Pakanood kan Nangongorog na Dalan nin Pagkamoot

Kosovo, Lebanon, asin Irlandia. An mga ngaran na ini naglataw nin parate sa mga bareta sa dai pa sana nahahaloy na mga taon. Ipinasasabong kaiyan sa isip nin mga tawo an mga eksena nin pagpabolos nin dugo, pambobomba, asin paggadan. Siempre, bakong bago an madahas na mga iriwal na causa kan pagkakalaen sa relihion, rasa, etniko, o iba pa. Sa katunayan, an mga pahina kan kasaysayan pano kaiyan, asin iyan nagbunga nin dai mabilang na pagsakit sa katawohan.

MANTANG naheheling na igwa nin mga guerra sa bilog na kasaysayan, an dakol nagkonklusyon na an mga guerra talagang dai malilikayan asin na natural para sa mga tawo na maongis sa lambang saro. Minsan siring, an siring na mga punto de vista biyong sarongat sa itinotokdo kan Tataramon nin Dios, an Biblia. An Kasuratan nagpapahayag na dai mapagdududahan: “An dai namomoot dai nakakamidbid sa Dios, huli ta an Dios pagkamoot.” (1 Juan 4:8) Malinaw na gusto kan Kaglalang na magkaminorootmootan an mga tawo.

Ihinahayag man kan Biblia na an tawo linalang sa ladawan nin Dios. (Genesis 1:26, 27) Nangangahulogan ini na an katawohan tinawan kan kakayahan na ipabanaag an mga kualidad nin Dios, na an pinakaprominente sa mga iyan iyo an pagkamoot. Mantang ini an situwasyon, taano ta nagkulang na marhay an mga tawo na magpaheling nin pagkamoot sa lambang saro sa bilog na kasaysayan? Sa giraray, an Biblia nagtatao nin pakarorop. Huli ta an enot na mag-agom na tawo, si Adan asin Eva, nagrebelde tumang sa Dios asin nahulog sa kasalan. Bilang resulta, an gabos na aki ninda nagmana nin kasalan asin pagkabakong sangkap. An Roma 3:23 nagpapaliwanag: “An gabos nagkasala asin nagkulang sa kamurawayan nin Dios.” An satong tao nin Dios na abilidad na mamoot rinaot kan satong minanang kasalan asin pagkabakong sangkap. Nangangahulogan daw ini na an mga tawo dai na puedeng magkaminorootmootan? Igwa pa daw nin paglaom na kita magkakamit pa nin matoninong, mamomoton na relasyon sa satong mga kapwa tawo?

Dapat Tang Manodan na Kamotan an Dios

Aram ni Jehova Dios na sa ibong kan gabos, kaya pa kan katawohan na magpaheling nin pagkamoot. Iyan an dahelan kun taano ta hinahagad nia sa gabos na gustong paogmahon sia na magpaheling nin pagkamoot sa pinakamakakaya ninda. An kahagadan na ini lininaw kan Aki nin Dios, si Jesu-Cristo, kan hagadan sia na sabihon an nakalalabi sa gabos na togon sa Ley na itinao sa Israel. Sinabi nia: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakalalabi sa gabos asin enot na togon.” Dangan idinugang nia: “An ikaduwa, na arog kaini, iyo ini, ‘Kamotan mo an saimong kataed nin siring sa saimo man sana.’ Sa duwang togon na ini nasasarig an bilog na Ley.”—Mateo 22:37-40.

Minsan siring, an dakol na tawo nagsasaboot na masakiton na kamotan an saro na dai ninda naheheling, asin kita na mga tawo dai puedeng maheling si Jehova Dios huli ta sia sarong Espiritu. (Juan 4:24) Sa ibong kaiyan, kita naaapektaran aroaldaw kan ginigibo nin Dios, mantang kita gabos nakadepende sa dakol na marahay na bagay na linalang nia para sa satong kapakinabangan. Itinokdo ni apostol Pablo an bagay na ini kan sabihon nia: “Dai [nin Dios] pinabayaan an saiyang sadiri na dai nin saksi sa bagay na sia guminibo nin marahay, na tinatawan kamo nin oran hale sa langit asin mabungang mga panahon, na biyong binabasog an saindong mga puso nin kakanon asin kaogmahan.”—Gibo 14:17.

Dawa ngani nakikinabang an gabos sa mga probisyon kan Kaglalang sa manlaenlaen na paagi, medyo kadikit an nagpapasalamat sa saiya o napahihiro na magpasalamat sa saiya. Sa siring, kaipuhan tang repasohon an gabos na marahay na bagay na ginibo sa sato nin Dios asin horophoropon an makangangalas na mga kualidad na nakaiimpluwensia sa gabos na ginigibo nia. An paggibo kaiyan maninigong magpangyari sa sato na mamansayan an nakapupukaw nin hararom na paggalang na kadonongan asin kapangyarihan kan satong Kaharohalangkaweng Kaglalang. (Isaias 45:18) Orog sa gabos, iyan maninigong makatabang sa sato na maheling na kanigoan kamamomoton na Dios sia, sa bagay na bako sanang tinawan nia kita nin buhay kundi pinagin posible man na kita magkamit nin dakol na kasiraman sa pamumuhay.

Halimbawa, isip-isipa an daing katapusan na pagkalaenlaen nin magagayon na burak na linalang nin Dios digdi sa daga. Kanigoan kamakangangalas para sa sato na tinawan man nia kita kan kakayahan na maheling asin makakua nin dakulang kaogmahan sa magayon na mga bagay na ini! Siring man, an Dios nagtao kan gabos na klase nin masustansiang kakanon para susteniran kita. Kanigoan kan saiyang pagkamaginirumdom na linalang man nia sa sato an sentido nin pangnamit tanganing maeksperyensiahan ta an siring na kagayagayahan sa pagkakan! Bako daw na ini malinaw na mga prueba na an Dios talagang namomoot sa sato asin nasa isip nia an satong pinakaikararahay?—Salmo 145:16, 17; Isaias 42:5, 8.

Apuera kan paghayag kan saiyang sadiri sa sato paagi sa “libro nin naturalesa,” an Kaglalang, paagi sa saiyang Tataramon, an Biblia, ipinaheheling sa sato kun anong klaseng Dios sia. Ini huli ta nakatala sa Biblia an dakol na mamomoton na bagay na ginibo ni Jehova Dios kan nakaagi asin an balakid na bendisyon na saiyang ipinanunuga na itatao sa katawohan sa haraning ngapit. (Genesis 22:17, 18; Exodo 3:17; Salmo 72:6-16; Kapahayagan 21:4, 5) Orog sa gabos, ihinahayag kan Biblia sa sato an pinakadakulang kapahayagan kan pagkamoot nin Dios sa katawohan—an pagtao kan saiyang bugtong na Aki na magin satong Parabalukat tanganing kita patalingkason sa kaoripnan sa kasalan asin kagadanan. (Roma 5:8) Tunay nanggad, mientras na nagdadakula an satong nanonodan manongod sa satong mamomoton na Kaglalang, orog kitang napahihiro na kamotan sia sa satong puso.

Pakanood na Kamotan an Satong mga Kapwa Tawo

Siring kan sinabi ni Jesus, dugang pa sa pagkamoot sa Dios sa bilog niatong puso, kalag, asin isip, maninigo niatong kamotan an satong kataed na siring sa sato man sana. Sa katunayan, an pagkamoot sa Dios inoobligar kita na kamotan an satong mga kapwa tawo. Ipinaliwanag ni apostol Juan: “Mga namomotan, kun siring kaini an pagkamoot sa sato nin Dios, kun siring kita mismo nasa irarom nin obligasyon na magkaminorootmootan.” Idinoon pa nia: “Kun an siisay man nagsasabi: ‘Namomoot ako sa Dios,’ pero naoongis sia sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai makahihimong mamoot sa Dios, na dai nia naheheling. Asin kita igwa kan togon na ini hale sa saiya, na an namomoot sa Dios maninigo man na mamoot sa saiyang tugang.”—1 Juan 4:11, 20, 21.

Kita nabubuhay ngonyan sa sarong kinaban na an kadaklan na tawo nagpapaheling nin ako ngunang aktitud, mantang “mga mamomoton sa sainda man sana,” siring kan ihinula sa Biblia. (2 Timoteo 3:2) Kun siring, kun gusto niatong manodan an nangongorog na dalan nin pagkamoot, kita maninigong odok na maghingoang liwaton an satong isip asin arogon an satong mamomoton na Kaglalang, imbes na sunodon an paslong mga dalan nin tawo sa pankagabsan. (Roma 12:2; Efeso 5:1) An Dios “maboot [dawa] sa mga daing utang na boot asin maraot,” asin “pinasisirang nia an saiyang aldaw sa maraot asin sa marahay asin pinapaoranan nia an matanos asin bakong matanos.” Mantang an satong langitnon na Ama nagtao nin siring na kahangahangang halimbawa para sa sato, kita maninigong magmaigot na magin maboot asin matinabang sa gabos. Sa paggibo kaiyan, mapatutunayan niato an satong sadiri na ‘mga aki kan satong mamomoton na langitnon na Ama.’—Lucas 6:35; Mateo 5:45.

Kun beses an siring na mamomoton na mga gibo nagreresulta na matabangan an mga tawo na magin mga parasamba kan tunay na Dios. Kaidtong nagkapirang taon na an nakaagi an sarong misis sa harong na saro sa Mga Saksi ni Jehova naghingoang ihiras an mensahe sa Biblia sa saiyang kataed, tangani sanang biyong sayumahan. Minsan siring, dai sia pinanluyahan nin boot huli sa reaksion na iyan. Imbes, sia nagpadagos na magpaheling nin kabootan asin naghingoang magin matinabang sa kataed na iyan. Sarong beses tinabangan nia an kataed sa pagbalyo sa ibang harong. May pangyayari pa na iinareglo nia na may mag-iba sa kataed pasiring sa aeropuerto tanganing tagboon an mga paryente kaini. Paghaloyhaloy, an kataed nag-ako nin pag-adal sa Biblia asin sa kahurihurihi nagin maigot na Kristiano sa ibong kan grabeng marhay na paglamag kan saiyang agom na lalaki. Iyo, an mga kapahayagan na idto nin pagkamoot nagbugtak nin basehan para sa daing katapusan na mga bendisyon.

Kun kita sadiosan manongod dian, aadmitiron niato na kita namomotan nin Dios bakong huli ta kita kadakol nin kahangahangang kualidad. Al kontraryo, namomotan nia kita dawa ngani dakol kitang sala asin pagkukulang. Huli kaiyan, maninigo man na kita makanood na kamotan an satong mga kapwa tawo sa ibong kan saindang dakol na depekto. Kun sasanayon niato an satong sadiri na mansayon asin apresyaron an marahay na mga kualidad kan iba imbes na hanapon an saindang mga sala, manonompongan niato na mas madali na kamotan sinda. An pagmate niato sa sainda puedeng makalampas sa pagkamoot na pinahihiro nin prinsipyo asin kaiba an mainit na pagkamuya asin maboot na kapadangatan na nasa dayupot na magkakatood.

Pagpatalubo kan Saindong Pagkamoot

An pagkamoot asin pagkakatood kaipuhan na padakulaon asin kultibaron, asin kabilang sa mahalagang marhay na mga sangkap kaini iyo an sinseridad asin pagkasadiosan. An nagkapira hinihingoang itago an saindang mga pagkukulang tanganing magkaigwa nin paborableng impresyon sa mga tawo na gusto nindang amigohon. Minsan siring, an siring na paggawe sa parate nagkakaigwa nin maraot na resulta, mantang pag-abot nin panahon naaaraman nin iba an mga katotoohan asin minarayo huli sa siring na pandadaya. Kun siring, dai kita maninigong matakot na mamidbid kan iba kun siisay talaga kita—dawa ngani igwa kita nin mga pagkukulang na pinagmamaigotan niatong daogon. Ini tibaad makatabang na maestablisar an pakikikatood sa sainda.

Halimbawa, an sarong may edad na babaeng Saksi sa sarong kongregasyon sa Harayong Sirangan hababaon an inadalan. Pero dai nia noarin man hinihingoang itago an katotoohan na iyan sa iba. Halimbawa, prangka niang inaadmitir na dai nia kayang ipaheling sa iba kun paano patutunayan basado sa mga hula sa Biblia asin kasaysayan na an Panahon kan mga Hentil natapos kan 1914.a Minsan siring, sia nagtatao nin marahay na halimbawa sa kaigotan sa ministeryo, saka sa pagkamoot asin pagigin buka an palad sa mga tugang, kaya sia may kapadangatan na inaapod na mutya kan kongregasyon.

Sa nagkapirang kultura, an pagpaheling nin kapadangatan sa publiko minumusdotan; an mga tawo tinokdoan na ipaheling an magalang na pormalidad sa saindang pagtratar sa iba. Mantang pirmeng marahay na magin magalang asin makonsiderar, dai niato maninigong togotan an satong pagigin magalang na pogolan o itago an satong namamatean sa iba. Si Jehova dai nasopog na akoon an saiyang kapadangatan sa saiyang piniling banwaan, an suanoy na Israel, na sinasabi sa sainda: “Namotan taka nin pagkamoot na sagkod sa panahon na daing katapusan.” (Jeremias 31:3) Kaagid kaiyan, si apostol Pablo sinabihan an saiyang mga kapagtubod sa Tesalonica: “Huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:8) Kaya mantang kita naghihingoa na kultibaron an tunay na kapadangatan sa mga kapwa tawo, orog na kaoyon kan katokdoan kan Biblia na pabayaan an siring na mga pagmate na ipahayag nin natural imbes na pogolan.

Kaipuhan an Nagpapadagos na Paghihingoa

An pakanood na mamatean asin ipaheling an pagkamoot sa iba nagpapadagos na proseso. An paggibo kaiyan nangangaipo nin dakulang paghihingoa sa kabtang niato huli ta kaipuhan niatong magmaigot na daogon an sadiri niatong pagkabakong sangkap saka sa pagkontra sa makosog na impluwensia kan kinaban na ini na dai nin pagkamoot. Minsan siring, an nagsosopay na balos na bunga kaini nagpapangyari na iyan magin kapakipakinabang.—Mateo 24:12.

Dawa sa kinaban na ini na grabe an pagkabakong sangkap, puede kitang magkaigwa nin mas marahay na relasyon sa satong mga kapwa tawo, na nagbubunga nin orog na kagayagayahan, katoninongan, asin pagkakontento sa satong sadiri asin sa iba. Paagi sa paggibo kan paghihingoang iyan, mapatutunayan niato na angay an satong sadiri sa makangangalas na paglaom na mabuhay sagkod lamang sa bagong kinaban nin Dios. Orog sa gabos, paagi sa pakanood kan nangongorog na dalan nin pagkamoot, puede niatong makamtan an pag-oyon asin mga bendisyon kan satong mamomoton na Kaglalang, ngonyan asin sa panahon na daing sagkod!

[Nota sa Ibaba]

[Mga retrato sa pahina 10]

An Kristianong pagkamoot puedeng ipaheling paagi sa mga gibo nin kabootan

[Pasasalamat para sa pinagkuanan kan retrato sa pahina 8]

UN PHOTO 186226/M. Grafman