Mga Hapot Hale sa mga Parabasa

Ano an pagmansay kan Mga Saksi ni Jehova sa pagboto?

Igwa nin malinaw na mga prinsipyo sa Biblia na nagpapangyari sa mga lingkod nin Dios na magkaigwa nin tamang pagmansay sa bagay na ini. Minsan siring, minalataw na mayo nin prinsipyo tumang sa pagboto mismo. Halimbawa, mayo nin rason kun taano an sarong junta directiva ta maninigong dai magboto tanganing makagibo nin mga desisyon na nakakaapektar sa saindang korporasyon. An mga kongregasyon kan Mga Saksi ni Jehova parateng naggigibo nin mga desisyon manongod sa oras nin mga pagtiripon asin paggamit kan pondo kan kongregasyon na pinaaagi sa pagboto paagi sa pag-itaas nin mga kamot.

Pero kumusta man an pagboto sa politikal na mga eleksion? Siempre, sa nagkapirang demokratikong nasyon, minaabot sa 50 porsiento kan populasyon an dai minaluwas tanganing bumoto sa aldaw nin eleksion. Kun dapit sa Mga Saksi ni Jehova, dai sinda nakikiaram sa diretso nin iba na bumoto; ni sa ano man na paagi nagkakampanya sinda tumang sa politikal na mga eleksion. Iginagalang ninda asin nakikikooperar sinda sa mga autoridad na inelehir sa siring na mga eleksion. (Roma 13:1-7) Mapadapit sa kun baga personal nindang iboboto an sarong nagdadalagan sa eleksion, an balang saro sa Mga Saksi ni Jehova nagdedesisyon basado sa saiyang konsensia na sinanay sa Biblia asin sa pakasabot sa paninimbagan nia sa Dios asin sa Estado. (Mateo 22:21; 1 Pedro 3:16) Sa paggibo kan personal na desisyon na ini, may mga kinokonsiderar an mga Saksi.

Enot, si Jesu-Cristo nagsabi dapit sa saiyang mga parasunod: “Sinda bakong kabtang kan kinaban, kun paanong ako bakong kabtang kan kinaban.” (Juan 17:14) Isinasaboot na gayo kan Mga Saksi ni Jehova an prinsipyong ini. Huling “bakong kabtang kan kinaban,” sinda neutral sa politikal na mga aktibidad kan kinaban.—Juan 18:36.

Ikaduwa, inapod ni apostol Pablo an saiyang sadiri na sarong “embahador” na irinerepresentar si Cristo sa mga tawo kaidtong saiyang kaaldawan. (Efeso 6:20; 2 Corinto 5:20) An Mga Saksi ni Jehova nagtutubod na si Cristo Jesus iyo ngonyan an nagtutukaw na Hade sa langitnon na Kahadean nin Dios, asin, siring sa mga embahador, dapat nindang ipaisi ini sa mga nasyon. (Mateo 24:14; Kapahayagan 11:15) An mga embahador linalaoman na magin neutral asin dai mag-entremeter sa panlaog na mga aktibidad kan nasyon na pinagsugoan sa sainda. Bilang mga representante kan langitnon na Kahadean nin Dios, an Mga Saksi ni Jehova nakakamate kan kaparehong obligasyon na dai makiaram sa politika kan mga nasyon na ineerokan ninda.

An ikatolong dapat konsideraron iyo na an mga may kabtang sa pagboto sa sarong tawo na makatukaw sa puesto puedeng magin responsable sa ginigibo nia. (Ikomparar an 1 Timoteo 5:22, The New English Bible.) Maninigong maingat na konsideraron kan mga Kristiano kun baga gusto nindang isaabaga an responsibilidad na iyan.

Ikaapat, dakula an pagpahalaga kan Mga Saksi ni Jehova sa Kristianong pagkasararo ninda. (Colosas 3:14) Kun an mga relihion nakikilabot sa politika, an resulta parateng pagkabaranga sa tahaw kan mga miembro ninda. Bilang pag-arog ki Jesu-Cristo, linilikayan kan Mga Saksi ni Jehova na maimbuelto sa politika asin sa siring mapagdanay an saindang Kristianong pagkasararo.—Mateo 12:25; Juan 6:15; 18:36, 37.

Ikalima asin pangultimo, huli sa dai ninda pakikilabot sa politika an Mga Saksi ni Jehova nagkakaigwa nin katalingkasan sa pagtaram na dolokon an mga tawo kan gabos na politikal na paniniwala tanganing ipaabot an mahalagang mensahe kan Kahadean.—Hebreo 10:35.

Huli kan Makakasuratan na mga prinsipyo na sinabi sa enotan, sa dakol na nasyon an Mga Saksi ni Jehova personal na nagdedesisyon na dai magboto sa politikal na mga eleksion, asin an saindang katalingkasan na gumibo kan desisyon na iyan suportado kan ley kan nasyon. Pero paano man kun hinahagad kan ley sa mga siudadano na magboto? Sa siring na kamugtakan, paninimbagan nin balang Saksi na gumibo nin sono sa konsensia, basado sa Biblia na desisyon manongod sa kun ano an gigibohon sa situwasyon na iyan. Kun an saro magdesisyon na dumuman sa presinto, desisyon nia iyan. Kun ano an ginigibo nia sa presinto nasa sainda na kan saiyang Kaglalang.

An luwas na Nobyembre 15, 1950 kan The Watchtower, sa pahina 445 asin 446, nagsabi: “Kun inoobligar ni Cesar an mga siudadano na bumoto . . . [an mga Saksi] puedeng magduman asin lumaog sa presinto. Digdi sinda hinahagadan na markahan an balota o isurat an paninindogan ninda. Ginigibo kan mga botante kun ano an gusto nindang gibohon sa saindang mga balota. Kaya digdi sa presensia nin Dios dapat na humiro an saiyang mga saksi kaoyon kan saiyang mga togon asin sono sa saindang pagtubod. Bako niamong responsibilidad na pagbotan sinda kan dapat na gibohon sa balota.”

Paano kun an daing pagtubod na agom nin sarong Kristiana mag-insistir na sia magduman tanganing bumoto? Bueno, sia sakop kan saiyang agom na lalaki, kun paanong an mga Kristiano sakop kan superyor na mga autoridad. (Efeso 5:22; 1 Pedro 2:13-17) Kun kuyogon nia an saiyang agom na lalaki asin magduman sia sa presinto, personal na desisyon nia iyan. Mayo nin siisay man na maninigong magkritika sa saiya.—Ikomparar an Roma 14:4.

Kumusta man sa nasyon na an pagboto dai iminamanda kan ley alagad makosog an pagkaanggot sa mga dai minaduman sa presinto—tibaad namemeligro sinda sa pisikal? O kumusta kun an mga indibiduwal, maski ngani bako man legal na obligadong bumoto, makuring pinapatawan nin penalidad minsan paano kun dai sinda minaduman sa presinto? Digdi asin sa kaagid na mga situwasyon, an Kristiano dapat na gumibo nin sadiri niang desisyon. “An lambang saro magpapasan kan saiyang sadiring pasan.”—Galacia 6:5.

Tibaad may mga tawo na nasisingkog kun naheheling ninda na durante nin eleksion sa saindang nasyon, an nagkapirang Saksi ni Jehova minaduman sa presinto asin an iba dai. Tibaad sabihon ninda, ‘An Mga Saksi ni Jehova bakong parareho.’ Pero maninigong maaraman kan mga tawo na sa arog kaining mga bagay na may labot sa indibiduwal na konsensia, an balang Kristiano kaipuhan na gumibo nin saiyang sadiring desisyon sa atubangan ni Jehova Dios.—Roma 14:12.

Ano man na personal na desisyon an gibohon kan Mga Saksi ni Jehova sa atubangan nin laen-laen na situwasyon, iniingatan nindang papagdanayon an saindang Kristianong neutralidad asin katalingkasan sa pagtaram. Sa gabos na bagay, sinda nagsasarig ki Jehova Dios na pakosogon sinda, tawan sinda nin kadonongan, asin tabangan sinda na malikayan na ikompromiso an saindang pagtubod sa ano man na paagi. Sa siring nagpapaheling sinda nin kompiansa sa mga tataramon kan salmista: “Ika an sakuyang kantil asin an sakuyang kuta; asin huli sa saimong ngaran gigiyahan mo ako asin iibanan mo ako.”—Salmo 31:3.