“Rumani Kamo sa Dios, Asin Sia Marani sa Saindo”

Bago Asin Pakatapos—Nakakapabakle an Tataramon nin Dios

KUN nakamidbid mo si Tony kaidtong nagtitinedyer pa sana sia, an naheling mo kutana sarong barumbado asin agresibong solterito na pirmeng yaon sa maraot an dangog na mga lugar sa Sydney, Australia. Kaiba sa saiyang mga katood an mga miembro nin gang. Parate sindang napapalabot sa pananalakat, ralaban nin mga gang, asin baradilan sa kalye.

Si Tony nagpoon na manigarilyo sa edad na nuebe anyos. Sa edad na 14, regular na siang nagmamarihuana asin namumuhay nin inmoral. Sa edad na 16, adikto na sia sa heroina, asin ini suminagkod sa paggamit nin cocaina, LSD—“an totoo, ano man na puedeng makapa-high sa sako,” an paliwanag ni Tony. Dangan nakaestablisar sia nin pakipagtransaksion sa droga sa duwang midbid na sindikato. Dai nahaloy si Tony namidbid bilang saro sa pinakamasasarigan na parasuplay nin droga sa sirangan na baybayon nin Australia.

Si Tony naggagastos nin poon $160 (E.U.) sagkod $320 (E.U.) kada aldaw huli sa pagkasugapa sa heroina asin marihuana. Alagad orog pa dian an nagin kabayadan kaiyan para sa saiyang pamilya. “Kami kan agom ko,” an sabi nia, “nagkapirang beses na tinutokan nin mga eskopeta asin lanseta sa samong lalauogon nin mga kriminal na naghahanap nin mga droga asin kuarta na yaon sa samong solar.” Pakatapos na mabilanggo nin tolong beses, napiritan si Tony na siyasaton an direksion kan saiyang buhay.

Minsan ngani parate siang nagsisimba kaidto, harayo an boot ni Tony sa sarong Dios na sinosolo daa sagkod lamang sa impierno an mga parakasala bilang padusa. Pero kan songkoon nin duwang Saksi ni Jehova, napangalas si Tony kan manodan nia na bakong siring kaiyan an Dios. Asin naogma si Tony na puede nanggad niang pakarhayon an saiyang buhay asin akoon an mga bendisyon hale sa Dios. Napukaw an boot ni Tony sa tataramon ni Jesu-Cristo: “An gabos na bagay posible sa Dios.” (Marcos 10:27) Si Tony espesyalmenteng napahiro kan nakapakokosog sa boot na mga tataramon: “Rumani kamo sa Dios, asin sia marani sa saindo.”​—Santiago 4:8.

Napaatubang ngonyan si Tony sa angat na ioyon an saiyang buhay sa mga pamantayan sa Biblia. Sia nagsasabi: “An enot kong pinondo iyo an paninigarilyo, na nungka kong magibo kaidto, minsan ngani dakol na beses kong prinobaran. Paagi sa kosog hale ki Jehova, napondo ko an paggamit nin heroina asin marihuana, pagkasugapa sa droga na nagkontrol sa sako sa nakaaging 15 taon. Nungka kong inisip kaidto na posibleng makabutas sa pagkasugapa na ini.”

Imbes na matakot sa Dios na pinasasakitan nin daing sagkod sa impierno an mga tawo—sarong doktrina na mayo nanggad sa Biblia​—maogmang inako ni Tony asin kan saiyang agom an paglaom na mabuhay sagkod lamang sa paraiso digdi sa daga. (Salmo 37:​10, 11; Talinhaga 2:21) “Kinaipuhan an dakol na panahon asin maigot na paghihingoa tanganing ikaoyon ko an sakong buhay sa mga pamantayan nin Dios,” an inadmitir ni Tony, “alagad sa tabang ni Jehova nagibo ko iyan.”

Iyo, an dating adikto sa drogang ini nagin Kristiano. Ibinoboluntaryo an saindang panahon asin rekurso, sinda mag-agom naggamit nin rinibong oras sa gibong pagtotokdo sa Biblia. Sinda sibot man sa pagpadakula nin duwang matatakton sa Dios na aki. An dakulaon na pagbabagong ini nagibo paagi sa dai makokontrang puersa kan Tataramon nin Dios, an Biblia. Tunay nanggad, siring kan sinabi ni apostol Pablo, “an tataramon nin Dios buhay asin mapuersa.”—Hebreo 4:12.

Apisar kan siring na positibong mga halimbawa, daing katanosan na nag-iinsistir an nagkapira na linalaglag kan gibong pagtotokdo na basado sa Biblia kan Mga Saksi ni Jehova an mga pamilya asin luway-luway na rinaraot an marahay na mga pamantayan sa buhay kan mga hoben. Pinahihimutikan nanggad kan nangyari ki Tony an deklarasyon na iyan.

Arog ki Tony, nanodan nin dakol na puedeng pangganahan an nakagagadan na adiksion. Paano? Paagi sa pagtubod sa Dios asin pagsarig sa saiya asin sa saiyang Tataramon, siring man paagi sa suporta kan nagmamakolog asin mamomoton na Kristianong mga kaibaiba. Si Tony maogmang nagkonklusyon: “Naheling ko kun paano prinotehiran kan mga prinsipyo sa Biblia an sakong mga aki. Ilinigtas kan mga katokdoan sa Biblia an sakong relasyon sa sakong agom. Asin an sakong mga kataed mas pasil nang makatorog ngonyan huli ta bako na akong peligro sa sainda.”

[Blurb sa pahina 9]

‘Paagi sa kosog hale ki Jehova, napondo ko an pagkasugapa sa droga na nagkontrol sa sako sa laog nin 15 taon’

[Kahon sa pahina 9]

Nakakapabakle an mga Prinsipyo sa Biblia

Nakatabang an manlaenlaen na prinsipyo sa Biblia sa dakol na adikto sa droga na bayaan an nagpapaluyang pagkasugapa na ini. Kabilang sa mga prinsipyong ini an minasunod:

“Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 7:1) An pagdodroga kontra sa ley nin Dios.

“An pagkatakot ki Jehova iyo an kapinonan nin kadonongan, asin an kaaraman dapit sa Kabanalbanaleng Saro iyo an pakasabot.” (Talinhaga 9:10) An reberensia ki Jehova na basado sa tamang kaaraman manongod sa saiya asin sa saiyang mga dalan nakatabang sa dakol na makabutas sa impluwensia nin droga.

“Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:​5, 6) An nakapanluluya nin biyo na pagkasugapa puedeng pondohon paagi sa odok sa pusong pagtitiwala sa Dios asin lubos na pagsarig sa saiya.