Iitaas an Maimbod na mga Kamot sa Pamimibi
“Sakuyang minamawot na sa lambang lugar an mga lalaki magpadagos sa pamimibi, na nag-iitaas nin maimbod na mga kamot, na dai nin grabeng kaanggotan asin mga debate.”—1 TIMOTEO 2:8.
1, 2. (a) Paano an 1 Timoteo 2:8 aplikado sa pamibi may koneksion sa banwaan ni Jehova? (b) Ano ngonyan an eestudyaran niato?
HINAHAGAD ni Jehova sa saiyang banwaan na magin maimbod sa saiya asin sa lambang saro. Ikinonektar ni apostol Pablo an kaimbodan sa pamibi kan sia sumurat: “Sakuyang minamawot na sa lambang lugar an mga lalaki magpadagos sa pamimibi, na nag-iitaas nin maimbod na mga kamot, na dai nin grabeng kaanggotan asin mga debate.” (1 Timoteo 2:8) Minalataw na si Pablo nagtataram manongod sa pampublikong pamibi “sa lambang lugar” na pinagtitiriponan nin mga Kristiano. Sairisay an dapat na magrepresentar kan banwaan nin Dios sa pamibi sa mga pagtiripon kan kongregasyon? Solamente an banal, matanos, reberenteng mga lalaki na maingat na nag-ootob kan gabos na obligasyon sa Dios sono sa Kasuratan. (Eclesiastes 12:13, 14) Kaipuhan na sinda malinig sa espirituwal saka sa moral asin daing duda na deboto ki Jehova Dios.
2 An kamagurangan sa kongregasyon nangorognang maninigo na ‘mag-itaas nin maimbod na mga kamot sa pamimibi.’ An saindang odok sa pusong mga pamibi paagi ki Jesu-Cristo nagpapaheling nin kaimbodan sa Dios asin nakatatabang sa sainda na likayan an mga debate saka pagputok nin grabeng kaanggotan. An totoo, an siisay man na magkapribilehio na irepresentar an Kristianong kongregasyon sa pampublikong pamibi maninigo na mayo nin grabeng kaanggotan, karaotan nin boot, asin kadaihan nin kaimbodan ki Jehova asin sa saiyang organisasyon. (Santiago 1:19, 20) Ano pa an dugang na mga giya oyon sa Biblia para sa mga nagkakapribilehio na irepresentar an iba sa pampublikong pamibi? Asin ano an nagkapira sa mga prinsipyo sa Kasuratan na maninigo niatong iaplikar sa satong pribado asin pampamilyang mga pamibi?
Patienot na Isip-isipon an Pamibi
3, 4. (a) Taano ta kapakipakinabang na patienot na isip-isipon an pampublikong pamibi? (b) Ano an ipinaririsa kan Kasuratan mapadapit sa lawig nin mga pamibi?
3 Kun kita hinagadan na mamibi sa publiko, posibleng marhay na mahihimo niato na minsan paano patienot na isip-isipon an satong pamibi. An paggibo kaini tibaad magpangyari sa sato na matratar an angay na mahahalagang bagay na bakong halawigon, mayo nin direksion an pamibi. Siempre, an satong pribadong mga pamibi puede man na itaram. Iyan puedeng minsan ano an laba. Si Jesus enterong banggi na namibi bago nia pinili an 12 niang apostol. Minsan siring, kan ponan nia an Memorial kan saiyang kagadanan, minalataw na medyo halipot sana an saiyang mga pamibi para sa tinapay asin arak. (Marcos 14:22-24; Lucas 6:12-16) Asin aram niato na dawa an haralipot na pamibi ni Jesus biyong inako nin Dios.
4 Ipamugtak ta baga na nagkapribilehio kitang irepresentar an pamilya sa pamibi bago an pagkakan. An siring na pamibi puedeng medyo halipot sana—alagad ano man an sinabi maninigo na may kaibang pagpasalamat sa kakanon. Kun kita namimibi sa publiko bago o pagkatapos nin Kristianong pagtiripon, dai kita kaipuhan na mamibi nin halawig na tinatratar an dakol na punto. Tinatsaran ni Jesus an mga eskriba na “huli sa sarong sarahotan namimibi nin haralawig na pamibi.” (Lucas 20:46, 47) Nungka na bobooton nin sarong diosnon na tawo na gibohon iyan. Pero, kun beses, tibaad angay an medyo mas halawig na pampublikong pamibi. Halimbawa, an sarong magurang sa kongregasyon na pinili na mamibi kan pangultimong pamibi sa sarong asamblea maninigo na isip-isipon iyan nin patienot asin tibaad mawot nia na sambiton an nagkapirang punto. Pero, maski an siring na pamibi dai maninigo na magin sobra kalawig.
Dumolok sa Dios na May Reberensia
5. (a) Ano an maninigo niatong isaisip kun namimibi sa publiko? (b) Taano ta dapat na mamibi sa may dignidad asin magalang na paagi?
5 Kun namimibi sa publiko maninigo niatong girumdomon na bakong tawo an kaolay niato. Imbes, kita makasalan na mga linalang na naghahagad sa Soberanong Kagurangnan na Jehova. (Salmo 8:3-5, 9; 73:28) Kun siring, maninigo kitang magpaheling nin reberensial na takot na ikaanggot nia kita huli sa satong sinasabi asin sa paagi kan pagpahayag niato kaiyan. (Talinhaga 1:7) An salmistang si David nag-awit: “Kun para sa sako, sa abundansia kan saimong mamomoton na kabootan ako malaog sa saimong harong, maduko ako sa saimong banal na templo na may takot sa saimo.” (Salmo 5:7) Kun igwa kita kan aktitud na iyan, paano kita mataram kun hagadon sato na mamibi sa publiko sa sarong pagtiripon kan Mga Saksi ni Jehova? Bueno, kun kaolay niato an sarong hadeng tawo, gigibohon niato iyan na may paggalang asin may dignidad. Bako daw na an satong mga pamibi maninigo na orog pang magin may dignidad asin magalang, mantang kita namimibi ki Jehova, an “Hade sa panahon na daing sagkod”? (Kapahayagan 15:3) Kaya kun namimibi lilikayan niato an mga tataramon na arog kan, “Marahay na aga po, Jehova,” “Ipinaaabot mi po sa saimo an samong pagkamoot,” o, “Paaram na po.” Ipinaheheling kan Kasuratan na an Aking bugtong nin Dios, si Jesu-Cristo, nungka na nakipag-olay sa saiyang langitnon na Ama sa paaging iyan.
6. Ano an maninigo niatong isaisip kun kita ‘minadolok sa trono nin dai na kutana maninigong kabootan’?
6 Si Pablo nagsabi: “Kita . . . dumolok na may katalingkasan sa pagtaram sa trono nin dai na kutana maninigong kabootan.” (Hebreo 4:16) Puede kitang dumolok ki Jehova na may “katalingkasan sa pagtaram” sa ibong kan satong pagigin makasalan huli sa satong pagtubod sa atang na pantubos ni Jesu-Cristo. (Gibo 10:42, 43; 20:20, 21) Pero, an “katalingkasan sa pagtaram” na iyan dai nangangahulogan na kita nakikiestoryahan sa Dios; ni maninigo man kitang magtaram sa saiya nin daing galang na mga bagay. Tangani na ikaogma ni Jehova an satong pampublikong mga pamibi, dapat na iyan ipahayag na may angay na paggalang saka dignidad, asin bakong tama na gamiton iyan sa pagpaisi, paghatol sa mga indibiduwal, o paglektura sa mga nagdadangog.
Mamibi na May Mapakumbabang Espiritu
7. Paano si Salomon nagpaheling nin kapakumbabaan kan namimibi sa okasyon kan pagdusay kan templo ni Jehova?
7 Baga man kita namimibi sa publiko o sa pribado, an sarong mahalagang prinsipyo sa Kasuratan na dapat girumdomon iyo na maninigo kitang magpaheling nin mapakumbabang aktitud sa satong mga pamibi. (2 Cronica 7:13, 14) Si Hadeng Salomon nagpaheling nin kapakumbabaan sa saiyang pampublikong pamibi sa okasyon kan pagdusay kan templo ni Jehova sa Jerusalem. Natapos pa sana ni Salomon an saro sa pinakakahangahangang edipisyo na itinogdok digdi sa daga kasuarin man. Pero, sia mapakumbabang namibi: “An Dios daw talagang mag-eerok sa ibabaw kan daga? Uya! An kalangitan, iyo, an langit kan kalangitan, mismo dai ka kayang pagkaigoon; kun siring, gurano pa daw an harong na ini na sakuyang itinogdok!”—1 Hade 8:27.
8. Ano an nagkapirang paagi na ipinaheheling an kapakumbabaan sa pampublikong pamibi?
8 Arog ni Salomon, kita maninigong magin mapakumbaba kun irinerepresentar an iba sa pampublikong pamibi. Minsan ngani maninigo niatong likayan an pagigin garo baga banal-banayot, an kapakumbabaan ikapaheheling kan tono kan satong boses. An mga pamibing mapakumbaba bakong mahawhaw o madrama. Dinadara kaiyan an atension, bakong sa namimibi, kundi sa Saro na pinamimibian. (Mateo 6:5) Ipinaheheling man an kapakumbabaan kan sinasabi niato sa pamibi. Kun kita mapakumbabang namimibi, dai kita mataram na garo baga ineeksihiran niato an Dios na gibohon an nagkapirang bagay segun sa gusto niato. Imbes, hahagadon niato ki Jehova na gumibo nin aksion sa paagi na kaoyon kan saiyang sagradong kabotan. Ipinaheling kan salmista paagi sa halimbawa an angay na aktitud kan sia makimaherak: “A, ngonyan, Jehova, magligtas ka, tabi! A, ngonyan, Jehova, magtao ka, tabi, nin kapangganahan!”—Salmo 118:25; Lucas 18:9-14.
Mamibi Gikan sa Puso
9. Anong marahay na hatol na itinao ni Jesus an yaon sa Mateo 6:7, asin paano iyan ikaaaplikar?
9 Tanganing ikaogma ni Jehova an satong pampubliko o pribadong mga pamibi, iyan dapat na gumikan sa puso. Sa siring, dai sana niato oorootrohon an sarong pormula nin pamibi na dai iniisip kun ano an sinasabi niato. Sa saiyang Sermon sa Bukid, naghatol si Jesus: “Kun namimibi, dai pagparaorootrohon an iyo man sanang mga bagay, arog kan ginigibo kan mga tawo kan mga nasyon, huli ta hinohona ninda [nin sala] na dadangogon sinda huli sa paggamit ninda nin kadakol na tataramon.” Sa ibang pagtaram, si Jesus nagsabi: “Dai ka magtiwatiwa; dai ka magtaram nin balisngag na mga pag-otro.”—Mateo 6:7; nota sa ibaba.
10. Taano ta angay na bako sanang sarong beses na ipamibi an iyo man sanang bagay?
10 Siempre, tibaad kaipuhan na ipamibi niato an iyo man sanang bagay nin paorootro. Iyan bakong sala ta isinadol ni Jesus: “Padagos na maghagad, asin ta iyan itatao sa saindo; padagos na maghanap, asin ta kamo makakakua; padagos na magtoktok, asin ta iyan bubuksan sa saindo.” (Mateo 7:7) Tibaad kaipuhan an sarong bagong Kingdom Hall ta pinapatalubo ni Jehova an lokal na paghuhulit. (Isaias 60:22) Angay na padagos na sambiton an pangangaipong ini kun namimibi nin pribado o kun namimibi nin pampubliko sa pagtiripon kan banwaan ni Jehova. An paggibo nin siring dai mangangahulogan na kita ‘nagtataram nin balisngag na mga pag-otro.’
Girumdomon an Pagpasalamat Asin Pag-omaw
11. Paano minaaplikar an Filipos 4:6, 7 sa pribado asin pampublikong pamibi?
11 Dakol an namimibi sana tanganing maghagad, alagad an satong pagkamoot ki Jehova Dios maninigong magpahiro sa sato na pasalamatan asin omawon sia sa pribado sagkod sa pampublikong pamibi. “Dai kamo maghadit sa ano man na bagay,” an isinurat ni Pablo, “kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Iyo, apuera sa mga pagngayongayo saka kahagadan, maninigo kitang magpahayag nin pagpasalamat ki Jehova para sa espirituwal saka materyal na mga bendisyon. (Talinhaga 10:22) An salmista nag-awit: “Magdolot ka nin pasalamat bilang saimong atang sa Dios, asin otobon mo sa Kaharohalangkawe an saimong mga promesa.” (Salmo 50:14) Asin kaiba sa mapagngayongayong melodiya ni David an nakapupukaw sa boot na mga tataramon na ini: “Oomawon ko an ngaran nin Dios paagi sa awit, asin ibabantog ko an saiyang kadakulaan paagi sa pagpapasalamat.” (Salmo 69:30) Bako daw na iyan man an maninigo niatong gibohon sa pampubliko asin pribadong pamibi?
12. Paano naootob ngonyan an Salmo 100:4, 5, asin huli sa ano kita kun siring makapagpapasalamat asin makakapag-omaw sa Dios?
12 Mapadapit sa Dios, an salmista nag-awit: “Lumaog kamo sa saiyang mga tata na may pagpasalamat, sa saiyang mga patyo na may pag-omaw. Magpasalamat kamo sa saiya, omawa nindo an saiyang ngaran. Huli ta si Jehova marahay; an saiyang mamomoton na kabootan sagkod sa daing talaan na panahon, asin an saiyang pagigin fiel sagkod sa sunod-sunod na kapag-arakian.” (Salmo 100:4, 5) Ngonyan, an mga tawo hale sa gabos na nasyon nagraralaog sa mga patyo kan santuaryo ni Jehova, asin huli kaini puede kitang mag-omaw asin magpasalamat sa saiya. Nagpapasalamat daw kamo sa Dios para sa lokal na Kingdom Hall asin ipinaheheling an saindong pag-apresyar paagi sa regular na pakikitipon dian sa mga namomoot sa saiya? Mantang yaon dian, kamo daw bilog na pusong kinokosogan an saindong boses sa mga awit nin pag-omaw asin pagpasalamat sa satong mamomoton na langitnon na Ama?
Nungka na Masopog na Mamibi
13. Anong mga halimbawa sa Kasuratan an nagpapaheling na maninigo kitang magngayongayo ki Jehova dawa kun an pagmate niato alangan kita huli sa pakamate nin kasalan?
13 Dawa kun an pagmate niato alangan kita huli sa pakamate nin kasalan, maninigo kitang dumolok sa Dios sa odok na pagngayongayo. Kan magkasala an mga Judio huli sa pag-agom nin mga babaeng taga ibang nasyon, si Esdras luminuhod, binuka an saiyang maimbod na mga palad sa Dios, asin mapakumbabang namibi: “O Dios ko, nasosopog nanggad ako asin nag-aalangan na itingag an sakong lalauogon sa saimo, O Dios ko, huli ta an samong mga kaliwagan mismo labaw na sa samong payo asin an samong pagigin may sala abot na sa kalangitan. Poon kan kaaldawan kan samong mga apoon yaon kami sa dakulang pagigin may sala sagkod sa aldaw na ini . . . Tara pagkatapos kan gabos na nangyari sa samo huli sa samong maraot na mga gibo asin sa samong dakulang pagigin may sala—huli ta ika mismo, O samong Dios, nagmenus-presyo sa samong kaliwagan, asin itinao mo sa samo an mga nakadulag arog kan mga ini—kami daw malapas na naman kan saimong mga togon asin magibo nin mga pakialyansa sa pag-agom sa mga banwaan kan makauuyam nin makuring mga bagay na ini? Dai ka daw mapipikar na marhay sa samo sagkod na mapano ka na kaya mayo na nin matatada asin mayo na nin makadudulag? O Jehova na Dios nin Israel, ika matanos, huli ta kami natada bilang nakadulag na banwaan arog kan sa aldaw na ini. Uya kami digdi sa atubangan mo sa samong pagigin may sala, huli ta imposible na tumindog sa atubangan mo huli kaini.”—Esdras 9:1-15; Deuteronomio 7:3, 4.
14. Arog kan pinatunayan kan kaaldawan ni Esdras, ano an kaipuhan tanganing akoon an kapatawadan nin Dios?
14 Tanganing akoon an kapatawadan nin Dios, an pagbuyboy sa saiya dapat na may kaibang pagbasol asin “mga bunga na angay sa pagsolsol.” (Lucas 3:8; Job 42:1-6; Isaias 66:2) Kan kaaldawan ni Esdras, an nagsosolsol na aktitud may kaibang paghihingoa na itanos an sala paagi sa pagpahale sa mga agom na taga ibang nasyon. (Esdras 10:44; ikomparar an 2 Corinto 7:8-13.) Kun hinahagad niato an kapatawadan nin Dios sa magabat na paggibo nin sala, magbuyboy kita sa mapakumbabang pamibi asin magpaluwas nin mga bunga na angay sa pagsolsol. An nagsosolsol na espiritu asin an kamawotan na itanos an sala mapahiro man sa sato na hagadon an espirituwal na tabang kan kamagurangan na Kristiano.—Santiago 5:13-15.
Paranga sa Pamibi
15. Paano ipinaheheling kan inagihan ni Ana na puede kitang makakua nin karangahan sa pamibi?
15 Kun makolog an satong puso huli sa sarong dahelan, makakakua kita nin karangahan sa pamibi. (Salmo 51:17; Talinhaga 15:13) An maimbod na si Ana naranga. Nabuhay sia kaidtong napagkatodan sa Israel an darakulang pamilya, alagad ta mayo sia nin aki. An agom nia, si Elcana, may mga aking lalaki saka babae sa saro pang agom kaini, si Penina, na nagduduhagi ki Ana huli sa pagigin baog. Si Ana namibi nin odok asin nanuga na kun sia bendisyonan nin aking lalaki, ‘itatao nia sia ki Jehova sa gabos na aldaw kan saiyang buhay.’ Naranga kan saiyang pamibi asin kan mga tataramon ni Halangkaw na Saserdote Eli, si Ana “bako nang hadit sa sadiring kamugtakan.” Sia nangaki nin lalaki na nginaranan niang Samuel. Sa huri, ini inentrega nia tanganing maglingkod sa santuaryo ni Jehova. (1 Samuel 1:9-28) Nagpapasalamat sa kabootan nin Dios sa saiya, sia namibi nin pagpasalamat—pamibing nag-omaw ki Jehova bilang an saro na daing kapantay. (1 Samuel 2:1-10) Arog ni Ana, puede kitang maranga nin pamibi, na kompiado na sinisimbag nin Dios an gabos na kahagadan na kaoyon kan saiyang kabotan. Kun biyo niatong ipinahahayag sa saiya an nasa satong puso, magin kitang “bako nang hadit sa sadiring kamugtakan,” huli ta hahaleon nia an pagabat sa sato o papangyayarihon nia na iyan makaya niato.—Salmo 55:22.
16. Arog kan iinilustrar sa kamugtakan ni Jacob, taano ta maninigo kitang mamibi kun kita natatakot o nahahadit?
16 Kun an sarong situwasyon ginigikanan nin takot, kakologan nin boot, o kahaditan, dai kita magsaltong dumolok sa Dios sa pamibi para sa karangahan. (Salmo 55:1-4) Natatakot kaidto si Jacob kan makakatagbo na nia an saiyang naparayo an boot na tugang, si Esau. Pero, namibi si Jacob: “O Dios kan sakong amang si Abraham asin Dios kan sakong amang si Isaac, O Jehova, ika na nagsasabi sa sako, ‘Magbalik ka sa saimong daga asin sa saimong mga paryente patin tatrataron taka nin marahay,’ alangan ako sa gabos na mamomoton na kabootan asin sa gabos na pagigin fiel na ginibo mo sa saimong lingkod, huli ta dinakit ko an Jordan na ini na sogkod sana an dara ko asin ngonyan ako nagin nang duwang grupo. Ligtasan ako, nakikimaherak ako sa saimo, sa kamot kan sakong tugang, sa kamot ni Esau, huli ta natatakot ako sa saiya na tibaad sia pumadigdi asin salakayon nanggad ako, an ina sagkod an mga aki. Asin ika, ika nagsabi, ‘Daing duda na tatrataron taka nin marahay asin ibubugtak ko an saimong banhi na siring sa mga baybay sa dagat, na dai mabilang huli sa kadakolan.’” (Genesis 32:9-12) Dai sinalakay ni Esau si Jacob asin an saiyang kairiba. Sa siring, talagang ‘trinatar nin marahay’ ni Jehova si Jacob sa pangyayaring idto.
17. Kaoyon kan Salmo 119:52, paano kita mararanga nin pamibi kun kita binabalo nin masakit?
17 Sa panahon kan satong mga pagngayongayo, tibaad kita maranga paagi sa paggirumdom kan mga bagay na isinabi sa Tataramon nin Dios. Sa pinakahalawig na salmo—sarong magayon na pamibi na inakompanyaran nin musika—tibaad si Prinsipe Ezequias an nag-awit: “Nagirumdoman ko an saimong hudisyal na mga desisyon poon sa daing talaan na panahon, O Jehova, asin nakakanompong ako nin karangahan para sa sakong sadiri.” (Salmo 119:52) Sa mapakumbabang pamibi kun kita binabalo nin masakit, tibaad makagirumdom kita nin prinsipyo o ley sa Biblia na puedeng makatabang sa sato na sundon an dalan na nagbubunga nin nakararangang garantiya na kita nakapaoogma sa satong langitnon na Ama.
An mga Maimbod Nagmamaigot sa Pamimibi
18. Taano ta masasabi na ‘an lambang maimbod mamimibi sa Dios’?
18 An gabos na maimbod ki Jehova Dios ‘magmamaigot sa pamimibi.’ (Roma 12:12) Sa ika-32 na Salmo, na posibleng kinompuesto pagkatapos na si David magkasala kaiba si Bat-seba, isinaysay nia an saiyang labi-labing kasakitan huli sa dai pakahagad nin kapatawadan asin an ginhawa na itinao sa saiya nin pagsolsol saka pagbuyboy sa Dios. Dangan nag-awit si David: “Nin huli kaini [huli ta makukua nin mga talagang nagsosolsol an indulto hale ki Jehova] an lambang maimbod mamimibi sa saimo sa panahon sana na ika manonompongan.”—Salmo 32:6.
19. Taano ta maninigo na iitaas niato an maimbod na mga kamot sa pamimibi?
19 Kun pinakamamahal niato an satong relasyon ki Jehova Dios, aarangon niato an saiyang pagkaherak basado sa atang na pantubos ni Jesus. May pagtubod, puede kitang dumolok sa trono nin dai na kutana maninigong kabootan na may katalingkasan sa pagtaram tanganing kamtan an pagkaherak asin napapanahon na tabang. (Hebreo 4:16) Alagad kanigoan kadakol kan mga dahelan na mamibi! Kun siring, kita “mamibi nin daing ontok”—na sa parate may mga tataramon nin odok sa pusong pag-omaw asin pagpasalamat sa Dios. (1 Tesalonica 5:17) Aldaw-banggi, iitaas niato an maimbod na mga kamot sa pamimibi.
Ano an Isisimbag Nindo?
◻ Ano an pakinabang sa patienot na pag-isip-isip sa pampublikong pamibi?
◻ Taano ta maninigo kitang mamibi sa magalang asin may dignidad na paagi?
◻ Anong espiritu an maninigo niatong ipaheling kun namimibi?
◻ Kun namimibi, taano ta maninigo niatong girumdomon an pagpasalamat asin pag-omaw?
◻ Paano ipinaheheling kan Biblia na puede kitang maranga nin pamibi?
[Retrato sa pahina 17]
Si Hadeng Salomon nagpaheling nin kapakumbabaan sa saiyang pampublikong pamibi sa okasyon kan pagdusay kan templo ni Jehova
[Mga retrato sa pahina 18]
Arog ni Ana, puede kamong maranga nin pamibi