‘Padagos Kamong Sueltong Magpatarawadtawadan’
“Padagos kamong magpatiriostios asin sueltong magpatarawadtawadan.” —COLOSAS 3:13.
1. (a) Kan isuherir ni Pedro na kita magpatawad sa iba nin “sagkod sa pitong beses,” taano ta tibaad naghona sia na buka an saiyang palad? (b) Ano an boot sabihon ni Jesus kan sabihon nia na kita maninigong magpatawad nin “sagkod sa pitong polo may pitong beses”?
“KAGURANGNAN, makapirang magkakasala tumang sa sako an sakong tugang asin patatawadon ko sia? Sagkod sa pitong beses?” (Mateo 18:21) Tibaad naghona si Pedro na bukang marhay an saiyang palad sa saiyang suhestion. Kan panahon na idto, an tradisyon nin mga rabi nagsasabi na an saro dai maninigong magpatawad nin labi sa tolong beses sa iyo man sanang kasalan.a Kun siring, imahinara an pagkabigla ni Pedro kan si Jesus sumimbag: “Sinasabi ko sa saimo, bakong, Sagkod sa pitong beses, kundi, Sagkod sa pitong polo may pitong beses”! (Mateo 18:22) An pag-otro sa pito kapareho nin pagsabi nin “daing limite.” Sa pagheling ni Jesus, haros mayo nin limite sa kun pirang beses na an sarong Kristiano maninigong magpatawad sa iba.
2, 3. (a) Ano an pirang situwasyon na dian tibaad garo baga masakit na magpatawad sa iba? (b) Taano ta makakokompiar kita na para sa satong pinakaikararahay an magpatawad sa iba?
2 Minsan siring, bakong pirmeng pasil an pag-aplikar kan hatol na iyan. Siisay sa sato an dai nakamate kan sugod nin bakong makatanosan na gibong raot? Tibaad ihinayag nin sarong pinagtitiwalaan an sarong hilom. (Talinhaga 11:13) An dai iniisip na pagtaram nin sarong dayupot na katood tibaad ‘binono kamo siring sa espada.’ (Talinhaga 12:18) An mapan-insultong pagtratar nin saro na saindong namomotan o pinagtitiwalaan tibaad nakalugad nin hararom. Kun mangyari an siring na mga bagay, an natural sanang magin reaksion niato tibaad maanggot. Tibaad magin tendensia niato na dai na kaolayon an nagkasala, na biyo na siang rayoan kun posible. An pagpatawad sa saiya tibaad garo baga mapalibre sa saiya sa pakakolog sa sato. Pero, sa pagpatalubo nin paghinanakit, kinokolgan ta sana an satong sadiri.
3 Kun siring tinotokdoan kita ni Jesus na magpatawad—“sagkod sa pitong polo may pitong beses.” Segurado na an saiyang mga katokdoan nungkang ikapapahamak niato. An gabos na itinotokdo nia gikan ki Jehova, ‘an Saro na nagtotokdo sa sato na pakinabangon an satong sadiri.’ (Isaias 48:17; Juan 7:16, 17) Rasonable sana na siertong para sa satong pinakaikararahay an magpatawad sa iba. Bago niato pag-olayan kun taano ta maninigo kitang magpatawad asin kun paano niato iyan magigibo, tibaad makatatabang nguna na linawon an kahulogan asin bakong kahulogan nin kapatawadan. An satong ideya dapit sa kapatawadan tibaad nakakaapektar sa satong kakayahan na magpatawad kun kita pinagkasalaan nin iba.
4. Ano an bakong kahulogan kan pagpatawad sa iba, alagad paano tinatawan nin kahulogan an kapatawadan?
4 An pagpatawad sa iba huli sa personal na mga pagkakasala dai nangangahulogan na kinokonsinte o pinasasadit niato an saindang nagibo; ni nangangahulogan man iyan na tinotogotan ta an iba na aprobetsaran kita. Total, kun pinatatawad kita ni Jehova, sierto nanggad na dai nia pinasasadit an satong mga kasalan, asin nungka niang totogotan an makasalan na mga tawo na timaktimakan an saiyang pagkaherak. (Hebreo 10:29) Sono sa Insight on the Scriptures, an kapatawadan tinatawan nin kahulogan na “akto nin pagtao nin indulto sa sarong nagkasala; dai na paghinanakit sa saiya huli sa saiyang pagkakasala asin pagsuko kan gabos na diretso sa indemnisasyon.” (Tomo 1, pahina 861)b An Biblia tinatawan kita nin madonong na mga rason sa pagpatawad sa iba.
Taano ta Dapat na Magpatawad sa Iba?
5. Anong mahalagang rason na magpatawad sa iba an sinasabi sa Efeso 5:1?
5 An sarong mahalagang rason na magpatawad sa iba sinasabi sa Efeso 5:1: “Kun siring, magin kamong mga paraarog sa Dios, bilang namomotan na mga aki.” Sa anong bagay kita maninigong ‘magin mga paraarog sa Dios’? An terminong “kun siring” ikinokonektar an frase sa sinusundan na bersikulo, na nagsasabi: “Magin maboot sa lambang saro, madinamayon sa mamomoton na paagi, na sueltong nagpapatarawadtawad siring na an Dios man sueltong nagpatawad sa saindo paagi ki Cristo.” (Efeso 4:32) Iyo, pag-abot sa pagpatawad, maninigo kitang magin mga paraarog sa Dios. Kun paanong an sarong sadang na aking lalaki naghihingoang magin arog nanggad kan saiyang ama, kita, bilang mga aki na namomotan na marhay ni Jehova, maninigo na magmawot na magin arog kan satong mapagpatawad na langitnon na Ama. Siertong nakapaoogma sa puso ni Jehova na dumungaw sa kalangitan asin maheling an saiyang mga aki digdi sa daga na naghihingoang magin arog nia paagi sa pagpatarawadtawadan!—Lucas 6:35, 36; ikomparar an Mateo 5:44-48.
6. Sa anong paagi na may dakulang pagkakalaen an pagpatawad ni Jehova asin niato?
6 Totoo, dai kita noarin man puedeng magpatawad sa sangkap na sentido siring ki Jehova. Alagad iyan an orog pang rason kun taano ta maninigo kitang magpatarawadtawadan. Isip-isipa: Dakulaon an kalaenan kan pagpatawad ni Jehova asin niato. (Isaias 55:7-9) Kun pinatatawad niato an mga nagkasala tumang sa sato, parateng aram ta na maabot an panahon na tibaad kaipuhan ta na balosan man ninda kita paagi sa pagpatawad sa sato. Sa mga tawo, an pirmeng nangyayari mga parakasala na nagpapatawad sa parakasala. Minsan siring, ki Jehova an pagpatawad pirmeng saro sanang lado. Pinatatawad nia kita, alagad nungkang kakaipuhanon niato na patawadon sia. Kun si Jehova, na dai nagkakasala, puedeng magpatawad sa sato sa mamomoton asin lubos na paagi, bako daw na kitang makasalan na mga tawo maninigo na maghingoang magpatarawadtawadan?—Mateo 6:12.
7. Kun habo niatong magpatawad sa iba kun may basehan para sa pagkaherak, paano iyan puedeng magkaigwa nin bakong paborableng epekto sa sato mismong relasyon ki Jehova?
7 Orog pa nganing mahalaga, kun habo tang magpatawad sa iba kun may basehan para sa pagkaherak, iyan puedeng magkaigwa nin bakong paborableng epekto sa sato mismong relasyon sa Dios. Dai sana kita pinakikiolayan ni Jehova na magpatarawadtawadan; linalaoman niang gibohon ta iyan. Sono sa Kasuratan, an kabtang kan motibasyon na kita magin mapagpatawad iyo na tanganing mapatawad man kita ni Jehova o huli ta pinatawad nia kita. (Mateo 6:14; Marcos 11:25; Efeso 4:32; 1 Juan 4:11) Kun siring, kun habo niatong magpatawad sa iba kun igwa nin marahay na rason na gibohon iyan, paano nanggad niato malalaoman an siring na pagpatawad hale ki Jehova?—Mateo 18:21-35.
8. Taano an pagigin mapagpatawad ta para sa satong pinakaikararahay?
8 Tinotokdoan ni Jehova an saiyang banwaan “kan marahay na dalan na maninigo nindang lakawan.” (1 Hade 8:36) Kun pinagbobotan nia kita na magpatarawadtawadan, makakokompiar kita na nasa puso nia an satong pinakaikararahay. May marahay na rason na sinasabihan kita kan Biblia na “magtao nin lugar sa kabangisan.” (Roma 12:19) An hinanakit sarong magabat na pagabat sa buhay. Kun itatanom ta iyan sa boot, dian nababangkag an satong isip, hinahalean kita kaiyan nin katoninongan, asin pinopogolan an satong kagayagayahan. An pinahahaloy na kaanggotan, arog nin pag-imon, puedeng makadanyar sa satong pisikal na salud. (Talinhaga 14:30) Asin mantang kita nakamamate kan gabos na ini, an nagkasala tibaad biyong dai nag-aaram kan satong grabeng karibarawan! Aram kan satong mamomoton na Kaglalang na kaipuhan niatong hayag na magpatawad sa iba bako sanang para sa saindang pakinabang kundi para sa sato man mismo. Tunay nanggad na an hatol kan Biblia na magpatawad iyo ‘an marahay na dalan na maninigong lakawan.’
“Padagos Kamong Magpatiriostios”
9, 10. (a) Anong klaseng mga situwasyon an dai man talaga nagkakaipo nin pormal na pagpapatawad? (b) Ano an isinusuherir kan pananaram na ‘padagos na magpatiriostios’?
9 An mga lugad sa pisikal puedeng poon sa saradit na gurot sagkod sa hararom na mga lugad, asin bakong gabos parareho an kaipuhan na atension. Kapareho iyan nin nalugadan na boot—an ibang lugad mas hararom kisa sa iba. Talaga daw na kaipuhan tang gibohon na isyu an lambang sadit na pagkakasala sa sato sa relasyon niato sa iba? An saradit na pagkairitar, pagdespresyar, asin pagkauyam kabtang nin buhay asin dai man talaga nagkakaipo nin pormal na pagpapatawad. Kun kita midbid bilang saro na rinarayoan an iba huli sa lambang sadit na pagkadesganar dangan nag-iinsister na sinda maghagad nin dispensasyon bago niato giraray sinda trataron na may pagrespeto, tibaad mapirit ta sinda na mag-ingat na marhay sa pakikiiba sa sato—o dumistansia sa sato!
10 Imbes, orog nanggad karahay na “magkaigwa nin reputasyon sa pagigin makatanosan.” (Filipos 4:5, Phillips) Bilang mga linalang na bakong sangkap na naglilingkod na magkaabaga, rasonable sanang malalaoman ta na sa panapanahon tibaad mairitar kita sa satong mga tugang asin sinda iyo man sa sato. An Colosas 3:13 nagsasadol sa sato: “Padagos kamong magpatiriostios.” An pananaram na iyan nagsusuherir nin pagpapasensia sa iba, na pinapabayaan na sana an mga bagay na dai niato nagugustohan sa sainda o an mga ugale na tibaad nakaiiritar sa sato. An siring na pagpapasensia asin pagpopogol makatatabang sa sato na atubangon an saradit na pagkakasala sa sato sa satong relasyon sa iba—na dai dinidisturbo an katoninongan kan kongregasyon.—1 Corinto 16:14.
Kun Mas Hararom an mga Lugad
11. Kun an iba magkasala tumang sa sato, ano an makatatabang sa sato na patawadon sinda?
11 Minsan siring, kumusta kun an iba magkasala tumang sa sato, na risang-risa an lugad? Kun bako man na magabaton an kasalan, tibaad dai man kita masakitan na gayo sa pag-aplikar kan hatol sa Biblia na ‘sueltong magpatarawadtawadan.’ (Efeso 4:32) An siring na pagigin andam na magpatawad kaoyon kan ipinasabong na mga tataramon ni Pedro: “Orog sa gabos, magkaigwa nin makosog na pagkamoot sa lambang saro, huli ta an pagkamoot nakatatahob sa dakol na kasalan.” (1 Pedro 4:8) An paggirumdom na kita mga parakasala man nakatatabang sa sato na pagpasensiahan an mga kalapasan nin iba. Sa siring kun kita nagpapatawad, binubutasan ta an hinanakit imbes na pataluboon iyan. Bilang resulta, an satong relasyon sa nagkasala tibaad dai madanyaran nin haloy, asin nakatatabang man kita na mapreserbar an mahalagang marhay na katoninongan kan kongregasyon. (Roma 14:19) Pag-abot nin panahon, tibaad malingawan na man an nagibo nia.
12. (a) Anong inisyatiba an tibaad kaipuhan niatong gibohon tanganing mapatawad an saro na nakakolog nin hararom sa sato? (b) Paano ipinaririsa kan mga tataramon sa Efeso 4:26 na maninigo niatong resolberan tolos an mga bagay?
12 Pero kumusta kun may magkasala tumang sa sato sa mas seryosong paagi, na hararom an pagkalugad sa sato? Halimbawa, an sarong pinagtitiwalaan na katood tibaad ihinayag an labi-labi kapersonal na mga bagay na itinuga nindo sa saiya nin sekreto. An pagmate nindo kamo nakolgan na marhay an boot, napasopog, asin pinagtraydoran. Hiningoa nindong lingawan iyan, alagad ta dai iyan mawara. Sa siring na kamugtakan, tibaad kaipuhan kamong gumibo nin inisyatiba na resolberan an problema, tibaad paagi sa pakikipag-olay sa nagkasala. Madonong na gibohon ini bago grumabe an bagay na iyan. Si Pablo nagsadol sa sato: “Maanggot kamo, pero dai kamo magkasala [an boot sabihon, paagi sa pagtanom sa boot o pagpadara sa satong kaanggotan]; dai nindo pagpasolnopon an saldang na kamo may kaanggotan.” (Efeso 4:26) Nakadadagdag sa kahulogan kan mga tataramon ni Pablo an bagay na sa tahaw kan mga Judio, an pagsolnop nin saldang iyo an pagkatapos nin sarong aldaw asin an pagpoon nin sarong bagong aldaw. Huli kaini, an sadol: Resolberan tolos an bagay!—Mateo 5:23, 24.
13. Kun dinodolok ta an saro na nagkasala sa sato, ano an maninigo na magin katuyohan niato, asin anong mga suhestion an makatatabang sa sato na magibo iyan?
13 Paano nindo maninigong dolokon an nagkasala? ‘Hanapon an katoninongan asin gibohon iyan,’ an sabi kan 1 Pedro 3:11. An katuyohan nindo, kun siring, bakong ipahayag an kaanggotan kundi makipagkatoninongan sa saindong tugang. Sa katuyohan na iyan, pinakamarahay na likayan an makolog na mga tataramon asin hiro; ini tibaad makapukaw nin kaparehong reaksion kan sa ibong na lado. (Talinhaga 15:18; 29:11) Dugang pa, likayan an labi-labing mga tataramon na arog nin, “Pirme ka na sanang . . . !” o, “Dai ka lamang . . . !” An siring na labi-labing mga komento tibaad magin dahelan sana na sia magdepensa tolos. Imbes, ipaheling paagi sa saindong tono nin boses asin panlauog na gusto nindong resolberan an sarong bagay na nakakolog na marhay sa saindo. Magin espesipiko sa pagpaliwanag kan saboot nindo manongod sa nangyari. Tawan nin oportunidad an sa ibong na lado na ipaliwanag an saiyang mga ginibo. Maghinanyog sa saiyang sinasabi. (Santiago 1:19) Ano an karahayan kaiyan? An Talinhaga 19:11 nagpapaliwanag: “An pakarorop nin tawo nakapopogol nanggad sa saiyang kaanggotan, asin kagayonan nia an dai pag-intindi sa kasalan.” An pagsabot sa mga pagmate kan ibong na lado asin sa mga dahelan kan saiyang gawe-gawe puedeng makahale sa negatibong mga kaisipan asin saboot manongod sa saiya. Kun dinodolok ta an situwasyon na an pasohan makipagkatoninongan asin pinapagdadanay an aktitud na iyan, posibleng marhay na mareresolberan an ano man na dai pagkasinabotan, magigibo an tamang paghagad nin dispensasyon, asin ikatatao an kapatawadan.
14. Kun kita magpapatawad sa iba, sa anong sentido na kita maninigong maglingaw?
14 An pagpatawad daw sa iba nangangahulogan na dapat niatong aktuwal na lingawan an nangyari? Girumdoma an mismong halimbawa ni Jehova sa bagay na ini, na ipinaliwanag sa sinusundan na artikulo. Kun sinasabi kan Biblia na linilingawan ni Jehova an satong mga kasalan, dai boot sabihon kaini na dai na nia iyan natatandaan. (Isaias 43:25) Imbes, sia naglilingaw sa sentido na oras na sia magpatawad, an mga kasalan na iyan dai nia gagamiton tumang sa sato pag-abot nin panahon. (Ezequiel 33:14-16) Kaagid kaiyan, an pagpatawad sa kapwa dai man nangangahulogan na dai na niato matatandaan an ginibo ninda. Minsan siring, puede kitang maglingaw sa sentido na dai niato iyan gagamiton tumang sa nagkasala o kukulibaton iyan pag-abot nin panahon. Huling nahusay na an bagay, bakong tama na itsismis iyan; ni mamomoton man na biyong likayan an nagkasala, na tinatratar sia na garo baga tiwalag. (Talinhaga 17:9) Totoo, tibaad kaipuhan an haloy-haloy na panahon na makabalik sa dati an satong relasyon sa saiya; tibaad bako na kitang arog kadayupot kaidto. Alagad ta namomotan pa niato sia bilang satong Kristianong tugang asin ginigibo ta an satong pinakamakakaya na papagdanayon an matoninong na relasyon.—Ikomparar an Lucas 17:3.
Kun Garo Baga Imposibleng Magpatawad
15, 16. (a) Hinahagad daw sa mga Kristiano na magpatawad sa sarong nagkasala na dai nagsosolsol? (b) Paano niato ikaaaplikar an sadol kan Biblia na yaon sa Salmo 37:8?
15 Pero kumusta kun an iba magkasala tumang sa sato sa paagi na hararomon an lugad na ginibo, alagad ta an nagkasala dai inaako an kasalan, dai nagsosolsol, asin dai naghahagad nin dispensasyon? (Talinhaga 28:13) Malinaw na sinasabi kan Kasuratan na si Jehova dai nagpapatawad sa dai nagsosolsol, may katagasan na mga parakasala. (Hebreo 6:4-6; 10:26, 27) Kumusta man kita? An Insight on the Scriptures nagsasabi: “Dai hinahagad sa mga Kristiano na patawadon an mga naggigibo nin may maraot na intension, tuyong kasalan na mayong pagsolsol. An mga siring nagigin kaiwal nin Dios.” (Tomo 1, pahina 862) Daing Kristiano na nagin biktima nin grabe kabakong makatanosan, makauuyam nin makuri, o makababaldeng pagtratar na maninigong mapiritan na magpatawad, o magtao nin indulto, sa sarong nagkasala na dai nagsosolsol.—Salmo 139:21, 22.
16 Natural sana na an mga nagin biktima nin maringis na pagmaltrato tibaad makolgan an boot asin maanggot. Minsan siring, girumdoma na an pagtanom nin kaanggotan asin hinanakit puedeng makadanyar na marhay sa sato. Kun hahalaton an pag-admitir o paghagad nin dispensasyon na nungkang nangyayari, tibaad lalo sana kitang maaburido. Tibaad huling pirmeng nasa isip an inhustisya kita papagdanayon na nagpuputok sa kaanggotan, na may nakapanluluya nin biyo na mga epekto sa satong espirituwal, emosyonal, asin pisikal na salud. Garo man sana tinotogotan niato an nakakolog sa sato na padagos na kolgan kita. Madonong nanggad na an Biblia nagsasadol: “Pabayaan an kaanggotan asin rumayo sa kabangisan.” (Salmo 37:8) Kun siring, nadidiskobre nin nagkapirang Kristiano na pag-abot nin panahon nakapagdesisyon sinda na magpatawad sa sentido na dai na nagtatanom nin hinanakit—dai man pinagigian an nangyari sa sainda, kundi nagsasayumang mapano nin kaanggotan. Lubos na isinasarig an bagay na iyan sa kamot kan Dios nin hustisya, sinda nakamamate nin dakulang kaginhawahan asin nakapamumuhay na nin trangkilo.—Salmo 37:28.
17. Anong nakararangang garantiya an itinatao kan panuga ni Jehova na nasusurat sa Kapahayagan 21:4?
17 Kun hararomon an lugad, tibaad dai niato mahimo na biyong paraon iyan sa satong isip, kisuerra bakong sa palakaw na ini nin mga bagay. Alagad si Jehova may ipinanunugang sarong bagong kinaban na dian “papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:4) An ano man na tibaad magirumdoman ta sa panahon na iyan dai na matao sa sato nin grabeng kahorasaan sa isip, o kolog, na tibaad nagpapagabat ngonyan sa satong puso.—Isaias 65:17, 18.
18. (a) Taano ta kaipuhan an pagigin mapagpatawad sa satong relasyon sa satong mga tugang na lalaki asin babae? (b) Kun an iba magkasala tumang sa sato, sa anong sentido kita puedeng magpatawad asin maglingaw? (c) Paano kita nakikinabang digdi?
18 Mientras tanto, kita kaipuhan na iribang mamuhay asin magtrabaho bilang magturugang na lalaki asin babae na bakong sangkap, makasalan na mga tawo. Kita gabos nasasala. Sa panapanahon, nakapadedesganar kita sa lambang saro asin nakakokolog pa ngani sa lambang saro. Aram na marhay ni Jesus na kakaipuhanon tang magpatawad sa iba, “bakong, Sagkod sa pitong beses, kundi, Sagkod sa pitong polo may pitong beses”! (Mateo 18:22) Totoo, dai kita puedeng magpatawad nin kapareho kalubos ni Jehova. Pero, sa kadaklan na kaso kun an satong mga tugang magkasala tumang sa sato, puede kitang magpatawad sa sentido na haleon niato an paghinanakit asin puede kitang maglingaw sa sentido na dai niato gamiton an bagay na iyan tumang sa sainda nin daing sagkod sa ngapit. Kun kita nagpapatawad asin naglilingaw sa siring na paagi, kita nakatatabang na mapreserbar bako sanang an katoninongan kan kongregasyon kundi siring man an sato mismong katoninongan sa isip asin puso. Orog sa gabos, mapapasato an katoninongan na solamente an satong mamomoton na Dios, si Jehova, an makatatao.—Filipos 4:7.
[Mga Nota sa Ibaba]
a Sono sa Talmud kan Babilonya, an sarong tradisyon nin mga rabi nagsasabi: “Kun an sarong tawo maglapas, sa primero, ikaduwa asin ikatolong beses patatawadon sia, sa ikaapat na beses sia dai patatawadon.” (Yoma 86b) Sa sarong kabtang basado ini sa salang pagsabot sa mga teksto na arog kan Amos 1:3; 2:6; asin Job 33:29.
b Ipinublikar kan Watchtower Bible and Tract Society of New York, Inc.
Mga Hapot sa Repaso
◻ Taano ta maninigo kitang magin andam na magpatawad sa iba?
◻ Anong klaseng mga situwasyon an naghahagad na kita ‘padagos na magpatiriostios’?
◻ Kun kita nakolgan nin hararom kan mga kasalan nin iba, ano an puede niatong gibohon tanganing resolberan an bagay na iyan sa matoninong na paagi?
◻ Kun kita nagpapatawad sa iba, sa anong sentido na kita maninigong maglingaw?
[Retrato sa pahina 16]
Kun kita nagtatanom nin hinanakit, an nagkasala tibaad biyong dai nag-aaram kan satong grabeng karibarawan
[Retrato sa pahina 17]
Kun dodolokon nindo an iba tanganing makipagkatoninongan, an mga dai pagkasinabotan puedeng pasil na mahale