Ginibo Ninda an Kabotan ni Jehova

Mapusong Nagpatotoo si Pablo sa Atubangan nin mga Dignitaryo

RISANG-RISA an pagkakalaen kan duwang lalaki. An saro nakakorona mantang an saro nakakadena. An saro hade; an saro preso. Pakalihis nin duwang taon sa bilanggoan, si apostol Pablo ngonyan nagtitindog sa atubangan kan namamahala sa mga Judio, si Herodes Agripa II. An hade asin an saiyang konsorte, si Berenice, nag-abot na “may labi-labing magarbong pasale asin naglaog sa kuarto para sa pakipag-olay kaiba an mga komandante militar saka an mga tawong bantog sa siudad.” (Gibo 25:23) An sarong reperensia nagsasabi: “May posibilidad na nagkapirang gatos na tawo an presente.”

An bagong nombrahan na gobernador, si Festo, an nag-areglo kan pagtiripon. An gobernador na naenot sa saiya, si Felix, nakontento na bayaan si Pablo na manluya sa bilanggoan. Alagad kinustion ni Festo an pagigin balido kan mga sahot tumang ki Pablo. Tara, iininsistir na marhay ni Pablo na sia daing sala kaya hinagad nia na darahon ki Cesar an saiyang kaso! Nagin interesadong marhay si Hadeng Agripa sa kaso ni Pablo. “Gusto ko man mismo na madangog an tawong iyan,” an sabi nia. Tolos-tolos na naggibo nin mga areglo si Festo, na posibleng iniisip-isip kun ano an magigin saboot kan hade manongod sa napapalaen na presong ini.​—Gibo 24:27–25:22.

Kan sunod na aldaw, si Pablo nagtitindog sa atubangan nin dakulang kadaklan nin mga dignitaryo. “Ibinibilang kong maogma an sakong sadiri na sa atubangan mo na ako magdedepensa sa aldaw na ini,” an sabi nia ki Agripa, “orog na ta ika eksperto sa gabos na kostumbre saka mga kontrobersia sa tahaw nin mga Judio. Kun siring nakikimaherak ako sa saimo na dangogon ako na may pagpapasensia.”​—Gibo 26:​2, 3.

An Mapusong Depensa ni Pablo

Enot, sinabi ni Pablo ki Agripa an manongod sa saiyang nakaagi bilang paralamag sa mga Kristiano. “Pinirit ko sindang gumibo nin pagsikwal sa pagtubod,” an sabi nia. “Pinaglamag ko pa ngani sinda minsan sa ibang mga siudad.” Isinaysay pa ni Pablo kun paano sia nag-ako nin nakagugulat na bisyon na dian hinapot sia kan binuhay liwat na si Jesus: “Taano ta pinaglalamag mo ako? An pagparasipa sa pan-alaw nagpapagin masakit para sa saimo.”a​—Gibo 26:​4-14.

Dangan sinugo ni Jesus si Saulo na magpatotoo sa mga tawo sa gabos na nasyon “kapwa sa mga bagay na saimong naheling asin sa mga bagay na ipaheheling ko sa saimo mapadapit sa sako.” Isinaysay ni Pablo na mahigos siang naghingoa na otobon an saiyang asignasyon. Pero, “huli sa mga bagay na ini,” an sabi nia ki Agripa, “an mga Judio dinakop ako sa templo asin nagprobar na gadanon ako.” Kinukua an interes ni Agripa sa Judaismo, idinoon ni Pablo na talagang kaiba sa saiyang pagpatotoo an ‘dai pagtaram nin ano man apuera sa mga bagay na isinabi kan Mga Propeta patin ni Moises na mangyayari’ mapadapit sa pagkagadan asin pagkabuhay liwat kan Mesiyas.​—Gibo 26:​15-23.

Uminentra si Festo. “An dakulaon na inadalan nakakapabua sa saimo!” an kagsing nia. Si Pablo nagsimbag: “Dai ako nabubua, Kagalanggalang na Festo, kundi ako nagsasabi nin mga tataramon nin katotoohan asin nin toltol na isip.” Dangan nagsabi si Pablo dapit ki Agripa: “An hade na sakuyang kaolay na may libertad sa pagtaram nakaaaram na marhay manongod kan mga bagay na ini; huli ta ako naniniwala na mayo ni saro sa mga bagay na ini an natatago sa saiya, huli ta an bagay na ini dai ginibo sa sarong kanto.”​—Gibo 26:​24-26.

Dangan direktang kinaolay ni Pablo si Agripa: “Hadeng Agripa, minatubod ka sa Mga Propeta?” Siertong dai mapamugtak si Agripa huli sa hapot na iyan. Total, igwa sia nin reputasyon na dapat ingatan, asin an pag-oyon ki Pablo magigin pagkampi sa inapod ni Festo na ‘kabuahan.’ Posibleng naririsa an pag-urong-sulong ni Agripa, sinimbag ni Pablo an saiyang sadiring hapot. “Aram ko na minatubod ka,” an sabi nia. Nagtaram ngonyan si Agripa, alagad ginibo nia na bakong klaro an saiyang mga tataramon. “Sa halipot na panahon,” an sabi nia ki Pablo, “makokombensir mo akong magin Kristiano.”​—Gibo 26:​27, 28.

May pagkaekspertong ginamit ni Pablo an minarayo sa punto na tataramon ni Agripa tanganing sabihon an sarong mapuersang punto. “Inaarang ko sa Dios,” an sabi nia, “na baga man sa halipot na panahon o sa halawig na panahon bako sanang ika kundi siring man an gabos na nakakadangog sa sako ngonyan magin arog sa sako, apuera sa mga gapos na ini.”​—Gibo 26:29.

Si Agripa asin Festo mayong naheling ki Pablo na maninigo sa kagadanan o pagkabilanggo. Pero, an saiyang kahagadan na iatubang ki Cesar an saiyang kaso dai puedeng kanselaron. Iyan an dahelan na si Agripa nagsabi ki Festo: “Nabutasan na kutana an tawong ini kun dai sia nag-apelar ki Cesar.”​—Gibo 26:30-32.

Leksion Para sa Sato

An paagi nin pagpatotoo ni Pablo sa atubangan nin mga dignitaryo nagtatao nin marahayon na halimbawa para sa sato. Sa pakipag-olay ki Hadeng Agripa, si Pablo naggamit nin paghusgar. Daing duwa-duwa na aram nia an iskandalo manongod ki Agripa asin Berenice. Incesto an relasyon ninda, huli ta an totoo tugang ni Agripa si Berenice. Alagad sa okasyon na ini dai pinili ni Pablo na magdiskurso dapit sa moralidad. Imbes, idinoon nia an mga punto na pinagkaoyonan ninda ni Agripa. Apuera kaini, minsan ngani si Pablo natokdoan kan madonong na Fariseong si Gamaliel, rinekonoser nia na si Agripa sarong eksperto sa mga kostumbreng Judio. (Gibo 22:3) Sa ibong kan personal na moral na gawe-gawe ni Agripa, si Pablo nakipag-olay sa saiya na may paggalang huli ta si Agripa nasa katongdan na may autoridad.​—Roma 13:7.

Minsan ngani kita mapusong nagpapatotoo manongod sa satong mga paniniwala, bako niatong pasohan na ibuyagyag o kondenaron an marigsok na mga gibo kan mga naghihinanyog sa sato. Imbes, tanganing gibohon na mas pasil na akoon ninda an katotoohan, maninigo na idoon niato an positibong mga aspekto kan maogmang bareta, na idinodoon an mga paglaom na pareho niato pinaniniwalaan. Kun nakikipag-olay sa mga mas maedad o may autoridad, maninigo na rekonoseron niato an saindang katongdan. (Levitico 19:32) Sa paaging ini, maaarog niato si Pablo, na nagsabi: “Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira.”​—1 Corinto 9:22.

[Nota sa Ibaba]