Padagos na Maglakaw sa Kaibanan nin Dios
“Magpadagos kamong maglakaw sa espiritu asin dai kamo makakagibo nin ano man na horot nin laman.”—GALACIA 5:16.
1. (a) Si Enoc naglakaw sa kaibanan nin Dios sa tahaw nin anong mga kamugtakan asin gurano kalawig? (b) Gurano kalawig na si Noe naglakaw sa kaibanan nin Dios, asin ano an magagabat na paninimbagan nia?
AN Biblia nagsasabi sa sato na si Enoc “nagpadagos na maglakaw sa kaibanan kan tunay na Dios.” Sa ibong kan nakakukubhan na pananaram asin maraot na gawe-gawe kan mga tawo sa palibot nia, sia nagdanay na naglalakaw sa kaibanan nin Dios sagkod sa katapusan kan saiyang buhay sa edad na 365. (Genesis 5:23, 24; Judas 14, 15) Si Noe “naglakaw [man] sa kaibanan kan tunay na Dios.” Ginibo nia iyan mantang inaataman nia an saiyang pamilya, mantang inaatubang an sarong kinaban na naimpluwensiahan kan rebeldeng mga anghel asin kan saindang madahas na mga aki, asin mantang inaasikaso an gabos na detalye na kalabot sa pagtogdok nin sarong dakulang dahong na mas dakula kisa sa arin man na sasakyan na pandagat kan suanoy na mga panahon. Sia padagos na naglakaw sa kaibanan nin Dios pagkatapos kan Delubyo, dawa ngani kan an rebelyon tumang ki Jehova naglataw giraray sa Babel. Tunay nanggad, si Noe nagpadagos na naglakaw sa kaibanan nin Dios sagkod na sia nagadan sa edad na 950.—Genesis 6:9; 9:29.
2. Ano an boot sabihon kan ‘paglakaw sa kaibanan nin Dios’?
2 Kun sinasabi na an mga lalaking ini na may pagtubod ‘naglakaw’ sa kaibanan nin Dios, ginagamit kan Biblia an termino sa piguratibong sentido. Iyan nangangahulogan na si Enoc asin Noe guminawe sa paagi na nagtaong ebidensia nin makosog na pagtubod sa Dios. Ginibo ninda an ipinagboot sa sainda ni Jehova asin ginigiyahan an saindang buhay kaoyon sa kun ano an aram ninda manongod sa saiya sa saiyang tratamiento sa katawohan. (Ikomparar an 2 Cronica 7:17.) Dai sana sinda nagpahayag nin pag-oyon sa isip sa sinabi asin ginibo nin Dios kundi sinda naghiro sono sa gabos na kahagadan nia—bako sanang nagkapira sa mga iyan kundi gabos iyan sagkod sa kaya ninda bilang bakong sangkap na mga tawo. Sa siring si Noe, halimbawa, ginibo an sono sa ipinagboot sa saiya nin Dios. (Genesis 6:22) Si Noe dai naeenot sa mga paggiya na itinao sa saiya, asin sia dai nag-aatraso na may kapabayaan. Bilang saro na dayupot ki Jehova, na sueltong nakapapamibi sa Dios asin naoogma sa paggiya nin Dios, sia naglakaw sa kaibanan nin Dios. Ginigibo daw nindo iyan?
Daing Liwat-Liwat na Pamumuhay
3. Ano an mahalagang marhay para sa gabos na dusay asin bautisadong lingkod nin Dios?
3 Nakaoogmang maobserbaran an mga tawo na nagpopoon na maglakaw sa kaibanan nin Dios. Mantang sinda naggigibo nin positibong mga lakdang kaoyon kan kabotan ni Jehova, sinda nagtatao nin ebidensia nin pagtubod, na kun mayo kaiyan mayo nin puedeng makapaogma sa Dios. (Hebreo 11:6) Kanigoan an satong paggayagaya na taon-taon, sa promedyo para sa nakaaging limang taon, labing 320,000 katawo an nagdusay kan saindang sadiri ki Jehova asin iprinesentar an saindang sadiri para sa bautismo sa tubig! Alagad mahalaga man na sinda asin kita gabos padagos na maglakaw sa kaibanan nin Dios.—Mateo 24:13; Kapahayagan 2:10.
4. Minsan ngani sinda nagpaheling man nin pagtubod, taano ta dai nakalaog sa Dagang Panuga an kadaklan sa mga Israelita na naghale sa Egipto?
4 Kan kaaldawan ni Moises, kinaipuhan an pagtubod para sa sarong Israelitang pamilya na selebraron an Paskua sa Egipto asin wirikan nin dugo an mga harigi kan pinto asin an itaas na parte kan pinto kan saindang harong. (Exodo 12:1-28) Minsan siring, an pagtubod kan dakol nag-urong-sulong kan maheling ninda an hukbo ni Faraon na harani na sa hudian ninda sa Dagat na Pula. (Exodo 14:9-12) Ipinaheheling kan Salmo 106:12 na kan sinda ligtas na nakaagi sa marang daga sa irarom kan dagat asin naheling an nag-aalimbukad na katubigan na pinoho an hukbo nin Egipto, sinda ‘tuminubod [giraray] sa tataramon ni Jehova.’ Minsan siring, dai nahaloy pakatapos kaiyan sa kaawagan, an mga Israelita nagpoon na magreklamo manongod sa inomon na tubig, kakanon, asin pangengenot. Natakot sinda huli sa negatibong bareta kan 10 sa 12 espiya na nagbalik hale sa Dagang Panuga. Sa siring na mga kamugtakan, arog kan sinasabi kan Salmo 106:24, ‘mayo sinda nin pagtubod sa tataramon nin Dios.’ Gusto nindang magbalik sa Egipto. (Bilang 14:1-4) Kun may pagtubod man sinda iyan naririsa sana kun sinda nakaheheling nin ekstraordinaryong mga paheling kan kapangyarihan nin Dios. Dai sinda nagpadagos na maglakaw sa kaibanan nin Dios. Bilang resulta, an mga Israelitang idto dai nakalaog sa Dagang Panuga.—Salmo 95:10, 11.
5. Paano konektado an 2 Corinto 13:5 asin Talinhaga 3:5, 6 sa paglakaw sa kaibanan nin Dios?
5 Sinasadol kita kan Biblia: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) An pagigin “nasa pagtubod” nangangahulogan nin pagsusog sa kabilogan nin Kristianong mga paniniwala. Ini mahalagang marhay tanganing magin mapanggana kita sa paglakaw sa kaibanan nin Dios sa gabos na aldaw kan satong buhay. Tanganing makalakaw sa kaibanan nin Dios, kaipuhan man niatong gibohon an kualidad na pagtubod, na biyong nagtitiwala ki Jehova. (Talinhaga 3:5, 6) Kadakol nin litag asin atbong na puedeng makasiod sa mga dai nakagigibo kaiyan. Ano an nagkapira sa mga ini?
Rayoan an Siod nin Kompiansa sa Sadiri
6. Ano an aram kan gabos na Kristiano manongod sa pakikisaro asin pagsambay, asin ano an saboot ninda manongod sa mga kasalan na ini?
6 An gabos na nag-adal sa Biblia, idinusay an sadiri ki Jehova, asin binautismohan nakaaaram na kinokondenar kan Tataramon nin Dios an pakikisaro asin pagsambay. (1 Tesalonica 4:1-3; Hebreo 13:4) An mga siring minaoyon na ini tama. Intension nindang mamuhay sono dian. Pero, an seksuwal na inmoralidad padagos na nagigin saro sa pinakaepektibong mga siod ni Satanas. Taano?
7. Sa Kaplanodohan kan Moab, paano napalabot an mga lalaking Israelita sa gawe-gawe na aram nindang sala?
7 Sa primero, idtong mga napalabot sa siring na inmoral na gawe-gawe tibaad dai man nagpaplano na gibohon iyan. Tibaad totoo man iyan sa mga Israelita sa Kaplanodohan kan Moab. Sa mga lalaking Israelita na pagal na sa buhay sa kaawagan, an mga babaeng Moabita asin Midianita na nan-akit sa sainda tibaad sa primero garo baga makikatood asin mapag-istimar. Alagad ano an nangyari kan akoon kan mga Israelita an mga pangagda na makiibaiba sa mga tawo na naglilingkod ki Baal asin bakong ki Jehova, mga tawo na tinogotan an saindang hoben na mga aking babae (dawa hale sa prominenteng mga pamilya) na makidorog sa mga lalaki na bako nindang agom? Kan an mga lalaki sa kampo kan Israel nagpoon na mansayon na makawiwili an siring na mga pakipag-asosyar, sinda natentaran na gibohon an mga bagay na aram nindang sala, asin ini nagin dahelan kan pagkagadan ninda.—Bilang 22:1; 25:1-15; 31:16; Kapahayagan 2:14.
8. Sa satong aldaw, ano an tibaad maggiya sa sarong Kristiano sa seksuwal na inmoralidad?
8 Ano an tibaad magin causa na an saro maholog sa kaagid na siod sa satong aldaw? Minsan ngani tibaad aram nia an kagabatan nin seksuwal na inmoralidad, kun dai man nia sasaboton an peligro nin kompiansa sa sadiri, tibaad togotan nia na sia mamugtak sa sarong situwasyon na an pan-aakit na gumibo nin sala mangibabaw sa saiyang pangangatanosan.—Talinhaga 7:6-9, 21, 22; 14:16.
9. Anong Makakasuratan na mga patanid an puedeng magprotehir sa sato tumang sa inmoralidad?
9 Sa malinaw na pananaram an Tataramon nin Dios nagpapatanid sa sato na dai padaya sa pag-isip na kita makosog na marhay kaya an maraot na mga pag-iriba dai makararaot sa sato. Kabale dian an pagdalan nin mga programa sa telebisyon na nagtatampok kan pamumuhay kan inmoral na mga tawo asin pagheling sa mga magasin na nagpupukaw nin inmoral na mga horot. (1 Corinto 10:11, 12; 15:33) Dawa an pakipag-asosyar sa mga kapagtubod sa salang mga kamugtakan puedeng gumiya sa magabat na mga problema. An atraksion sa pag-oltanan nin bakong magkasekso makosog. Igwa nin mamomoton na pagmakolog na an organisasyon ni Jehova kun siring nagpapatanid tumang sa pagsolosolo asin daing ibang nakaheheling kaiba nin sarong bakong kasekso na bako tang agom o bakong kapamilya. Tanganing padagos na maglakaw sa kaibanan nin Dios, kaipuhan na rayoan niato an siod nin kompiansa sa sadiri asin himateon an nagpapatanid na hatol na itinatao nia sa sato.—Salmo 85:8.
Dai Nindo Togotan na Kamo Kontrolon kan Takot sa Tawo
10. Paano nagigin siod an “pagtakig sa mga tawo”?
10 An saro pang peligro ipinamimidbid sa Talinhaga 29:25, na nagsasabi: “An pagtakig sa mga tawo sarong siod.” An siod nin paraayam sa parate igwa nin pansiod na minatindi sa palibot kan liog o mga pisi na minaporopot sa bitis nin sarong hayop. (Job 18:8-11) An pagtakig sa mga tawo puede man na makapogol sa abilidad nin sarong tawo na sueltong magtaram asin gumawe sa paagi na nakapaoogma sa Dios. Normal an pagmawot na paogmahon an iba, asin an daing herak na dai pag-intindi sa iisipon nin ibang tawo bakong sa Kristiano. Alagad kaipuhan an pagigin timbang. Kun iniisip an posibleng magin reaksion nin ibang mga tawo kaya ginigibo nin saro an ipinangangalad nin Dios o dai ginigibo an ipinagboboot kan Tataramon nin Dios, an indibiduwal na iyan nasiod na.
11. (a) Ano an proteksion tumang sa pagtogot sa takot sa tawo na kontrolon an saro? (b) Paano tinabangan ni Jehova an saiyang mga lingkod na nasasakitan sa takot sa tawo?
11 An proteksion tumang sa siring na siod minadepende, bakong sa natural na disposisyon nin saro, kundi sa ‘pagtitiwala ki Jehova.’ (Talinhaga 29:25b) Paagi sa pagtitiwala sa Dios, dawa an sarong tawo na masosopgon an personalidad puedeng magin mapuso asin marigon. Sagkod na kita napalilibotan kan mga pangigipit kan palakaw na ini nin mga bagay ni Satanas, kita mangangaipong magmaan tumang sa nakasisiod na takot sa tawo. Minsan ngani an propetang si Elias marahay an rekord nin paglilingkod na may kapusoan, kan maghuma si Jezabel na sia ipagagadan, sia nagdulag huli sa takot. (1 Hade 19:2-18) Kan nagigipit, huli sa takot nagrirong si apostol Pedro na midbid nia si Jesu-Cristo, asin pakalihis nin dakol na taon tinogotan nia an takot na papangyarihon siang gumawe sa paagi na sarongat sa pagtubod. (Marcos 14:66-71; Galacia 2:11, 12) Minsan siring, si Elias asin Pedro pareho nag-ako nin espirituwal na tabang asin, may kompiansa ki Jehova, padagos na naglingkod na inaako nin Dios.
12. Anong mga halimbawa sa presenteng panahon an nagpapaheling kun paano natabangan an mga indibiduwal na malikayan an pagtogot sa takot na pogolan sinda sa pagpaogma sa Dios?
12 Dakol sa mga lingkod ni Jehova sa satong aldaw an nakanood man kun paano dadaogon an nakasisiod na takot. Sarong tin-edyer na Saksi sa Guyana an nag-admitir: “Mapuersa an pakikilaban tanganing tumangon an impluwensia nin kairiba sa eskuelahan.” Alagad idinugang nia: “Kaya iyo man an sakong pagtubod ki Jehova.” Kan an saiyang maestro pag-olog-ologon sia sa atubangan kan bilog na klase huli sa saiyang pagtubod, sia toninong na namibi ki Jehova. Kan huri sa pribado sia nagtao nin mataktikang patotoo sa maestro. Durante nin pagdalaw sa saiyang ginikanan na banwaan sa Benin, an sarong hoben na lalaki na nag-aadal kan mga kahagadan ni Jehova nagdesisyon na haleon an idolo na ginibo kan saiyang ama para sa saiya. Aram kan hoben na lalaki na an imahen daing buhay, asin dai nia iyan kinatatakotan, alagad aram nia man na an anggot na mga tagabaryo tibaad maghingoang gadanon sia. Sia namibi ki Jehova, dangan kan banggi dinara nia an idolo sa kadlagan asin itinapok iyan. (Ikomparar an Hokom 6:27-31.) Kan an sarong babae sa Republika Dominica nagpoon na maglingkod ki Jehova, pinapamili sia kan saiyang agom kun baga sia sa saiya o ki Jehova. Tinakot sia kan lalaki na ididiborsio. Aabandonaron nia daw an saiyang pagtubod huli sa takot? Sia nagsimbag: “Kun kalabot an pagtraydor, ako masosopog, alagad dai ako nasosopog sa paglilingkod ki Jehova Dios!” Sia padagos na naglakaw sa kaibanan nin Dios, asin pag-abot nin panahon an saiyang agom nakiayon sa saiya sa paggibo kan kabotan ni Jehova. May kompletong tiwala sa satong langitnon na Ama, malilikayan ta man an pagtogot sa takot sa tawo na pogolon kita sa paggibo kan aram tang makapaoogma ki Jehova.
Likayan na Pasaditon an Hatol
13. Manongod sa anong siod na kita pinatatanidan sa 1 Timoteo 6:9?
13 Minsan ngani an nagkapirang siod na ginagamit kan mga paraayam dinisenyo tanganing makadakop nin ano man na hayop na mapaagi sa sarong lugar, an ibang siod inaakit an mga hayop paagi sa mapandayang nakaeenganyar na paon. Para sa dakol na tawo, an kayamanan arog kaiyan. (Mateo 13:22) Sa 1 Timoteo 6:8, 9, an Biblia ineenkaminar kita na manigoan sa kakanon asin gubing. Dangan iyan nagpapatanid: “Idtong mga desididong yumaman nahoholog sa sugot asin sa siod patin sa dakol na rungaw asin nakararaot na mawot, na nagdadara sa mga tawo sa kalaglagan asin kapahamakan.”
14. (a) Ano an tibaad makaolang sa sarong tawo na isapuso an hatol na manigoan sa kakanon asin gubing? (b) Paano an salang pakahulogan sa kayamanan tibaad magpangyari sa saro na pasaditon an patanid na nakarekord sa 1 Timoteo 6:9? (c) Sa anong paagi tibaad butahon kan “horot nin mga mata” an nagkapira sa siod na naghahalat sa sainda?
14 Sa ibong kan patanid na ini, dakol an nasisiod huli ta dai ninda iinaaplikar an hatol sa saindang sadiri. Taano? Kapalangkawan daw an nagtutulod sa sainda na iinsister an pagsusog sa sarong estilo nin pamumuhay na naghahagad nin orog pa kisa sa “kakanon asin gubing” na isinasadol sa sato kan Biblia na manigoan? Posible daw na pinasasadit ninda an patanid kan Biblia huli ta an pakahulogan ninda kan kayamanan sono sa kun ano an yaon sa mga tawong mayaman na marhay? An Biblia nagsasabi sana na an determinasyon na yumaman kabaliktaran nin pagigin naninigoan sa kakanon asin gubing. (Ikomparar an Hebreo 13:5.) Nagigin dahelan daw “an horot nin mga mata”—an horot na magkaigwa kan mga bagay na naheheling ninda, dawa isakripisyo an espirituwal na mga aktibidad—na gibohon nindang segunda sana an intereses kan tunay na pagsamba? (1 Juan 2:15-17; Haggeo 1:2-8) Kanigoan kamas maogma kaidtong mga tunay na isinasapuso an hatol kan Biblia asin naglalakaw sa kaibanan nin Dios paagi sa paggibong pinakasentro kan saindang buhay kan paglilingkod ki Jehova!
Mapangganang Pag-atubang sa mga Kahaditan sa Buhay
15. Anong mga situwasyon an natural sanang nagkacausa nin kahaditan sa dakol sa banwaan ni Jehova, asin sa anong siod kita dapat na magin listo kun kita nasa siring na pangigipit?
15 Mas komun kisa sa determinasyon na yumaman an paghadit kun paano makukua an mga kinakaipuhan sa buhay. Dakol sa mga lingkod ni Jehova an nabubuhay na kakadikit sana an rogaring. Sinda nagtatrabaho nin dakol na oras tangani sanang magkaigwa dawa kan pundamental na gubing, lugar na matotorogan kan saindang pamilya kun banggi, asin kisuerra kakanon para sa aldaw. An iba nasasakitan sa mga problema huli sa helang o paggurang ninda o kan mga miembro kan pamilya. Pasil sana nanggad na togotan an siring na mga kamugtakan na pogolon an espirituwal na intereses sa saindang buhay!—Mateo 13:22.
16. Paano kita tinatabangan ni Jehova na atubangon an mga kagipitan sa buhay?
16 Sa mamomoton na paagi, sinasabi sa sato ni Jehova an manongod sa kaginhawahan na maeeksperyensiahan sa pamamahala kan Mesiyanikong Kahadean. (Salmo 72:1-4, 16; Isaias 25:7, 8) Tinatabangan nia man kita na atubangon an mga kagipitan sa buhay ngonyan paagi sa pagtao sa sato nin hatol sa kun paano papagdadanayon na tama an satong mga prioridad. (Mateo 4:4; 6:25-34) Paagi sa rekord kun paano nia tinabangan an saiyang mga lingkod kan suanoy, pinakokosog ni Jehova an satong boot. (Jeremias 37:21; Santiago 5:11) Pinasasarig nia kita kan pakaaram na, ano man na kasakitan an dumatong sa sato, an saiyang pagkamoot sa saiyang maimbod na mga lingkod nagdadanay na dai naliliwat. (Roma 8:35-39) Sa mga nagtitiwala ki Jehova, sia nagpapahayag: “Sa ano man na paagi dai taka babayaan ni sa ano man na paagi pababayaan taka.”—Hebreo 13:5.
17. Magtao nin mga halimbawa kun paano an mga indibiduwal na nakaeeksperyensia nin grabeng kasakitan nakapadagos na maglakaw sa kaibanan nin Dios.
17 Napakosog kan pakaaram kaini, an tunay na mga Kristiano padagos na naglalakaw sa kaibanan nin Dios imbes na bumirik sa kinabanon na mga dalan. An sarong komun na kinabanon na pilosopiya sa tahaw kan mga dukha sa dakol na kadagaan iyo na an pagkua nin bagay sa mas may kaya tanganing mapakakan mo an saimong pamilya bakong paghabon. Alagad an mga naglalakaw paagi sa pagtubod sinasayumahan an siring na pagmansay. Pinahahalagahan ninda an pag-oyon nin Dios nin orog kisa sa ano pa man asin naglalaom sa saiya na babalosan an saindang sadiosan na gawe-gawe. (Talinhaga 30:8, 9; 1 Corinto 10:13; Hebreo 13:18) Nanompongan nin sarong balo sa India na an pagigin andam na magtrabaho na may kaibang pagkamapamaagi nakatabang sa saiya na maatubang an mga problema. Imbes na ipaghinanakit an saiyang kamugtakan sa buhay, aram nia na, kun eenoton nia sa saiyang buhay an Kahadean nin Dios asin an saiyang katanosan, bebendisyonan ni Jehova an saiyang mga paghihingoa na makua an pangenot na mga kinakaipuhan nia asin kan saiyang aking lalaki. (Mateo 6:33, 34) Rinibo sa palibot kan daga an nagpapaheling na, ano man na kasakitan an tibaad naeeksperyensiahan ninda, si Jehova an saindang pailihan asin kuta. (Salmo 91:2) Totoo daw iyan sa saindo?
18. Ano an liabe tanganing malikayan an mga siod kan kinaban ni Satanas?
18 Sagkod na kita nabubuhay sa presenteng palakaw nin mga bagay, magkakaigwa nin mga siod na dapat likayan. (1 Juan 5:19) An mga ini pinamimidbid sa sato kan Biblia asin ipinaheheling sa sato kun paano lilikayan an mga iyan. Idtong mga tunay na namomoot ki Jehova asin igwa nin nakararahay na takot na mapamondo sia puedeng mapangganahan an siring na mga siod. Kun sinda ‘padagos na maglalakaw sa espiritu,’ dai sinda mapadara sa kinabanon na mga dalan. (Galacia 5:16-25) Para sa gabos na totoong ikinokonsentrar an saindang buhay sa saindang relasyon ki Jehova, yaon an dakulang oportunidad na maglakaw sa kaibanan nin Dios, na dayupot sa saiya sagkod lamang.—Salmo 25:14.
Ano an Komento Nindo?
◻ Paano puedeng magin siod an kompiansa sa sadiri?
◻ Ano an makapoprotehir sa sato tumang sa pagigin kontrolado nin takot sa tawo?
◻ Ano an tibaad magpangyari sa sato na dai ikaaplikar an hatol manongod sa peligro nin pag-aaabot sa kayamanan?
◻ Ano an puedeng makatabang na malikayan niato na masiod kan mga kahaditan sa buhay?
[Retrato sa pahina 16, 17]
Dakol an padagos na naglalakaw sa kaibanan nin Dios sa bilog nindang buhay