Bareta kan mga Parabalangibog kan Kahadean
Maogmang mga Resulta Huli sa Pagpasensia Asin Pagkadesidido
IHINULA ni Jesu-Cristo na sa huring mga aldaw “an pagkamoot nin dakol malipot.” Bilang resulta, sa dakol na parte kan kinaban ngonyan, an mga tawo sa pankagabsan indiperente sa maogmang bareta kan Kahadean. An nagkapira pa ngani minamansay an relihion na may pagmenos.—Mateo 24:12, 14.
Dawa siring, huli sa pagtubod asin pagpasensia, mapangganang inaatubang kan mga parahayag kan Kahadean an angat na iyan, arog kan ipinaheheling kan minasunod na eksperyensia hale sa Republikang Czech.
Duwang Saksi an nakipag-olay sa sarong babae na nasa ibong kan seradong pinto. Paghaloyhaloy, binukasan nin kadikit kan babae an pinto, ilinuwas an saiyang kamot asin kinua an mga magasin na Torrengbantayan asin Awake! na iinaalok kan mga Saksi. Sarong tingog an nagsabing “salamat,” asin sinerahan an pinto. “Maninigo pa daw kaming bumalik?” an inisip-isip kan mga Saksi. An saro sa sainda, sarong payunir, o bilog na panahon na ministro, nagdesisyon na bumalik liwat, alagad iyo man giraray an nangyari, asin nagpadagos ini sa laog nin sangtaon.
Huling nagdesisyon na maninigo niang liwaton an saiyang paagi nin pagdolok, an payunir namibi ki Jehova para sa tabang. Kan suminunod na ialok nia an mga magasin, makikatood niang hinapot an babae: “Kumusta ka na? Nagustohan mo an mga magasin?” Kan primero, dai sia sinimbag, alagad pakalihis nin pira pang pagdalaw, an babae nagpoon na magin makikatood. Sarong beses binukasan nia an pinto, alagad an pag-oolay nagin halipot sana.
Huling an babae nagduduwaduwang makipag-olay sa pinto, an payunir nagdesisyon na suratan sia tanganing magpaliwanag kan katuyohan kan mga pagdalaw asin mag-alok nin pag-adal sa Biblia. Sa katapustapusi, pakalihis nin sangtaon may kabanga nin mapasensiang paghihingoa, an payunir mapangganang nakapoon nin sarong pag-adal sa Biblia sa kagharong. Nabigla sia alagad naparigon an boot kan sa huri sinabi sa saiya kan babae: “Nagtubod ako sa Dios poon kan pinonan mong darahan ako nin mga magasin.”
Tunay nanggad, an pagpasensia asin pagkadesidido puedeng magbunga nin maogmang mga resulta sa paghuhulit kan Kahadean asin paggibo nin disipulo.—Mateo 28:19, 20.