Magsarig sa Espiritu nin Dios sa Pag-atubang sa mga Pagbabago sa Buhay

“Gibohon mo an bilog mong makakaya tanganing ikaatubang mo an saimong sadiri na inooyonan nin Dios.”​—2 TIMOTEO 2:15.

1. Anong mga pagbabago an nag-aatubang nin angat sa satong espirituwal na kapakanan?

PADAGOS an mga pagbabago kan kinaban sa palibot niato. Naheheling niato an makangangalas na mga pag-oswag sa siensia asin teknolohiya kasabay nin grabeng pagruro kan mga pamantayan sa moral. Siring kan tinokar niato sa naenot na artikulo, dapat na labanan kan mga Kristiano an kontra sa Dios na espiritu kan kinaban. Minsan siring, mantang nagbabago an kinaban, kita nagbabago man sa dakol na paagi. Kita minaagi hale sa pagkaaki pasiring sa pagkaadulto. Tibaad kita magkaigwa o mawaran nin kayamanan, salud, asin mga namomotan. An dakol sa siring na mga pagbabago bako niatong kontrolado, asin puede iyan na mag-atubang nin bago asin masakit na mga angat sa satong espirituwal na kapakanan.

2. Paano nag-agi nin pagbabago an buhay ni David?

² Pipirang tawo an nag-aagi nin pambihirang mga pagbabago sa saindang buhay na arog kan nangyari ki David, na aki ni Jese. Si David marikas na uminagi hale sa pagigin daing gayo midbid bilang sarong pastor na solterito pasiring sa pagigin bantog bilang sarong eroe kan nasyon. Kan huri, sia nagin dulag, na garo hayop na linalapag nin sarong nauuring hade. Pakatapos kaiyan, si David nagin hade asin kongkistador. Tinios nia an makolog na mga epekto nin magabat na kasalan. Nagsapar sia nin trahedya asin pagkabaranga sa laog kan saiyang pamilya. Nagkaigwa sia nin kayamanan, guminurang, asin naeksperyensiahan an mga kamatean nin kagurangan. Minsan siring, sa ibong kan dakol na pagbabago sa saiyang buhay, si David nagpaheling sa bilog na buhay nia nin kompiansa asin pagtiwala ki Jehova asin sa Saiyang espiritu. Ginibo nia an bilog niang makakaya na ikaatubang an saiyang sadiri na “inooyonan nin Dios,” asin binendisyonan sia nin Dios. (2 Timoteo 2:15) Minsan ngani iba an satong mga kamugtakan kisa kan ki David, may manonodan kita sa paagi nin pag-atubang nia sa mga bagay-bagay sa saiyang buhay. An saiyang halimbawa makatatabang sa sato na masabotan kun paano niato padagos na makakamtan an tabang kan espiritu nin Dios mantang inaatubang niato an mga pagbabago sa satong buhay.

An Kapakumbabaan ni David​—Sarong Marahayon na Halimbawa

3, 4. Paano si David nagin bantog sa nasyon hale sa pagigin bakong gayong midbid bilang sarong solteritong pastor?

³ Kan solterito pa sana, si David bakong prominente dawa sa laog kan saiyang sadiring pamilya. Kan mag-abot sa Betlehem si propeta Samuel, iinatubang kan ama ni David an pito sa walo niang aking lalaki. Si David, an kangudhan, nawalat na nagpapastor kan mga karnero. Pero, si David an pinili ni Jehova na magin hade sa Israel sa ngapit. Ipinaapod si David sa oma. Sunod, an rekord kan Biblia nagsasabi: “Kinua ni Samuel an sungay kan lana asin linahidan sia sa tahaw kan saiyang mga tugang na lalaki. Asin an espiritu ni Jehova nagpoon na humiro ki David poon kan aldaw na idto.” (1 Samuel 16:​12, 13) Si David nagsarig sa espiritung iyan sa bilog niang buhay.

⁴ Dai mahahaloy kaidto, an solteritong pastor na ini magigin bantog sa nasyon. Ipinaapod sia tangani na serbihan an hade asin tugtogan sia. Ginadan nia an parapakilaban na si Goliat, sarong higanteng maringison kaya maski an pinakamatibay na mga soldados sa Israel takot na humampang sa saiya. Ikinaag na mangenot sa mga lalaking parapakilaban, dinaog ni David an mga Filisteo. Namotan sia kan banwaan. Naggibo sinda nin mga kanta nin pag-omaw sa saiya. Bago kaini, an sarong konsehero ni Hadeng Saul nagsabi na an hoben na si David bako sanang “matibay tumugtog” kan arpa kundi saro man na “pusoan, makosog na lalaki asin lalaking parapakilaban asin madonong magpahayag patin lalaking guapo an itsura.”​—1 Samuel 16:18; 17:​23, 24, 45-51; 18:5-7.

5. Ano kutana an puedeng nagpagin arogante ki David, asin paano niato naaaraman na dai sia nagin siring?

⁵ Kabantogan, kaguapohan, pagkahoben, tibay sa pagpahayag, mga abilidad sa musika, kakayahan sa militar, pag-oyon nin Dios​—garo baga gabos yaon na ki David. An arin man sa mga bagay na ini puede kutanang nagpagin arogante sa saiya, pero ni saro kaiyan dai. Mangnoha an simbag ni David ki Hadeng Saul, na nag-alok na ipakasal ki David an saiyang aking babae. May tunay na kapakumbabaan, si David nagsabi: “Siisay ako asin siisay an sakong mga paryente, an pamilya kan sakong ama, sa Israel, tanganing ako magin manugang na lalaki kan hade?” (1 Samuel 18:18) Sa pagkomento dapit sa bersikulong ini, an sarong nag-espesyalisar nagsurat: “Boot sabihon ni David, dai man lamang sia puedeng maghingako na magin maninigo sa onra na magin manugang kan hade base sa saiyang personal na mga kualipikasyon, ni dahel sa saiyang kamugtakan sa sosyedad, ni huli sa saiyang ginikanan.”

6. Taano ta maninigo niatong kultibaron an kapakumbabaan?

⁶ An kapakumbabaan ni David nakabasar sa saiyang pagmidbid na si Jehova labi-labi an kadakulaan kisa bakong sangkap na mga tawo sa gabos na paagi. Nagngalas si David na minamangno ngani nin Dios an tawo. (Salmo 144:3) Aram man ni David na an ano man na kadakulaan na tibaad napasaiya nangyari sana huli ta si Jehova nagpaheling nin kapakumbabaan, na nagpapakanghababa tanganing susteniran, protehiran, asin asikasohon sia. (Salmo 18:35) Kanigoan kagayon na leksion para sa sato! Maninigo na nungka kitang magin maabhaw dahel sa mga talento niato, mga nagibo niato, asin mga pribilehio niato. “Sa katunayan, ano an rogaring mo na dai mo inako?” an isinurat ni apostol Pablo. “Ngonyan, kun iyan talagang inako mo, tadaw ta naghahambog ka na garo baga dai mo iyan inako?” (1 Corinto 4:7) Tanganing kamtan an banal na espiritu nin Dios asin an pag-oyon nia, dapat niatong kultibaron asin papagdanayon an kapakumbabaan.​—Santiago 4:6.

“Dai Kamo Magbalos”

7. Nagkaigwa nin anong oportunidad si David na gadanon si Hadeng Saul?

⁷ Minsan ngani an kabantogan ni David dai nakapukaw nin kapalangkawan sa saiyang puso, iyan nakapukaw nanggad ki Hadeng Saul nin pag-imon na may intension na gumadan, kaya huminale sa saiya an espiritu nin Dios. Minsan ngani mayo man nin nagibong sala si David, nagdulag sia tanganing iligtas an saiyang buhay asin nag-erok sa kaawagan. Sarong beses, durante nin daing ontok na paglapag ki David, si Hadeng Saul luminaog sa sarong kueba, na dai nia aram na si David asin an saiyang kairiba nagtatago duman. An mga tawohan ni David sinadol sia na aprobetsaran an garo baga itinao nin Dios na oportunidad na gadanon si Saul. Maiimahinar niato sinda na yaon sa madiklom, na hinihinghingan si David: “Uya an aldaw na sinasabi saimo ni Jehova, ‘Uya! Itinatao ko sa kamot mo an saimong kaiwal, asin gibohon mo sa saiya an garo baga marahay sa pagheling mo.’”​—1 Samuel 24:2-6.

8. Taano ta nagpogol si David na magbalos?

⁸ Habo ni David na kolgan si Saul. Nagpapaheling nin pagtubod asin pasensia, kontento na siang ipabaya ki Jehova an mga bagay. Pagkahale kan hade sa kueba, nagkurahaw sa saiya si David asin nagsabi: “Maghokom logod si Jehova sa sako asin saimo; asin ibabalos ako ni Jehova sa saimo, alagad dai ka aabotan kan sako mismong kamot.” (1 Samuel 24:12) Minsan ngani aram nia na sala si Saul, si David dai nagbalos; ni nagtaram sia nin mapan-insulto ki Saul o manongod sa saiya. Sa nagkapirang iba pang pangyayari, nagpogol si David na sia mismo an magbalos. Imbes, nagsarig sia ki Jehova na iyong magtanos kan mga bagay.​—1 Samuel 25:32-34; 26:​10, 11.

9. Taano ta dai kita maninigong magbalos kun kita nakakaeksperyensia nin pagtumang o paglamag?

⁹ Arog ki David, tibaad kamo mamugtak sa masakit na mga situwasyon. Tibaad kamo kinokontra o linalamag nin mga kaeskuela, katrabaho, kapamilya, o iba pa na bako nindong kapagtubod. Dai magbalos. Maghalat ki Jehova, na hinahagad na logod tabangan kamo kan saiyang banal na espiritu. An mga daing pagtubod na iyan tibaad humanga sa saindong marahay na paggawe asin magtubod. (1 Pedro 3:1) Ano man an mangyari, makasisierto kamo na naheheling ni Jehova an saindong situwasyon asin magibo sia nin paagi sa saiyang itinalaan na panahon. Si apostol Pablo nagsurat: “Dai kamo magbalos, mga namomotan, kundi magtao nin lugar sa kabangisan; huli ta nasusurat: ‘Sako an pagbalos; ako an mabalos, sabi ni Jehova.’”​—Roma 12:19.

‘Maghinanyog sa Disiplina’

10. Paano nagkasala si David, asin paano nia hiningoang itago iyan?

¹⁰ Uminagi an mga taon. Si David nagin namomotan na marhay na hade na labi-labi kaprominente. An saiyang buhay na pambihira an pagigin fiel, pati na an magagayon na salmong isinurat nia bilang pag-omaw ki Jehova, tibaad madaling magtao nin impresyon na ini an tawo na nungkang magkakasala nin magabat. Pero, nagkasala sia. Sarong aldaw, pinagmasdan kan hade hale sa itaas kan saiyang bubongan an sarong magayon na babae na nagkakarigos. Naghapot sia kun siisay ini. Kan maaraman na an babae iyo si Bat-seba asin na an saiyang agom, si Urias, yaon sa ralaban, ipinaapod sia ni David asin dinurogan sia. Kan huri, naaraman nia na bados ini. Magigin iskandalo nanggad kun mahayag ini! Segun sa Ley ni Moises, kagadanan an padusa sa pagsambay. Minalataw na inisip kan hade na ikatatago an kasalan. Kaya nagpadara sia nin mensahe sa hukbo, na pinapapuli si Urias sa Jerusalem. Naglaom si David na dudurogan ni Urias si Bat-seba pagkabanggi, alagad dai iyan nangyari. Desesperado na ngonyan, pinabalik ni David si Urias sa ralaban na may darang surat para ki Joab, an komandante militar. An surat nagboot na si Urias ipuesto sa ralaban kun saen magagadan sia. Nagkuyog si Joab, asin nagadan si Urias. Pakatapos na isagibo ni Bat-seba an kinaugalean na peryodo nin pagmondo, kinua sia ni David na magin saiyang agom.​—2 Samuel 11:1-27.

11. Anong situwasyon an isinaysay ni Natan ki David, asin ano an nagin reaksion nia?

¹¹ Garo baga nag-aser an pakana, minsan ngani maninigo kutanang aram ni David na an gabos na iyan hayag ki Jehova. (Hebreo 4:13) Nag-agi an mga bulan, asin namundag an aki. Dangan, sa pagboot nin Dios, dinumanan ni Natan na propeta si David. Isinaysay kan propeta sa hade an sarong situwasyon kun saen an sarong mayaman na kagsadiri nin dakol na karnero kinua asin binuno an sasaro asin padangaton na karnero nin sarong tawong dukha. Napukaw kan estoryang iyan an pakamate nin hustisya ni David alagad dai lamang sia nagsuspetsa na may natatago iyan na kahulogan. Marikas na hinokoman ni David an tawong mayaman. Nag-iinit sa kaanggotan, sia nagsabi ki Natan: “An lalaking naggigibo kaini maninigong magadan!”​—2 Samuel 12:1-6.

12. Ano an nagin paghokom ni Jehova ki David?

¹² “Ika mismo an lalaki!” an simbag kan propeta. Hinokoman ni David an saiyang sadiri. Daing duwa-duwa, an gurobgutob ni David biglang nasalidahan nin grabeng supog asin makuring kamondoan. Mantang namumungnan, naghinanyog sia kan itinatao ni Natan an dai madudulagan na paghokom ni Jehova. Mayo nin mga tataramon nin karangahan. Hinamak ni David an tataramon ni Jehova paagi sa paggibo kan maraot. Bako daw na ginadan nia si Urias paagi sa espada kan kaiwal? Dai mahale sa harong ni David an sarong espada. Bako daw na kinua nia sa hilom an agom ni Urias? May kaparehong maraot na mangyayari sa saiya, bakong sa hilom, kundi hayagan.​—2 Samuel 12:7-12.

13. Ano an nagin reaksion ni David sa disiplina ni Jehova?

¹³ An marahay ki David ta dai nia pignegaran an saiyang kasalan. Dai nia inanggotan si propeta Natan. Dai sia nambasol nin iba o nanarahotan sa saiyang ginibo. Kan sabihon sa saiya an saiyang mga kasalan, inako ni David an responsibilidad, na nagsabi: “Nagkasala ako tumang ki Jehova.” (2 Samuel 12:13) Ipinaheheling kan Salmo 51 an labi-labing kamondoan sa saiyang kasalan asin an rarom kan saiyang pagsolsol. Nakimaherak sia ki Jehova: “Dai mo ako ipagsikwal sa atubangan kan saimong lalauogon; asin an saimong banal na espiritu O dai mo paghaleon sa sakuya.” May pagtubod sia na dai duduhagion ni Jehova, huli sa saiyang pagkaherak, an “pusong laglag asin ronot” dahel sa kasalan. (Salmo 51:​11, 17) Padagos na nagsarig si David sa espiritu nin Dios. Minsan ngani dai prinotehiran ni Jehova si David sa mapait na mga epekto kan saiyang kasalan, pinatawad nia sia.

14. Ano an maninigo na magin reaksion niato sa disiplina ni Jehova?

¹⁴ Kita gabos bakong sangkap, asin kita gabos nagkakasala. (Roma 3:23) Kun beses tibaad magkasala kita nin magabat, arog kan nangyari ki David. Kun paanong dinidisiplina nin sarong mamomoton na ama an saiyang mga aki, itinatanos man ni Jehova an mga gustong maglingkod sa saiya. Minsan siring, baga man kapakipakinabang an disiplina, bako iyan pasil na akoon. Sa katunayan, kun beses “nakamomondo” iyan. (Hebreo 12:​6, 11) Pero, kun kita ‘maghihinanyog sa disiplina,’ kita makakapakipag-ulian ki Jehova. (Talinhaga 8:33) Tanganing kamtan an nagpapadagos na bendisyon kan espiritu ni Jehova, dapat niatong akoon an pagtatanos asin maghingoang magin inooyonan nin Dios.

Dai Kamo Maglaom sa mga Kayamanan na Bakong Segurado

15. (a) Sa anong mga paagi ginagamit nin nagkapirang tawo an saindang mga kayamanan? (b) Paano minawot ni David na gamiton an saiyang kayamanan?

¹⁵ Mayo nin nagpaparisa na si David naggikan sa sarong prominenteng kamugtakan o na mayaman an saiyang pamilya. Minsan siring, durante kan saiyang paghade, si David nagkaigwa nin dakulaon na kayamanan. Siring kan aram nindo, an dakol itinatago an saindang kayamanan, may kahanaban na naghihingoang padakolon iyan, o may kaimotan sa paggastos kaiyan. An iba ginagamit an saindang kuarta tanganing pamurawayon an saindang sadiri. (Mateo 6:2) Ginamit ni David an saiyang kayamanan sa ibang paagi. Hinimuyawot niang tawan nin onra si Jehova. Sinabi ni David ki Natan an kamawotan nia na magtogdok nin templo para ki Jehova tanganing duman ibugtak an kaban kan tipan, na kaidto nasa Jerusalem na “namumugtak sa tahaw kan mga tahob nin tolda.” Naogma si Jehova sa mga intension ni David alagad sinabihan sia paagi ki Natan na an matogdok kan templo iyo an aki ni David na si Salomon.​—2 Samuel 7:​1, 2, 12, 13.

16. Anong mga pag-andam an ginibo ni David para sa pagtogdok kan templo?

¹⁶ Tinipon ni David an materyales na gagamiton sa dakulang proyektong ini nin pagtogdok. Nagsabi si David ki Salomon: “Nag-andam ako para sa harong ni Jehova nin sanggatos na ribong talentong bulawan asin sarong milyon na talentong pirak, asin daing paagi na matimbang an tanso saka batbat huli sa kadakolan kaiyan; asin inandam ko an mga tablon saka mga gapo, alagad ta dadagdagan mo an mga iyan.” Gikan sa saiyang personal na kayamanan, nagkontribwir sia nin 3,000 na talentong bulawan asin 7,000 na talentong pirak.a (1 Cronica 22:14; 29:​3, 4) An buka an palad na pagtao ni David, bakong pagpasikat, kundi kapahayagan nin pagtubod asin debosyon ki Jehova Dios. Minimidbid an Ginikanan kan saiyang kayamanan, sinabi nia ki Jehova: “An gabos hale sa saimo, asin hale sa saimong sadiring kamot kami nagtao sa saimo.” (1 Cronica 29:14) An matinaong puso ni David nagpahiro sa saiya na gibohon an gabos niang makakaya na paoswagon an dalisay na pagsamba.

17. Paano minaaplikar sa mga mayaman sagkod sa mga dukha an hatol na yaon sa 1 Timoteo 6:17-19?

¹⁷ Kaagid kaiyan, logod na gamiton niato an satong materyal na mga kayamanan sa paggibo nin marahay. Imbes na mamuhay sa materyalistikong paagi, mas marahay na hingoahon na kamtan an pag-oyon nin Dios​—iyan an dalan nin tunay na kadonongan asin kaogmahan. Si Pablo nagsurat: “Pagbotan mo an mga mayaman sa presenteng sistema nin mga bagay na dai magin mapalangkaw, asin ibugtak an saindang paglaom, bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong pagkaogma; na sinda maggibo nin marahay, magin mayaman sa marahay na mga gibo, magin matinao, andam na manhiras, na nagririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.” (1 Timoteo 6:17-19) Ano man an kamugtakan niato sa pagbuhay, magsarig kita sa espiritu nin Dios asin mamuhay sa paagi na kita magigin “mayaman sa Dios.” (Lucas 12:21) Mayo nang orog na mahalaga kisa inooyonan na kamugtakan sa atubangan kan satong mamomoton na langitnon na Ama.

Iatubang an Saindong Sadiri na Inooyonan nin Dios

18. Sa anong paagi nagpaheling si David nin marahayon na halimbawa para sa mga Kristiano?

¹⁸ Sa bilog niang buhay, hiningoa ni David na kamtan an pag-oyon ni Jehova. Paagi sa awit, nag-agrangay sia: “Kaherakan mo ako, O Dios, kaherakan mo ako, huli ta sa saimo nagpaili an sakuyang kalag.” (Salmo 57:1) Bakong sayang an pagtiwala nia ki Jehova. Guminurang si David na “kontento sa mga aldaw.” (1 Cronica 23:1) Minsan ngani nakagibo nin magabat na mga sala si David, ginigirumdom sia bilang saro sa dakol na saksi nin Dios na nagpaheling nin pambihirang pagtubod.​—Hebreo 11:32.

19. Paano niato ikaaatubang an satong sadiri na inooyonan nin Dios?

¹⁹ Mantang napapaatubang kamo sa nagbabagong mga situwasyon sa buhay, girumdomon na kun paanong sinusteniran, pinakosog, asin itinanos ni Jehova si David, puede man Niang gibohon iyan sa saindo. Si apostol Pablo, arog ni David, napaatubang sa dakol na pagbabago sa buhay. Pero, nagdanay man siang fiel paagi sa pagsarig sa espiritu nin Dios. Sia nagsurat: “Igwa ako kan kosog para sa gabos na bagay huli sa saiya na nagtatao nin puersa sa sako.” (Filipos 4:​12, 13) Kun magsasarig kita ki Jehova, tatabangan nia kitang magin mapanggana. Gusto nia na kita magin mapanggana. Kun kita mahinanyog sa saiya asin marani sa saiya, tatawan nia kita kan kosog tanganing magibo an saiyang kabotan. Asin kun padagos kitang magsasarig sa espiritu nin Dios, mahihimo niato na ‘iatubang an satong sadiri na inooyonan nin Dios’ ngonyan asin sa bilog na panahon na daing sagkod.​—2 Timoteo 2:15.

[Nota sa Ibaba]

Ano an Isisimbag Nindo?

• Paano kita makapagmamaan tumang sa kapalangkawan?

• Taano ta dai kita maninigong magbalos?

• Ano an maninigo na magin pagmansay niato sa disiplina?

• Taano ta maninigo kitang magtiwala sa Dios asin bakong sa mga kayamanan?

[Ritrato sa pahina 16, 17]

Si David nagsarig sa espiritu nin Dios asin naghingoang kamtan an pag-oyon nin Dios. Iyo man daw kamo?

[Ritrato sa pahina 18]

“An gabos hale sa saimo, asin hale sa saimong sadiring kamot kami nagtao sa saimo”