Pagpakosog kan Satong Pagtubod sa Tataramon nin Dios

MAS dakol na tawo an nakabasa na kan Biblia kisa sa arin man na ibang libro. Alagad pira an nagpaheling nin pagtubod sa mensahe kaiyan? An Biblia mismo nagpapaliwanag na “an pagtubod bakong sadiri nin gabos na tawo.” (2 Tesalonica 3:2) Malinaw nanggad, dai kita namundag na may pagtubod. Iyan dapat na pataluboon. Maski an mga may pagtubod man maninigo na dai ipamugtak na iyan segurado na. An pagtubod puedeng magluya asin magadan. Huli kaini, kaipuhan an paghihingoa tanganing magdanay na “makosog sa pagtubod.”​—Tito 2:2.

May marahay na rason, kun siring, na pinili kan Namamahalang Grupo kan Mga Saksi ni Jehova an temang “Pagtubod sa Tataramon nin Dios” para sa saindang serye nin pandistritong mga kombension sa 1997/98. Minilyon na Saksi asin iba pa an sa siring nagkapribilehio na magtiripon tanganing pakosogon an saindang pagtubod sa Tataramon nin Dios.

An Tataramon nin Dios Katotoohan—An Basehan kan Satong Pagtubod

Ini an tema kan enot na aldaw kan kombension. Iyan nagpoon paagi sa mga tataramon nin komendasyon sa gabos na nag-atender. An presensia sa kombension ebidensia nin paggalang sa Biblia. Pero, iinatubang an nakapapepensar na mga hapot mapadapit sa kualidad kan satong pagtubod: ‘Ikinadedepensa daw niato an satong mga paniniwala, na ginagamit an Tataramon nin Dios bilang autoridad? Inaapresyar ta daw an espirituwal na kakanon, na nungkang pinalilimanlimanan an Biblia, mga pagtiripon kan kongregasyon, asin mga publikasyon na basado sa Biblia? Kita daw nagtatalubo sa pagkamoot, tamang kaaraman, asin pakamansay?’ An gabos inenkaminar kan espiker na maghinanyog nin maingat, na rinirisa na “an ‘Pagtubod sa Tataramon nin Dios’ na Pandistritong Kombension na ini inandam tanganing tabangan kita na siyasaton an satong sadiri asin an kadakulaan patin kualidad kan pagtubod niato bilang mga indibiduwal.”

An pahayag sa pinakatema may titulong “Paglakaw Paagi sa Pagtubod, Bakong Paagi sa Pakaheling.” (2 Corinto 5:7) “An pagtubod kan mga nagigin Saksi ni Jehova bakong madaling mapaniwala,” an sabi kan espiker. Kanigoan katotoo kaini! An tunay na pagtubod bakong buta. Iyan basado sa mga katunayan. An Hebreo 11:​1 nagsasabi: “An pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” An espiker nagkomento: “Kun talagang malakaw kita paagi sa pagtubod, kaipuhan ta an pagtubod na may marigon na basehan.” Huling kita naglalakaw paagi sa pagtubod, bakong paagi sa pakaheling, dai ta kaipuhan an mga detalye manongod sa kun paano asin kun noarin ootobon ni Jehova an gabos na aspekto kan saiyang katuyohan. An aram na niato manongod sa saiya nagtatao sa sato nin absolutong kompiansa sa saiyang kapangyarihan na otobon an saiyang mga panuga sa mamomoton asin makatanosan na paagi.

An pahayag na “Kristianong mga Hoben​—Mahalagang Marhay na Kabtang kan Kongregasyon” nagpagirumdom sa mga hoben kun gurano sinda kamahal na marhay para ki Jehova. Sinda inenkaminar na tumalubo sa espirituwal paagi sa pag-aaabot sa mga pasohan na arog baga kan pagbasa kan bilog na Biblia asin pakaabot sa mga kahagadan para sa pagdusay asin bautismo. Sarong personal na bagay an pagpadagos nin suplementaryong edukasyon na dapat na desisyonan kaiba an mga magurang nin saro, alagad kun iyan kukuanon, an katuyohan maninigo na pirmeng an masangkapan na maglingkod sa Dios nin mas epektibo. An sekular na edukasyon puedeng makatabang para sa kapakipakinabang na katuyohan kun satong ‘sinisierto an orog na mahalagang mga bagay’ na konektado sa satong pagtubod.​—Filipos 1:​9, 10.

Suminunod an simposium na may tolong pahayag sa temang “Kiisay na mga Pamantayan an Sinusunod Nindo?” An pagtubod sa Tataramon nin Dios nagmomotibar sa sato na susogon an mga pamantayan kan Biblia. An mga Kristiano nagkukuyog sa mga ley asin prinsipyo ni Jehova. Halimbawa, sinasadol kita kan Kasuratan na dai maggamit nin malaswa asin raway na mga pananaram. (Efeso 4:​31, 32) An espiker naghapot: “Kun nauuyam o naiiritar, saindo daw na sinisilyakan an saindong agom o an saindong mga aki?” Siempre, iyan bakong sa Kristiano. An Dios igwa man nin mga pamantayan mapadapit sa satong personal na itsura. An mga Kristiano maninigo na magsulot “nin husay na mga gubing, na may kabinian.”​(1 Timoteo 2:​9, 10) An terminong “kabinian” igwa kan ideya nin paggalang sa sadiri, pakamate nin onra, pagigin malinaw an isip, asin pagigin tama sana. Kita minomotibar kan pagkamoot sa iba asin ginigiyahan kan mga prinsipyo sa Biblia patin kan pakamate nin kun ano an angay.

Kabale sa kasunod na duwang pahayag an bersikulo por bersikulong paliwanag sa Hebreo 3:​7-​15 asin 4:​1-​16. An mga tekstong ini sa Biblia nagpapatanid sa sato tumang sa peligro nin pagigin ‘napatagas kan mapandayang kapangyarihan nin kasalan.’ (Hebreo 3:13) Paano kita magigin mapanggana sa satong pakikilaban tumang sa kasalan? Tinatabangan kita ni Jehova paagi sa saiyang Tataramon. Tunay na “an tataramon nin Dios buhay asin mapuersa asin . . . nakamamansay kan mga kaisipan asin intension kan puso.”​—Hebreo 4:12.

An ultimong pahayag sa enot na aldaw kan kombension iyo an “Sarong Libro Para sa Gabos na Tawo.” Itinampok kaiyan an pagkamasasarigan, pagkaeksakto, asin praktikal na halaga kan Biblia. Kanigoan kanakapupukaw sa boot na madangog na iinaanunsiar kan espiker an pagluwas nin sarong bagong 32 pahinang brosyur na may titulong Sarong Libro Para sa Gabos na Tawo! An bagong publikasyon na ini inandam partikularmente para sa mga tawo na, minsan ngani edukado, kadikit an aram manongod sa Biblia. An pahayag natapos paagi sa mga tataramon na: “Kaipuhan na siyasaton mismo nin mga tawo an Tataramon nin Dios. Kompiado kita na kun magsisiyasat mismo sinda, marerealisar ninda na an daing kaagid na librong ini, an Biblia, tunay nanggad na sarong libro para sa gabos na tawo!”

Arogon an “Parasangkap kan Satong Pagtubod”

An temang ini kan ikaduwang aldaw kan kombension dinara an atension ki Jesu-Cristo, an “Parasangkap kan satong pagtubod.” Kaipuhan tang ‘sunodon nin estrikto an saiyang mga lakad.’ (Hebreo 12:2; 1 Pedro 2:21) Dakol sa Kakristianohan an sinasabihan: ‘Magtubod kamo sa Kagurangnan na si Jesus, asin kamo maliligtas!’ Alagad arog sana daw kaiyan an pagtubod? An Biblia nagsasabi na “an pagtubod na daing mga gibo gadan.” (Santiago 2:26) Kun siring, apuera sa pagtubod ki Jesus, dapat na gibohon ta an mga ginibo nia, nangorogna paagi sa paghuhulit kan maogmang bareta kan Kahadean nin Dios.

An programa kan aga nakasentro sa pag-ebanghelyo. Arog ki Pablo, maninigo kitang magin galagang magpahayag kan maogmang bareta nin kaligtasan. (Roma 1:​14-16) Si Jesus naghulit sa mga tawo sa gabos na lugar. Minsan ngani nagbubunga an satong regular na ministeryong pagharongharong, nagdadakol an tawo na mayo sa harong kun kita minasongko. (Gibo 20:20) Dakol an nasa eskuelahan, nagtatrabaho, namamakal, o nagbibiahe. Huli kaini, kaipuhan man kitang maghulit sa pampublikong mga lugar asin saen man manompongan an mga tawo.

An pahayag na “Magin Nakagamot Asin Marigon sa Katotoohan” ipinagirumdom sa sato an dakulang bilang nin bagong mga disipulo na nababautismohan​—may promedyong labing 1,000 kada aldaw! Mahalagang marhay na an mga bagohan na ini magin nakagamot na gayo asin marigon sa pagtubod. (Colosas 2:​6, 7) Ipinaliwanag kan espiker na an literal na mga gamot nagsusupsup nin tubig asin sustansia mantang nagigin man pasisikadan o suporta kan tinanom. Kaagid kaiyan, paagi sa marahay na ugale sa pag-adal asin nakapakokosog na kairiba, an bagong mga disipulo puedeng magin marigon sa katotoohan.

An hatol na ini espesyalmenteng angay para sa mga kandidato sa bautismo. Iyo, sa ikaduwang aldaw kan kombension, darakulang grupo nin bagong mga disipulo an nabautismohan, na sinusunod an halimbawa ni Jesus. An pahayag na “An Pagtubod sa Tataramon nin Dios Naggigiya sa Bautismo” pinagirumdom an mga kandidato na an biyong pagladop sa tubig sarong angay na simbolo kan pagkagadan ninda sa saindang dating makasadiring paagi nin pamumuhay. An paghawas sa sainda sa tubig nagrerepresentar sa pagkabuhay ninda tanganing gibohon an kabotan nin Dios.

An pahayag na “Makipaglaban nin Maigot Para sa Pagtubod” ibinasar sa libro kan Biblia na Judas. Kita inenkaminar na protehiran an satong pagtubod paagi sa pagtumang sa nakadadanyar na mga impluwensia, arog baga kan inmoralidad, pagrebelde, asin apostasiya. Sunod, an mga magurang​—espesyalmente an mga ama—​nag-ako nin espesyal na atension sa pahayag na “Sustentohan an Saindong Kairiba sa Harong.” An pagsustento sa espirituwal, pisikal, asin emosyonal na mga pangangaipo kan pamilya sarong Makakasuratan na obligasyon. (1 Timoteo 5:8) Nangangaipo ini nin panahon, komunikasyon, asin kadayupotan. Sierto nanggad na naoogma si Jehova Dios sa gabos na pagmamaigot nin Kristianong mga magurang na padakulaon sa katotoohan an saindang mga aki.

An kasunod na simposium na, “Dumuman Kita sa Harong ni Jehova,” nagpatalubo nin apresasyon sa Kristianong mga pagtiripon. Iyan nagtatao nin kapahingaloan sa mga kahaditan kan kinaban na ini. Sa mga pagtiripon may oportunidad kita para sa pagparinigonan sa boot, asin ikapaheheling ta an satong pagkamoot sa satong mga kapagtubod. (Hebreo 10:​24, 25) An mga pagtiripon tinabangan man kitang pataromon an satong mga abilidad bilang paratokdo, asin pinarararom kaiyan an satong pakasabot sa katuyohan nin Dios. (Talinhaga 27:17) Nungka logod na kita rumayo sa kongregasyon, asin girumdomon ta an mga tataramon ni Jesus: “Kun saen an duwa o tolo na nagkakatiripon sa ngaran ko, yaon ako sa tanga ninda.”​—Mateo 18:20.

An ultimong pahayag kan aldaw na iyan iyo “An Kualidad kan Saindong Pagtubod​—Nababalo Ngonyan.” An pagtubod na dai nababalo mayo nin probadong halaga, asin an kualidad kaiyan nagdadanay na dai aram. Garo iyan tseke na dai pa napaparibayan. Talaga daw na an nakasurat dian an kantidad kaiyan? Kaagid kaiyan, an satong pagtubod dapat na baloon tanganing mapatunayan na iyan may halaga asin tunay na kualidad. (1 Pedro 1:​6, 7) An espiker nagsabi: “Kun beses, an media saka an mga autoridad naloloko kan mga klerigo asin apostata na gumibo nin falsong mga akusasyon sa sato, na minimisrepresentar an satong Kristianong mga paniniwala asin pamumuhay. . . . Totogotan ta daw an mga binuta ni Satanas na takoton kita asin paluyahon an satong boot patin papangyarihon kita na ikasopog an maogmang bareta? Totogotan ta daw an mga kaputikan manongod sa katotoohan na makaapektar sa satong regular na pag-atender sa mga pagtiripon asin sa satong paghuhulit? O kita daw maninindogan nin marigon asin magigin mapuso patin mas determinado kisa kasuarin pa man na padagos na magbalangibog kan katotoohan manongod ki Jehova asin sa saiyang Kahadean?”

Mabuhay Huli sa Pagtubod

An tema kan ikatolong aldaw kan kombension ibinasar sa mga tataramon ni Pablo: “Hayag na paagi sa ley mayo nin siisay man na pinapakangmatanos sa Dios, huli ta ‘an matanos mabubuhay huli sa pagtubod.’” (Galacia 3:11) An simposium na, “An Makahulang mga Tataramon ni Joel Para sa Satong Aldaw,” saro sa tampok na mga kabtang sa aga. An libro nin Joel nagtotokdo sa satong panahon asin nagsasabi na may pagkaapurado: “Herak man kan aldaw; huli ta harani na an aldaw ni Jehova, asin siring sa pananamsam gikan sa Makakamhan sa gabos na Saro iyan madatong!” (Joel 1:15) Sa paagi na kaagid kan sa daing ontok na mga doron, dai tinotogotan kan linahidan na mga Kristiano na may makaolang sa pagbalangibog kan Kahadean sa panahon na ini kan katapusan.

An libro nin Joel nagtatao man nin paglaom, na nagsasabi: “An gabos na mag-apod sa ngaran ni Jehova makaliligtas.” (Joel 2:32) An kahulogan kaini labi pa kisa sa paggamit sana kan ngaran ni Jehova. Kaipuhan an odok sa pusong pagsolsol, asin kaiba digdi an pagtalikod niato sa salang gibo. (Joel 2:​12, 13) Mayo nang panahon na mag-atraso huli ta sa dai na mahahaloy gigibohon ni Jehova an paghokom sa mga nasyon, arog kan ginibo nia sa Moab, Amon, asin sa mabukid na rehion nin Seir kan kaaldawan ni Hadeng Josafat nin Juda.​—2 Cronica 20:​1-​30; Joel 3:​2, 12.

An gabos naparigon an boot kan pahayag na “Ipaheling an Pagtubod Paagi sa Paghalat ki Jehova.” Ngonyan na nasa poro nang marhay kan panahon kan katapusan, puede niatong salingoyon an kaotoban kan dakol sa mga panuga ni Jehova, asin kita odok na interesado sa mga bagay na mangyayari pa. An banwaan ni Jehova dapat na padagos na magpasensia, na ginigirumdom na an gabos na ipinanuga nin Dios maootob.​—Tito 2:​13; 2 Pedro 3:​9, 10.

An programa sa aga natapos paagi sa dramang “Papagdanayon na Simple an Saindong Mata.” An realistikong drama na ini inenkaminar kita na siyasaton an satong aktitud mapadapit sa materyal na mga pinag-aaabot. Saen man kita nag-iistar, kun boot niato na mawaran nin kahaditan an satong buhay, dapat niatong sunodon an hatol ni Jesus na papagdanayon na simple an satong mata, na malinaw na nakatorohok sa Kahadean nin Dios.​—Mateo 6:​22.

An pampublikong pahayag igwa kan nakapupukaw nin interes na titulong “An Pagtubod Asin an Saindong Ngapit.” Iyan nagtao nin prueba sa pagkadaing kakayahan nin namomoon na mga tawo na resolberan an mga problema kan kinaban. (Jeremias 10:23) An kasaysayan nin tawo paorootro na sana​—sa mas dakula asin nakadadanyar na sokol. Ano an saboot kan Mga Saksi ni Jehova manongod sa ngapit? Naniniwala kita na an fiel na katawohan igwa nin maliwanag na ngapit sa pamamahala kan Kahadean nin Dios. (Mateo 5:5) Ootobon nin Dios an saiyang mga panuga para sa kapakinabangan kan gabos na may pagtubod sa saiyang Tataramon, na nagsasadol: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa.”​—Isaias 55:6.

Si Jesus nagbangon nin mahalagang marhay na hapot na nasa isip an satong aldaw. Sia naghapot: “Kun dumatong na an Aki nin tawo, makukua daw nanggad nia an pagtubod sa daga?” (Lucas 18:8) Rinepaso kan pangultimong pahayag an programa kan kombension asin ipinaheling kun paano iyan nagtao nin lubos na ebidensia na an pagtubod sa Tataramon nin Dios nag-eeksister, dawa ngani kita nabubuhay sa daing pagtubod asin sekularisadong kinaban.

Pero, bilang indibiduwal puede niatong ihapot sa satong sadiri, ‘Ako daw kabilang sa mga may marigon na pagtubod sa Dios asin sa saiyang Tataramon?’ An “Pagtubod sa Tataramon nin Dios” na Pandistritong Kombension maninigong tumabang sa sato na sumimbag nin iyo sa hapot na iyan. Asin kanigoan an pasasalamat niato ki Jehova huli sa pagpakosog kan satong pagtubod sa saiya asin sa saiyang ipinasabong na Tataramon, an Biblia!

[Mga retrato sa pahina 24]

Dakol na boluntaryo an maogmang nagtrabaho tanganing asikasohon an rinibong delegado

[Mga retrato sa pahina 25]

An darakulang istadyum na arog kaini ginamit sa bilog na kinaban

[Mga retrato sa pahina 25]

Si L. A. Swingle kan Namamahalang Grupo na ilinuluwas an bagong brosyur

[Retrato sa pahina 26]

Dakol an nabautismohan bilang simbolo kan saindang pagdusay ki Jehova

[Mga retrato sa pahina 27]

An mga kombensionista magayagayang nag-arawit nin mga awit na pan-Kahadean. Retrato sa laog: an dramang “Papagdanayon na Simple an Saindong Mata”