Paggibo nin mga Desisyon—Sarong Dai Malilikayan na Angat
“MAYO na nin mas depisil pa, asin kun siring mas mahalagang marhay kisa an makapagdesisyon,” an sinabi kaidto ni Napoleon Bonaparte, emperador kan Pransia kan ika-19 siglo. Posibleng marhay na maoyon kamo sa duwang aspektong iyan, huling sa pankagabsan mahalagang marhay para sa mga tawo na sinda may kontrol sa sadiri nindang buhay. Kadungan kaiyan, naaraman ninda na kun beses depisil na marhay an paggibo nin desisyon.
Pasil man o depisil, an paggibo nin desisyon dai malilikayan. Aroaldaw napapaatubang kita sa paggibo kaiyan. Sa pagmata niato sa aga, kaipuhan na niatong magdesisyon kun anong isusulot, anong kakakanon sa pamahaw, asin paano aasikasohon an dakol na iba pang bagay sa aldaw na iyan. An kadaklan sa mga desisyon na ini saradit sanang bagay. Dai na ngani niato iyan pinag-iisipan pang marhay. Bibihira na dai kita makatorog huling iniisip niato kun baga iyan madonong o bakong madonong.
Sa ibong na lado, may mga desisyon na may halawig na epekto. Dakol na hoben sa kinaban ngonyan an kaipuhan na magdesisyon kun anong mga pasohan an pagmamaigotan nindang maabot. Tibaad kaipuhan nindang magdesisyon kun anong klaseng edukasyon an kaipuhan ninda asin kun gurano kalawig. Pag-abot nin panahon madesisyon an kadaklan sa sainda kun baga maagom o magdadanay na daing agom. An mga nagpili na mag-agom kaipuhan na magdesisyon: ‘Ako daw nasa tama nang edad asin maygurang na tanganing mag-agom? Anong klaseng kapadis an gusto ko, o mas importante, anong klaseng kapadis an kaipuhan ko?’ Pira sanang desisyon sa buhay an nakaiimpluwensia nin biyo sa sato na arog kan pagpili niato nin maaagom.
Sa importanteng marhay na mga bagay, mahalagang marhay an paggibo nin madonong na mga desisyon, huli ta an kaogmahan nakadependeng marhay sa paggibo niato kaiyan. May mga tawo na tibaad nagsasaboot na kaya nindang gumibo nin siring na mga desisyon asin tibaad haboan ninda an tabang kun ialok iyan. Madonong daw iyan? Helingon niato.
[Picture Credit Line sa pahina 3]
Si Napoleon: Hale sa librong The Pictorial History of the World