Ipinaheheling daw Nindo na Kamo Nagpapasalamat?

Sa sarong erokan nin mga misyonero sa solnopan na Aprika, may Bantay na ayam duman kaidto na an ngaran Teddy. Kun may nag-aapon nin kapidasong karne ki Teddy, hinahalon tolos nia iyan, na dai na ninanamitan, dai na nginungutanguta. Naghahangoshangos sa init kan saldang sa tropiko, hinahalat nia an sunod na pidaso na iapon sa saiya. Kan ubos na an karne, buminirik sia asin naghale.

Si Teddy nungkang nagpahayag nin kakadikit na pagpasalamat sa inako nia. Dai nin siisay man na naglaom kaiyan sa saiya. Total, saro sana siang ayam.

KUN dapit sa pagpasalamat, parateng mas linalaoman niato iyan sa mga magkasitawo kisa sa mga hayop. Sa parate nasusudya an satong linalaoman. An dakol na tawo inaaprobetsaran an makukua ninda sa buhay asin naghahanap nin orog pa. Bako man ining makangangalas. Ihinula kan Biblia na sa huring mga aldaw, an mga tawo magigin daing utang na boot.—2 Timoteo 3:1, 2.

Minsan siring, an mga lingkod nin Dios iba an aktitud. Isinasaboot ninda an hatol ni apostol Pablo, na nagsadol sa mga kapagtubod: “Ipaheling nindo na kamo nagpapasalamat.”—Colosas 3:15.

Ipinaheheling ni Jehova na Sia Nagpapasalamat

Itinatao ni Jehova Dios an sangkap na halimbawa sa pagpaheling nin apresasyon. Estudyare kun paano an pagheling nia sa saiyang fiel na mga lingkod. Si Pablo, paagi sa pasabong, nagsurat sa mga Kristianong Hebreo: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”—Hebreo 6:10.

Kadakol kan halimbawa kan pag-apresyar ni Jehova sa saiyang fiel na mga lingkod. Binendisyonan nia si Abraham paagi sa pagpadakol kan saiyang literal na mga gikan, kaya sinda nagin “siring kan mga bitoon sa kalangitan asin siring kan mga baybay sa baybayon.” (Genesis 22:17) Bilang pag-apresyar sa pagigin fiel ni Job sa irarom nin pagbalo, bako sanang ibinalik ni Jehova an dakulaon na kayamanan ni Job kundi itinao man nia “nin doble.” (Job 42:10) An mga pagtratar ni Jehova sa mga tawo sa bilog na mga milenyo nagpatunay sa pagigin totoo kan mga tataramon: “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.”—2 Cronica 16:9.

An pag-apresyar asin inklinasyon nin Dios na balosan an mga naghihingoang gibohon an saiyang kabotan pangenot na mga kabtang kan saiyang personalidad. An pagrekonoser kaini mahalagang marhay sa Kristianong pagtubod. Si Pablo nagsurat: “Kun dai nin pagtubod imposible na mapaogma sia nin marhay, huli ta an minadolok sa Dios kaipuhan na magtubod . . . na sia nagigin an parabalos sa mga maigot na naghahanap sa saiya.”—Hebreo 11:6.

Kun imbes kaiyan si Jehova nagpaheling nin maringis, mapagtatsar na aktitud, kita gabos makokondenar. Nasambitan ini kan salmista kaidtong haloy na an nakaagi: “Kun mga sala an saimong binabantayan, O Jah, O Jehova, siisay an makatitindog?” (Salmo 130:3) Si Jehova bakong dai tataong mag-apresyar ni mapagtatsar. Pinakamamahal nia an mga naglilingkod sa saiya. Ipinaheheling nia na sia nagpapasalamat.

Si Jesus—Sarong Odok na Mapag-apresyar na Tawo

Sangkap na ipinababanaag an mga kualidad kan saiyang langitnon na Ama, ipinaheling ni Jesu-Cristo na sia nagpapasalamat sa mga ginibo nin iba huli sa pagtubod. Estudyare an nangyari sarong beses sa templo sa Jerusalem: “Ngonyan kan [si Jesus] nagheheling naheling nia an mga mayaman na naghoholog kan saindang mga regalo sa kaha nin kayamanan. Dangan naheling nia an sarong dukhang balo na nagholog duman nin duwang saradit na sinsilyo na kadikiton an halaga, asin sia nagsabi: ‘Sa katotoohan sinasabi ko sa saindo, An balong ini, minsan ngani dukha, nagholog nin labi ki kan ihinolog ninda gabos. Huli ta an gabos na ini nagholog nin mga regalo gikan sa saindang kalabihan, alagad an babaeng ini nagholog gikan sa saiyang kadaihan kan gabos niang pagbuhay.’”—Lucas 21:1-4.

Kun hehelingon sa kantidad, sadit an kontribusyon, nangorogna kun ikokomparar sa kontribusyon kan mayayaman. An kadaklan kan mga yaon duman dai nanggad sia nariparo. Pero, talagang naheling ni Jesus an balong idto. Namansayan nia an saiyang mga kamugtakan. Naheling sia asin inapresyar sia ni Jesus.

An saro pang pangyayari may labot sa sarong mayaman na babae, si Maria. Kan si Jesus nagsasandig mantang nagkakakan, ibinubo nia an mamahalon na marhay na ungguento sa mga bitis ni Jesus asin sa saiyang payo. Tinatsaran nin nagkapira an saiyang ginibo, na nagrarason na an lana ikinapabakal kutana asin an kuarta nagamit sa pagtabang sa mga dukha. Ano an reaksion ni Jesus? Sia nagsabi: “Pabayae sia nindo. Taano ta hinihingoa nindong ribokon sia? Ginibohan nia ako nin marahay na gibo. Totoong ako nagsasabi sa saindo, Saen man ipaghulit an maogmang bareta sa bilog na kinaban, an ginibo kan babaeng ini masasabihan man bilang paggirumdom sa saiya.”—Marcos 14:3-6, 9; Juan 12:3.

Si Jesus dai nagreklamong may pagtatsar na an mamahalon na lana dai ginamit sa ibang bagay. Inapresyar nia an bukas an palad na kapahayagan kan pagkamoot asin pagtubod ni Maria. An pangyayari isinurat sa Biblia bilang paggirumdom sa saiyang marahay na gibo. An mga estoryang ini asin an iba pa nagpapaheling na si Jesus sarong odok na mapag-apresyar na tawo.

Kun kamo lingkod nin Dios, makaseseguro kamo na si Jehova Dios asin si Jesu-Cristo pareho odok na inaapresyar an saindong mga paghihingoa na suportaran an dalisay na pagsamba. An siring na kaaraman irinarani kita sa sainda asin minomotibar kita na arogon sinda paagi sa pagpatunay na kita nagpapasalamat.

An Mapagtatsar na Aktitud ni Satanas

Ngonyan estudyaran ta an halimbawa nin saro na dai nagpapaheling na sia nagpapasalamat—si Satanas na Diablo. An kadaihan nin pag-apresyar ni Satanas nagkontribwir sa pangengenot nia sa sarong kapahapahamak na pagrebelde tumang sa Dios.

Huling nagpatalubo nin mapagtatsar na aktitud nin pagkadiskontento sa saiyang sadiri, pinonan ni Satanas na itanom iyan sa iba. Estudyare an mga nangyari sa tatamnan nin Eden. Linalang ni Jehova an enot na lalaki asin babae, ibinugtak sinda sa sarong paraisong tatamnan, asin sinabihan sinda: “Hale sa gabos na kahoy sa tatamnan puede kang magkakan sagkod na ika mabasog.” Alagad may saro sanang ipinangalad. An Dios nagsabi: “Kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.”—Genesis 2:16, 17.

Minsan siring, dai nahaloy inangat ni Satanas an kredibilidad ni Jehova. Sa sarong kabtang, gusto niang gibohon si Eva na ingratong marhay ki Jehova tanganing sia mapahiro na magrebelde tumang sa saiya, siring kan pagrebelde mismo ni Satanas. “Ano totoo na an Dios nagsabi na dai kamo magkakan sa gabos na kahoy kan tatamnan?” an hapot ni Satanas. (Genesis 3:1) An malinaw na ipinaririsa iyo na an Dios may ipinangunguring mahalagang marhay na bagay ki Eva, sarong bagay na mabuklat kan saiyang mga mata asin magibo sa saiya na kabaing mismo nin Dios. Imbes na ipaheling na sia nagpapasalamat sa dakol na bendisyon na itinao sa saiya ni Jehova, si Eva nagpoon na himuyawoton an ipinangangalad.—Genesis 3:5, 6.

Aram na marhay an kapahapahamak na mga resulta. Minsan ngani tinawan kan ngaran na Eva “huli ta sia an magigin ina kan gabos na nabubuhay,” sa ibang sentido sia nagin ina kan gabos na nagagadan. Poon ki Adan an gabos na tawo nagmana nin kasalan na nagbubunga nin kagadanan.—Genesis 3:20; Roma 5:12.

Arogon an Dios Asin si Cristo

Estudyare an kalaenan ni Satanas asin ni Jesus. Si Satanas ilinaladawan na “an parasumbong sa satong mga tugang, na nagsusumbong sa sainda aldaw asin banggi sa atubangan kan satong Dios.” (Kapahayagan 12:10) Si Jesus “man lubos na makapagliligtas duman sa mga minadolok sa Dios paagi sa saiya, huli ta sia danay na buhay tanganing makimaherak para sa sainda.”—Hebreo 7:25.

Sinasahotan ni Satanas an mga lingkod nin Dios. Si Jesus inaapresyar sinda asin nakikimaherak para sa sainda. Bilang mga paraarog ki Cristo, an mga Kristiano maninigo na maghingoang hanapon an karahayan nin lambang saro, na inaapresyar asin pinahahalagahan an lambang saro. Sa paggibo kaiyan, ipinaheheling ninda na sinda nagpapasalamat sa saro na nagtatao kan pinakadakulang halimbawa nin pag-apresyar, si Jehova Dios.—1 Corinto 11:1.

[Retrato sa pahina 17]

Si Jesus nagpahayag nin apresasyon sa marahay na gibo ni Maria