugo sa saindang mga lugad. Asin abaang ribok mantang an 450 gabos nagkukururahaw sa pinakamakosog nindang tingog! Alagad mayo nin simbag.—1 Hade 18:26-29.
6. Anong pag-andam an ginibo ni Elias para sa pagbalo sa pagka-Dios?
6 Si Elias naman ngonyan. Itinogdok nia liwat an altar ni Jehova, kinalihan an palibot kaiyan, asin inandam an atang. Dangan pinabuboan nia nin tubig an gatong asin an atang. Kagduwang darakulang dulay nin tubig an ibinubo sa ibabaw kan altar sagkod na mapano mismo an kali. Imahinara an pag-antisipar mantang namimibi si Elias: “O Jehova, an Dios ni Abraham, Isaac asin Israel, ngonyan maaraman logod na ika an Dios sa Israel asin ako an saimong lingkod patin paagi sa saimong tataramon na ginibo ko an gabos na bagay na ini. Simbaga ako, O Jehova, simbaga ako, tanganing an banwaan na ini makaaram na ika, Jehova, iyo an tunay na Dios asin ika mismo an nagpabalik kan saindang puso.”—1 Hade 18:30-37.
7, 8. (a) Paano sinimbag ni Jehova an pamibi ni Elias? (b) Ano an nagibo kan mga pangyayari sa Bukid nin Carmelo?
7 Bilang simbag sa pamibi ni Elias, ‘an kalayo ni Jehova naholog hale sa langit asin inubos an saiyang dolot, an mga kahoy, an mga gapo, patin an kabokabo, asin dinila an tubig na yaon sa kali.’ An banwaan nagralaob asin nagsarabi: “Si Jehova iyo an tunay na Dios! Si Jehova iyo an tunay na Dios!” (1 Hade 18:38, 39) Desididong naghiro ngonyan si Elias. Nagboot sia: “Dakopa nindo an mga propeta ni Baal! Dai nindo pagpabayaeng makadulag an saro man sa sainda!” Pakagadana sa sainda sa kasapaan nin Cison, napano nin maitom na mga panganoron an langit. Sa katapustapusi, tinapos nin makosog na oran an tigmara!—1 Hade 18:40-45; ikomparar an Deuteronomio 13:1-5.
8 Kanigoan kadakulang aldaw! Nanggana si Jehova sa pambihirang pagbalo na ini sa pagka-Dios. Dugang pa, huli sa mga pangyayaring ini an puso kan dakol na Israelita buminalik sa Dios. Digdi asin sa iba pang mga paagi, si Elias napatunayan na fiel bilang propeta, asin sia personal na may makahulang kabtang.
Maabot Pa daw “si Elias na Propeta”?
9. Ano an ihinula sa Malaquias 4:5, 6?
9 Kan huri, paagi ki Malaquias, an Dios naghula: “Uya! Isosobol ko sa saindo si Elias na propeta bago umabot an dakula asin makangingirhat na aldaw ni Jehova. Asin pababalikon nia an puso nin mga ama sa mga aking lalaki, asin an puso nin mga aking lalaki sa mga ama; tanganing dai ako dumatong asin hampakon nanggad an daga paagi sa pagtao kaiyan sa kalaglagan.” (Malaquias 4:5, 6) Nabuhay si Elias mga 500 na taon bago sinabi an mga tataramon na iyan. Mantang ini sarong hula, an mga Judio kan enot na siglo C.E. naghahalat sa pagdatong ni Elias tanganing otobon iyan.—Mateo 17:10.
10. Siisay an ihinulang Elias, asin paano niato naaaraman?
10 Siisay, kun siring, an madatong na Elias na ini? Nahayag kun siisay sia kan magsabi si Jesu-Cristo: “Poon kan kaaldawan ni Juan Bautista sagkod ngonyan an kahadean kan kalangitan iyo an pasohan na pinagmamaigotan na aboton nin mga tawo, asin an mga nagmamaigot nakapangangapot dian. Huli ta an gabos, an Mga Propeta asin an Ley, naghula sagkod ki Juan; asin kun boot nindo na akoon iyan, Sia mismo si ‘Elias na nakatalagang umabot.’” Iyo, si Juan na Bautisador an ihinulang katimbang ni Elias. (Mateo 11:12-14; Marcos 9:11-13) Sinabihan nin sarong anghel an ama ni Juan, si Zacarias, na si Juan magkakaigwa kan “espiritu asin kapangyarihan ni Elias” asin saiyang ‘aandamon para ki Jehova an sarong andam na banwaan.’ (Lucas 1:17) An bautismong ginibo ni Juan sarong hayag sa gabos na simbolo kan pagsolsol nin sarong indibiduwal sa saiyang mga kasalan tumang sa Ley, na magiya sa mga Judio pasiring ki Cristo. (Lucas 3:3-6; Galacia 3:24) Sa siring an gibohon ni Juan ‘napag-andam an sarong andam na banwaan para ki Jehova.’
11. Kan Pentecostes, ano an sinabi ni Pedro manongod sa “aldaw ni Jehova,” asin kasuarin iyan nangyari?
11 An gibohon ni Juan na Bautisador bilang “Elias” nagpaheling na may “aldaw ni Jehova” na harani na. Isinabi man ni apostol Pedro an kaharanihan kan aldaw na iyan na an Dios mahiro tumang sa saiyang mga kaiwal asin ililigtas an saiyang banwaan. Idinoon nia na an milagrosong mga pangyayari kan Pentecostes nin 33 C.E. kaotoban kan hula ni Joel manongod sa pagbubo kan espiritu nin Dios. Ipinaheling ni Pedro na ini mangyayari bago an “dakula asin mamuraway na aldaw ni Jehova.” (Gibo 2:16-21; Joel 2:28-32) Kaidtong 70 C.E. na inotob ni Jehova an saiyang Tataramon paagi sa pagpangyari sa mga hukbong Romano na gibohon an paghokom nin Dios sa nasyon na nagsikwal sa saiyang Aki.—Daniel 9:24-27; Juan 19:15.
12. (a) Ano an sinabi ni Pablo asin Pedro manongod sa madatong na “aldaw ni Jehova”? (b) Taano ta may seguradong mangyayari siring sa ilinaladawan kan gibohon ni Elias?
12 Minsan siring, may mangyayari pa pakalihis nin 70 C.E. Iinasosyar ni apostol Pablo an sarong madatong na “aldaw ni Jehova” sa presensia ni Jesu-Cristo. Saro pa, si apostol Pedro nagtaram manongod sa aldaw na iyan may koneksion sa “bagong kalangitan asin sarong bagong daga” na nasa ngapit pa. (2 Tesalonica 2:1, 2; 2 Pedro 3:10-13) Girumdomon na si Juan na Bautisador naggibo nin arog-Elias na gibohon bago nagdatong an “aldaw ni Jehova” kan 70 C.E. Ini gabos nagparisa na may mangyayari pa na irinerepresentar kan gibohon ni Elias. Ano iyan?
Igwa Sinda kan Espiritu ni Elias
13, 14. (a) Ano an pagkakaagid kan mga aktibidad ni Elias asin kan sa linahidan na mga Kristiano sa presenteng aldaw? (b) Ano an ginibo kan mga apostata kan Kakristianohan?
13 An gibohon ni Elias bako sanang may pagkakaagid sa mga aktibidad ni Juan na Bautisador kundi pati sa mga aktibidad kan linahidan na mga Kristiano sa delikadong peryodong ini na masagkod sa maabot na “aldaw ni Jehova.” (2 Timoteo 3:1-5) Igwa kan espiritu asin kapangyarihan ni Elias, sinda maimbod na mga parasuportar sa tunay na pagsamba. Asin kaipuhan nanggad ini! Pagkagadan kan mga apostol ni Cristo, nagkaigwa nin apostasiya sa tunay na Kristianismo, kun paanong nag-oswag sa Israel an pagsamba ki Baal kan kaaldawan ni Elias. (2 Pedro 2:1) An naghihingakong mga Kristiano nagpoon na isalak an Kristianismo sa mga doktrina asin kaugalean nin falsong relihion. Halimbawa, inaprobaran ninda an pagano asin bakong sono sa Kasuratan na katokdoan na an tawo igwa nin inmortal na kalag. (Eclesiastes 9:5, 10; Ezequiel 18:4) An mga apostata kan Kakristianohan uminontok sa paggamit kan ngaran kan iyo sanang tunay na Dios, si Jehova. Imbes, Trinidad an sinasamba ninda. Inarog man ninda an arog-Baal na paghorohod sa mga imahen ni Jesus asin kan saiyang ina, si Maria. (Roma 1:23; 1 Juan 5:21) Alagad bako sana iyan.
14 Poon kan ika-19 siglo, an mga namomoon sa mga iglesia nin Kakristianohan nagpoon na magpahayag nin pagduda manongod sa dakol na kabtang kan Biblia. Halimbawa, sinayumahan ninda an pagkasaysay kan Genesis dapit sa paglalang asin suminaludo sa teoriya nin ebolusyon, na inaapod iyan na “sientipiko.” Direktang kinontra kaini an mga katokdoan ni Jesu-Cristo asin kan saiyang mga apostol. (Mateo 19:4, 5; 1 Corinto 15:47) Minsan siring, arog ni Jesus asin kan saiyang enot na mga parasunod, sinusuportaran kan linahidan nin espiritung mga Kristiano ngonyan an pagkasaysay kan Biblia dapit sa paglalang.—Genesis 1:27.
15, 16. Kabaliktaran sa Kakristianohan, sairisay an igwa nin regular na mga suplay nin espirituwal na kakanon, asin paagi sa ano?
15 Sa paglaog kan kinaban sa “panahon kan katapusan,” an Kakristianohan tinamaan nin igo nin espirituwal na gutom. (Daniel 12:4; Amos 8:11, 12) Alagad an sadit na grupo nin linahidan na mga Kristiano igwa nin regular na mga suplay nin espirituwal na pagkakan na itinatao nin Dios “sa igong panahon,” kun paanong sinierto ni Jehova na si Elias napakakakan durante kan makuring kakulangan nin kakanon kaidtong saiyang kaaldawan. (Mateo 24:45; 1 Hade 17:6, 13-16) Dati inaapod na Internasyonal na mga Estudyante sa Biblia, an fiel na mga lingkod na ini nin Dios kan huri inako an sono sa Kasuratan na ngaran na Mga Saksi ni Jehova.—Isaias 43:10.
16 Namuhay si Elias sono sa saiyang ngaran, na an kahulogan “An Sakuyang Dios si Jehova.” Bilang an opisyal na magasin kan mga lingkod ni Jehova digdi sa daga, daing pagliwatliwat na ginagamit kan An Torrengbantayan an ngaran nin Dios. Sa katunayan, an ikaduwang luwas kaiyan (Agosto 1879) nagpahayag nin kompiansa na si Jehova an nagsusuportar sa magasin na iyan. An magasin na ini asin an iba pang mga publikasyon kan Watch Tower Society ibinubuyagyag an bakong sono sa Kasuratan na mga katokdoan kan Kakristianohan asin kan iba pang kabtang kan Dakulang Babilonya, an pankinaban na imperyo nin falsong relihion, mantang sinosorog an pagigin totoo kan Tataramon nin Dios, an Biblia.—2 Timoteo 3:16, 17; Kapahayagan 18:1-5.
Fiel Mantang Binabalo
17, 18. Ano an nagin reaksion ni Jezabel sa paggadan sa mga propeta ni Baal, alagad paano tinabangan si Elias?
17 An reaksion kan klero sa pagbuyagyag kapareho kan ki Jezabel kan maaraman nia na ginadan ni Elias an mga propeta ni Baal. Pinadarahan nia nin mensahe an fiel na propeta ni Jehova, na nagsumpang ipagagadan nia ini. Bako ining basta-basta sanang huma, huli ta dakol na sa mga propeta nin Dios an ipinagadan ni Jezabel. Huli sa takot, si Elias duminulag patimog-solnopan pasiring sa Beer-seba. Iwinalat duman an saiyang surogoon, nagdagos pa sia, pasiring sa kaawagan, na namimibing magadan. Alagad dai binayaan ni Jehova an saiyang propeta. May anghel na nagtunga ki Elias tanganing andamon sia para sa halawig na pagbaklay pasiring sa Bukid nin Horeb. Sa siring nag-ako sia nin ikabubuhay sa laog kan 40 aldaw na pagbaklay nin labing 300 kilometros. Sa Horeb, nakipag-olay sa saiya an Dios pakatapos nin sarong makangingirhat na pagpaheling nin kapangyarihan paagi sa sarong makosog na doros, linog, asin kalayo. Mayo si Jehova sa mga paheling na ini. Iyan mga kapahayagan kan saiyang banal na espiritu, o puersa aktiba. Dangan nakipag-olay si Jehova sa saiyang propeta. Imahinara kun paano pinakosog kan eksperyensiang ini si Elias. (1 Hade 19:1-12) Kumusta kun kita, arog ni Elias, medyo natatakot kun hinuhuma kan mga kaiwal nin tunay na pagsamba? An saiyang eksperyensia maninigong makatabang sa sato na marealisar na dai binabayaan ni Jehova an saiyang banwaan.—1 Samuel 12:22.
18 Lininaw nin Dios na may gigibohon pa si Elias bilang propeta. Dugang pa, minsan ngani an paghona ni Elias sia na sana an nagsasamba sa tunay na Dios sa Israel, ipinaheling sa saiya ni Jehova na may 7,000 na dai naghohorohod ki Baal. Dangan pinabalik nin Dios si Elias sa saiyang asignasyon. (1 Hade 19:13-18) Arog ni Elias, tibaad linalapag kita kan mga kaiwal nin tunay na pagsamba. Tibaad lamagon kita nin makuri, siring sa ihinula ni Jesus. (Juan 15:17-20) Kun beses, tibaad mahandal kita. Minsan siring, puede kitang magin arog ni Elias, na pinasarig nin Dios an boot dangan fiel na nagpadagos sa paglilingkod ki Jehova.
19. Ano an naeksperyensiahan kan linahidan na mga Kristiano kan panahon kan Guerra Mundial I?
19 Huli sa makuring paglamag durante kan Guerra Mundial I, an nagkapirang linahidan na Kristiano napadaog sa takot asin uminontok sa paghuhulit. Nasala sinda sa paghona na an saindang gibohon digdi sa daga tapos na. Alagad dai sinda isinikwal nin Dios. Imbes, may pagkaherak na sinusteniran nia sinda, siring kan pagtao nia nin kakanon ki Elias. Arog ni Elias, an fiel na mga linahidan nag-ako nin pagtatanos nin Dios asin naomayan sa pagkadai nagtatrabaho. An saindang mga mata nabuksan sa dakulang pribilehio nin paghuhulit kan mensahe nin Kahadean.
20. Ngonyan, anong pribilehio an itinatao sa mga fiel na arog ni Elias?
20 Sa saiyang hula manongod sa saiyang presensia, isinabi ni Jesus an lakop sa globong gibohon na mahahaman bago an katapusan kan maraot na palakaw na ini nin mga bagay. (Mateo 24:14) Ngonyan, ginigibo ini kan linahidan na mga Kristiano asin kan minilyon na kairiba ninda na naglalaom na mabuhay sa sarong paraisong daga. An paghuhulit kan Kahadean sagkod na matapos iyan sarong pribilehio na itinatao sana sa mga fiel na arog ni Elias.
Magin Fiel Arog ni Elias
21, 22. (a) Anong gibohon an pinangengenotan kan linahidan na mga Kristiano ngonyan? (b) An paghuhulit ginigibo paagi sa anong tabang, asin taano ta kaipuhan iyan?
21 May kaigotan na arog kan ki Elias, inootob kan sadit na natatada nin tunay na linahidan na mga Kristiano an saindang paninimbagan na pag-asikaso sa daganon na intereses kan pinatukaw na sa tronong Hade, si Jesu-Cristo. (Mateo 24:47) Asin sa laog nin labi nang 60 taon ngonyan, ginagamit nin Dios an mga linahidan na ini na pangenotan an paggibo nin mga disipulo sa mga tawo na tinawan nia kan makangangalas na paglaom sa buhay na daing sagkod sa sarong paraisong daga. (Mateo 28:19, 20) Makapasasalamat nanggad an minilyon na ini na an medyo kadikit na sanang natatadang linahidan maigot asin fiel na inaasikaso an saindang mga paninimbagan!
22 An paghuhulit na ini kan Kahadean ginigibo nin bakong sangkap na mga tawo asin paagi sana sa kosog na itinatao ni Jehova duman sa mga mapagngayongayong nananarig sa saiya. “Si Elias sarong tawo na may mga pakamate na arog kan sa sato,” an sabi kan disipulong si Santiago kan sambiton nia an halimbawa nin pamimibi kan propeta tanganing ipaheling an puersa kan pamibi nin sarong matanos na tawo. (Santiago 5:16-18) Si Elias kaidto dai man perming naghuhula o naggigibo nin mga milagro. May mga sa tawong pakamate asin kaluyahan man sia na kapareho niato, alagad sia fiel na naglingkod sa Dios. Mantang kita tinatabangan man nin Dios asin pinakokosog nia kita, puede kitang magin fiel arog ni Elias.
23. Taano ta may marahay na dahelan kita na magin fiel asin optimistiko?
23 May marahay kitang dahelan na magin fiel asin optimistiko. Girumdoma na si Juan na Bautisador may ginibong kaagid kan gibohon ni Elias bago duminatong an “aldaw ni Jehova” kan 70 C.E. May espiritu asin kapangyarihan ni Elias, an linahidan na mga Kristiano may ginibo man na kaparehong itinao nin Dios na gibohon sa bilog na daga. Ini malinaw na nagpapatunay na harani na an dakulang “aldaw ni Jehova.”
Ano an Isisimbag Nindo?
◻ Paano napatunayan an pagka-Dios ni Jehova sa Bukid nin Carmelo?
◻ Siisay an ‘Elias na maabot,’ asin ano an ginibo nia?
◻ Paano ipinaheling kan linahidan na mga Kristiano sa presenteng aldaw na igwa sinda kan espiritu ni Elias?
◻ Taano ta puede kitang magin fiel arog ni Elias?