Taano ta Dapat Maniwala ki Jesu-Cristo?

“DAWA an dakol na tawo na bakong Kristiano naniniwala na Sia dakula asin madonong na paratokdo. Sia tunay nanggad na saro sa pinakamaimpluwensiang tawo na nabuhay kasuarin man.” (The World Book Encyclopedia) Siisay “Sia”? Si Jesu-Cristo, an kagpundar kan Kristianismo.

Minsan siring, apisar kan sinasabi kan ensiklopedya, para sa ginatos na milyon na tawo sa Oriente asin iba pang lugar, si Jesu-Cristo dai midbid, saro sanang ngaran na tibaad nagigirumdoman ninda sa inaadalan na mga libro sa haiskul. Dawa sa mga iglesia nin Kakristianohan, may mga teologo asin klerigo na nagsasabi na talagang dai ta midbid si Jesus asin pinagdududahan an pagigin tunay kan yaon pang apat na pagkasaysay kan saiyang buhay (an mga Ebanghelyo) na manonompongan sa Biblia.

Pinalsipikar daw kan mga kagsurat kan Ebanghelyo an estorya kan buhay ni Jesus? Dai nanggad! An bantog na historyador na si Will Durant, pakaanalisara kan mga pagkasaysay na iyan sa Ebanghelyo, nagsurat: “Na an pirang simpleng tawo sa sarong kapag-arakian inimbento an mapuersa asin nakaaakit nanggad na personalidad, an halangkawon na etika asin nakaiinspirar na gayong bisyon nin pagkamagturugang nin tawo, magigin sarong milagro na orog nanggad na pambihira kisa arin man na irinekord sa mga Ebanghelyo. Pakalihis nin duwang siglo nin Mas Halangkaw na Gradong Pagkritika an sumaryo kan buhay, karakter, asin katokdoan ni Cristo, nagdadanay na talagang malinaw, asin iyo an pinakainteresanteng karakteristiko sa kasaysayan nin tawong taga Solnopan.”

Pero, igwa nin mga habo ki Jesu-Cristo bilang dai maninigo sa saindang atension dahelan sa ginibo kan saiyang naghihingakong mga parasunod. ‘Hinulogan ninda nin bomba atomika an Nagasaki,’ an sasabihon nin nagkapira sa Hapon. ‘Asin mas dakol an Kristiano sa Nagasaki kisa kadaklan na siudad sa Hapon.’ Alagad puede daw nindong basolon an doktor sa kamatean nin sarong pasyente kun dai sinusunod kan pasyente an giya kan doktor? An kadaklan na tawong naghihingako na Kristiano haloy nang dai inintindi an preskripsion ni Jesus sa paghale sa mga problema nin katawohan. Pero, itinao ni Jesus an remedyo para sa satong aroaldaw na mga problema siring man sa mga sakit nin katawohan sa bilog na kinaban. Iyan an dahelan na inaagda mi kamo na basahon an minasunod na artikulo asin helingon nindo mismo kun anong klaseng tawo sia.