Taano ta Dapat Otobon an Saindong mga Panuga?

“BOTOHAN nindo an tawo na pinakakadikit an panuga; sia magigin an pinakadaing gayo nakadedesganar,” an sabi kan gadan nang konsehero sa presidente na si Bernard Baruch. Sa kinaban ngonyan garo baga an mga panuga ginigibo tanganing dai otobon. Iyan tibaad mga kapanugaan sa pag-agom, kontrata sa negosyo, o promesa na mas dakol na oras sa pakiibaiba sa mga aki. Lakop an dai pag-intindi sa isinusuherir kan komun na kasabihan, “An sokolan kan sarong tawo iyo an pag-otob nia kan saiyang panuga.”

Siempre, dakol na tawo an mayo nin intension noarin man na otobon an saindang mga panuga. An iba ragap na nanunumpa na dai ninda kayang gibohon o dai inootob an saindang mga tataramon huli sana ta minaluwas na ini an pinakamadaling gibohon.

Totoo, an pag-otob sa sarong panuga tibaad masakit kun lumataw an mga pagkanorongod. Alagad grabe daw talaga an danyos nin dai inotob na panuga? Maninigo daw nindong seryosohon an saindong mga panuga? An halipot na pagsiyasat sa halimbawa ni Jehova Dios makatatabang sa sato na maheling kun taano ta maninigo niatong seryosong estudyaran an bagay na ini.

Inootob ni Jehova an Saiyang mga Panuga

Sinasamba niato an sarong Dios na an mismong ngaran konektadong marhay sa pag-otob kan saiyang mga panuga. Kaidtong mga panahon kan Biblia an ngaran sa parate naglaladawan sa tawo. Totoo man ini sa ngaran na Jehova, na nangangahulogan “Saiyang Pinapangyayaring Magin.” Sa siring nasa ngaran nin Dios an ideya na ootobon nin Dios an saiyang mga panuga asin gigibohon an saiyang mga katuyohan.

Tamang-tama sa saiyang ngaran, inotob ni Jehova an gabos na ipinanuga nia sa suanoy na nasyon nin Israel. Mapadapit sa mga panugang ini, rinekonoser ni Hadeng Salomon: “Pag-omawon logod si Jehova, na nagtao nin lugar nin kapahingaloan sa saiyang banwaan na Israel sono sa gabos na saiyang ipinanuga. Mayo nin nasudya ni sarong tataramon sa gabos niang marahay na panuga na saiyang ipinanuga paagi ki Moises na saiyang lingkod.”—1 Hade 8:56.

Mapagtitiwalaan nanggad si Jehova kaya si apostol Pablo makapangangatanosan: “Kan an Dios manuga ki Abraham, huli ta dai nia ikapanunumpa an siisay man na orog na dakula, ipinanumpa nia an saiyang sadiri.” (Hebreo 6:13) Iyo, an mismong ngaran asin persona ni Jehova garantiya na dai nia tatalikodan an saiyang mga panuga, dawa magsakripisyo sia nin dakula huli kaiyan. (Roma 8:32) An bagay na inootob ni Jehova an saiyang mga panuga nagtatao sa sato nin paglaom na angkla para sa satong kalag, o buhay.—Hebreo 6:19.

An mga Panuga ni Jehova Asin an Satong Ngapit

An satong paglaom, pagtubod, asin buhay mismo nakadepende gabos sa kaotoban kan mga panuga ni Jehova. Anong paglaom an minamahal niato? “Igwa nin bagong kalangitan asin sarong bagong daga na satong hinahalat oyon sa . . . panuga [nin Dios], asin sa mga ini magdadanay an katanosan.” (2 Pedro 3:13) An Kasuratan nagtatao man sa sato nin basehan para sa pagtubod na “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Asin segurado niato na may orog pa kisa presenteng buhay na ini. Tunay nanggad, an inapod ni apostol Juan na “panuga na ipinanuga” iyo “an buhay na daing katapusan.” (1 Juan 2:25) Alagad an mga panuga ni Jehova sa saiyang Tataramon bakong limitado sa ngapit. Iyan nagtatao nin kahulogan sa satong buhay sa aroaldaw ngonyan mismo.

An salmista nag-awit: “Si Jehova harani sa gabos na nag-aarang sa saiya, . . . asin dadangogon nia an agrangay ninda na tabangan.” (Salmo 145:18, 19) Sinisierto man sa sato nin Dios na “sia nagtatao nin kapangyarihan sa napapagal; asin sa saro na mayo nin dinamikong kosog saiyang pinadadakol an bilog na puersa.” (Isaias 40:29) Asin nakararanga nanggad na maaraman na ‘dai itotogot nin Dios na kita masugotan nin labi sa satong makakaya, kundi kaibahan kan sugot matao man sia nin luluwasan’! (1 Corinto 10:13) Kun naeksperyensiahan ta personalmente an kaotoban kan arin man sa mga panugang ini, aram niato na si Jehova puedeng lubos na pagtiwalaan. Huli sa mga pakinabang na nakukua niato sa dakol na panuga na ginigibo asin inootob nin Dios, paano niato maninigong mansayon an satong mga panuga sa saiya?

Pag-otob kan Satong mga Panuga sa Dios

An satong pagdusay sa Dios daing duda na iyo an pinakaimportanteng panuga na puede niatong gibohon. Paagi sa paggibo kan lakdang na ini, ipinaheheling niato na mawot niatong maglingkod ki Jehova sagkod lamang. Minsan ngani an mga togon nin Dios dai nakapagagabat, tibaad bako pirmeng pasil na gibohon an saiyang kabotan, mantang kita nabubuhay sa maraot na palakaw na ini nin mga bagay. (2 Timoteo 3:12; 1 Juan 5:3) Alagad oras na ‘kinapotan ta an arado’ asin nagin nagdusay na mga lingkod ni Jehova asin mga disipulo kan saiyang Aki, si Jesu-Cristo, kita maninigo na dai noarin man magsalingoy sa mga bagay kan kinaban na binayaan ta na.—Lucas 9:62.

Kun kita namimibi ki Jehova, tibaad mapahiro kita na manuga sa saiya na kita maigot na mahingoang daogon an kaluyahan, kultibaron an Kristianong kualidad, o paoswagon an sarong aspekto kan satong teokratikong aktibidad. Ano an makatatabang sa sato tanganing maotob an mga panugang ini?—Ikomparar an Eclesiastes 5:2-5.

An sinserong mga panuga hale sa puso saka sa isip. Kun siring, patunayan ta an satong mga panuga ki Jehova paagi sa pagpahayag sa saiya kan nasa satong puso paagi sa pamibi, na sadiosan na ipinapahayag an satong mga kinatatakotan, kamawotan, asin kaluyahan. An pamimibi manongod sa sarong panuga pakokosogon an satong determinasyon na otobon iyan. Puede niatong ibilang na utang an satong mga panuga sa Dios. Kun an utang dakula, an pagbayad dikit-dikit. Kaagid kaiyan, kaipuhan an panahon tanganing maotob an dakol na panuga ta ki Jehova. Alagad paagi sa regular na pagtao sa saiya kan kaya niato, ipinaheheling niato na intension ta na gibohon an sinabi niato, asin huli kaiyan bebendisyonan nia kita.

Ikapaheheling niato na sineseryoso ta an satong mga panuga paagi sa parateng pamimibi manongod dian, tibaad aroaldaw. Ipaheheling kaini sa satong langitnon na Ama na kita sinsero. Iyan magseserbi man na regular na pagirumdom. Winalatan kita ni David nin marahay na halimbawa sa bagay na ini. Paagi sa awit, nakimaherak sia ki Jehova: “Hinanyoga, O Dios, an sakuyang agrangay. Dangoga an sakuyang pamibi. . . . Mag-aawit ako sa saimong ngaran sagkod lamang, tangani na maotob ko an sakong mga promesa aroaldaw.”—Salmo 61:1, 8.

An Pag-otob kan Satong mga Panuga Nagpaparigon nin Tiwala

Kun an mga panuga sa Dios dai maninigong pagbasangbasangon, totoo man iyan kun manongod sa mga panuga ta sa mga kapwa Kristiano. Dai niato maninigong trataron si Jehova sa laen na paagi sa pagtratar niato sa satong mga tugang. (Ikomparar an 1 Juan 4:20.) Sa saiyang Sermon sa Bukid, si Jesus nagsabi: “Pabayaan sana na an saindong tataramon na Iyo mangahulogan nin Iyo, an saindong Dai, Dai.” (Mateo 5:37) An pagsierto na an satong tataramon pirmeng mapagtitiwalaan sarong paagi tanganing ‘gibohan nin marahay an mga may relasyon sa sato sa pagtubod.’ (Galacia 6:10) An lambang panuga na inootob niato nagpaparigon nin tiwala.

An danyos na nagigibo kan dai pag-otob sa panuga sa parate nagdadakula kun kalabot an kuarta. Baga man sa pagbayad nin utang, pagserbisyo, o pag-otob nin kontrata sa negosyo, maninigong otobon nin sarong Kristiano an saiyang panuga. Ini nagpapaogma sa Dios asin pinaririgon an tiwala kan saro sa saro na kaipuhan na marhay tanganing an magturugang “mag-ontok na sararo.”—Salmo 133:1.

Minsan siring, an dai pakaotob kan mga kontrata puedeng makadanyar sa kongregasyon saka sa mga indibiduwal na direktang kalabot. An sarong nagbibiaheng paraataman nagkomento: “An mga pagpasuruhay sa negosyo—na pirmeng bunga nin mga kontrata na kisuerra sarong lado an naniniwalang inagrabiado—sa parate nahahayag sa gabos. Bilang resulta, an mga tugang nagkakampikampi, asin puedeng magkaigwa nin tension sa laog kan Kingdom Hall.” Importante nanggad na maingat na estudyaran an ano man na kontrata na ginigibo ta asin ibugtak sa kasuratan an mga bagay!a

Maninigo man na magin maingat kun nagpapabakal nin mga produkto na halangkaw an presyo o nagrerekomendar nin mga pangangapital, nangorogna kun kita personal na maganansia sa transaksion. Siring man, kaipuhan na magin maingat na marhay na dai pasobrahan an mga pakinabang kan nagkapirang panienda o mga produkto na para sa salud o manuga nin harayo sa katunayan na pakinabang sa mga pangangapital. An pagkamoot maninigong pahiroon an mga Kristiano na ipaliwanag nin biyo an ano man na peligrong kalabot. (Roma 12:10) Mantang an kadaklan na tugang limitado an eksperyensia sa negosyo, tibaad magtiwala sinda sa satong hatol huli sana ta kita may relasyon sa sainda sa pagtubod. Makaturotriste nanggad an mangyayari kun maraot an pagtitiwalang ini!

Bilang mga Kristiano, dai niato puedeng aprobaran an mga gibohon sa negosyo na madaya o na dai iniintindi an lehitimong mga interes nin iba. (Efeso 2:2, 3; Hebreo 13:18) Tanganing kamtan an pabor ni Jehova bilang ‘mga bisita sa saiyang tolda,’ kita dapat na mapagtitiwalaan. ‘Dawa kun kita nanumpa sa maraot para sa sato man sana, dai kita nagliliwat.’—Salmo 15:1, 4.

Si Hokom Jefte kan Israel nanumpa na kun tatawan sia nin Dios nin kapangganahan tumang sa mga Amonita, itatao nia ki Jehova bilang dolot na tinotong an enot na magsabat sa saiya pagpuli nia hale sa ralaban. An sarong iyan luminuwas na iyo an solamenteng aki ni Jefte, alagad dai nia rinebokar an saiyang tataramon. Odok sa pusong minaoyon an saiyang aking babae, idinolot nia sia para sa permanenteng paglilingkod sa santuaryo nin Dios—sarong atang na daing duda na makolog asin masakripisyo sa dakol na paagi.—Hokom 11:30-40.

An mga paraataman sa kongregasyon nangorognang may paninimbagan na magsusog sa saindang mga pakipagkontrata. Segun sa 1 Timoteo 3:2, an sarong paraataman maninigong “dai nin kanawayan.” Ini an traduksion nin sarong termino sa Griego na nangangahulogan “dai maaakusaran, daing kasagwean, dai masasagwe.” Iyan “nagpaparisa na an tawong siring bako sanang may marahay na reputasyon, kundi sia maninigo para dian.” (A Linguistic Key to the Greek New Testament) Mantang an paraataman kaipuhan na dai nin kanawayan, an saiyang mga panuga maninigo na pirmeng masasarigan.

Ibang mga Paagi sa Pag-otob kan Satong mga Panuga

Paano niato maninigong mansayon an satong mga panuga sa mga bakong Kristiano? “Pasiranga an saindong liwanag sa atubangan nin mga tawo,” an sabi ni Jesus, “tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Paagi sa pagpatunay na inootob niato an satong panuga, tibaad maakit niato an iba sa satong Kristianong mensahe. Sa ibong kan pagruro sa mga pamantayan nin pagkaonesto sa bilog na kinaban, pinahahalagahan pa man giraray kan kadaklan na tawo an integridad. An pag-otob kan satong mga panuga sarong paagi na ipaheling an pagkamoot sa Dios asin sa kapwa asin maakit an mga namomoot sa katanosan.—Mateo 22:36-39; Roma 15:2.

Durante kan saindang 1998 na taon nin paglilingkod, an Mga Saksi ni Jehova naggamit nin labing sarong bilyon na oras sa pagbalangibog kan maogmang bareta kan Kahadean nin Dios sa publiko. (Mateo 24:14) An nagkapira kan paghuhulit na ini tibaad dai dinangog kun dai niato inotob an satong panuga sa mga transaksion sa negosyo o sa ibang mga bagay. Mantang irinerepresentar niato an Dios nin katotoohan, tama sanang laoman kita kan mga tawo na gumawe na may pagkaonesto. Paagi sa pagigin mapagtitiwalaan asin onesto, “sinasamnohan niato an katokdoan kan satong Paraligtas, an Dios, sa gabos na bagay.”—Tito 2:10.

Sa satong ministeryo, kita may mga oportunidad na otobon an satong panuga kun kita nagdadalaw liwat sa mga nagpapahayag nin interes sa mensahe kan Kahadean. Kun sinasabi ta na kita mabalik, maninigo na gibohon ta iyan. An pagbalik siring sa satong ipinanuga sarong paagi na “dai ipanguri an marahay sa mga nanonongdan kaiyan.” (Talinhaga 3:27) Ipinaliwanag nin sarong tugang na babae an bagay na iyan sa paaging ini: “Sa nagkapirang pangyayari, nanompongan ko an interesadong mga indibiduwal na nagsabi na may Saksi na nanuga na mabalik alagad dai iyan ginibo. Siempre, aram ko na tibaad mayo an kagharong o nanongod na imposible an pagbalik. Alagad habo ko na sabihon iyan sa sako nin siisay man, kaya ginigibo ko an sakong pinakamakakaya na matagboan liwat na nasa harong an tawo. Naniniwala ako na kun madesganar sa sako an siisay man, iyan matao nin maraot na impresyon ki Jehova asin sa sakong mga tugang sa kabilogan.”

Sa nagkapirang pangyayari, tibaad kita daing ganang bumalik huli ta kita nagkokonklusyon na an tawo bako man talagang interesado. An iyo man sanang tugang na babae nagpapaliwanag: “Dai ko hinihingoang husgaran kun gurano kadakula an interes. Tinokdoan ako kan sadiri kong eksperyensia na an enot na mga impresyon sa parate sala. Kaya hinihingoa kong magin positibo, na minamansay an lambang tawo bilang potensial na tugang na lalaki o babae.”

Sa Kristianong ministeryo asin sa dakol na iba pang langtad, kaipuhan na ipaheling niato na mapaniniwalaan an satong tataramon. Totoo, may mga bagay na mas madaling sabihon kisa gibohon. An madonong na tawo nagsabi: “An dakulang kaburunyogan nin tawo ibabalangibog balang saro an saiyang sadiring mamomoton na kabootan, alagad siisay an makanonompong nin tawong fiel?” (Talinhaga 20:6) May determinasyon, puede kitang magin fiel asin totoo sa satong tataramon.

Nagsosopay na Bendisyon Hale sa Dios

An tuyong panunuga nin basang sana madaya asin puedeng iagid sa pag-isyu nin tseke na mayo nin pondo sa bangko na nagpapagin balido kaiyan. Alagad kanigoan na mga balos asin bendisyon an inaako niato sa pag-otob kan satong mga panuga! An sarong bendisyon sa pagigin mapagtitiwalaan iyo an pagkaigwa nin marahay na konsensia. (Ikomparar an Gibo 24:16.) Imbes kan nakakokonsumir na pakamate nin pagsagwe sa sadiri, kita may satispaksion asin katoninongan. Dugang pa, paagi sa pag-otob kan satong panuga, kita nagkokontribwir sa pagkasararo kan kongregasyon, na minadepende sa tiwala kan saro sa saro. An satong “pagtaram nin totoo” nagrerekomendar man sa sato bilang mga ministro kan Dios nin katotoohan.—2 Corinto 6:3, 4, 7.

Si Jehova totoo sa saiyang tataramon, asin ikinaoongis nia an “putikon na dila.” (Talinhaga 6:16, 17) Paagi sa pag-arog niato sa satong langitnon na Ama, nagigin mas dayupot kita sa saiya. Kun siring, daing duwa-duwa na kita may marahay na dahelan sa pag-otob kan satong mga panuga.

[Nota sa Ibaba]

[Mga retrato sa pahina 10]

Inotob ni Jefte an saiyang panuga, dawa ngani an paggibo kaiyan makolog

[Mga retrato sa pahina 11]

Kun kamo nanuga na mabalik, mag-andam na marhay na gibohon iyan