Mag-andam Para sa Milenyo na Mahalaga!
AN Sangribong Taon na Paghade ni Cristo matao nin dai mabilang na bendisyon sa pamilya nin tawo. Sa irarom kan mamomoton na paggiya ni Jesus, an katawohan hahaleon sa makamomondong marhay na kamugtakan kaiyan pasiring sa mamuraway na pagkasangkap. Isipa an magigin kahulogan kaiyan para sa saindo. Marahayon na salud! Imahinara na kamo minabangon kada aga na mas marahay an pagmate kisa kan nakaaging aldaw. Minilyon na lalaki, babae, asin aki an nag-aantisipar na mamuhay sa maogmang panahon na iyan. Linalaoman ninda iyan, ipinamimibi iyan. An saindang pag-adal sa Biblia nakakombensir sa sainda na an mga bendisyon na ini puede nindang kamtan.
Minsan siring, bago nia ponan an saiyang Sangribong Taon na Paghade, kaipuhan na haleon ni Jesu-Cristo sa daga an gabos na nagkokontra sa saiyang pamamahala. Gigibohon nia ini sa ralaban na inapod sa Biblia na Armagedon. (Kapahayagan 16:16) An tunay na mga Kristiano sa daga dai makikilaban sa ralaban na iyan. Iyan ralaban nin Dios. Asin bako iyan limitado sa sarong geograpikong lugar. Sinasabi kan Biblia na iyan makaaabot sagkod sa pinakaharayong mga lugar sa daga. An mga kaiwal kan pamamahala ni Cristo gagadanon. Mayo nin makadudulag sa sainda!—Jeremias 25:33.
Dangan aatubangon ni Jesus si Satanas na Diablo asin an saiyang mga demonyo. Imahinara an eksena, siring kan maheling iyan kan kagsurat kan librong Kapahayagan: “Naheling ko an sarong anghel [si Jesu-Cristo] na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon.” (Kapahayagan 20:1, 2) Sa huri, si Satanas asin an saiyang mga demonyo lalaglagon sagkod lamang.—Mateo 25:41.
“An sarong dakulang kadaklan, na dai nin siisay man na makabibilang,” makaliligtas sa Armagedon. (Kapahayagan 7:9) Gigiyahan ni Cristo an mga ini na makinabang nin lubos sa “mga burabod kan tubig nin buhay,” kun paanong ginigiyahan nin pastor an saiyang mga karnero sa tubig na nagliligtas-buhay. (Kapahayagan 7:17) Dai naolang ni Satanas asin kan saiyang mga demonyo sa saindang espirituwal na pag-oswag, an mga nakaligtas na ini sa Armagedon luway-luway na matatabangan na daogon an saindang makasalan na mga tendensia sagkod na sa katapustapusi kamtan ninda an pagkasangkap!
Sakop kan mamomoton na pamamahala ni Cristo, an mga kamugtakan nin pamumuhay dagos-dagos na marahay. Hahaleon ni Jehova Dios, paagi ki Jesu-Cristo, an gabos na causa nin kolog asin pagkamondo. “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:4) Kinompleto ni propeta Isaias an ladawan, na sinasabi: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 35:5, 6) Asin an mga gadan, “an darakula asin saradit,” mabubuhay liwat na may esperansang dai na noarin man magadan giraray!—Kapahayagan 20:12.
Dawa ngonyan, an “dakulang kadaklan” na makaliligtas sa Armagedon tinitipon na. Sinda nag-aandam para sa Milenyal na Paghade ni Cristo. Minsan ngani dai ninda aram kun noarin mapoon an paghadeng iyan, sinda kompiado na sa itinalaan na panahon nin Dios, iyan mapoon. Puede kamong mapabilang sa sainda, alagad kaipuhan na mag-andam man kamo—bakong paagi sa pagpabakal kan saindong mga rogaring asin pagbiahe pasiring sa sarong geograpikong lugar, kundi paagi sa paglaog sa isip nin tamang kaaraman dapit ki Jehova Dios asin sa saiyang mga katuyohan paagi sa pag-adal kan Biblia. Daing bayad o obligasyon, an Mga Saksi ni Jehova maogmang ipaheheling sa saindo kun paano an pag-adal kan Biblia puedeng pakinabangan nindo asin kan saindong pamilya. An mga kagpublikar kan magasin na ini maoogmang magtao nin dugang pang impormasyon.
[Kahon sa pahina 7]
An Sangribong Taon—Literal o Simboliko?
Mantang an kadaklan sa libro kan Biblia na Kapahayagan isinurat sa simbolikong pananaram, minalataw an hapot. Kumusta man an Sangribong Taon na Paghade ni Cristo na nasambitan sa Kapahayagan? Iyan daw literal o simbolikong peryodo?
Bastante an nagpaparisa na literal na sangribong taon an boot sabihon. Estudyare: Si apostol Pablo nagtataram manongod sa Sangribong Taon na Paghade ni Cristo, na durante kaiyan an katawohan hohokoman, bilang sarong aldaw. (Gibo 17:31; Kapahayagan 20:4) Si apostol Pedro nagsurat na an sarong aldaw (24 oras) ki Jehova garo sangribong taon. (2 Pedro 3:8) Iyan nagpapatotoo na an “aldaw” nin paghokom na ini literal na sangribong taon kalawig. Dugang pa, sa Kapahayagan 20:3, 5-7, mababasa niato an apat na laen-laen na pagsambit, bakong “nin sangribong taon” kundi ‘kan sangribong taon.’ Ini garo baga nagpaparisa nin sarong peryodo na may depinidong lawig.