Bareta kan mga Parabalangibog kan Kahadean
Pakapanggana sa mga Angat sa “Daga kan Dai Linalaoman”
SI APOSTOL Pablo naghapot sa mga Kristiano kan enot na siglo sa Corinto: “Kun an trumpeta tumanog nin bakong sayod, siisay an mag-aandam para sa pakilaban? Sa siring man na paagi, kun dai kamo magtaram paagi sa dila nin tataramon na pasil na masabotan, paano maaaraman kun ano an itinataram?”—1 Corinto 14:8, 9.
Sa Papua New Guinea, na kun beses inaapod na Daga kan Dai Linalaoman, nakatutupar an Mga Saksi ni Jehova nin nakapanluluya sa boot na mga kaolangan sa paghuhulit kan malinaw na mensahe kan Biblia. Naghuhulit sinda sa mga tawo na nagtataram nin labing 700 na laen-laen na lenguahe asin igwa nin dakol na manlaenlaen na kaugalean. Inaatubang man kan mga Saksi an mabukid na kadagaan, kadaihan nin mga tinampo, asin nagdadakol na krimen. Apuera sa gabos na ining kadepisilan, may pagtumang gikan sa nagkapirang relihiosong grupo asin, kun beses, hale pa ngani sa mga opisyal nin eskuelahan.
Minsan siring, an marahay na espirituwal na pagtotokdo asin nagdadakol na libreriya nin mga pantabang sa pag-adal sa Biblia sa lokal na mga lenguahe sinasangkapan an mga Saksi na ikapaabot an maogmang bareta bilang sayod na tanog nin trumpeta. Sa parate positibo an reaksion, siring sa ipinaheheling kan minasunod na mga bareta:
• Sa pagpopoon nin bagong taon sa eskuelahan, gustong maaraman nin sarong maestro kun taano an mga aki kan Mga Saksi ni Jehova ta dai nagsasaludo sa bandera o nag-aawit kan himno nasyonal. Ki Maiola sia naghapot, sarong 13 anyos na estudyante na bautisadong Saksi. Nagtao si Maiola nin klaro, basado sa Kasuratan na paliwanag. Inako kan maestro an saiyang pangangatanosan huling idto hale sa Biblia. Ihiniras man an saiyang paliwanag sa iba pang mga tawohan kan eskuelahan.
Pagkatapos, kan asignaran an mga estudyante na sumurat nin mga komposisyon, pinili ni Maiola an temang Trinidad. An saiyang komposisyon nag-ako kan pinakahalangkaw na marka sa klase, asin hinapot sia kan maestro kun saen nia nakua an impormasyon. Ipinaheling nia sa saiya an librong Puwede Kamong Mabuhay Sagkod Lamang sa Paraiso Digdi sa Daga sa lenguaheng Ingles. Dangan iinatubang kan maestro an libro sa bilog na klase, asin dakol an gustong magkaigwa nin sadiri nindang kopya. Kan sumunod na aldaw, nakapasakamot si Maiola nin 14 libro asin 7 magasin sa saiyang mga kaeskuela, asin nakapoon sia nin mga pag-adal sa Biblia sa tolo sa sainda. An pasohan ni Maiola magin sarong bilog na panahon na ministro.
• An sarong napapasuway na grupo nin Mga Saksi ni Jehova sa sarong baryo sa may dagat harani sa Port Moresby napapaatubang sa pagtumang kaidto pang pagpopoon kan mga taon nin 1970. Minsan siring, dai pa sana nahahaloy nag-ako sinda nin tabang hale sa dai linalaoman na gikanan. An obispo kan United Church duman, sarong propiong taga-Papua New Guinea na naedukar sa ibang nasyon, sinabihan na maghapot an mga nag-atender sa simbahan sarong aldaw. Naghapot an sarong lalaki: “May duwa pong relihion sa samong baryo—an United Church asin an Mga Saksi ni Jehova. Ano po an maninigo niamong gibohon kun dumuman sa samo an mga Saksi?” Pakalihis nin halawig na pag-ontok, nagsimbag an obispo: “Aram nindo, talagang dai ko aram an sasabihon ko saindo. Dai pa sana nahahaloy, duwang hoben na Saksi an nagdigdi sa sako. May ihinapot sinda sa sako, asin apisar kan gabos kong pinag-adalan sa unibersidad, dai ko aram an simbag. Alagad pasil sanang itinao ninda sa sako an simbag gikan sa Biblia. Kaya dai ko sasabihon sa saindo kun ano an gigibohon nindo—kamo na an bahala. Dai nindo kaipuhan na maghinanyog kun habo nindo, alagad dai kamo magin madahas sa sainda.”
An sarong nagbibiaheng representante kan Watch Tower Society na dinalaw sa huri an grupong ini nin mga Saksi nagbareta: “Haros gabos sa baryo naghihinanyog sa mga Saksi kun sinda naghuhulit. An nagkapira inaagda pa ngani sinda na dumagos sa saindang harong. Iyan saro nang paraiso para sa paghuhulit ngonyan.”