Estorya nin Buhay

Pakaeksperyensia kan Mamomoton na Kabootan Asin Pagmakolog ni Jehova

ISINAYSAY NI FAY KING

An sakong mga magurang maboot na mga tawo, alagad arog kan dakol na iba pa, haboon ninda sa relihion. Pirmeng sinasabi kaidto kan sakong ina: “Siertong may Dios, ta kun mayo siisay an naggibo kan mga burak, asin siisay an naggibo kan mga kahoy?” Alagad sagkod na sana iyan dian.

NAGADAN an sakong ama kan 1939 kan ako 11 anyos, asin nag-istar ako kaiba kan sakong ina sa Stockport, sa timog sana nin Manchester, Inglaterra. Kaidto pa pirme ko nang gusto na makaaram nin orog pa manongod sa sakong Kaglalang asin iginagalang ko na an Biblia, minsan ngani mayo akong aram manongod dian. Kaya nagdesisyon akong magduman sa Iglesia nin Inglaterra tanganing aramon kun anong igwa dian.

Mayong epekto sa sako an seremonya, alagad kan binasa an Ebanghelyo, maski paano nakombensir ako kan mga tataramon ni Jesus na siertong totoo an Biblia. Sa paggirumdom kan nakaagi, garo baga pambihira na dai ko mismo binasa an Biblia. Dawa kan huri, kan an sarong katood nin pamilya tinawan ako nin sarong “Bagong Tipan” sa modernong traduksion, dai ako noarin man nagtao nin panahon na basahon iyan.

An pagputok kan Guerrang Koreano kan 1950 talagang nagpangyari sako na mag-isip-isip. Malakop daw an ralaban, siring sa nangyari kan Guerra Mundial II? Kun iyan mangyari, paano ko maootob an pagboot ni Jesus na kamotan an sakong mga kaiwal? Minsan siring, puede daw akong tumindog na sana asin helingon an mga tawo na sinasakyada an sakong nasyon asin dai akong gigibohon tanganing pogolan sinda? Kun ginibo ko iyan, siertong dinudulagan ko an sakong paninimbagan. Minsan ngani nariribaraw an sakong isip, nagdanay akong kombensido na yaon sa Biblia an simbag sa gabos kong hapot, minsan ngani dai ko aram kun paano o saen ko iyan manonompongan.

Paghanap kan Katotoohan sa Australia

Kan 1954 nagdesisyon kami kan sakong ina na mag-imigrar sa Australia, na duman nag-iistar an sakong tugang na babae, si Jean. Pakalihis nin pirang taon, sinabi sako ni Jean na hinagad nia sa mga Saksi ni Jehova na dalawon ako huli ta aram nia na ako interesado sa Biblia asin nagsisimba. Gusto niang maaraman kun ano an saboot ko manongod sa sainda. “Dai ko aram kun tama o bako an mga paliwanag ninda,” an itinuga nia sa sako, “alagad minsan paano may mga paliwanag sinda kisa sa mga iglesia.”

Si Bill asin Linda Schneider, an mag-agom na nagdalaw sa sako, marahayrahay na mag-agom. Sinda magsesetenta na asin dakol nang taon na mga Saksi. Nagtrabaho sinda sa estasyon nin radyo na minamanehar kan Mga Saksi ni Jehova sa Adelaide, asin kan iprohibir an paghuhulit sa Australia durante kan Guerra Mundial II, nagpalista sinda bilang bilog na panahon na mga ebanghelisador. Minsan siring, dawa ngani tinatabangan ako ni Bill asin Linda, sinisiyasat ko pa an manlaenlaen na relihion.

Iiniba ako nin sarong katrabaho sa sarong pagtiripon kan ebanghelistang si Billy Graham, na pakatapos kaiyan an nagkapira sa samo nakipag-olay sa sarong klero na nagsabi na puede kaming maghapot. Ihinapot ko an hapot na nakariribok pa sa sako kaidto: “Paano ka magigin sarong Kristiano asin mamomoot sa saimong mga kaiwal kun ika nakikiguerra asin ginagadan mo sinda?” An bilog na grupo biglang naribok​—an hapot na iyan minalataw na ikinahadit ninda gabos! Sa kahurihurihi, an klerigo nagsabi: “Dai ko aram an simbag sa hapot na iyan. Pinag-iisipan ko pa iyan.”

Mientras tanto, an pakipag-adal ko sa Biblia ki Bill asin Linda nagpapadagos kaidto, asin kan Setyembre 1958, nabautismohan ako. Nagdesisyon ako na sundan an halimbawa kan mga nagtokdo sa sako, kaya kan Agosto kan sumunod na taon, nagpalista ako bilang regular payunir, sarong bilog na panahon na paraebanghelyo. Pakalihis nin walong bulan inimbitaran akong mag-espesyal payunir. Kanigoan an kaogmahan ko kan maaraman ko na an sakong tugang, si Jean, nag-oswag man sa saiyang pag-adal asin nabautismohan!

Nabukasan an Sarong Pinto nin Oportunidad

Naglilingkod ako sa saro sa mga kongregasyon sa Sydney asin namamayo nin dakol na pag-adal sa Biblia. Sarong aldaw nakanuparan ko an sarong retiradong klerigo kan Iglesia nin Inglaterra asin hinapot ko sia kun ano an sabi kan iglesia manongod sa katapusan kan kinaban. Minsan ngani sinabi nia sa sako na sia nagtokdo kan doktrina kan iglesia sa laog nin 50 taon, an saiyang simbag ipinagngalas ko nin labi-labi: “Kaipuhan ko pa nin panahon na siyasaton iyan huli ta dai ko kabisado an Biblia na siring kan Mga Saksi ni Jehova.”

Dai nahaloy pakatapos kaini, nagkaigwa nin pangapodan para sa mga boluntaryo na malingkod sa Pakistan. Nag-aplay ako, na daing pag-aram na dai isinusugo duman an daing agom na mga babae, mga daing agom na lalaki o mag-agom sana. Minalataw na ipinadara sa opisina prinsipal sa Brooklyn an aplikasyon ko huli ta dai nahaloy nakaresibi ako nin surat na sinasabi sa sako na may bakante sa Bombay (ngonyan an apod Mumbai), India, kun gusto kong akoon iyan. Iyan nangyari kan 1962. Inako ko iyan asin nagdanay sa Bombay sa laog nin 18 bulan bago buminalyo sa Allahabad.

Nagkonsentrar ako sa pag-adal nin Hindi. An lenguaheng ini sa India sa pankagabsan daing pagliwatliwat sa pagdeletriya asin pagpronunsiar, kaya bakong gayong depisil na kabisadohon iyan. Minsan siring, nakakadesganar kun hinahagad kan mga kagharong na magtaram ako nin Ingles kisa magkapakapa ako sa saindang lenguahe! Alagad an bagong nasyon na ini nag-atubang nin interesante asin nakaaanimar na mga angat, asin naogma ako sa pakikiasosyar sa mga kapwa Saksi hale sa Australia.

Kan hoben pa ako, nag-isip ako na mag-agom, alagad kan ako mabautismohan, sibot-sibot ako sa paglilingkod ki Jehova tangani na isipon pa nin orog an manongod dian. Minsan siring, namamatean ko na naman ngonyan an pangangaipo nin kadamaydamay sa buhay. Siempre, habo kong bayaan an sakong asignasyon sa ibang nasyon, kaya ipinamibi ko iyan ki Jehova asin hinale ko na iyan sa isip ko.

Dai Linalaoman na Bendisyon

Si Edwin Skinner an nangangataman sa gibohon sa sangang opisina sa India kan panahon na idto. Nag-atender sia sa ikawalong klase kan Paadalan sa Biblia kan Watchtower sa Gilead kan 1946 kaiba nin dakol na iba pang fiel na tugang, kabale si Harold King asin Stanley Jones, na nadestino sa Tsina.a Kan 1958, si Harold asin Stanley ibinilanggo sa pagkainkomunikado huli sa saindang paghuhulit sa Shanghai. Kan si Harold paluwason kan 1963, sinuratan sia ni Edwin. Nagsimbag si Harold pakabalik nia sa Hong Kong hale sa mga pagbiahe nia sa Estados Unidos asin Britania asin sinabi na gusto na niang mag-agom. Sinabi nia ki Edwin na ipinamibi nia ini mantang nasa bilanggoan, asin hinapot nia si Edwin kun may midbid siang Saksi na angay na magin agom.

Sa India inaareglo an kadaklan na pag-agoman, asin si Edwin pirmeng hinahagadan na gumibo kan siring na mga areglo, alagad pirme siang nagsasayumang gibohon iyan. Kun siring itinao nia an surat ni Harold ki Ruth McKay, na an agom kaini, si Homer, sarong nagbibiaheng paraataman. Sa kahurihurihi, sinuratan ako ni Ruth tanganing sabihon na may sarong misyonero na dakol nang taon sa katotoohan an naghahanap nin maaagom, asin naghapot sia kun interesado ako na suratan ini. Dai nia sinabi sako kun siisay an tugang na lalaki o an ano man manongod sa saiya.

Mayo nin siisay man na nakaaaram manongod sa sakong pamibi na logod tawan ako nin makakaibaiba, siempre, apuera ki Jehova, asin sa enot kong reaksion habo ko kan ideyang iyan. Pero, mantang orog kong pinag-iisipan iyan, orog ko man na inaako an konklusyon na bihirang simbagon ni Jehova an satong mga pamibi sa paagi na tibaad hinohona niatong gigibohon nia. Kaya sinimbag ko si Ruth asin sinabi ko na sagkod na mayo nin obligasyon, puede niang pasuraton giraray an tugang. An ikaduwang surat ni Harold King para sa sako.

An mga retrato ni Harold asin an saiyang estorya nagluwas na sa manlaenlaen na peryodiko asin magasin kasunod kan pagpaluwas sa saiya sa bilanggoan sa Tsina. Kan panahon na ini, midbid na siang marhay sa bilog na kinaban, alagad an saiyang rekord nin fiel na teokratikong paglilingkod an hinangaan ko. Kaya nagsuratan kami sa laog nin limang bulan, dangan nagduman ako sa Hong Kong. Kinasal kami kan Oktubre 5, 1965.

Pareho mi gustong mag-agom asin magdanay sa bilog na panahon na paglilingkod, asin mantang kami naggugurang na, lalo niamong namamatean an pangangaipo na may makaibaiba. Nagtalubo an pagkamoot ko ki Harold, asin mantang naheheling ko an maboot asin makonsiderasyon na paagi nin pagtratar nia sa mga tawo asin sa mga problemang naglataw may koneksion sa samong paglilingkod, nakua nia an sakong hararom na paggalang. Sa laog nin 27 taon nakamtan mi an sarong maogmahon na pag-agoman asin nag-ako nin dakol na bendisyon gikan sa kamot ni Jehova.

An mga Intsik mahigos na mga tawo, asin suno ko sindang marhay. An ginagamit na tataramon sa Hong Kong Cantones, sarong dialektong Intsik na mas dakol an tono, o punto sa pagtaram, kisa Mandarin asin kun siring masakit nanggad na manodan. Nagpoon kami ni Harold sa erokan nin mga misyonero sa sangang opisina kan Mga Saksi ni Jehova, dangan naglingkod kami sa mga asignasyon sa manlaenlaen na parte kan teritoryo. Iyo, maogmahon kami kaidto, alagad kan 1976 nagkaigwa nin grabeng problema huli sa sakong salud.

Pag-atubang sa mga Problema sa Salud

Dinugo ako sa laog nin nagkapirang bulan, asin buminaba nin bigla asin risang marhay an sakong blood count. Kaipuhan na ako maoperahan, alagad sinabi sako kan mga doktor sa ospital na dai ninda gigibohon an operasyon na mayo nin dugo huli ta kun gibohon ninda iyan, tibaad magadan ako huli sa kakulangan nin sirkulasyon nin dugo. Sarong aldaw kan pinag-oorolayan kan mga doktor an sakong kamugtakan, naghingoa an mga nars na bagohon an sakong isip, na sinasabi na mayo ako nin deretso na sayangon an sakong buhay. Doseng operasyon an nakaiskedyul sa aldaw na idto, na an 10 kaini pagpakua sa aki, alagad nariparo ko na mayo man lamang nagtaram nin kontra sa mga bados na babae manongod sa paggadan kan saindang mga omboy.

Sa katapustapusi, si Harold naggibo nin surat na nagpapalibre sa ospital sa ano man na paninimbagan kun ako magadan, asin uminoyon an mga doktor na gibohon an kaipuhan na operasyon. Dinara ako sa sala de operasyon asin inandam na saksakan nin anestesia. Minsan siring, sa ultimo ora, huminabo an anestesiologo, asin kinaipuhan kan ospital na paluwason ako.

Dangan nagkonsulta kami sa sarong independienteng ginekologo. Biyong nakaaaram sa sakong delikadong kamugtakan, nagpresentar siang gibohon an operasyon sa hababang bayad​—basta dai mi sabihon sa siisay man kun gurano an siningil nia samo. Nagin mapanggana an pag-operar nia​—asin na mayo nanggad nin ano man na pag-ineksion nin dugo. An mamomoton na kabootan asin pagmakolog ni Jehova risang-risang marhay sa samo ni Harold sa partikular na panahon na ini.

Kan 1992, si Harold nagkaigwa nin helang na ikagagadan. Nagbalyo kami sa sangang opisina asin pareho kami mamomoton na inasikaso duman. Natapos kan sakong namomotan na agom an saiyang daganon na buhay kan 1993 sa edad na 81.

Pagbalik sa Inglaterra

Naoogma ako kaidto na magin miembro kan pamilyang Bethel sa Hong Kong, alagad paorog nang paorog na nasasakitan akong tagalan an init asin harasahas. Dangan nagdatong an sarong nakasosorpresang surat hale sa opisina prinsipal sa Brooklyn, na naghahapot kun, huli sa sakong salud, magugusto akong bumalyo sa sarong sangang opisina na mas dakol an pasilidad. Kaya kan taon 2000, nagbalik ako sa Inglaterra asin uminayon sa pamilyang Bethel sa Londres. Mamomoton na probisyon nanggad ini! Maogma akong inako, asin naogmang marhay ako sa sakong laen-laen na mga asignasyon, na kaiba an pagtabang sa pag-asikaso kan libreriya kan pamilyang Bethel asin sa 2,000 na tomo kaiyan.

Nakikiasosyar man ako sa kongregasyon na Intsik na nagtitipon sa Londres, pero nabago na an kamugtakan digdi. Ngonyan na mga aldaw, kakadikit an hale sa Hong Kong kundi, imbes, hale sa kontinente nin Tsina. Nagtataram sinda nin Mandarin, asin iyan sarong bagong angat sa paghuhulit. Sa bilog na nasyon may mga bareta nin dakol na interesanteng pag-adal sa Biblia sa mga estudyanteng postgraduado hale sa Tsina. Sinda mahigos asin naoogma sa katotoohan sa Biblia na nanonodan ninda. Nakaoogma an pagtabang sa sainda.

Sa katrangkilohan kan sakong bagong erokan, parate kong hinohorophorop an sakong maogmang buhay asin padagos na nagngangalas sa mamomoton na kabootan ni Jehova. Iyan nakakaapektar sa gabos na bagay na may koneksion sa saiyang katuyohan, asin risang-risa an saiyang pagmakolog sa saiyang mga lingkod bilang indibiduwal. Yaon sako an gabos na dahelan na magpasalamat sa gabos niang mamomoton na pagmakolog sa sako.​—1 Pedro 5:​6, 7.

[Nota sa Ibaba]

[Ritrato sa pahina 24]

Paglilingkod sa India

[Mga Ritrato sa pahina 25]

Si Harold King kan 1963 asin kan naglilingkod sa Tsina kan mga taon nin 1950

[Mga Ritrato sa pahina 26]

An aldaw kan samong kasal sa Hong Kong, Oktubre 5, 1965

[Ritrato sa pahina 26]

Kaiba kan mga miembro kan Bethel sa Hong Kong, an mag-agom na Liang sa tahaw, an mag-agom na Gannaway sa too