An Kristianong Kongregasyon—Gikanan nin Tabang na Nakapakokosog

SI Popi, sarong babae na labi pa sanang 20 anyos, nadedesganar huli sa sarong makolog na situwasyon sa pamilya may labot sa kadaihan nin bukas na komunikasyon sa saiyang mga magurang.a Pakatapos na ipahayag an nasa saiyang puso sa sarong Kristianong magurang sa kongregasyon asin sa agom kaini, sia nagsurat sa sainda: “Salamat na marhay sa pagtao nin panahon na makipag-olay sa sako. Dai nindo aram kun gurano kadakulang bagay para sa sako na kamo nagmamakolog. Nagpapasalamat ako ki Jehova sa pagtao sa sako nin mga tawo na puede kong pagtiwalaan asin makaolay.”

Si Toula, sarong bago pa sanang mabalong babae na may duwang tinedyer na aki, namugtak sa nakapupurisaw na marhay na emosyonal asin pinansial na mga problema. Sia asin an saiyang mga aki regular na sinosongko tanganing pakosogon nin sarong Kristianong mag-agom sa kongregasyon. Pakatapos na mapangganahan nia an saiyang situwasyon, pinadarahan nia sinda nin kard, na nagsasabi: “Pirme ko kamong ginigirumdom sa sakong mga pamibi. Natatandaan ko an kadakol na panahon na dinamayan nindo ako asin sinuportaran ako.”

May panahon daw na an pagmate nindo kamo “nagagabatan” sa nag-oorog na mga sakit sa kinaban na ini? (Mateo 11:28) An buhay daw nindo rinaot nin makolog na mga eksperyensia huli sa “panahon asin pagkanorongod”? (Eclesiastes 9:11) Kun siring dai kamo nagsosolo. Alagad siring sa nanompongan na nin rinibong napupurisaw, manonompongan man nindo an makahulogan na tabang sa Kristianong kongregasyon kan Mga Saksi ni Jehova. Kan enot na siglo C.E., nanompongan ni apostol Pablo na an nagkapirang kapagtubod nangorognang nagin “tabang na nagpapakosog” para sa saiya. (Colosas 4:10, 11) Puede man nindong maeksperyensiahan iyan.

Suporta Asin Tabang

Sa Kristianong Griegong Kasuratan, an terminong “kongregasyon” trinadusir hale sa termino sa Griego na ek·kle·siʹa, na nangangahulogan nin sarong grupo nin mga tawo na magkairibahan na inapod. Katambay kan terminong iyan an mga ideya nin pagkasararo asin pagsuportar kan lambang saro.

Sinusuportaran kan Kristianong kongregasyon an katotoohan kan Tataramon nin Dios asin ipinahahayag an maogmang bareta kan saiyang Kahadean. (1 Timoteo 3:15; 1 Pedro 2:9) Minsan siring, an kongregasyon nagtatao man nin espirituwal na suporta asin tabang sa mga asosyado dian. Sa laog kaiyan, an saro makanonompong nin grupo nin mamomoton, nagmamalasakit, asin may pagmakolog na mga katood, na andam asin gustong tabangan asin rangahon an iba sa mga panahon nin kasakitan.—2 Corinto 7:5-7.

An mga parasamba ki Jehova kaidto pa pirmeng nakanonompong nin pagigin ligtas sa peligro asin seguridad sa saiyang kongregasyon. Sinabi kan salmista na naeksperyensiahan nia an kagayagayahan asin pakamate nin seguridad sa tahaw kan tiripon na banwaan nin Dios. (Salmo 27:4, 5; 55:14; 122:1) Siring man ngonyan, an Kristianong kongregasyon asosasyon nin magkakapagtubod na nagpapakosog asin nagpaparigon sa boot kan lambang saro.—Talinhaga 13:20; Roma 1:11, 12.

An mga miembro kan kongregasyon tinotokdoan na “gumibo . . . kan marahay sa gabos, alagad orog na sa mga may relasyon sa [sainda] sa pagtubod.” (Galacia 6:10) An inaako nindang basado sa Biblia na edukasyon pinahihiro sinda na ipahayag an sa tugang na pagkamoot asin mamomoton na kapadangatan sa lambang saro. (Roma 12:10; 1 Pedro 3:8) An magturugang sa espirituwal na mga lalaki asin babae sa kongregasyon pinahihiro na magin maboot, toninong, asin madinamayon sa pagkamoot. (Efeso 4:3) Imbes na magin sanang pormal na mga parasamba, sinda nagpapaheling nin mamomoton na pagmakolog sa iba.—Santiago 1:27.

Kun siring, sa kongregasyon manonompongan kan mga biyong pinanluluyahan nin boot an maogmang kamugtakan na garo sa pamilya. (Marcos 10:29, 30) An pakamate nin pagigin kabilang sa sarong dayupot na marhay asin mamomoton na grupo nagpapakosog sa sainda. (Salmo 133:1-3) Paagi sa kongregasyon, an “fiel asin madonong na oripon” nagtatao nin masustansiang espirituwal na “kakanon sa igong panahon.”—Mateo 24:45.

Tabang Gikan sa Mamomoton na mga Paraataman

Makakalaom an mga miembro kan Kristianong kongregasyon na manompongan dian an mamomoton, mapagsabot, asin kualipikadong mga pastor na nagtatao nin espirituwal na suporta asin pamparigon sa boot. An mga pastor na igwa kan mga kualidad na iyan siring sa “pailihan sa doros asin tagoan sa bagyo.” (Isaias 32:1, 2) An nombrado kan espiritung kamagurangan, o paraataman, inaataman an arog-karnerong banwaan nin Dios, pinaririgon an boot kan mga may helang asin nagmomondo nin makuri, asin hinihingoang ibalik an mga napasala.—Salmo 100:3; 1 Pedro 5:2, 3.

Siempre, an grupo nin kamagurangan kan kongregasyon bakong propesyonal na mga terapista o mga doktor, na kayang bolongon an mga problema sa pisikal o kamugtakan nin isip na inaatubang kan mga kapagtubod. Sa palakaw na ini nin mga bagay, an mga may helang “nangangaipo [pa giraray] nin parabolong.” (Lucas 5:31) Minsan siring, puedeng tabangan kan siring na mga pastor an mga may pangangaipo sa espirituwal. (Santiago 5:14, 15) Kun posible, an kamagurangan nag-aareglo man nin ibang tabang.—Santiago 2:15, 16.

Siisay an nasa likod kan siring na mamomoton na areglo? Si Jehova Dios mismo! Ilinaladawan ni propeta Ezequiel si Jehova na nagpapahayag: “Hahanapon ko an sakong mga karnero asin aatamanon ko sinda. . . . Ililigtas ko sinda hale sa gabos na lugar na saindang nagkawararakan . . . Ako mismo an mapasabsab sa sakong mga karnero, asin ako mismo an mapahigda sa sainda.” An Dios may pagmakolog man sa mabublay asin maluyang mga karnero.—Ezequiel 34:11, 12, 15, 16.

Tunay na Tabang sa Tamang Panahon

Talaga daw na makukua an tunay na tabang sa Kristianong kongregasyon? Iyo, asin an minasunod na mga halimbawa nagpapaheling kan laen-laen na kamugtakan na dian an kongregasyon nagigin tabang.

◆ Pagkagadan nin sarong namomotan. An agom ni Anna nagadan pakatapos nin pabalikbalik na helang. “Poon kaidto nag-ako ako nin mainit na pagkamoot gikan sa Kristianong pagkanitugang,” an sabi nia. “An nagpapadagos na maboot na mga tataramon nin pagsuportar asin pagparigon sa boot gikan sa sakong mga kapagtubod, kabale an saindang odok sa pusong mga kugos, pinapagdanay an sakong puso na nagkukutab imbes na biyong manluya, asin nagpapasalamat ako ki Jehova. An saindang pagkamoot nagpamate sa sako na ako suportadong marhay, lubos na naparahay an kamugtakan, mamomoton na inaataman.” Tibaad inagihan na man nindo an makologon na eksperyensia na magadanan nin sarong namomotan. Sa siring na mga panahon, an mga miembro kan kongregasyon puedeng makatao nin kinakaipuhan na marhay na ranga asin emosyonal na suporta.

◆ Helang. Si Arthur, sarong nagbibiaheng paraataman hale sa Polandia, regular na nagsongko sa mga kongregasyon sa Asia Sentral tanganing pakosogon sinda sa espirituwal. Durante kan saro sa mga pagsongko na ini, sia naghelang nin grabe asin kan sia nagpaparahay nagkaigwa nin grabeng mga komplikasyon. “Boot kong eestorya sa saindo kun paano ako inataman kan mga tugang na lalaki asin babae sa [sarong siudad sa Kazakhstan],” an may odok na apresasyon na paggirumdom ni Arthur. “An mga tugang na lalaki asin babae, na an dakol sa sainda dai ko midbid—asin pati mga interesado—nagdara nin kuarta, kakanon, asin bolong. . . . Asin ginibo ninda iyan na may dakulang kagayagayahan.

“Imahinara an sakong mga namatean kan makaresibi ako nin sobre na may laog na kuarta asin kan minasunod na surat: ‘Namomotan na Tugang, ipinaaabot ko po sa saimo an mainit na pataratara. Tinawan po ako ni Nanay nin kuarta na pambakal nin ice cream, alagad nagdesisyon ako na itao iyan sa saindo para sa bolong. Parahay tabi tolos kamo. Kaipuhan kita ni Jehova sa halawig na panahon. Mapasaindo an sakong pinakamarahay na mga kamawotan. Asin estoryahan pa nindo kami nin marahay, nakapagtotokdong mga estorya. Vova.’” Iyo, siring kan ipinaheheling sa pangyayaring ini, an mga hoben asin gurang sa kongregasyon puedeng magtao nin nakapakokosog na tabang sa mga panahon nin paghelang.—Filipos 2:25-29.

◆ Makuring kamondoan. Odok sa puso an pagmawot ni Teri na maglingkod bilang payunir, o bilog na panahon na parabalangibog kan Kahadean. Pero huli sa mga problema, kinaipuhan niang pumondo sa pagpayunir. “Nakamate ako nin dakulaon na kasalan sa paghihingoang makapaglingkod sa kapasidad na ini asin dai man lamang ngani nagsarong taon,” an sabi nia. Nasala an paniniwala ni Teri na an pag-oyon ni Jehova nakadepende sana sa kadakolan kan paglilingkod nia sa saiya. (Ikomparar an kalaenan kan Marcos 12:41-44.) Huling makuri an pagmondo, isinuhay nia an saiyang sadiri. Alagad kaidto nag-abot an nakagiginhawang tabang hale sa kongregasyon.

Nagigirumdoman ni Teri: “An sarong gurang nang payunir na tugang na babae tolos-tolos na tinabangan ako asin naghinanyog sa sako mantang ilinuluwas ko sa saiya an sakong mga nasa boot. Paghale ko sa saiyang harong, an pagmate ko garo baga may pagabat na hinale sa sako. Poon kaidto, an payunir na tugang na babaeng ini asin an saiyang agom, na sarong magurang sa kongregasyon, nagtao nin mahalagang tabang. Inaapodan ninda ako aroaldaw na kinukumusta ako. . . . Pinasasabay ninda ako kun minsan sa saindang pampamilyang pag-adal, na nagtudok sa isip ko kan halaga nin pagdadanay na dayupot kan mga pamilya.”

Komun para sa dakol—maski dusay na mga Kristiano—na mamondo nin makuri, manluya an boot, asin mapungaw. Makapasasalamat nanggad kita na an mamomoton, daing kapasloan na tabang makukua sa kongregasyon nin Dios!—1 Tesalonica 5:14.

◆ Mga kalamidad asin aksidente. Ibugtak nindo an saindong sadiri sa situwasyon nin sarong pamilya na may apat na miembro na nawaran kan gabos nindang rogaring kan masolo an saindang harong. Dai nahaloy napasainda an inaapod ninda na “nakaparirigon sa boot na eksperyensia na makakaapektar sa samo sagkod lamang asin nakatudok sa isip niamo kan tunay na pagkamoot sa tahaw kan banwaan ni Jehova.” Sinda nagpapaliwanag: “Haros ensegida na nabigla kami sa sinserong mga apod nin pagsuportar asin pakikidamay kan samong mga tugang na lalaki asin babae sa espirituwal. Pirmeng nagtatanog an telepono. Nakapupukaw na marhay sa boot an tunay na pagmakolog asin pagkamoot kan gabos kaya napaluha kami sa pagpasalamat.”

Dai nahaloy, sarong dakulang grupo nin mga tugang na lalaki an inorganisar kan kamagurangan sa kongregasyon, asin sa laog nin pirang aldaw, sinda nakatogdok nin sarong bagong harong para sa pamilyang ini. An sarong kataed nagkagsing: “Maninigo nindong helingon iyan! Gabos na klaseng tawo nagtatrabaho duman—mga lalaki, babae, itom, Hispanico!” Ini malinaw na ebidensia nin pagkamoot sa tugang.—Juan 13:35.

An pamilya tinawan man kan mga kapwa Kristiano nin gubing, pagkakan, asin kuarta. An ama nagkomento: “Durante ini kan panahon nin Navidad na an gabos nagtatao nin mga regalo, alagad sadiosan ming masasabi na mayo nang ibang nagkamit kan klase nin tunay, dakulaon na pagkabukas palad na nakamtan mi.” Asin idinugang ninda: “An mga memorya kan kasolo luway-luway na nawawara asin nasasalidahan nin mahal na mga memorya nin mga akto nin kabootan asin marahay na mga katood. Nagpapasalamat kami sa samong mamomoton na langitnon na Ama, si Jehova, na kami igwa nin siring kamakangangalas, nagkakasararong pamilya nin magturugang digdi sa daga, asin nagpapasalamat na marhay kami na magin kabtang kaiyan!”

Siempre, an siring na pag-interbenir bakong posible, ni hinahalat, sa lambang trahedya na siring kaiyan. Alagad an pangyayaring ini nagpapaheling kan suporta na puedeng itao kan kongregasyon.

Kadonongan Hale sa Itaas

Dakol an nakanompong nin saro pang gikanan nin tabang asin kosog sa Kristianong kongregasyon. Ano iyan? Mga publikasyon na inandam kan “fiel asin madonong na oripon.” Risang-risa sa mga ini an mga magasin na An Torrengbantayan asin Awake! Tanganing makatao nin may pakarorop na hatol asin praktikal na instruksion, an mga publikasyon na ini pangenot na nagsasarig sa kadonongan nin Dios na yaon sa Biblia. (Salmo 119:105) An sono sa Kasuratan na impormasyon iniibanan nin responsable asin autorisadong pagsiyasat sa mga tema na arog kan depresyon sa isip, pagkarahay sa pagmaltrato, laen-laen na problema sa sosyedad asin ekonomiya, mga angat na inaatubang nin mga hoben, asin mga problema na espesyalmenteng nangyayari sa nagpoprogresong mga nasyon. Orog sa gabos, sinusuportaran kan mga publikasyon na ini an dalan nin Dios bilang an pinakamarahay na dalan sa buhay.—Isaias 30:20, 21.

Kada taon, an Watch Tower Society nakareresibi nin rinibong surat nin apresasyon. Halimbawa, may labot sa sarong artikulo sa Awake! dapit sa paghugot an sarong hoben na lalaki sa Rusya nagsurat: “Huli sa sakong pagigin madaling magmondo nin makuri, . . . dakol na beses na akong nag-isip na maghugot. Pinakosog kan artikulong ini an sakong paniniwala na tatabangan ako nin Dios sa pagresolber sa sakong mga problema. Gusto nia na ako mabuhay. Nagpapasalamat ako sa saiyang suporta na itinao paagi sa artikulong ini.”

Kun an maunos na mga alon nin mga problema sa kinaban na ini garo baga masakit na gayong atubangon, makaseseguro kamo na igwa nin ligtas na tagoan sa Kristianong kongregasyon. Tunay nanggad, kun an marang desierto kan daing pagkamoot na palakaw na ini inuubos an saindong kosog, makanonompong kamo nin nagpapabagsik na oasis sa organisasyon ni Jehova. Pakatapos na maeksperyensiahan an siring na suporta, puede man nindong otrohon an mga sentimiento nin sarong Kristiana na mapangganang inatubang an grabeng kamatean kan saiyang agom asin nagsurat: “Huli kan pagkamoot asin pagmakolog na ipinaheling sa samo, an pagmate ko garo baga kami kinarga ni Jehova sa saiyang palad na makahale sa krisis na ini. Kanigoan an pagpasalamat ko na magin kabtang kan kahangahangang organisasyon ni Jehova!”

[Nota sa ibaba]

[Mga retrato sa pahina 26]

Puede kitang tumao nin nakapakokosog na tabang sa mga may helang, nagadanan, asin iba pa