Siisay an Makaliligtas sa “Aldaw ni Jehova”?

“Kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!”​—2 PEDRO 3:​11, 12.

1. Siisay an naggigibo na igwa kan espiritu asin kapangyarihan ni Elias?

SI Jehova Dios pinili sa katawohan an mga indibiduwal na magigin kapwa mga paramana kan saiyang Aki, si Jesu-Cristo, sa langitnon na Kahadean. (Roma 8:​16, 17) Mantang sinda yaon pa digdi sa daga, an linahidan na mga Kristiano naggigibo na igwa kan espiritu asin kapangyarihan ni Elias. (Lucas 1:17) Sa sinundan na artikulo, nasambitan niato an nagkapirang pagkakaagid kan mga aktibidad ninda asin kan ki propeta Elias. Alagad kumusta man an gibohon kan kasalihid ni Elias, si propeta Eliseo?​—1 Hade 19:​15, 16.

2. (a) Ano an ultimong milagro ni Elias, asin an primero ni Eliseo? (b) Ano an prueba na si Elias dai nagsakat sa langit?

² An ultimong milagro na ginibo ni Elias iyo an pagbanga sa katubigan kan Salog nin Jordan paagi sa pagrapas kaiyan kan saiyang opisyal na gubing. Nagpangyari ini ki Elias asin Eliseo na makabalyo sa marang daga. Mantang sinda naglalakaw sa sirangan na tampi kan salog, si Elias ipinadpad nin sarong ariporos pasiring sa ibang lugar digdi sa daga. (Helingon an kahon sa pahina 15 na may titulong “Sa Arin na Kalangitan Suminakat si Elias?”) Nawalat an opisyal na gubing ni Elias. Kan gamiton iyan ni Eliseo tanganing rapason an Jordan, nabanga giraray an katubigan kaiyan, na nagpangyari sa saiya na makabalik sa marang daga. Lininaw kan milagrong ini na si Eliseo an nagin kasalihid ni Elias sa pagpalakop kan tunay na pagsamba sa Israel.​—2 Hade 2:​6-​15.

Kaipuhan an Diosnon na mga Kualidad

3. Ano an sinabi ni Pablo asin Pedro manongod sa presensia ni Jesus asin sa “aldaw ni Jehova”?

³ Mga siglo pakalihis kan kaaldawan ni Elias asin Eliseo, an mga apostol na si Pablo asin Pedro iinasosyar an sarong madatong na “aldaw ni Jehova” sa presensia ni Jesu-Cristo asin sa “bagong kalangitan asin sarong bagong daga” na nasa ngapit pa kan panahon na idto. (2 Tesalonica 2:​1, 2; 2 Pedro 3:​10-​13) Tanganing makaligtas sa dakulang aldaw ni Jehova​—kun laglagon na nin Dios an saiyang mga kaiwal asin iligtas an saiyang banwaan—​dapat niatong hanapon si Jehova asin ipaheling an kahoyoan asin katanosan. (Sofonias 2:​1-3) Alagad may dugang pang mga kualidad na minalataw mantang ineestudyaran niato an mga pangyayari na kalabot si propeta Eliseo.

4. Ano an kabtang nin kaigotan sa paglilingkod ki Jehova?

⁴ Mahalagang marhay an kaigotan sa paglilingkod sa Dios tanganing makaligtas kita sa “aldaw ni Jehova.” Si Elias asin Eliseo maigot sa paglilingkod ki Jehova. May kaparehong kaigotan, an natatada kan linahidan na mga Kristiano ngonyan nagtatao nin sagradong paglilingkod ki Jehova asin nangengenot sa paghuhulit kan maogmang bareta.a Poon kan kabangaan kan mga taon nin 1930, inenkaminar ninda an gabos na nag-aako kan mensahe kan Kahadean asin naglalaom na mabuhay sagkod lamang digdi sa daga na idusay an saindang sadiri ki Jehova asin pabautismo. (Marcos 8:​34; 1 Pedro 3:​21) Minilyon an nagkuyog sa pag-enkaminar na ini. Dati yaon sinda sa espirituwal na kadikloman asin gadan sa kasalan, alagad ngonyan saindang nanodan an katotoohan nin Dios, inako an paglaom na buhay na daing sagkod sa sarong paraiso digdi sa daga, asin maigot sinda sa paglilingkod ki Jehova. (Salmo 37:29; Kapahayagan 21:​3-5) Paagi sa saindang kaigotan, kooperasyon, pagkamapag-istimar, asin iba pang marahay na mga gibo, nagtatao sinda nin dakulang represko sa espirituwal na mga tugang ni Cristo na yaon pa digdi sa daga.​—Mateo 25:​31-46.

5. Taano ta mahalagang marhay an paggibo nin marahay para sa “mga tugang” ni Jesus, asin ano an halimbawa niato kaidtong kaaldawan ni Eliseo?

⁵ An mga naggigibo nin marahay sa “mga tugang” ni Jesus huli ta an mga linahidan na ini mga parasunod nia igwa kan paglaom na makaligtas sa “aldaw ni Jehova.” An sarong mag-agom sa baryo nin Sunem binendisyonan nin abunda huli sa pagigin maboot asin mapag-istimar ki Eliseo asin sa saiyang surugoon. Daing aki an mag-agom na ini, asin gurang na an agom na lalaki. Alagad nanuga si Eliseo sa Sunamita na sia mangangaki nin sarong aking lalaki, asin ini talagang nangyari. Kan magadan an solong aki na ini pakalihis nin pirang taon, si Eliseo nagpa-Sunem asin binuhay sia liwat. (2 Hade 4:​8-​17, 32-​37) Nagsosopay nanggad ining mga balos huli sa pag-istimar ki Eliseo!

6, 7. Anong halimbawa an itinao ni Naaman, asin ano an koneksion kaini sa pakaligtas sa “aldaw ni Jehova”?

⁶ Kaipuhan an kapakumbabaan tanganing akoon an paggiya na basado sa Biblia hale sa “mga tugang” ni Cristo na may paglaom na makaligtas sa aldaw ni Jehova. An daoton na kapitan kan hukbo nin Siria na si Naaman kinaipuhan na magpaheling nin kapakumbabaan tanganing sunodon an suhestion nin sarong bihag na Israelitang aking babae asin maghingoang maomayan paagi sa pagduman sa Israel tanganing hanapon si Eliseo. Imbes na lumuwas sa saiyang harong tanganing sabaton si Naaman, si Eliseo nagpadara sa saiya kan mensaheng ini: “Maghugas ka nin makapito sa Jordan tanganing an saimong laman maulian dian sa saimo; asin magin ka malinig.” (2 Hade 5:10) Nakolgan an amor propio ni Naaman, asin naanggot sia, alagad pakatapos na sia mapakumbabang dumuman asin lumadop sa Jordan nin makapito, “an saiyang laman naulian arog kan laman nin sarong omboy na lalaki asin sia nagin malinig.” (2 Hade 5:14) Bago magpuli, si Naaman nagbiahe pabalik sa Samaria tanganing pasalamatan an propeta ni Jehova. Desidido na dai magganansia sa materyal gikan sa mga kapangyarihan na itinao nin Dios, si Eliseo nagluwas tanganing sabaton si Naaman alagad habong umako nin ano man na regalo. Si Naaman mapakumbabang nagsabi ki Eliseo: “An saimong oripon dai na matao nin dolot na tinotong o atang sa siisay pa man na ibang dios kundi ki Jehova.”​—2 Hade 5:17.

⁷ Paagi sa mapakumbabang pagsunod sa basado sa Kasuratan na hatol kan mga linahidan, minilyon an binebendisyonan nin abunda ngonyan. Dugang pa, paagi sa paggibo nin pagtubod sa pantubos na atang ni Jesus, an mga sadiosan an puso na ini nalinigan sa espirituwal. Yaon sa sainda ngonyan an pribilehio na pagigin mga katood ni Jehova Dios asin ni Jesu-Cristo. (Salmo 15:​1, 2; Lucas 16:9) Asin an saindang debosyon sa Dios asin sa paglilingkod sa saiya babalosan paagi sa pagligtas sa sainda sa daing sagkod na kalaglagan na mangyayari sa mapalangkaw, dai nagsosolsol na mga parakasala sa marikas nang nagdadangadang na “aldaw ni Jehova.”​—Lucas 13:24; 1 Juan 1:7.

“Siisay an Kakampi Ko? Siisay?”

8. (a) May anong kaisipan manongod sa paggibo kan kabotan nin Dios an mga makaliligtas sa “aldaw ni Jehova”? (b) Anong sugo an itinao ki Jehu? (c) Ano an mangyayari kaidto ki Jezabel?

⁸ An mga naglalaom na makaligtas sa “aldaw ni Jehova” dapat man na magin desidido sa paggibo kan kabotan nin Dios. Si Elias may kapusoan na ihinula an kalaglagan kan mapangadan, nagsasamba ki Baal na pamilya ni Hadeng Acab. (1 Hade 21:​17-​26) Minsan siring, bago ginibo an paggadan na ini, an kasalihid ni Elias na si Eliseo may dapat pang taposon na trabaho. (1 Hade 19:​15-​17) Kan dumatong an itinalaan na panahon ni Jehova, pinagbotan ni Eliseo an sarong surugoon na magduman asin lahidan an kapitan kan hukbo na si Jehu bilang an bagong hade sa Israel. Pakabubo nin lana sa payo ni Jehu, an mensahero nagsabi sa saiya: “Iyo ini an isinabi ni Jehova na Dios nin Israel, ‘Linalahidan taka nanggad bilang hade sa banwaan ni Jehova, an boot sabihon, sa Israel. Asin lugadon mo an harong ni Acab na saimong kagurangnan, asin ipamamalos ko an dugo kan sakong mga lingkod na propeta asin an dugo kan gabos na lingkod ni Jehova sa kamot ni Jezabel. Asin kaipuhan na malaglag an bilog na harong ni Acab.’” An maraot na si Reyna Jezabel iaapon sa mga ayam asin dai magkakaigwa nin disenteng lobong.​—2 Hade 9:​1-10.

9, 10. Paano naotob an tataramon ni Elias sa kaso ni Jezabel?

⁹ Rinekonoser kan mga tawohan ni Jehu an pagigin balido kan paglahid sa saiya asin ipinahayag sia na an bagong hade sa Israel. Desididong naghihiro, naghumari si Jehu pa-Jezreel tanganing ponan an saiyang gibohon na paggadan sa apostatang mga namomoon sa pagsamba ki Baal. Enot na nakamate kan pana nin paggadan ni Jehu an aking lalaki ni Acab, si Hadeng Joram. Nagsakay sia paluwas sa siudad tanganing maghapot kun si Jehu duminatong para sa sarong misyon na katoninongan. “Anong katoninongan an makakamtan sagkod na yaon an mga pakikisaro ni Jezabel na saimong ina asin an dakol niang panraratak?” an simbag ni Jehu. Pagkatapos, an pana ni Jehu luminagbas sa puso ni Joram.​—2 Hade 9:​22-24.

¹⁰ Linilikayan kan diosnon na mga babae na magin arog ni Jezabel o nin siisay man na kabaing nia. (Kapahayagan 2:​18-23) Kan oras na si Jehu makaabot sa Jezreel, hiningoa na ni Jezabel na magpagayon. Nagdudungaw sa bintana, tinaratara nia si Jehu na may patagong huma. Hinapot ni Jehu an mga surugoon nia: “Siisay an kakampi ko? Siisay?” Tolos-tolos na may duminungaw na duwa o tolong opisyal sa palasyo. Kakampi daw sinda ni Jehu? “Hologan sia!” an sadol ni Jehu. Sa puntong iyan, sinda desididong huminiro, na ihinolog sa bintana an maraot na si Jezabel. Tinimaktimakan sia, posibleng marhay na kan mga kuko kan mga kabayo. Pag-abot kan mga tawo tanganing ilobong sia, ‘mayo sindang nakua kundi an saiyang bungo asin an mga bitis patin an mga palad kan saiyang mga kamot.’ Kanigoan kadramatikong kaotoban kan tataramon ni Elias: “Kakakanon kan kaayaman an laman ni Jezabel”!​—2 Hade 9:​30-​37.

Odok sa Pusong Pagsuportar sa Tunay na Pagsamba

11. Siisay si Jonadab, asin paano nia ipinaheling an saiyang pagsuportar sa tunay na pagsamba?

¹¹ An mga naglalaom na makaligtas sa “aldaw ni Jehova” asin mabuhay sagkod lamang digdi sa daga dapat na bilog na pusong suportaran an tunay na pagsamba. Sinda dapat na magin arog ni Jonadab, sarong parasamba ki Jehova na bakong Israelita. Mantang may kaigotan na nagpapadagos si Jehu sa pag-otob kan sugo sa saiya, boot na ipaheling ni Jonadab an saiyang pag-oyon asin pagsuportar. Kaya luminuwas sia tanganing sabaton an bagong hade kan Israel, na pasiring sa Samaria tanganing gadanon an mga natatada pa sa harong ni Acab. Kan maheling si Jonadab, si Jehu naghapot: “An puso mo daw tanos kaiba ko, arog kan sakong sadiring puso sa saimong puso?” An simbag ni Jonadab na iyo nagpahiro ki Jehu na iabot an saiyang kamot asin agdahon si Jonadab na lumunad sa saiyang karuwaheng panguerra, na nagsasabi: “Umiba ka sa sakuya asin helingon mo an dai ko pagtogot na may makaribal si Jehova.” Daing pag-atraso na inako ni Jonadab an pribilehio na ipaheling an saiyang pagsuportar sa linahidan ni Jehova na parakastigo.​—2 Hade 10:​15-17.

12. Taano ta tama sanang hagadon ni Jehova an dai nababangang debosyon?

¹² Sierto nanggad na angay an odok sa pusong pagsuportar sa tunay na pagsamba, huling si Jehova an Kaglalang asin Unibersal na Soberano, na tama sanang maghagad nin asin maninigo sa satong esklusibong debosyon. Pinagbotan nia an mga Israelita: “Dai ka maggibo para sa saimo man sana nin linabrang ladawan o porma na kabaing nin ano man na yaon sa kalangitan sa itaas o yaon sa daga sa ibaba o yaon sa katubigan sa irarom kan daga. Dai ka maghorohod sa sainda ni madara na maglingkod sa sainda, huli ta ako si Jehova na saimong Dios sarong Dios na naghahagad nin dai nababangang debosyon.” (Exodo 20:​4, 5) An mga naglalaom na makaligtas sa “aldaw ni Jehova” dapat na sa saiya sana sumamba, na ginigibo iyan “sa espiritu asin katotoohan.” (Juan 4:​23, 24) Sinda maninigong magin marigon para sa tunay na pagsamba, arog ninda Elias, Eliseo, asin Jonadab.

13. Kun paanong an puso ni Jonadab kakampi ni Jehu, sairisay an nagmimidbid sa Mesiyanikong Hade, asin paano ninda ini ipinaheheling?

¹³ Pakagadana kan harong ni Acab, si Hadeng Jehu naggibo nin iba pang mga aksion na mamidbid an mga parasamba ki Baal asin pohoon sa Israel an falsong relihion na ini. (2 Hade 10:​18-28) Ngonyan, an langitnon na Hadeng si Jesu-Cristo ninombrahan na gadanon an mga kaiwal ni Jehova asin ibindikar an Saiyang soberaniya. Siring na an puso ni Jonadab kakampi ni Jehu, an “dakulang kadaklan” kan “ibang karnero” ni Jesus ngonyan bilog na pusong minimidbid si Cristo bilang an Mesiyanikong Hade asin nakikikooperar sa saiyang espirituwal na mga tugang digdi sa daga. (Kapahayagan 7:​9, 10; Juan 10:16) Ipinaheheling ninda an ebidensia kaini paagi sa paggibo nin tunay na relihion asin pagkaigwa nin maigot na pakikikabtang sa Kristianong ministeryo, na pinatatanidan an mga kaiwal nin Dios dapit sa marikas nang nagdadangadang na “aldaw ni Jehova.”​—Mateo 10:​32, 33; Roma 10:​9, 10.

Haranihon Na an Dramatikong mga Pangyayari!

14. Ano an natatagama sa falsong relihion?

¹⁴ Naghiro si Jehu tanganing taposon an pagsamba ki Baal sa Israel. Sa satong panahon, paagi sa Orog na Dakulang Jehu, si Jesu-Cristo, papangyayarihon nin Dios an kalaglagan kan Dakulang Babilonya, an pankinaban na imperyo nin falsong relihion. Madali na niatong maheling an kaotoban kan mga tataramon kan anghel ki apostol Juan: “An sampulong sungay na naheling mo, asin an mabangis na hayop, an mga ini maoongis sa patotot [Dakulang Babilonya] asin lalaglagon patin huhubaan sia, asin kakakanon an saiyang laman asin lubos siang sosoloon sa kalayo. Huli ta ibinugtak nin Dios sa saindang puso na otobon an saiyang kaisipan, na otobon pa ngani an saindang sarong kaisipan paagi sa pagtao kan saindang kahadean sa mabangis na hayop, sagkod na maotob an mga tataramon nin Dios.” (Kapahayagan 17:​16, 17; 18:​2-5) “An sampulong sungay” nagrerepresentar sa militarisadong politikal na mga kapangyarihan na namamahala digdi sa daga. Minsan ngani ngonyan sinda may espirituwal na pakipagsambayan sa Dakulang Babilonya, halipot na sana an saiyang panahon. Lalaglagon kan politikal na elemento kan kinaban na ini an falsong relihion, asin “an mabangis na hayop”​—an Naciones Unidas—​magkakaigwa nin pangenot na kabtang kaiba kan “sampulong sungay” sa paglaglag sa saiya.b Saro nanggad iyan na okasyon na omawon si Jehova!​—Kapahayagan 19:​1-6.

15. Ano an mangyayari kun probaran na laglagon an daganon na organisasyon nin Dios?

¹⁵ Pakatapos kan pagsalakay ni Jehu tumang sa pagsamba ki Baal, an saiyang makahadeng harong nagtao nin atension sa politikal na mga kaiwal kan Israel. Siring man kaiyan an gigibohon kan Hadeng si Jesu-Cristo. Yaon pa an politikal na mga kapangyarihan pagkalaglag kan arog-Baal na falsong relihion. Sa pag-impluwensia ni Satanas na Diablo, an mga kaiwal na ini kan soberaniya ni Jehova magibo nin todo-todong pagsalakay sa pagprobar na laglagon an daganon na organisasyon nin Dios. (Ezequiel 38:​14-​16) Alagad ipagagadan sinda ni Jehova sa Hadeng si Jesu-Cristo paagi sa paglaglag sa sainda sa Har–​Magedon, an “ralaban kan dakulang aldaw nin Dios na Makakamhan sa gabos,” na matapos kan pagbindikar sa soberaniya ni Jehova.​—Kapahayagan 16:​14, 16; 19:​11-21; Ezequiel 38:​18-23.

Paglilingkod na Igwa kan Kaigotan ni Eliseo

16, 17. (a) Paano niato naaaraman na si Eliseo maigot sagkod sa katapusan kan saiyang buhay? (b) Ano an maninigo niatong gibohon sa mga pana nin katotoohan?

¹⁶ Sagkod na taposon na kan “aldaw ni Jehova” an bilog na maraot na palakaw nin mga bagay ni Satanas, an mga lingkod nin Dios magigin siring kamapuso asin kaigot ni Eliseo. Apuera sa saiyang trabaho bilang surugoon ni Elias, si Eliseo solong naglingkod bilang propeta ni Jehova sa laog nin labing 50 taon! Asin maigot si Eliseo sagkod sa katapusan kan saiyang halawig na buhay. Kan madali na siang magadan, sinongko sia kan makoapo ni Jehu, si Hadeng Joas. Sinabihan sia ni Eliseo na pumana paluwas sa bintana. Marikas an dalagan kan pana pasiring sa punteriya kaiyan, asin kuminagsing si Eliseo: “An pana nin kaligtasan ni Jehova, an pana nin kaligtasan tumang sa Siria! Asin pababagsakon mo nanggad an Siria sa Afek sagkod sa katapusan.” Sa pakiolay ni Eliseo, sunod na tinira ni Joas an daga kan saiyang mga pana. Alagad ginibo nia ini na kulang nin kaigotan, na tolong beses sana niang tinira. Kun siring sinabi ni Eliseo na, bilang resulta, si Joas tatawan sana nin tolong kapangganahan laban sa Siria, asin iyan an nangyari. (2 Hade 13:​14-​19, 25) Dai biyong pinabagsak ni Joas an mga Sirio, “sagkod sa katapusan.”

¹⁷ Pero, may kaigotan na arog kan ki Eliseo, an linahidan na natatada padagos na nakikilaban tumang sa falsong pagsamba. Iyan man an ginigibo kan saindang kairiba na an paglaom daganon. Dugang pa, marahay na girumdomon kan gabos na naglalaom na makaligtas sa “aldaw ni Jehova” an mga tataramon kan maigot na si Eliseo manongod sa pagtira sa daga. Kuanon ta an mga pana nin katotoohan asin maigot na itira iyan​—paorootro—​iyo, sagkod na magsabi si Jehova na tapos na an paggamit ta kaiyan.

18. Paano niato maninigong himateon an mga tataramon sa 2 Pedro 3:​11, 12?

¹⁸ Madali nang taposon kan “aldaw ni Jehova” an presenteng maraot na palakaw nin mga bagay. Togotan niato kun siring an satong sadiri na pahiroon kan nakapakokosog sa boot na mga tataramon ni apostol Pedro. “Mantang an gabos na bagay na ini tutunawon nin siring,” an kagsing ni Pedro, “kamo maninigong magin anong klaseng mga tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Pedro 3:​11, 12) Kun an gabos na kabtang kan palakaw na ini tunawon na kan kalayo kan kaanggotan nin Dios na ipinahayag paagi ki Jesu-Cristo, an mga may rekord nin tanos na gawe asin diosnon na debosyon an solamenteng makadudulag. Kaipuhan an kadalisayan sa moral asin espirituwal. Iyo man an pagkamoot sa kapwa, na ipinaheheling paagi sa pag-asikaso sa saindang mga pangangaipo, nangorogna sa espirituwal paagi sa satong Kristianong ministeryo.

19. Ano an dapat niatong gibohon tanganing makaligtas sa “aldaw ni Jehova”?

¹⁹ An saindo daw na mga tataramon asin gibo nagpapamidbid sa saindo bilang sarong fiel asin maigot na lingkod nin Dios? Kun iyo, puede kamong maglaom na makaligtas sa “aldaw ni Jehova” pasiring sa ipinanugang bagong kinaban nin Dios. Iyo, puede nindong maeksperyensiahan an pakaligtas kun gigibohan nindo nin marahay an espirituwal na mga tugang ni Cristo huli ta sinda an saiyang mga parasunod, siring kan pag-istimar kan mag-agom na Sunamita ki Eliseo. Tanganing maligtas kaipuhan man kamong magin arog ni Naaman, na mapakumbabang inako an instruksion nin Dios asin nagin parasamba ki Jehova. Kun naghihimuyawot kamong mabuhay sagkod lamang sa sarong paraiso digdi sa daga, dapat kamong magpaheling nin odok sa pusong pagsuportar sa tunay na pagsamba, arog kan ginibo ni Jonadab. Kun siring puede na kamong makabilang sa fiel na mga lingkod ni Jehova, na madali nang makaeksperyensia kan kaotoban kan mga tataramon ni Jesus: “Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.”​—Mateo 25:34.

[Mga Nota sa Ibaba]

Ano an Isisimbag Nindo?

◻ Ano an pirang kualidad na kaipuhan tanganing makaligtas sa “aldaw ni Jehova”?

◻ Anong halimbawa an itinao kan mag-agom na Sunamita kan kaaldawan ni Eliseo?

◻ Anong leksion an manonodan ki Naaman?

◻ Paano niato maaarog an halimbawa ni Jonadab?

◻ Paano kita maninigong maapektaran kan 2 Pedro 3:​11, 12?