An Nagsosopay na Pagigin Buka an Palad Nagbubunga nin Kagayagayahan

BILANG sarong mamomoton na Kristianong paraataman, talagang nagmamakolog si apostol Pablo sa pinakaikararahay kan saiyang mga kapagtubod. (2 Corinto 11:28) Huli kaini, kaidtong mga kabangaan kan mga taon nin 50 kan enot na siglo kan satong Komun na Kapanahonan kan organisaron nia an sarong pangongolekta nin kuarta para sa dukhang mga Kristiano sa Judea, inaprobetsaran nia an oportunidad na magtokdo nin sarong mahalagang leksion manongod sa pagigin buka an palad. Idinoon ni Pablo na an maogmang pagtatao pinahahalagahan na marhay ni Jehova: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.”—2 Corinto 9:7.

Dukhang Marhay, Pero Matinao

An kadaklan na Kristiano kan enot na siglo bakong prominente sa sosyedad. Si Pablo nagkomento na sa tahaw ninda “bakong dakol na makapangyarihan.” Sinda an “mga maluya kan kinaban,” “an hamak na mga bagay sa kinaban.” (1 Corinto 1:26-28) Halimbawa, an mga Kristiano na nag-eerok sa Macedonia nasa “grabeng kadukhaan” asin “[na]sa irarom nin kasakitan.” Sa ibong kaiyan, an mapakumbabang mga nagtutubod na taga Macedonia na idto nakimaherak na tawan kan pribilehio na magkontribwir nin kuarta “sa ministeryong itinalaga para sa mga banal”; asin an itinao ninda, na pinatotoohan ni Pablo, “labi pa sa saindang talagang kakayahan”!—2 Corinto 8:1-4.

Pero, an siring na buka an palad na pagtatao dai hinusgaran paagi sa kantidad na itinao. Imbes, an motibasyon, pagigin andam na maghiras, asin disposisyon nin puso an mahalaga. Ipinarisa ni Pablo sa mga Kristiano sa Corinto na kalabot an isip sagkod puso sa pagtao nin kontribusyon. Sinabi nia: “Aram ko an pagigin andam kan saindong isip na iyo kong ipinananagsag sa mga taga Macedonia manongod sa saindo, . . . asin an saindong kaigotan nakapukaw sa kadaklan sa sainda.” ‘Napagdesisyonan ninda sa saindang puso’ na buka an palad na magtao.—2 Corinto 9:2, 7.

‘Pinukaw Sinda kan Saindang Espiritu’

Tibaad nasa isip ni apostol Pablo an mas naenot na halimbawa nin buka an palad na pagtao, na nangyari sa kaawagan labing 15 siglo bago kan saiyang panahon. An 12 tribo nin Israel pinatalingkas sa pagkaoripon sa Egipto. Sinda ngonyan nasa pamitisan kan Bukid nin Sinai, asin pinagbotan sinda ni Jehova na magtogdok nin sarong tabernakulo para sa pagsamba asin igibo iyan nin mga kasangkapan para sa pagsamba. Kakaipuhanon kaini an dakol na rekurso, asin an banwaan inimbitaran na magkontribwir.

Paano naghimate an mga Israelitang idto? “Sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo sa tolda nin katiriponan.” (Exodo 35:21) An banwaan daw nagtao nin dolot na buka an palad? Labi-labi nanggad! Ipinaabot ki Moises an minasunod na bareta: “An banwaan nagdadara nin labing gayo sa kinakaipuhan sa paglilingkod para sa gibohon na ipinagboot ni Jehova na gibohon.”—Exodo 36:5.

Ano an kamugtakan sa pinansial kan mga Israelita kan panahon na idto? Dai pa nahahaloy bago kaidto, sinda nagin miserableng mga oripon, ‘inaapi sa saindang pagpasan nin pagabat,’ may ‘mapait na pamumuhay,’ sarong buhay na puro “kasakitan.” (Exodo 1:11, 14; 3:7; 5:10-18) Kun siring, harayo an posibilidad na sinda asensado sa materyal. Totoo, binayaan kan mga Israelita an daga kan saindang kaoripnan na may kaibang mga aripompon asin baka. (Exodo 12:32) Alagad idto bakong bastante, huling dai nahaloy kan maghale sa Egipto, nagreklamo sinda na mayo sindang makakan na karne ni tinapay man.—Exodo 16:3.

Kun siring, saen kinua kan mga Israelita an mamahalon na mga bagay na ikinontribwir ninda sa pagtogdok kan tabernakulo? Sa dating mga among ninda, an mga Egipcio. An Biblia nagsasabi: “[An] mga aki ni . . . Israel naghagad . . . sa mga Egipcio nin mga bagay na pirak asin mga bagay na bulawan asin mga gubing. . . . Itinao kan [mga Egipcio] an mga hinagad.” An pagigin buka an palad na ini kan mga Egipcio bendisyon hale ki Jehova, bakong ki Faraon. An banal na rekord nagsasabi: “Tinawan ni Jehova nin biyaya an banwaan sa mga mata kan mga Egipcio, kaya itinao kan mga ini an mga hinagad.”—Exodo 12:35, 36.

Kun siring, imahinara an namatean kan mga Israelita. Dakol na kapag-arakian an nagdusa sa mapait na kaoripnan asin kadaihon. Ngonyan sinda talingkas na asin may mamahalon na materyal na mga rogaring. Ano daw an magigin saboot ninda sa pagbutas sa nagkapira kan mga rogaring na iyan? Tibaad nagsaboot sinda na inako ninda iyan bilang bayad asin may diretso sinda na itago iyan. Minsan siring, kan hagadan na magkontribwir sa pinansial tanganing suportaran an dalisay na pagsamba, ginibo ninda iyan—asin bakong magabat an boot o kuripot! Dai ninda nalingawan na si Jehova an nagpangyaring magin posible na sinda magkaigwa kan materyal na mga bagay na idto. Sa siring, sinda abundang nagtao kan saindang mga pirak asin bulawan patin ataman na mga hayop. Sinda “gusto an puso.” Sinda ‘pinahiro kan saindang puso.’ Sinda ‘pinukaw kan saindang espiritu.’ Tunay nanggad na idto “gikan sa boot na dolot ki Jehova.”—Exodo 25:1-9; 35:4-9, 20-29; 36:3-7.

Pagigin Andam na Magtao Ngonyan

An kantidad kan sarong kontribusyon dai pirmeng nagrerepresentar sa pagigin buka an palad kan nagtatao. Sarong beses si Jesu-Cristo nagmasid mantang an mga tawo naghoholog nin kuarta sa kaha nin kayamanan kan templo. An mayaman na mga indibiduwal nagholog nin dakol na sinsilyo, alagad naghanga si Jesus kan maheling nia an sarong dukhang balo na nagholog duman nin duwang saradit na sinsilyo na kadikiton an halaga. Sinabi nia: “An balong ini, minsan ngani dukha, nagholog nin labi ki kan ihinolog ninda gabos. . . . Nagholog [sia] gikan sa saiyang kadaihan kan gabos niang pagbuhay.”—Lucas 21:1-4; Marcos 12:41-44.

An komento ni Pablo sa mga taga Corinto kaoyon kan kaisipan na ini ni Jesus. Kun dapit sa pagtao nin mga kontribusyon sa pagtabang sa mga kapagtubod na dukha, si Pablo nagsabi: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” (2 Corinto 8:12) Iyo, an mga kontribusyon bakong para sa kompetisyon o komparasyon. An saro nagtatao segun sa kaya nia, asin si Jehova naoogma sa espiritu nin pagkamatinao.

Minsan ngani mayo nin puedeng magpayaman ki Jehova, na kagsadiri kan gabos na bagay, an pagkontribwir sarong pribilehio na nagtatao nin oportunidad sa mga nagsasamba na ipaheling an saindang pagkamoot sa saiya. (1 Cronica 29:14-17) An mga kontribusyon na itinatao, bakong para sa pagpasikat o huli sa ibang maimot na mga motibo, kundi may tamang aktitud asin tanganing paoswagon an tunay na pagsamba, nagbubunga nin kagayagayahan asin kadungan kaiyan nin bendisyon nin Dios. (Mateo 6:1-4) Si Jesus nagsabi: “Igwang orog na kaogmahan sa pagtao kisa pag-ako.” (Gibo 20:35) Magkakaigwa kita nin kahirasan sa kaogmahan na iyan paagi sa paggamit kan satong kosog sa paglilingkod ki Jehova asin paagi sa pagtagama nin ano man hale sa satong materyal na mga rogaring para sa pagsuportar sa tunay na pagsamba asin pagtabang sa mga angay sa tabang.—1 Corinto 16:1, 2.

An Nagsosopay na Pagigin Buka an Palad Ngonyan

Ngonyan, an Mga Saksi ni Jehova napapalukso an puso na maheling an pag-oswag sa paghuhulit kan “maogmang baretang ini kan kahadean” sa bilog na kinaban. (Mateo 24:14) Durante kan nakaaging dekada kan ika-20 siglo, labing 3,000,000 katawo an nabautismohan bilang simbolo kan saindang pagdusay ki Jehova Dios, asin mga 30,000 na bagong kongregasyon an nabilog. Iyo, un-tersio kan mga kongregasyon kan Mga Saksi ni Jehova na nag-eeksister ngonyan an nabilog durante kan nakaaging sampulong taon! An kadaklan sa pag-oswag na ini resulta kan kahigosan kan sinserong Kristianong mga lalaki asin babae na itinao an saindang panahon asin kosog tangani na dalawon an saindang mga kataed asin sabihon sa sainda an manongod sa mga katuyohan ni Jehova. An ibang pag-oswag resulta kan gibohon kan mga misyonero, na binayaan an saindang harong asin nagbiahe sa harayong kadagaan tanganing tumabang sa paghuhulit kan Kahadean duman. An pag-oswag nagresulta sa pagkaorganisar nin bagong mga sirkito, na kinaipuhan an pagnombrar nin bagong mga paraataman sa sirkito. Dugang pa, dakol pang Biblia an kinaipuhan na gagamiton sa paghuhulit asin personal na pag-adal. Kinaipuhan an dakol pang inimprentang babasahon. Asin sa dakol na nasyon, an mga edipisyo kan sangang opisina kinaipuhan na padakulaon o salidahan nin mas dakulang mga edipisyo. An gabos na ining nadagdag na mga pangangaipo ikinatao sa tabang kan boluntaryong mga kontribusyon hale sa banwaan ni Jehova.

Pangangaipo Para sa mga Kingdom Hall

An sarong lataw na pangangaipo na nagin risang-risa sa pagdakol nin bilang kan mga Saksi ni Jehova iyo an mga Kingdom Hall. Ihinayag kan ginibong mga surbey sa kapinonan kan taon 2000 an pangangaipo nin labing 11,000 na Kingdom Hall sa nagpoprogreso pa sanang mga nasyon, kun saen limitado an kuarta. Estudyare an Angola. Sa ibong kan dakol na taon nin guerra sibil, an nasyon na iyan nagkakaigwa nin promedyong taonan na pag-oswag na mga 10 porsiento sa kabilangan nin parabalangibog kan Kahadean. Minsan siring, an mayoriya kan 675 kongregasyon sa dakulang nasyon na ini sa Aprika nagtitiripon sa luwas. Igwa sana nin 22 na Kingdom Hall sa nasyon, asin sa mga ini 12 sana an may atop.

An kaagid na situwasyon nangyayari man sa Republika Demokratika nin Congo. Minsan ngani haros 300 an kongregasyon sa kabiserang siudad nin Kinshasa, sampulo sana an Kingdom Hall. Sa bilog na nasyon, an nasyon na ini nangangaipo sa presente nin labing 1,500 na Kingdom Hall. Huli sa marikas na pag-oswag sa mga nasyon sa Sirangan na Europa, an Rusya asin Ukraine nagbareta nin pinagsarong pangangaipo nin ginatos na Kingdom Hall. An marikas na pag-oswag sa Latin America heling-heling sa Brazil, kun saen igwa nin labing kabangang milyon na Saksi asin dakulang pangangaipo nin dakol pang Kingdom Hall.

Tanganing mataparan an mga pangangaipo sa siring na mga nasyon, an Mga Saksi ni Jehova iniimplementar an sarong pinarikas na programa para sa pagtogdok nin mga Kingdom Hall. An programa sinusustentohan paagi sa buka an palad na mga kontribusyon kan bilog na kinaban na kasararoan nin magturugang, tangani na dawa an pinakadukhang mga kongregasyon magkaigwa nin angay na sentro nin pagsamba.

Arog kaidtong panahon kan suanoy na Israel, dakol an mahahaman huli ta an sinserong mga Kristiano ‘tinatawan nin onra si Jehova paagi sa saindang mahahalagang bagay.’ (Talinhaga 3:9, 10) An Namamahalang Grupo kan Mga Saksi ni Jehova mawot na kuanon an oportunidad na ini tanganing ipahayag an hararom na pagpasalamat sa gabos na pinahiro kan saiyang puso na makikabtang sa gikan sa boot na pagtataong ini. Asin makakokompiar kita na an espiritu ni Jehova padagos na pahihiroon an mga puso kan saiyang banwaan na suportaran an mga pangangaipo kan danay na nag-ooswag na gibong pan-Kahadean.

Mantang nagpapadagos an paghiwas sa bilog na kinaban, kita logod padagos na humanap nin mga oportunidad na ipaheling an satong pagigin masinggaya asin andam na magtao kan satong kosog, satong panahon, asin satong mga rekurso. Asin maeksperyensiahan ta logod an tunay na kagayagayahan na ibinubunga kan siring na matinaong espiritu.

[Kahon sa pahina 29]

“Gamiton Nindo Iyan sa Madonong na Paagi!”

“Ako dies anyos. Ipinadadara ko saindo an kuartang ini tanganing makabakal kamo nin papel o ano man na bagay sa paggibo nin mga libro.”—Cindy.

“Gustohon kong ipadara sa saindo an kuartang ini para sa paggibo nin dakol pang libro para sa samo. Nadamot ko an kuartang ini sa pagtabang ko ki tatay. Kaya gamiton po nindo iyan sa madonong na paagi!”—Pam, siete anyos.

“Ikinamondo ko an manongod sa bagyo. Naglalaom ako na ligtas kamo. Ini [$2, E.U.] sana an kuarta ko sa sakong alkansia.”—Allison, kuatro anyos.

“Rudy an ngaran ko, asin ako 11 anyos. An tugang kong lalaki na si Ralph sais. Asin an tugang kong babae na si Judith duwa may kabanga. Kami nagdamot hale sa samong paragastos sa laog nin tolong bulan tanganing tabangan an satong mga tugang sa [lugar na nababanga huli sa guerra]. Nakadamot kami nin 20 dolyares na ipinadadara mi ngonyan.”

“Naheherak ako sa mga tugang na [binagyo]. Nakaganansia ako nin 17 dolyares sa pagtabang ko ki tatay. Dai ko ipinadadara an kuartang ini para sa ano man na partikular na bagay, kaya kamo na an bahala.”—Maclean, otso anyos.

[Kahon sa pahina 31]

Mga Paaging Pinipili nin Iba sa Pagtao nin

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Society’s Worldwide Work—Matthew 24:14.” Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina.

An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of the Philippines, P. O. Box 2044, 1060 Manila, o sa opisina kan Sosyedad na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA KONDISYONAL NA DONASYON

An kuarta puedeng itao sa Watch Tower Society paagi sa sarong espesyal na areglo na dian, kun magkaigwa nin personal na pangangaipo an nagdonar, an donasyon ibabalik sa saiya. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalo na kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower Society bilang direktang regalo.

Daga Asin Harong: An ikapapabakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Maninigong paaramon nin saro an Sosyedad bago ibalyo sa ngaran kan Sosyedad an ano man na daga asin harong.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Sosyedad puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaririsa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an Sosyedad paagi sa sarong klase nin pagplano para sa pag-abuloy, an Sosyedad nag-andam nin sarong brosyur sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur bilang simbag sa dakol na hapot na naresibi kan Sosyedad mapadapit sa mga regalo, testamento, asin kabuhayan na ipinagkatiwala. Igwa man iyan nin dagdag na makakatabang na impormasyon sa pagplano manongod sa daga, pinansial, asin buhis. Asin dinisenyo iyan tanganing tabangan an mga taga Estados Unidos na nagpaplanong magtao nin espesyal na regalo sa Sosyedad ngonyan o magwalat nin pamana pagkagadan sa pagpili kan pinakamarahay asin episienteng paagi na kinokonsiderar an saindang pampamilya asin personal na mga kamugtakan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Pakatapos na mabasa an brosyur asin magkonsulta sa Charitable Planning Office, dakol an nakatabang sa Sosyedad asin kadungan kaiyan, ginagamit sa pinakalubos na paagi an mga benepisyo sa buhis huli sa paggibo kaiyan. An Charitable Planning Office maninigong paaramon kan asin makaresibi nin kopya nin ano man na may koneksion na dokumento dapit sa arin man kan mga areglong ini. Kun kamo interesado sa arin man sa mga areglong ini sa pagplano para sa pag-abuloy, maninigo nindong paaramon an Charitable Planning Office, magsalang paagi sa pagsurat o telepono, sa adres na nakalista sa ibaba o sa opisina kan Sosyedad na naglilingkod sa saindong nasyon.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telepono: (845) 306-0707