An Sarong Makatanosan na Kinaban Bakong Pangatorogan!
“AN HUSTISYA iyo an dakulang pinagkakainteresan nin tawo sa daga,” an komento kan Amerikanong estadista na si Daniel Webster. Asin an Biblia nagsasabi: “Si Jehova mamomoton sa hustisya.” (Salmo 37:28) Mantang ginibo na kaagid nin Dios, an enot na tawong mag-agom igwa nin diosnon na mga atributo, kabale an sentido nin hustisya.—Genesis 1:26, 27.
An Kasuratan nagtataram man manongod sa ‘mga tawo nin mga nasyon na mayo nin ley na minagibo sa saindang naturalesa nin mga bagay kan ley.’ Sa siring sinda “nagpapaheling na an ley nasusurat sa saindang puso, mantang an saindang konsensia nagpapatotoo sa kaibanan ninda asin, sa sainda mismong mga pag-isip, sinda inaakusar o ipinahahayag na daing kasalan.” (Roma 2:14, 15) Iyo, an tawo tinawan kan abilidad nin konsensia—an panlaog na sentido nin tama asin sala. Malinaw nanggad, an pangangaipo nin hustisya natural sa tawo.
An paghanap nin tawo nin kaogmahan konektadong marhay sa pangangaipo nin hustisya, huli ta an Salmo 106:3 nagpapahayag: “Maogma an mga nag-ootob sa hustisya, na naggigibo nin katanosan sa gabos na panahon.” Pero, taano ta dai nakayang pangyarihon nin tawo an sarong makatanosan na kinaban?
Taano ta Naprakaso an Tawo?
An sarong pundamental na dahelan kan pagkaprakaso na magkaigwa nin sarong makatanosan na kinaban iyo an kanawayan na minana niato sa satong enot na mga magurang, si Adan asin Eva. An Biblia nagpapaliwanag: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) An kanawayan kasalan. Minsan ngani linalang na daing sala, si Adan asin Eva nagdesisyon na magrebelde tumang sa Dios asin sa siring ginibong parakasala an saindang sadiri. (Genesis 2:16, 17; 3:1-6) Huli kaini, iwinalat ninda sa saindang mga aki an pamanang makasalan, salang mga tendensia.
Bako daw na an mga karakteristiko nin personalidad na siring sa kahanaban asin prehuwisyo mga bunga nin makasalan na mga tendensia? Asin bako daw na an mga karakteristikong ini nagkokontribwir sa mga inhustisya sa kinaban? Tara, an kahanaban iyo an pinakagamot kan tuyong mga pag-abuso sa palibot asin pan-aapi sa pagbuhay! An prehuwisyo nasa likod nanggad kan etnikong iriwal asin mga inhustisya huli sa rasa. An siring na mga karakteristiko minaagyat man sa mga tawo na maghabon, mandaya, asin humiro sa paaging nakadadanyar sa iba.
Dawa an may pinakamarahay na motibo na mga paghihingoang gibohon an hustisya asin an marahay sa parate napaprakaso huli sa satong makasalan na mga inklinasyon. Si apostol Pablo mismo nagtuga: “An marahay na minamawot ko dai ko ginigibo, kundi an maraot na hinahaboan ko iyo an ginigibo ko.” Ipinadagos niang ipaliwanag an pakipagtusayan, na nagsasabi: “Tunay na ako naoogma sa ley nin Dios oyon sa sakong pagkatawo sa laog, alagad nakaheheling ako nin laen na ley sa mga kabtang kan sakong hawak na minatumang sa ley kan sakong isip asin dinadara ako sa pagkabihag sa ley nin kasalan na yaon sa mga kabtang kan sakong hawak.” (Roma 7:19-23) Posible na kita ngonyan igwa kan kaparehong pagkakalaban. Iyan an dahelan kun taano ta parateng igwa nin mga inhustisya.
An sa-tawong paagi nin pamamahala nakakontribwir man sa inhustisya sa kinaban. Sa lambang nasyon, igwa nin mga ley saka idtong mga nagpapaotob kaiyan. Asin igwa, siempre, nin mga hokom asin husgado. Tunay nanggad, an nagkapirang may prinsipyong tawo naghihingoang sorogon an sa-tawong mga diretso asin siertohon na igwa nin pantay na hustisya para sa gabos. Sa ibong kaiyan, an kadaklan kan saindang paghihingoa naprakaso. Taano? Sinusumaryo an manlaenlaen na dahelan na kalabot sa saindang pagkaprakaso, an Jeremias 10:23 nagsasabi: “Aram kong marhay, O Jehova, na bakong sadiri nin tawo an saiyang dalan. Mayo sa tawong naglalakaw an kakayahan na giyahan man lamang an saiyang lakad.” Huling siblag sa Dios, an tawo mayo nanggad nin kakayahan na mag-establisar nin sarong matanos asin makatanosan na kinaban.—Talinhaga 14:12; Eclesiastes 8:9.
An sarong dakulang kaolangan sa paghihingoa nin tawo na makagibo nin sarong makatanosan na kinaban iyo si Satanas na Diablo. Malinaw na sinasabi kan Biblia na an rebelyosong anghel na si Satanas iyo an orihinal na “paragadan” asin “putikon” asin na “an bilog na kinaban namumugtak sa kapangyarihan kan maraot.” (Juan 8:44; 1 Juan 5:19) Ipinamimidbid sia ni apostol Pablo bilang an “dios kan palakaw na ini nin mga bagay.” (2 Corinto 4:3, 4) Mantang naoongis sa katanosan, ginigibo ni Satanas an gabos na paaging posible na palakopon an karatan. Sagkod na kontrolado nia an kinaban, an gabos na klase nin inhustisya asin an resulta kaiyan na grabeng sakit ooriponon an katawohan.
An gabos daw na ini nangangahulogan na an inhustisya dai malilikayan sa sosyedad nin tawo? Imposibleng pangatorogan daw an sarong makatanosan na kinaban?
An Sarong Makatanosan na Kinaban Sarong Katunayan—Paano?
Tanganing magin katunayan an paglaom sa sarong makatanosan na kinaban, an katawohan kaipuhan na maglaom sa saro na makapopoho kan mga causa nin inhustisya. Alagad siisay an makagagabot sa kasalan asin makahahale ki Satanas asin sa saiyang pamamahala? Maliwanag na mayo nin tawo ni arin man na ahensia nin tawo na makagigibo kan siring kagabat na gibohon. Si Jehova Dios sana an makagigibo kaiyan! Mapadapit sa saiya, an Biblia nagsasabi: “An Gapo, sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 32:4) Asin bilang “mamomoton sa hustisya,” mawot ni Jehova na an mga tawo maogma sa buhay sa sarong makatanosan na kinaban.—Salmo 37:28.
Sa pagtaram manongod sa areglo nin Dios na magtao nin sarong makatanosan na kinaban, si apostol Pedro nagsurat: “Igwa nin bagong kalangitan asin sarong bagong daga na satong hinahalat oyon sa saiyang panuga, asin sa mga ini magdadanay an katanosan.” (2 Pedro 3:13) An “bagong kalangitan” na ini bakong bagong pisikal na kalangitan. Ginibong sangkap nin Dios an satong pisikal na kalangitan, asin iyan nagtatao sa saiya nin kamurawayan. (Salmo 8:3; 19:1, 2) An “bagong kalangitan” sarong bagong pamamahala sa daga. An presenteng “kalangitan” kompuesto nin mga gobyerno na ginibo nin tawo. Dai na nanggad mahahaloy, sa ralaban nin Dios na Armagedon, an mga ini riribayan kan “bagong kalangitan”—an saiyang langitnon na Kahadean, o gobyerno. (Kapahayagan 16:14-16) An Hade kan Kahadean na iyan iyo si Jesu-Cristo. Permanenteng tinapos an pamamahala nin tawo, an gobyernong ini mamamahala sagkod lamang.—Daniel 2:44.
Kun siring, ano an “bagong daga”? Iyan bakong bagong planeta, huli ta ginibo nin Dios an daga na tamang-tama na istada nin tawo, asin kabotan nia na iyan magdanay sagkod lamang. (Salmo 104:5) An “bagong daga” nanonongod sa bagong sosyedad nin mga tawo. (Genesis 11:1; Salmo 96:1) An “daga” na lalaglagon kompuesto kan mga tawo na ginigibo an saindang sadiri na kabtang kan maraot na palakaw na ini nin mga bagay. (2 Pedro 3:7) An “bagong daga” na masalida sa sainda magigin kompuesto nin tunay na mga lingkod nin Dios, na naoongis sa karatan asin namomoot sa katanosan asin hustisya. (Salmo 37:10, 11) Sa siring, mawawara na an kinaban ni Satanas.
Alagad ano an nakatagama para ki Satanas? Ihinula ni apostol Juan: “Dinakop nia [ni Cristo Jesus] an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinolog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia ikalagalag an mga nasyon.” (Kapahayagan 20:1-3) An impluwensia sa katawohan kan nakagapos na si Satanas magigin kapareho kan impluwensia nin sarong preso na nasa sarong hararom na bilanggoan sa irarom nin daga. Kanigoan na kaginhawahan iyan para sa katawohan, na minadatong bilang tanda nin sarong makatanosan na kinaban! Asin sa katapusan kan sangribong taon, si Satanas biyo nang roronoton.—Kapahayagan 20:7-10.
Pero, kumusta an minanang kasalan? Si Jehova nagtao na kan basehan para sa paggabot sa kasalan. “An Aki nin tawo [si Jesu-Cristo] nagdigdi . . . tanganing . . . magtao kan saiyang kalag bilang pantubos na karibay nin dakol.” (Mateo 20:28) An terminong “pantubos” nangangahulogan kan bayad na kaipuhan sa pagkabalukat nin mga bihag. Ibinayad ni Jesus an saiyang sangkap na tawong buhay bilang pantubos sa pagpatalingkas sa katawohan.—2 Corinto 5:14; 1 Pedro 1:18, 19.
An pantubos na atang ni Jesus makatatao sa sato nin pakinabang dawa ngonyan. Paagi sa paggibo nin pagtubod dian, kita puedeng magkamit nin malinig na kamugtakan sa atubangan nin Dios. (Gibo 10:43; 1 Corinto 6:11) Sa irarom kan pamamahala kan Kahadean nin Dios, an pantubos gigibohon na posible para sa katawohan na biyong maomayan sa kasalan. An huring libro kan Biblia ilinaladawan an sarong piguratibong “salog kan tubig nin buhay” na nagbobolos hale sa trono nin Dios, asin sa mga pangpang kaiyan igwa nin simbolikong namumungang mga kahoy na an mga dahon “para sa pagpaomay sa mga nasyon.” (Kapahayagan 22:1, 2) An ilinaladawan digdi kan Biblia nagrerepresentar sa makangangalas na probisyon kan Kaglalang para sa pagpaomay sa katawohan sa kasalan basado sa pantubos na atang ni Jesus. An kompletong aplikasyon kan probisyon na ini mapatalingkas sa makinuyog na mga tawo sa kasalan asin kagadanan.
An Buhay sa Sarong Makatanosan na Kinaban
Pakaisipon an magigin pamumuhay sa irarom kan pamamahala kan Kahadean. An krimen asin kadahasan magigin kabtang kan mga bagay na nakalihis na. (Talinhaga 2:21, 22) Mawawara na an inhustisya sa pagbuhay. (Salmo 37:6; 72:12, 13; Isaias 65:21-23) An gabos na gira nin pagpalaenlaen sosyal, sa rasa, sa tribo, asin etniko mapapara na. (Gibo 10:34, 35) An mga guerra asin armas nin pakikilaban mawawara na. (Salmo 46:9) An minilyon na gadan bubuhayon liwat sa sarong kinaban na mayo nin inhustisya. (Gibo 24:15) An gabos magkakamit nin sangkap asin mabagsik na salud. (Job 33:25; Kapahayagan 21:3, 4) “Sa katotoohan,” sinisierto sa sato kan Biblia, “paluluwason nia [ni Jesu-Cristo] an hustisya.”—Isaias 42:3.
Mientras tanto, an inhustisya puedeng mangyari sa sato, alagad kita logod nungkang magin bakong makatanosan bilang balos. (Miqueas 6:8) Dawa kun an inhustisya kaipuhan na tioson, papagdanayon logod niato an positibong paglaom sa ngapit. An ipinanugang makatanosan na kinaban magigin katunayan sa dai na mahahaloy. (2 Timoteo 3:1-5; 2 Pedro 3:11-13) An Makakamhan sa gabos na Dios nanuga, asin iyan “magigin siring.” (Isaias 55:10, 11) Ngonyan na an panahon na mag-andam para sa buhay sa makatanosan na kinaban na iyan paagi sa pag-adal kan mga kahagadan sa sato nin Dios.—Juan 17:3; 2 Timoteo 3:16, 17.
[Retrato sa pahina 7]
An gabos na gira nin inhustisya paparaon sa ipinanuga nin Dios na bagong kinaban