Mga Hapot Hale sa mga Parabasa

An dakol na Saksi ni Jehova nagseselebrar nin mga anibersaryo nin kasal. An kumpleanyo sarong anibersaryo kan pagkamundag nindo. Kaya taano ta sineselebrar an mga anibersaryo nin kasal asin an mga anibersaryo nin pagkamundag dai?

An totoo, dai kaipuhan na selebraron nin sarong Kristiano an arin man kaiyan. Pero, dai boot sabihon kaiyan na pareho an kahulogan kan duwa o na an pagmansay kan mga Kristiano sa naenot (mga anibersaryo nin kasal) dapat na kapareho kan pagmansay ninda sa mga selebrasyon nin kumpleanyo.

Siring kan sinabi na, puedeng sabihon na iyan pareho anibersaryo huli ta an “anibersaryo” iyo an ‘taonan na pagkaotro nin petsa nin sarong pangyayari.’ Iyan puedeng anibersaryo nin ano man na pangyayari​—an aldaw na kamo naaksidente sa auto, nakaheling nin pag-eklipse kan bulan, naglangoylangoy kaiba kan saindong pamilya, asin iba pa. Malinaw na an mga Kristiano dai ginigibong espesyal na aldaw an gabos na “anibersaryo” o nagkakaigwa nin parti sa paggirumdom kaiyan. Maninigong estudyaran nin saro an mga aspekto nin sarong pangyayari asin magdesisyon kun ano an tama.

Halimbawa, espesipikong pinagbotan nin Dios an mga Israelita na selebraron nin taonan an aldaw na nag-agi an saiyang anghel sa mga harong kan mga Israelita sa Egipto asin an ibinungang lagdoan na pagharale kan saiyang banwaan kan 1513 B.C.E. (Exodo 12:14) Kan sinelebrar na kan mga Judio, pati ni Jesus, an anibersaryo kan pangyayaring iyan, pagkuyog idto sa instruksion nin Dios, asin dai ninda iyan ginibo na may parti o pagtao nin regalo. An pagdedikar liwat kan templo ibinilang man kan mga Judio na sarong espesyal na anibersaryo. Minsan ngani dai ipinagboot sa Biblia an pagselebrar kan nasa kasaysayan na okasyon na ini, an Juan 10:​22, 23 nagsusuherir na dai tinatsaran ni Jesus an paggibo kaiyan. Sa katapustapusi, an mga Kristiano igwa nin espesyal na pagtiripon sa anibersaryo kan kagadanan ni Jesus. Siempre, ginigibo ini bilang pagkuyog sa malinaw na pagboot na yaon sa Tataramon nin Dios.​—Lucas 22:​19, 20.

Kumusta man an mga anibersaryo nin kasal? Sa nagkapirang kadagaan komun na tawan nin atension nin mag-agom an anibersaryo kan saindang paglaog sa estado nin pag-agom, sarong areglo na tinugdas nin Dios. (Genesis 2:​18-​24; Mateo 19:​4-6) Tunay nanggad, bakong negatibo an pagkaatubang kan Biblia sa pag-agom. Si Jesus nag-atender sa sarong kasal sagkod nagkontribwir sa kasiraman kan okasyon.​—Juan 2:​1-11.

Sa siring, bakong pambihira na sa saindang anibersaryo nin kasal tibaad magtao nin panahon an mag-agom na pensaron an kagayagayahan kan okasyon na iyan asin an saindang desisyon na maghingoa para sa kapangganahan bilang mag-agom. Sinda an madesisyon kun baga tatawan ninda nin atension an maogmang okasyon na ini sa pribado, na sinda sanang mag-agom, o kaiba an nagkapira nindang paryente o dayupot na katood. An okasyon dai maninigo na magin sarahotan sana para sa sarong dakulang sosyal na pagtiripon. Sa okasyon na ini boot nin mga Kristiano na pagiya sa mga prinsipyo na minaaplikar sa aroaldaw nindang buhay. Kaya personal na bagay kun baga an saro tatawan nin atension o dai an anibersaryo nin kasal.​—Roma 13:​13, 14.

Pero, kumusta an pagtao nin espesyal na atension sa kumpleanyo? Igwa daw nin ano man na nagpaparisa sa Biblia manongod sa siring na anibersaryo?

Bueno, sa pagpoon kan siglong ini, an Mga Estudyante sa Biblia, na apod kaidto sa Mga Saksi ni Jehova, talagang nagtao nin atension sa mga kumpleanyo. An dakol sa sainda igwa nin saradit na libro na inaapod Daily Heavenly Manna. Yaon dian an sarong teksto sa Biblia para sa kada aldaw, asin an dakol na Kristiano nagbubugtak nin sadit na retrato sa mga pahinang katangod kan kumpleanyo nin mga kapwa Estudyante sa Biblia. Siring man, an The Watch Tower kan Pebrero 15, 1909, nagsaysay na sa sarong kombension sa Jacksonville, Florida, E.U.A., si Tugang na Russell, na presidente kaidto kan Sosyedad, pinasakat sa plataporma. Taano? Sinorpresa sia nin regalo sa kumpleanyo na mga kahon nin lukban, pinya, asin aransas. Nagtatao iyan sa sato nin patanaw kan nakaagi. Tanganing makonsiderar an konektadong mga kamugtakan, girumdomon na durante kan panahon na idto, sineselebrar man kan Mga Estudyante sa Biblia an Disyembre 25 bilang an anibersaryo kan pagkamundag ni Jesus, o kumpleanyo. Nagin kostumbre pa ngani kaidto an pagkaigwa nin pamanggihan para sa Navidad sa opisina prinsipal sa Brooklyn.

Siempre, nagtalubo na sa espirituwal an banwaan nin Dios sa dakol na bagay poon kaidto. Kan mga taon nin 1920 an nadugangan na liwanag nin katotoohan nagpangyari sa sainda na masabotan an minasunod:

Si Jesus dai namundag sa petsang Disyembre 25, petsa na konektado sa paganong relihion. Pinagbobotan kita kan Biblia na selebraron an petsa kan kagadanan ni Jesus, bakong an anibersaryo kan pagkamundag nia o nin siisay pa man. An paggibo kaiyan kaoyon kan Eclesiastes 7:1 asin kan bagay na an linuluwasan kan buhay nin saro mas mahalaga kisa sa aldaw kan saiyang pagkamundag. An Biblia mayo nin rekord na an siisay man na fiel na lingkod nagselebrar kan saiyang kumpleanyo. Yaon sa rekord kaiyan an mga pagselebrar nin kumpleanyo nin mga pagano, na ikinokonektar an mga okasyon na ini sa maringis na mga gibo. Aramon niato an kasaysayan sa likod kan mga anibersaryong idto nin pagkamundag.

An primero iyo an kumpleanyo kan Faraon kaidtong kaaldawan ni Jose. (Genesis 40:​20-​23) Mapadapit digdi, an artikulo manongod sa mga kumpleanyo sa Encyclopædia of Religion and Ethics ni Hastings nagsasabi sa kapinonan: “An kostumbre na pagselebrar kan aldaw nin pagkamundag konektado sa pagkuenta nin panahon, kun dapit sa porma kaiyan, asin sa nagkapirang kagurangguranging mga prinsipyo sa relihion, kun dapit sa laog kaiyan.” Sa huri, kinotar kan ensiklopedya an Egiptologong si Sir J. Gardner Wilkinson, na nagsurat: “An lambang Egipcio pinahahalagahan na marhay an aldaw, asin an oras pa ngani kan saiyang pagkamundag; asin may posibilidad na, kapareho sa Persia, an lambang indibiduwal sineselebrar an saiyang kumpleanyo na may dakulang paggayagaya, na maogmang inaako an saiyang mga katood paagi sa gabos na libangan kan sosyedad, asin labi sa ordinaryong abundansia nin piling mga pagkakan sa lamesa.”

An saro pang selebrasyon nin kumpleanyo na nasambitan sa Biblia iyo an ki Herodes, na dian pinugotan si Juan Bautista. (Mateo 14:​6-​10) An The International Standard Bible Encyclopedia (edisyon na 1979) nagtatao kan pakarorop na ini: “An mga Griego bago an Helenismo sineselebrar an kumpleanyo kan mga dios asin prominenteng mga tawo. Inapod na genéthlia sa G[riego] an mga selebrasyon na ini, mantang an genésia nangangahulogan na selebrasyon sa paggirumdom kan kumpleanyo nin sarong importanteng indibiduwal na gadan na. Sa 2 Mac[abeo] 6:7 manonompongan niato an pagkasambit sa bulanan na genéthlia ni Antioco IV, na durante kaiyan pinipirit an mga Judio na ‘makikabtang sa mga atang.’ . . . Kan selebraron ni Herodes an saiyang kumpleanyo sia minagawe oyon sa sarong Helenistikong kostumbre; mayo nin prueba nin pagselebrar nin mga kumpleanyo sa Israel kan mga panahon bago an Helenismo.”

Totoo, an tunay na mga Kristiano ngonyan bakong preokupado sa mga ginikanan asin posibleng mga koneksion sa suanoy na mga relihion kan lambang kaugalean o kostumbre, alagad sinda mayo man nin tendensia na dai intindihon an pertinenteng mga nagpaparisa na yaon talaga sa Tataramon nin Dios. Kabale digdi an bagay na an solamenteng mga pagselebrar nin kumpleanyo na nasa rekord kan Biblia kumpleanyo nin mga pagano asin konektado sa mga karingisan. Huli kaini, malinaw na negatibo an sinasabi kan Kasuratan dapit sa selebrasyon nin kumpleanyo, sarong bagay na dai binabasangbasang nin sinserong mga Kristiano.

Bilang resulta, minsan ngani biyong pribadong bagay kun baga bobooton nin mga Kristiano na tawan nin atension an saindang anibersaryo nin kasal, igwa nin balidong mga dahelan kun taano an maygurang na mga Kristiano ta dai nagseselebrar nin mga kumpleanyo.