“Rumani Kamo sa Dios”

“Rumani kamo sa Dios, asin sia marani sa saindo.”​—SANTIAGO 4:8.

1, 2. (a) Ano an parateng hinihingako nin mga tawo? (b) Anong sadol an itinao ni Santiago, asin taano ta kaipuhan iyan?

“NASA samo an Dios.” An mga tataramon na ini nakadekorar sa nasyonal na mga simbolo asin maski sa uniporme nin mga soldados. An “Sa Dios kami nananarig” inukit sa dai mabilang na mga sinsilyo asin kuartang papel sa presenteng panahon. Ordinaryo na para sa mga tawo na maghingakong igwa sinda nin dayupot na relasyon sa Dios. Pero dai daw kamo maoyon na an talagang pagkaigwa nin siring na relasyon nagkakaipo nin bako sanang pag-estorya kaiyan o pag-eksibir nin mga sarabihon?

² Ipinaheheling kan Biblia na puedeng magkaigwa nin relasyon sa Dios. Pero kaipuhan an paghihingoa. Maski an nagkapirang linahidan na Kristiano kan enot na siglo kinaipuhan na pakosogon an saindang relasyon ki Jehova Dios. Kinaipuhan kan Kristianong paraataman na si Santiago na patanidan an nagkapira mapadapit sa saindang makalaman na mga tendensia asin pagkawara nin espirituwal na kalinigan. Kaiba sa hatol na iyan, itinao nia an mapuersang sadol na ini: “Rumani kamo sa Dios, asin sia marani sa saindo.” (Santiago 4:1-12) Ano an boot sabihon ni Santiago kan “rumani”?

3, 4. (a) Ano an tibaad ikinapagirumdom sa nagkapirang nagbabasa kan surat ni Santiago kan enot na siglo kan pananaram na “rumani kamo sa Dios”? (b) Taano ta makaseseguro kita na posible an pagdolok sa Dios?

³ Naggamit si Santiago nin pananaram na pamilyar na kaidto sa dakol na mabasa kan saiyang surat. An Ley ni Moises nagtao sa mga saserdote nin espesipikong mga instruksion kun paano ‘marani,’ o madolok, ki Jehova para sa saiyang banwaan. (Exodo 19:22) Sa siring puedeng ikinapagirumdom sa mga nagbabasa kan surat ni Santiago na an pagdolok ki Jehova bakong bagay na dapat ipasipara sana. Si Jehova an kadarudakulaing dignitaryo sa uniberso.

⁴ Sa ibong na kampi, siring kan sabi nin sarong intelektuwal sa Biblia, “an sadol na ini [na nasa Santiago 4:8] naghahayag nin mapuersang optimismo.” Aram ni Santiago na si Jehova pirmeng mamomoton na nag-aagda sa bakong sangkap na mga tawo na rumani sa Saiya. (2 Cronica 15:2) An atang ni Jesus nagbukas kan dalan nin pagdolok ki Jehova sa mas lubos na paagi. (Efeso 3:​11, 12) Ngonyan, an dalan nin pagdolok sa Dios bukas na sa minilyon! Pero paano niato maaaprobetsaran an makangangalas na oportunidad na ini? Pag-oolayan niato sa halipot an tolong paagi na makararani kita ki Jehova Dios.

Padagos na ‘Maglaog sa Isip nin Kaaraman’ Dapit sa Dios

5, 6. Paano ipinaheheling kan halimbawa kan aking si Samuel kun ano an kalabot sa “paglaog sa isip nin kaaraman” dapit sa Dios?

⁵ Segun sa Juan 17:​3, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” An dakol na traduksion kan bersikulong ini igwa nin dikit na kalaenan sa New World Translation. Imbes na sabihon na “paglaog sa isip nin kaaraman” dapit sa Dios, basta sana tinatradusir ninda an berbo na “mamidbid” an Dios o “pakamidbid” sa Dios. Minsan siring, an nagkapirang intelektuwal nagsasabi na an kahulogan kan termino na ginamit sa orihinal na Griego orog pa dian an kalabot​—sarong nagpapadagos na proseso, na puede nganing magbunga nin dayupot na pakamidbid sa iba.

⁶ An dayupot na pakamidbid sa Dios bakong bagong ideya kan kaaldawan ni Jesus. Halimbawa, sa Hebreong Kasuratan mababasa niato na kan si Samuel aki pa, “dai pa nia midbid si Jehova.” (1 Samuel 3:7) An boot daw sabihon kaini kakadikit an aram ni Samuel manongod sa saiyang Dios? Dai. Seguradong dakol an itinokdo sa saiya kan saiyang mga magurang asin kan mga saserdote. Minsan siring, an termino sa Hebreo na ginamit sa bersikulong iyan, segun sa sarong intelektuwal, puedeng “gamiton para sa pinakadayupot na pakamidbid.” Dai pa midbid ni Samuel si Jehova sa dayupot na paagi, siring kan pakamidbid nia sa huri kan naglilingkod na sia bilang representante ni Jehova sa pagtaram. Mantang padagos na nagdadakula si Samuel, talagang namidbid nia si Jehova, na nagkaigwa nin dayupot na personal na relasyon sa saiya.​—1 Samuel 3:​19, 20.

7, 8. (a) Taano ta dai kita maninigong madesganar sa mas harararom na katokdoan sa Biblia? (b) Ano an nagkapirang harararom na katotoohan sa Tataramon nin Dios na marahay na pag-adalan niato?

⁷ Naglalaog daw kamo sa isip nin kaaraman dapit ki Jehova tanganing dayupot na mamidbid sia? Tanganing magibo iyan, kaipuhan na kamo ‘magkaigwa nin pagmawot’ sa espirituwal na kakanon na itinatao nin Dios. (1 Pedro 2:2) Dai kamo makontento sa pundamental na mga tokdo. Maghingoang ilaog sa isip an nagkapira sa mas hararom na katokdoan kan Biblia. (Hebreo 5:12-14) Nadedesganar daw kamo sa siring na mga katokdoan, na iniisip nindo na depisilon iyan? Kun iyo, girumdomon na si Jehova an “Kaharohalangkaweng Paratokdo.” (Isaias 30:20) Aram nia kun paano ipapasabot sa bakong sangkap na isip nin tawo an harararom na katotoohan. Asin puede niang bendisyonan an saindong sinserong mga paghihingoa na saboton an itinotokdo nia sa saindo.​—Salmo 25:4.

⁸ Taano ta dai siyasaton an saindong sadiri mapadapit sa nagkapira sa “hararom na mga bagay nin Dios”? (1 Corinto 2:10) Bako ining nakasusumong mga topiko na arog kan tibaad pinagdedebatehan nin mga teologo asin klerigo. Iyan buhay na mga doktrina na paagi kaiyan marororop niato an kawiliwiling mga bagay manongod sa isip asin puso kan satong mamomoton na Ama. Halimbawa, an pantubos, an “sagradong hilom,” asin an laen-laen na tipan na ginamit ni Jehova sa pagbendisyon sa saiyang banwaan asin sa pag-otob kan saiyang mga katuyohan​—an mga temang ini asin an dakol pang kaagid kaiyan nakaoogmang marhay asin nakakokontentong mga tema para sa personal na pagsiyasat asin pag-adal.​—1 Corinto 2:7.

9, 10. (a) Taano ta peligroso an kapalangkawan, asin ano an matabang sato na malikayan iyan? (b) Kun manongod sa kaaraman dapit ki Jehova, taano ta maninigo kitang magmaigot na magin mapakumbaba?

⁹ Mantang nadadagdagan an saindong kaaraman sa mas harararom na espirituwal na katotoohan, mag-ingat sa peligro na puedeng ibunga kan pagkaigwa nin kaaraman​—an kapalangkawan. (1 Corinto 8:1) Peligroso an kapalangkawan, huli ta isinisiblag kaiyan sa Dios an mga tawo. (Talinhaga 16:5; Santiago 4:6) Girumdomon, mayo nin siisay man na tawo an igwa nin dahelan na ipaghambog an saiyang kaaraman. Sa pag-ilustrar, estudyare an mga tataramon na ini hale sa introduksion nin sarong libro na nagsusurbey sa mas bago pa sanang mga pag-oswag nin tawo sa siensia: “Mientras na nagdadakol an naaaraman niato, orog man niatong narerealisar kun gurano kadikit an aram niato. . . . An gabos na naaaraman niato daing saysay kun ikokomparar sa dapat pa niatong maaraman.” Nakarerepresko an kapakumbabaan na iyan. Ngonyan, kun dapit sa nakalalabi sa gabos na kaaraman​—an kaaraman dapit ki Jehova Dios​—igwa ngani kita nin orog na dahelan na magdanay na mapakumbaba. Taano?

¹⁰ Mangnoha an nagkapirang sinasabi sa Biblia manongod ki Jehova: “Hararomon an saimong mga kaisipan.” (Salmo 92:5) “Dai nanggad ikasasaysay an . . . pakasabot” ni Jehova. (Salmo 147:5) “Dai marorop an . . . pakasabot” ni Jehova. (Isaias 40:28) “O an rarom kan mga kayamanan asin kadonongan patin kaaraman nin Dios!” (Roma 11:33) Malinaw nanggad, nungka niatong maaaraman an gabos na bagay manongod ki Jehova. (Eclesiastes 3:11) Tinokdoan nia kita nin dakol na makangangalas na bagay, alagad ta daing katapusan an kaaraman na puede niatong manodan. Bako daw na nakapupukaw sa boot sagkod nakakapakumbaba para sa sato an oportunidad na iyan? Kun siring, mantang kita nakakanood, pirme niatong gamiton an satong kaaraman bilang basehan sa pagrani ki Jehova asin sa pagtabang sa iba na gibohon iyan​—nungkang bilang paagi tanganing ilangkaw an satong sadiri sa iba.​—Mateo 23:12; Lucas 9:48.

Ipaheling an Saindong Pagkamoot ki Jehova

11, 12. (a) Ano an maninigong magin epekto sa sato kan kaaraman mapadapit ki Jehova na ilinalaog niato sa isip? (b) Ano an nagdedeterminar kun baga tunay an pagkamoot sa Dios nin sarong tawo?

¹¹ Angay nanggad, ipinaheling ni apostol Pablo an koneksion nin kaaraman asin pagkamoot. Sia nagsurat: “Ini an padagos kong ipinamimibi, na an saindong pagkamoot paorog nang paorog na magin abunda na may tamang kaaraman asin lubos na pakamansay.” (Filipos 1:9) Imbes na gibohon kitang maabhaw huli sa kapalangkawan, an kada mahalagang marhay na katotoohan na nanonodan niato manongod ki Jehova asin sa saiyang mga katuyohan maninigong magpaorog kan satong pagkamoot sa satong langitnon na Ama.

¹² Siempre, an dakol na naghihingakong namomoot sa Dios dai man talaga namomoot sa saiya. Tibaad sinsero an saindang makosog na mga saboot na nasa saindang puso. Marahay an saboot na iyan, kaomaw-omaw pa ngani, kun kaoyon sa tamang kaaraman. Alagad iyan mismo dai nangangahulogan nin tunay na pagkamoot sa Dios. Taano ta dai? Mangnoha kun paano tinatawan nin kahulogan kan Tataramon nin Dios an siring na pagkamoot: “Ini iyo an boot sabihon kan pagkamoot sa Dios, na kuyogon niato an saiyang mga togon.” (1 Juan 5:3) Kun siring, an pagkamoot ki Jehova tunay sana kun iyan ipinaheheling sa makinuyog na mga gibo.

13. Paano kita tatabangan kan diosnon na takot na ipaheling an satong pagkamoot ki Jehova?

¹³ An diosnon na takot matabang sa sato na kuyogon si Jehova. An hararom na may pagkangirhat na paggalang na ini ki Jehova naggigikan sa paglaog sa isip nin kaaraman dapit sa saiya, pakanood manongod sa saiyang daing katapusan na kabanalan, kamurawayan, kapangyarihan, hustisya, kadonongan, asin pagkamoot. An siring na pagkatakot importante sa pagrani sa saiya. Sa katunayan, mangnoha an sinasabi kan Salmo 25:14: “An pakikidayupot ki Jehova para sa mga natatakot sa saiya.” Kaya kun igwa kita nin tamang pagkatakot na mapaanggot an satuyang namomotan na langitnon na Ama, puede kitang rumani sa saiya. An diosnon na takot matabang sa sato na himateon an madonong na hatol na nakasurat sa Talinhaga 3:6: “Sa gabos mong dalan girumdomon mo sia, asin itatanos nia mismo an saimong mga dana.” Ano an boot sabihon kaiyan?

14, 15. (a) Ano an nagkapira sa mga desisyon na napapaatubang sato sa aroaldaw na buhay? (b) Paano kita makagigibo nin mga desisyon sa paagi na nagpapabanaag kan satong diosnon na takot?

¹⁴ Kaipuhan kamong gumibo nin mga desisyon aroaldaw, darakula sagkod saradit na desisyon. Halimbawa, anong klaseng pakikipag-olay an gigibohon nindo sa saindong mga katrabaho, kaeskuela, kataed? (Lucas 6:45) Hihigosan daw nindo an paggibo kan ipinapatrabaho sa saindo, o mahanap kamo nin mga paagi na makatapos sa kakadikit na paghihingoa? (Colosas 3:23) Orog daw kamong makikidayupot sa mga kadikit an o mayo nin pagkamoot ki Jehova, o hihingoahon daw nindo na pakosogon an saindong relasyon sa mga tawong espirituwal? (Talinhaga 13:20) Ano an gigibohon nindo, dawa sa sadit na mga paagi, tanganing suportaran an intereses kan Kahadean nin Dios? (Mateo 6:33) Kun an mga prinsipyo sa Kasuratan na arog kan kinotar digdi an naggigiya sa saindong desisyon sa aroaldaw, kun siring talagang ginigirumdom nindo si Jehova ‘sa gabos nindong dalan.’

¹⁵ Sa katunayan, sa lambang desisyon na ginigibo niato, an kaisipan na ini an maninigong gumiya sa sato: ‘Ano daw an boot ni Jehova na gibohon ko? Anong paghiro an magpapaogmang marhay sa saiya?’ (Talinhaga 27:11) An pagpaheling nin diosnon na takot sa paaging ini sarong marahayon na paagi nin pagpahayag nin pagkamoot ki Jehova. An diosnon na takot mapahiro man sa sato na magdanay na malinig​—sa espirituwal, moral, asin pisikal. Girumdomon, sa iyo man sanang bersikulo kun saen sinasadol ni Santiago an mga Kristiano na ‘rumani sa Dios,’ isinasadol man nia: “Hanawe nindo an saindong mga kamot, kamong mga parakasala, asin linigi nindo an saindong mga puso, kamo na mga nagduduwaduwa.”​—Santiago 4:8.

16. Paagi sa pagtao ki Jehova, ano an nungka niatong magigibo, pero ano an pirme niatong mapangganang magigibo?

¹⁶ Siempre, an kalabot sa pagpaheling kan satong pagkamoot ki Jehova bako sana nanggad na paglikay sa maraot. An pagkamoot nagpapahiro man sa sato na gibohon an tama. Halimbawa, paano niato binabalosan an dakulaon na pagigin buka kan palad ni Jehova? Si Santiago nagsurat: “An lambang marahay na balaog asin lambang sangkap na regalo hale sa itaas, huling iyan naghahale sa Ama kan langitnon na mga liwanag.” (Santiago 1:17) Totoo, kun nagtatao kita ki Jehova nin satong mga rogaring, dai niato sia pinapayaman. Sadiri na nia an gabos na yaon na rekurso. (Salmo 50:12) Asin kun nagtatao kita ki Jehova nin satong panahon asin kosog, dai niato itinatao an sarong pangangaipo na dai nia kayang panigoan. Dawa kun habo niatong maghulit kan maogmang bareta kan Kahadean nin Dios, puede niang pakurahawon an mga gapo! Kun siring, taano ta matao pa ki Jehova kan satong mga rekurso, panahon, asin kosog? Sa pangenot, huli ta paagi kaiyan ipinaheheling niato an satong pagkamoot sa saiya sa bilog niatong puso, kalag, isip, asin kosog.​—Marcos 12:​29, 30.

17. Ano an makamomotibar sa sato na maogmang magtao ki Jehova?

¹⁷ Kun kita nagtatao ki Jehova, maninigo niatong gibohon iyan na may kaogmahan, “huli ta an Dios namomoot sa maogmang paratao.” (2 Corinto 9:7) An prinsipyo na nakasurat sa Deuteronomio 16:17 makakatabang sa sato na magtao na maogma: “An regalo kan kamot nin lambang saro maninigong magin kasokol kan bendisyon ni Jehova na saimong Dios na itinao nia sa saimo.” Kun hinohorophorop niato kun gurano kabuka kan palad ni Jehova sa sato, nakakamate kita nin pagmawot na sueltong magtao sa saiya. An siring na pagtao nagpapagayagaya sa saiyang puso, kapareho nanggad kun paanong an sarong sadit na regalo hale sa sarong namomotan na aki nagpapaogmang marhay sa sarong magurang. An pagpaheling kan satong pagkamoot sa paaging ini matabang sa sato na rumani ki Jehova.

Pataluboon an Kadayupotan Paagi sa Pamibi

18. Taano ta kapakipakinabang na horophoropon kun paano mapaparahay an kualidad kan satong mga pamibi?

¹⁸ An satong pribadong mga pamibi nagtatao sa sato nin mahalagang marhay na oportunidad​—nin mga okasyon para sa dayupot, kompidensial na pakikipag-olay sa satong langitnon na Ama. (Filipos 4:6) Huling an pamibi sarong mahalagang marhay na paagi nin pagrani sa Dios, kapakipakinabang na pumondo nguna asin horophoropon an kualidad kan satong mga pamibi. Dai man kaipuhan na iyan magin magayonon an pagkasabi asin pagkaareglar, alagad maninigo iyan na magin sinserong mga kapahayagan na naggigikan sa puso. Paano niato mapaparahay an kualidad kan satong mga pamibi?

19, 20. Taano ta dapat maghorophorop bago kita mamibi, asin ano an nagkapirang angay na tema para sa siring na paghorophorop?

¹⁹ Puede niatong probaran na maghorophorop bago mamibi. Kun mahorophorop kita antes pa, magigibo niatong espesipiko asin makahulogan an satong mga pamibi, na sa siring malilikayan an pagparaorootro sa mga tataramon na garo baga pamilyar na asin basta na sana minasabong sa isip. (Talinhaga 15:​28, 29) Tibaad makatabang an pagpensar sa nagkapira sa mga temang sinambit ni Jesus sa saiyang modelong pamibi dangan paghorophorop kun paano an mga ini nakakaagid sa sato mismong mga kamugtakan. (Mateo 6:9-13) Halimbawa, puede niatong ihapot sa satong sadiri kun anong sadit na kabtang an linalaoman niatong gibohon sa pag-otob kan kabotan ni Jehova digdi sa daga. Puede daw niatong sabihon ki Jehova an satong pagmawot na magamit nia sagkod sa mapupuede asin hagadon an saiyang tabang sa paggibo kan ano man na mga asignasyon na itinao nia sa sato? Nagagabatan daw kita sa mga kahaditan manongod sa satong materyal na mga pangangaipo? Sa anong mga kasalan kita nangangaipo nin kapatawadan, asin kiisay kita kaipuhan na magin orog na mapagpatawad? Anong mga sugot an pinoproblema niato, asin narerealisar daw niato kun gurano niato kaipuhan na marhay an proteksion ni Jehova sa bagay na iyan?

²⁰ Saro pa, tibaad maisip niato an mga kamidbid niato na partikularmenteng nangangaipo kan tabang ni Jehova. (2 Corinto 1:11) Pero dai dapat malingawan an pagpasalamat. Kun kita mapondo nguna asin iisip-isipon iyan, seguradong makakaisip kita nin mga dahelan na pasalamatan si Jehova asin omawon sia kada aldaw huli sa saiyang abundang karahayan. (Deuteronomio 8:10; Lucas 10:21) Igwa nin dugang pang pakinabang an paggibo kaiyan​—makatatabang iyan sato na magkaigwa nin mas positibo, mapag-apresyar na pananaw sa buhay.

21. An pag-adal sa anong mga halimbawa sa Kasuratan puedeng makatabang sa sato kun kita minadolok ki Jehova sa pamibi?

²¹ An pag-adal makatatabang man sa satong mga pamibi. May marahayon na mga pamibi nin fiel na mga lalaki asin babae na nakasurat sa Tataramon nin Dios. Halimbawa, kun may masakit na problemang napapaatubang sa sato, na dahel kaiyan nahahadit asin nahahandal pa ngani kita para sa ikararahay niato o kan satong mga namomotan, puede niatong basahon an pamibi ni Jacob mapadapit sa gigibohon nindang pag-oolay kan saiyang benggatibong tugang, si Esau. (Genesis 32:9-12) O puede niatong pag-adalan an pamibi ni Hadeng Asa kan an banwaan nin Dios humaon nin sarong hukbo nin mga sarong milyon na Etiope. (2 Cronica 14:​11, 12) Kun pinupurisaw kita nin sarong problema na posibleng magtao nin katuyawan sa marahay na ngaran ni Jehova, kun siring angay na estudyaran an pamibi ni Elias sa atubangan kan mga parasamba ki Baal sa Bukid nin Carmelo, siring man an pamibi ni Nehemias mapadapit sa makamomondong marhay na kamugtakan kan Jerusalem. (1 Hade 18:​36, 37; Nehemias 1:4-11) An pagbasa asin paghorophorop sa siring na mga pamibi makapakokosog sa satong pagtubod asin magkakaideya kita kun paano pinakamarahay na irarani ki Jehova an mga kapurisawan na nagpapagabat sa sato.

22. Ano an teksto kan taon 2003, asin ano an puedeng ihapot niato sa satong sadiri sa panapanahon durante kan taon na ini?

²² Malinaw nanggad, mayo nang maorog pang onra, mayo nang mas marahay na pasohan, kisa paghimate sa hatol ni Santiago na “rumani kamo sa Dios.” (Santiago 4:8) Logod na gibohon niato iyan paagi sa pag-oswag sa satong kaaraman dapit sa Dios, paagi sa paghihingoang ipaheling nin orog pa an satong pagkamoot sa saiya, asin paagi sa pagpatalubo nin kadayupotan sa saiya sa satong mga pamibi. Durante kan taon 2003, mantang isinasaisip niato an Santiago 4:8 bilang teksto kan taon, padagos niatong siyasaton an satong sadiri kun baga kita talagang minarani ki Jehova. Pero kumusta man an ikaduwang kabtang kan mga tataramon na iyan? Sa anong paagi na si Jehova “marani sa saindo,” na maresulta sa anong mga bendisyon? Totokaron ini kan masunod na artikulo.

Nagigirumdoman daw Nindo?

• Taano ta sarong bagay na dapat seryosohon an pagrani ki Jehova?

• Ano an nagkapirang puedeng magin pasohan niato mapadapit sa paglaog sa isip nin kaaraman dapit ki Jehova?

• Paano niato ikapaheheling na igwa kita nin tunay na pagkamoot ki Jehova?

• Sa anong mga paagi kita puedeng makapatalubo nin orog na kadayupotan ki Jehova sa pamibi?

[Blurb sa pahina 12]

An magigin teksto kan taon 2003 iyo an: “Rumani kamo sa Dios, asin sia marani sa saindo.”​—Santiago 4:8.

[Ritrato sa pahina 8, 9]

Mantang sia nagtatalubo, namidbid nin dayupot ni Samuel si Jehova

[Ritrato sa pahina 12]

An pamibi ni Elias sa Bukid nin Carmelo sarong marahay na halimbawa para sa sato