Kun Paano Kamo Matatabangan nin mga Anghel

PINATUTUNAYAN kan Tataramon nin Dios an pag-eksister nin mga anghel. Sinasabi kaiyan sa sato na minilyon an espiritung mga linalang na ini. An lingkod ni Jehova Dios na si Daniel nagkaigwa nin bisyon kan langitnon na mga bagay na manongod kaiyan nagsurat sia: “Manriboribo an padagos na naglilingkod sa [Dios], asin manampulong ribo sa manampulong ribo an padagos na nagtitirindog sa atubangan nia.”​—Daniel 7:10.

Mangnoha na an mga tataramon ni Daniel bako sanang nagsasabi sa sato na dakol an mga anghel. Ipinaheheling man kaiyan na an mga anghel naglilingkod sa Dios. Sinda mga lingkod nia. Kaoyon kaini, an salmista nag-awit: “Omawa nindo si Jehova, O kamong mga anghel nia, makosog, na nag-ootob kan saiyang tataramon, paagi sa paghinanyog sa tingog kan saiyang tataramon. Omawa nindo si Jehova, kamo gabos na hukbo nia, kamo gabos na ministro nia, na naggigibo kan saiyang kabotan.”​—Salmo 103:​20, 21.

Ipinaliliwanag man kan Biblia na an buhay kan mga anghel dai nagpoon bilang mga tawo digdi sa daga. Si Jehova naglalang nin mga anghel sa langit dawa bago pa nia linalang an daga. Kan ‘lalangon nin Dios an daga, an gabos na aking anghel nin Dios nagkururahaw sa pag-omaw.’​—Job 38:​4-7.

An mga anghel espiritung linalang​—dai naheheling, makapangyarihan, intelihente. Sa Biblia, an termino sa Hebreo na mal·ʼakhʹ asin an termino sa Griego na agʹge·los tinatradusir na “anghel” kun sarong espiritung linalang an ipinapakahulogan. An mga terminong ini haros 400 na beses na minalataw sa Biblia. An duwa pareho an kahulogan, an boot sabihon, “mensahero.”

Pakanupar nin mga Anghel

An mga anghel tunay nanggad na mga mensahero. Tibaad pamilyar kamo sa pagkasaysay kan Biblia manongod kaidtong panahon na an anghel na si Gabriel nagpaheling ki Maria. Sinabi nia sa saiya na minsan ngani sia sarong daraga, mangangaki sia nin sarong aking lalaki na aapodon na Jesus. (Lucas 1:​26-​33) May anghel man na nagpaheling sa nagkapirang pastor na yaon sa langtad. Sia nagpaisi: “Namundag sa saindo ngonyan an sarong Paraligtas, na iyo si Cristo na Kagurangnan.” (Lucas 2:​8-11) Kaagid kaiyan, may mga anghel na nagdara nin mensahe ki Agar, Abraham, Lot, Jacob, Moises, Gedeon, Jesus, asin iba pa na nakasurat sa Biblia.​—Genesis 16:​7-​12; 18:​1-5, 10; 19:​1-3; 32:​24-​30; Exodo 3:​1, 2; Hokom 6:​11-​22; Lucas 22:​39-​43; Hebreo 13:2.

Mahalagang mangnohon na an gabos na mensaheng ini na ipinaabot nin mga anghel kaoyon kan pagkaotob kan mga katuyohan nin Dios asin bako man talagang kan mga tawong kalabot. An mga anghel nagtunga bilang mga representante nin Dios, sono sa saiyang kabotan asin iskedyul. Dai sinda inapod nin mga tawo.

Maninigo daw Kitang Mag-arang sa mga Anghel Para sa Tabang?

Tama daw na mag-arang sa mga anghel sa mga panahon nin kapurisawan? Kun iyo, boot niatong maaraman an ngaran nin anghel na pinakamakatatabang sa sato. Bilang resulta, an nagkapirang komersial na libro may listahan kan soboot mga ngaran nin dakol na anghel, kaiba an saindang ranggo, titulo, asin obligasyon. An sarong libro may listahan kan inaapod kaiyan na “pangenot na sampulo sa langit,” an “pinakabantog na mga anghel sa kinaban sa Solnopan.” Kaiba sa listahan an suhestion na pirongon an saindong mata, luway-luway na orootrohon nin nagkapirang beses an ngaran kan anghel, humangos nin harararom, humangos nin luway-luway, asin “andamon an saindong sadiri para sa posibleng pakapagkomunikar sa sainda.”

Sa kabaliktaran, duwa sanang ngaran kan fiel na mga anghel nin Dios, si Miguel asin Gabriel, an itinatao sa sato kan Biblia. (Daniel 12:1; Lucas 1:​26) Posible na an dahelan kan pagtao kan mga ngaran na ini iyo na ipaheling na an lambang anghel daing kaagid na espiritung persona na may ngaran, bako sanang sarong impersonal na enerhiya o puersa.

Mahalagang mangnohon na an nagkapirang anghel nagsayumang ihayag sa mga tawo an saindang ngaran. Kan hagadon ni Jacob sa sarong anghel na ihayag an saiyang ngaran, habo niang gibohon iyan. (Genesis 32:29) Kan hagadan na magpamidbid, an sarong anghel na nagrani ki Josue nagsabi sana na sia an “prinsipe kan hukbo ni Jehova.” (Josue 5:​14) Kan hapoton kan mga magurang ni Samson an ngaran nin sarong anghel, sia nagsabi: “Taano ta naghahapot ka manongod sa sakong ngaran, mantang iyan makangangalas?” (Hokom 13:​17, 18) Paagi sa dai pagtao nin lista kan mga ngaran kan mga anghel, pinoprotehiran kita kan Biblia sa pagtao nin dai maninigong onra asin pagsamba. Siring kan satong maheheling, dai kita kaiyan iniinstruksionan na arangon sinda.

Pag-arang sa Dios

Sinasabi sa sato kan Biblia an gabos na kaipuhan niatong maaraman manongod sa mga aktibidad sa rona nin mga espiritu. Si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo . . . tanganing an tawo nin Dios magin lubos na may kakayahan, andam nanggad para sa lambang marahay na gibo.” (2 Timoteo 3:​16, 17) Kun boot nin Dios na maaraman niato an ngaran kan dakol na anghel, ihinayag kutana nia ini sa saiyang Tataramon, an Biblia. Asin kun mawot nin Dios na tokdoan kita kun paano makakokomunikar sa mga anghel asin makaolay sinda sa pamibi, itinao kutana nia an impormasyon na iyan sa Kasuratan.

Imbes, itinokdo ni Jesu-Cristo: “Kun ika namimibi, lumaog ka sa saimong kuarto asin, pakapintoa kan saimong tata, mamibi ka sa saimong Ama na nasa hilom . . . Kun siring mamibi kamo nin arog kaini: ‘Ama niamo na nasa langit, santipikaron logod an saimong ngaran.’” (Mateo 6:​6, 9) Ini an Makakasuratan na punto de vista: Dai kita dapat mag-arang sa mga anghel o mamibi sa sainda, kundi maninigo na kita mapagngayongayong dumolok sa Kaglalang kan mga anghel, an Dios mismo. An saiyang ngaran bakong misteryo, asin dai kaipuhan an bisyonaryo tanganing ihayag iyan. Minsan ngani nagkaigwa nin mga pagprobar na itago an ngaran nin Dios, iyan minalataw sa rekord kan Biblia nin labing 7,000 na beses. Halimbawa, nauunabihan an langitnon na Ama na an salmista nag-awit: “Ika, na an ngaran Jehova, ika sana an Kaharohalangkawe sa bilog na daga.”​—Salmo 83:18.

Si Jehova nungkang sibot-sibot tanganing maghinanyog sa sato kun kita minadolok sa saiya sa tamang paagi sa pamibi. Itinatao kan Biblia an garantiyang ini: “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.”​—2 Cronica 16:9.

Mga Anghel Asin Moral na Gawe-gawe

Kabaliktaran sa parateng ipinaheheling sa media, an mga anghel dai naghohokom sa mga tawo. Tama iyan, ta an mga anghel bakong autorisado na maghokom sa mga tawo. Si Jehova an “Hokom sa gabos,” minsan ngani “itinao nia an gabos na paghokom sa Aki,” si Jesu-Cristo. (Hebreo 12:23; Juan 5:22) Minsan siring, sala na ipamugtak na an mga anghel daing pakiaram sa kun paano kita namumuhay. Si Jesus nagsabi: “Nagkakaigwa nin kagayagayahan an mga anghel nin Dios huli sa sarong parakasala na nagsosolsol.”​—Lucas 15:10.

Minsan siring, an mga anghel bakong paramasid sana. Sa nakaaging mga panahon, sinda naglingkod bilang parakastigo, na ginigibo an mga paghokom nin Dios. Halimbawa, an Dios naggamit nin mga anghel laban sa suanoy na mga Egipcio. Sono sa Salmo 78:​49, “ipinadara nia sa sainda an saiyang naglalaad na kaanggotan, kabangisan asin pagdenunsiar patin kapurisawan, mga deputasyon nin mga anghel na may darang kalamidad.” Siring man, ibinabareta kan Biblia na sa sarong banggi ginadan nin sasarong anghel an 185,000 na soldados na Asirio.​—2 Hade 19:35.

Kaagid kaiyan, sa ngapit, lalaglagon kan mga anghel an mga naghuhuma sa ikararahay nin iba paagi sa pagsayumang sumunod sa matanos na mga pamantayan nin Dios. Si Jesus madatong “kaiba an saiyang makapangyarihan na mga anghel sa naglalaad na kalayo, kun sia mamalos na sa mga dai nakamimidbid sa Dios asin sa mga dai nagkukuyog kan maogmang bareta.”​—2 Tesalonica 1:​7, 8.

Sa siring ipinaheheling kan Kasuratan na pirmeng ginigibo kan fiel na mga anghel nin Dios an saiyang kabotan paagi sa pag-otob kan saiyang mga instruksion asin pagsuportar sa saiyang matanos na mga pamantayan. Malinaw nanggad, kun boot niato na tabangan kita kan mga anghel nin Dios, kaipuhan niatong maaraman an kabotan nin Dios asin galagang maghingoa na gibohon iyan.

Mga Anghel de la Guardia

An mga anghel daw igwa nin pagmakolog sa mga tawo asin pinoprotehiran sinda? Si apostol Pablo naghapot: “Bako daw na sinda [an mga anghel] gabos espiritu para sa paglingkod sa publiko, na isinugo tanganing maglingkod sa mga magmamana kan kaligtasan?” (Hebreo 1:14) Malinaw nanggad, iyo an simbag sa hapot ni Pablo.

Huli sa saindang pagsayuma na humorohod sa atubangan nin bulawan na imahen na pinatindog ni Hadeng Nabucodonosor nin Babilonya, an tolong Hebreo na sinda Sadrac, Mesac, asin Abednego iinapon sa labi-labi kainit na horno. Minsan siring, an fiel na mga lingkod nin Dios na idto dai naano kan kalayo. Kan sumirip an hade sa horno, sia nakaheling nin “apat na pusog na lalaki,” asin nagsabi na an “lalauogon kan ikaapat nakaaagid sa sarong aking lalaki kan mga dios.” (Daniel 3:25) Pakalihis nin mga pirang taon, si Daniel namugtak sa lungib nin mga leon huli sa saiyang pagigin fiel. Sia nakaligtas man na dai naano asin nagpahayag: “An sakuyang Dios nagsugo kan saiyang anghel asin pinintoan an ngoso kan mga leon.”​—Daniel 6:22.

Kan maestablisar an kongregasyon kan mga parasunod ni Cristo kaidtong enot na siglo C.E., nagtunga liwat an mga anghel, na pinaluwas sa bilanggoan an mga apostol. (Gibo 5:​17-​24; 12:​6-​12) Asin kan mameligro an buhay ni Pablo sa dagat, sinierto sa saiya nin sarong anghel na sia makakaabot na ligtas sa Roma.​—Gibo 27:​13-​24.

An mga lingkod ni Jehova Dios sa presenteng aldaw lubos na kombensido na an dai naheheling na mga hukbo nin mga anghel nin Dios tunay asin kayang magtao nin proteksion, siring kan ginibo ninda ki Eliseo asin sa saiyang katabang. (2 Hade 6:​15-​17) Tunay nanggad, “an anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.”​—Salmo 34:7; 91:11.

An Mensaheng Dara kan mga Anghel

Mantang an mga anghel interesado sa ikararahay kan mga naglilingkod ki Jehova Dios, kalabot man sinda sa pagsierto na an mga tawo makanood manongod sa saiya asin sa saiyang katuyohan. Si apostol Juan nagsurat: “Naheling ko pa an sarong anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag sa mga nag-eerok sa daga, asin sa lambang nasyon asin tribo asin tataramon patin banwaan, na nagsasabi sa makosog na tingog: ‘Matakot kamo sa Dios asin pamurawayon sia.’”​—Kapahayagan 14:​6, 7.

Boot daw nindong maaraman an laog kaining “daing katapusan na maogmang bareta”? Kun iyo, ihapot nindo sa Mga Saksi ni Jehova. Maoogma sinda na sabihon iyan sa saindo.

[Mga retrato sa pahina 7]

May sarong anghel sa tahaw kan langit na nagpapahayag nin daing katapusan na maogmang bareta. Boot daw nindong manodan iyan?