Pagkinabang sa “Trigo nin Langit”
DAI nahaloy pakatapos kan saindang milagrosong pagkaligtas sa Egipto, an mga Israelita nagpaheling nin grabeng kadaihan nin pagtubod sa saindang Paraligtas, si Jehova. Bilang resulta, pinapaglagawlagaw sinda ni Jehova sa kaawagan nin Sinai sa laog nin 40 taon. Durante kan bilog na panahon na idto, an mga Israelita asin an mga dayo na “dakulang kadaklan na manlaenlaen” na nakiayon sa sainda nagkakan asin nag-inom “sagkod sa kabasogan.” (Exodo 12:37, 38) An Salmo 78:23-25 nagsasabi sa sato kun paano ini nagin posible: “Pinagbotan [ni Jehova] an mapanganoron na kalangitan sa itaas, asin binukasan nia an mga tata nin langit. Asin pinaoran nia sa sainda an mana tanganing kakanon, asin itinao nia sa sainda an trigo nin langit. An mga tawo nagkakan kan mismong tinapay kan mga makapangyarihan; nagpadara sia sa sainda nin probisyon sagkod sa kabasogan.”
Bilang nagkakan kan mana, ilinadawan ni Moises an daing kaagid na kakanon na ini. Sia nagsurat na sa aga, pakatapos na “uminalisngaw an sarong suon nin ambon . . . , sa ibabaw kan kaawagan igwa nin pinong bagay na garo niebe, pino na arog nin nagyeyelong ambon sa ibabaw nin daga. Kan maheling iyan kan mga aki ni Israel, sinda nagpoon na magsabi sa lambang saro: ‘Ano ini?’” o sa literal sa Hebreo, “man huʼ?” An tataramon na ini an posibleng ginikanan kan tataramon na “mana,” an iinapod kan mga Israelita sa kakanon. Sinabi ni Moises: “Iyan maputi na siring kan pisog nin kulantro, asin an namit kaiyan siring kan lapnad na tinapay na may tangguli.”—Exodo 16:13-15, 31, nota sa ibaba.
An mana bakong natural na nakukuang pagkakan, siring kan argumento nin iba. An lihis sa natural na puersa kalabot sa pagtao kaiyan. Halimbawa, an pagkaigwa kaiyan bakong limitado sa lugar o kapanahonan. Kun paagahan, iyan inuulod asin nagpopoon na magbata; pero, an dobleng kabtang na tinitipon nin kada pamilya sa aldaw bago kan semanal na Sabbath dai nararaot dawa paagahan, kaya iyan puedeng kakanon sa Sabbath—an aldaw na mayong mana na minaluwas. Tunay nanggad, an mana sarong milagrosong probisyon.—Exodo 16:19-30.
An pagsambit kan “mga makapangyarihan,” o “mga anghel,” sa Salmo 78 nagsusuherir na tibaad ginamit ni Jehova an mga anghel sa pagtao kan mana. (Salmo 78:25, nota sa ibaba) Sa paano man, an mga tawo may dahelan nanggad na magpasalamat sa Dios huli sa saiyang kabootan. Minsan siring, an kadaklan nagpaheling nin ingratong aktitud sa mismong Saro na nagligtas sa sainda sa kaoripnan sa Egipto. Tibaad bali-walaon ta man an mga probisyon ni Jehova o magin ingrato pa ngani kun dai niato hohorophoropon an saiyang mamomoton na kabootan. Kaya kita makapagpapasalamat na iiniba ni Jehova an rekord kan pagliligtas sa Israel asin an suminunod na mga pangyayari para sa “pagtokdo sa sato.”—Roma 15:4.
An Leksion Para sa Israel Pinakikinabangan kan mga Kristiano
Kan itao ni Jehova an mana, labi kisa pagpanigo sana sa pisikal na mga pangangaipo kan mga tolong milyon na Israelita an nasa isip nia. Gusto niang ‘pakumbabaon sinda asin baloon sinda’ tangani na dalisayon asin disiplinahon sinda para sa sadiri nindang kapakinabangan. (Deuteronomio 8:16; Isaias 48:17) Kun sinda naghimate sa pagdadalisay asin pagdidisiplina na iyan, ikinaoogmang marhay ni Jehova na ‘gibohan sinda nin marahay sa saindang kahurihurihing mga aldaw’ paagi sa pagtao sa sainda nin katoninongan, prosperidad, asin kaogmahan sa Dagang Panuga.
An sarong mahalagang marhay na bagay na kaipuhan nindang manodan iyo na “an tawo bako sanang sa tinapay nabubuhay kundi sa lambang tataramon kan ngoso ni Jehova na an tawo nabubuhay.” (Deuteronomio 8:3) Kun dai nin Dios inorden an mana, an mga tawo nagutom kutana nin makuri—bagay na inako tolos ninda. (Exodo 16:3, 4) An mapag-apresyar na mga Israelita pinagirumdom aroaldaw kan saindang lubos na pagdepende ki Jehova asin kun siring pinakumbaba. Pag-abot sa Dagang Panuga na abunda sa materyal, kadikit an posibilidad na malingawan ninda si Jehova asin an saindang pagdepende sa saiya.
Arog kan mga Israelita, an mga Kristiano dapat na magdanay na nakamamate kan saindang pagdepende sa Dios sa mga pangangaipo sa buhay—sa pisikal saka espirituwal. (Mateo 5:3; 6:31-33) Bilang simbag sa saro sa mga sugot kan Diablo, kinotar ni Jesu-Cristo an mga tataramon ni Moises na manonompongan sa Deuteronomio 8:3, na nagsasabi: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’” (Mateo 4:4) Iyo, an tunay na mga nagsasamba sa Dios sinususteniran paagi sa pagbasa kan mga kapahayagan ni Jehova na manonompongan sa saiyang Tataramon. Dugang pa, an saindang pagtubod pinakokosog kun sinda nakaeeksperyensia kan kapakipakinabang na mga epekto kan mga kapahayagan na ini sa saindang buhay mantang sinda naglalakaw sa kaibahan nin Dios asin ineenot an intereses kan Kahadean.
An bakong sangkap na mga tawo puedeng mawaran nin pag-apresyar sa mga bagay na ordinaryo na sana sa buhay—dawa kun an mga bagay na ini nagpapaheling kan mamomoton na pagmalasakit ni Jehova. Halimbawa, an lihis sa natural na probisyon na mana kapwa nakasorpresa asin nakapakontento sa mga Israelita sa kapinonan, alagad pag-abot nin panahon dakol sa sainda an nagreklamo. “Ikinasurang na nin makuri kan samong kalag an daing kuentang tinapay,” an daing galang na inagrotong ninda—sarong tanda na sinda nagpopoon nang ‘magbaya sa nabubuhay na Dios.’ (Bilang 11:6; 21:5; Hebreo 3:12) Kun siring, an saindang halimbawa nagseserbing “pagpatanid sa sato na inabotan kan mga katapusan kan mga palakaw nin mga bagay.”—1 Corinto 10:11.
Paano ta ikasasapuso an panalmingan na ini? An sarong paagi iyo an nungkang pagtogot na magin ordinaryo, o komun na sana, an mga katokdoan kan Biblia o an mga probisyon na inaako niato paagi sa grupong fiel asin madonong na oripon. (Mateo 24:45) Oras na magpoon na bali-walaon ta an mga balaog ni Jehova o magin disganado na sa mga iyan, an satong relasyon sa saiya mapoon na lumipot.
May marahay na dahelan, si Jehova dai kita pinababahaan nin daing pondong nakaoogmang bagong mga bagay. Imbes, sia nagtatao nin orog pang liwanag sa saiyang Tataramon sa luway-luway, progresibong paagi. (Talinhaga 4:18) Nagtotogot ini sa saiyang banwaan na akoon asin iaplikar an mga bagay na saindang nanonodan. Sinunod ni Jesus an halimbawa kan saiyang Ama kan tinotokdoan an saiyang enot na mga disipulo. Ipinaliwanag nia an Tataramon nin Dios sa sainda “sagkod na kaya nindang maghinanyog,” o “magsabot,” siring kan pagkatradusir nin nagkapira.—Marcos 4:33; ikomparar an Juan 16:12.
Pasarigon an Saindong Pag-apresyar sa mga Probisyon nin Dios
Si Jesus naggamit man nin pag-otro. Siempre, an isip tibaad kayang masabotan tolos an sarong bagay—halimbawa, sarong prinsipyo sa Biblia—alagad an pagsapuso kaiyan asin paggibo kaiyan na kabtang kan Kristianong “bagong personalidad” tibaad mas haloy-haloy, nangorogna kun nakalaog na nin hararom an daan na kinabanon na mga ugale asin aktitud. (Efeso 4:22-24) Iyan nanggad an kamugtakan kan mga disipulo ni Jesus kun mapadapit sa pagdaog sa amor propio asin pagpatalubo nin kapakumbabaan. Kinaipuhan sindang tokdoan ni Jesus manongod sa kapakumbabaan sa dakol na okasyon, na sa lambang okasyon iinaatubang an iyo man sanang pundamental na punto sa laen na anggulo tanganing iyan tumadom, na pag-abot nin panahon nangyari.—Mateo18:1-4; 23:11, 12; Lucas 14:7-11; Juan 13:5, 12-17.
Sa presenteng mga panahon, an Kristianong mga pagtiripon asin an mga publikasyon kan Watch Tower sinusunod an halimbawa ni Jesus sa paggamit nin inandam na marhay na pag-otro. Kaya apresyaron niato ini bilang kapahayagan kan mamomoton na pagmalasakit nin Dios para sa sato asin nungkang masuya sa bagay na inaako ta, kun paanong an mga Israelita nasuya sa mana. Tunay nanggad, mantang kita mapasensiang nagmamaigot na akoon an regular na mga pagirumdom ni Jehova, maheheling niato an marahay na mga bunga sa satong buhay. (2 Pedro 3:1) An siring na mapag-apresyar na aktitud totoong nagpapaheling na kita “nakasasabot” kan Tataramon nin Dios sa satong puso siring man sa satong isip. (Mateo 13:15, 19, 23) Mapadapit digdi, marahay na halimbawa para sa sato an salmistang si David, na, minsan ngani dai nagkaigwa nin laen-laen na espirituwal na kakanon na inaako niato ngonyan, ilinadawan an mga ley ni Jehova na “mas mahamis kisa tangguli asin nagbobolos na tangguli sa anira”!—Salmo 19:10.
An “Mana” na Nagtatao nin Buhay na Daing Katapusan
“Ako an tinapay nin buhay,” an sabi ni Jesus sa mga Judio. “An saindong mga apoon nagkarakan kan mana sa kaawagan alagad nagkagaradan. . . . Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang . . . An tinapay na sakong itatao iyo an sakong laman manongod sa buhay kan kinaban.” (Juan 6:48-51) An literal na tinapay o mana dai nakatao asin dai makatatao nin buhay na daing katapusan. Alagad an mga naggigibo nin pagtubod sa pantubos na atang ni Jesus sa kahurihurihi magkakamit kan bendisyon na buhay na daing katapusan.—Mateo 20:28.
An mayoriya kan mga nakikinabang kan pantubos ni Jesus magkakamit nin buhay na daing katapusan sa sarong paraisong daga. An “sarong dakulang kadaklan” kaini—na ipinanganino kan mga dayo na “dakulang kadaklan na manlaenlaen” na nakiiba sa mga Israelita sa Lagdoan na Pagharale sa Egipto—maliligtas sa nagdadangadang na “dakulang kahorasaan” na mahale kan gabos na karatan sa daga. (Kapahayagan 7:9, 10, 14; Exodo 12:38) Mas dakula pa nganing balos an nakakamtan kan mga ipinanganganino kan mga Israelita mismo. Ilinadawan ni apostol Pablo an mga ini, na an bilang 144,000, bilang minakompuesto kan espirituwal na Israel nin Dios. An saindang balos pagkagadan iyo an pagkabuhay liwat sa buhay sa langit. (Galacia 6:16; Hebreo 3:1; Kapahayagan 14:1) Duman tatawan sinda ni Jesus nin espesyal na klase nin mana.
An Kahulogan kan “Natatagong Mana”
“Sa makadaog matao ako kan natatagong mana,” an sinabi kan binuhay liwat na si Jesus sa espirituwal na Israel. (Kapahayagan 2:17) Ipinagigirumdom kan simbolikong natatagong mana na ini an mana na ipinagboot nin Dios ki Moises na isaray sa sarong dulay na bulawan sa laog kan sagradong kaban kan tipan. An Kaban itinago sa Kabanalbanaleng kuarto kan tabernakulo. Duman iyan nagdanay na dai naheheling, natatago sabi ngani. Isinaray bilang girumdoman, an sampol na ini nin mana dai nalapa mantang iyan nagdadanay na nasa laog kan Kaban, kaya iyan angay na simbolo nin dai nalalapa na suplay nin kakanon. (Exodo 16:32; Hebreo 9:3, 4, 23, 24) Sa pagtao nin natatagong mana sa 144,000, ginagarantiyahan ni Jesus an saindang pag-ako nin inmortalidad asin kadaihan nin kalapaan bilang espiritung mga aki nin Dios.—Juan 6:51; 1 Corinto 15:54.
“Yaon sa saimo [Jehova] an gikanan nin buhay,” an sabi kan salmista. (Salmo 36:9) Marahayon nanggad an pagkapatunay liwat kan probisyon na mana—kapwa sa literal asin simbolikong paagi—sa pundamental na katotoohan na iyan! An mana na itinao nin Dios sa suanoy na Israel, an piguratibong mana na itinao nia sa pormang laman ni Jesus para sa sato, asin an simbolikong natatagong mana na itinatao nia paagi ki Jesus sa 144,000 nagpapagirumdom sa sato gabos kan satong biyong pagdepende sa Dios para sa buhay. (Salmo 39:5, 7) Rekonoseron niato na may kapakumbabaan, kababaan nin isip, asin nin regular an pagdependeng ini. Bilang balos, si Jehova ‘gigibohan kita nin marahay sa satong kahurihurihing mga aldaw.’—Deuteronomio 8:16.
[Mga retrato sa pahina 26]
Tanganing kamtan an buhay na daing katapusan, an gabos na tawo nagdedepende sa “nabubuhay na tinapay na naghilig hale sa langit”
[Retrato sa pahina 28]
An pag-atender sa gabos na Kristianong pagtiripon nagpapabanaag kan satong pag-apresyar sa mga pagirumdom ni Jehova