Mga Magurang, Protehiran an Saindong Mahalagang Marhay na Mana
“An kadonongan para sa proteksion . . . [Iyan] nagpapadanay na buhay sa mga nakakasadiri kaiyan.”—ECLESIASTES 7:12.
1. Taano ta maninigong mansayon nin mga magurang an saindang mga aki bilang regalo?
AN MGA magurang an responsable sa pagkamundag sa kinaban nin sarong bagong buhay na persona na igwa nin pisikal na mga karakteristiko asin personalidad na kapareho kan sa sainda. An mga omboy na iyan inaapod kan Biblia na “mana hale ki Jehova.” (Salmo 127:3) Mantang sia an tunay na Paratao nin Buhay, talagang ipinagkakatiwala ni Jehova sa mga magurang an talagang sadiri nia. (Salmo 36:9) Mga magurang, paano nindo minamansay an pag-ako kan siring na mahalagang marhay na regalo hale sa Dios?
2. Ano an nagin reaksion ni Manoa kan maaraman na sia magigin sarong ama?
2 Daing duwa-duwa na maninigong akoon an siring na regalo na may kapakumbabaan asin pagpapahalaga. Labing 3,000 na taon na an nakaagi, arog kaini an nagin reaksion kan Israelitang si Manoa kan an saiyang agom sabihan nin sarong anghel na sia magkakaaki. Kan madangog an maogmang bareta, namibi si Manoa: “Dispensara ako, Jehova. An lalaki kan tunay na Dios na isinugo mo pa sana, tabi pabalikon mo sia sa samuya asin tokdoan kami kun ano an maninigo niamong gibohon sa aki na mamumundag.” (Hokom 13:8) Mga magurang, ano an manonodan nindo sa halimbawa ni Manoa?
Kun Taano ta Kaipuhan Ngonyan an Tabang nin Dios
3. Taano ta nangorognang kaipuhan ngonyan an tabang nin Dios sa pagpadakula sa mga aki?
3 Ngonyan orog kisa kasuarin man kaidto, kaipuhan kan mga magurang an tabang ni Jehova sa pagpadakula sa saindang mga aki. An dahelan? Ihinulog si Satanas na Diablo asin an saiyang mga anghel hale sa langit pasiring sa daga. “Herak man kan daga,” an patanid kan Biblia, “huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:7-9, 12) “Siring sa nagngangarob na leon,” an paliwanag kan Biblia, si Satanas “naghahanap nin masisiba.” (1 Pedro 5:8) Parateng binibiktima kan mga leon an mga hayop na daing kalabanlaban, sa parate an mga ogbon. Madonong, kun siring, na an mga magurang na Kristiano naghahagad ki Jehova nin giya tanganing protehiran an saindang mga aki. Gurano kadakula an paghihingoa nindo tanganing magibo iyan?
4. (a) Ano an maninigong magin reaksion nin mga magurang kun maaraman ninda na igwa nin leon na nakabutas sa saindang lugar? (b) Ano an kaipuhan nin mga aki para sa proteksion?
4 Kun naaraman nindo na may nakabutas na leon sa lugar nindo, siertong an pangenot na iisipon nindo iyo na protehiran an saindong mga aki. Si Satanas naniniba. Hinihingoa niang raoton an banwaan nin Dios, sa siring ginigibo sindang bakong angay na magkamit kan pag-oyon nin Dios. (Job 2:1-7; 1 Juan 5:19) An mga aki an madaling mabiktima. Tanganing makalikay sa mga siod kan Diablo, dapat na mamidbid asin kuyogon kan mga aki si Jehova. Mahalagang marhay an kaaraman sa Biblia. “Ini nangangahulogan nin buhay na daing katapusan,” an sabi ni Jesus, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Apuera kaini, kaipuhan nin mga aki an kadonongan—an kakayahan na saboton asin iaplikar an saindang nanonodan. Mantang “an kadonongan mismo nagpapadanay na buhay sa mga nakakasadiri kaiyan,” kaipuhan na itadom nindo mga magurang an katotoohan sa puso kan saindong mga aki. (Eclesiastes 7:12) Paano daw nindo gigibohon ini?
5. (a) Paano ikakatao an kadonongan? (b) Paano ilinaladawan kan Talinhaga an halaga nin kadonongan?
5 Puede—asin maninigo—na basahan nindo sa Tataramon nin Dios an saindong mga aki. Alagad labi pa dian an kaipuhan sa pagtabang sa sainda na kamotan asin kuyogon si Jehova—kaipuhan na masabotan ninda iyan. Sa pag-ilustrar: Tibaad sabihan an aki na bago magbalyo sa tinampo kaipuhan na magheling nguna sa too asin sa wala. Pero, may mga aki na dai nagkukuyog. Taano ta dai? An ibubunga kun sia maligis nin auto tibaad daing gayo ipinaliwanag nin parate o dai ipinaliwanag sa paagi na idinodoon sa aki an peligro, na naghahale kan “kakablasan” na puedeng magbunga nin aksidente. An pagtao nin kadonongan nangangaipo nin panahon, saka dakol na pasensia. Alagad mahalaga nanggad an kadonongan! “An mga dalan kaiyan mga dalan nin pagigin nakakagayagaya,” an sabi kan Biblia, “asin an gabos na dana kaiyan katoninongan. Iyan kahoy nin buhay para sa mga nangangapot kaiyan, asin an mga higot na nangangapot kaiyan aapodon na maogma.”—Talinhaga 3:13-18; 22:15.
Pagtotokdo na Nagtatao nin Kadonongan
6. (a) Taano an mga aki ta parateng minagawe nin bakong madonong? (b) Anong pakikipag-agawan an nangyayari ngonyan?
6 Sa parate minagawe nin bakong tama an mga aki, bakong huli ta dai sinda natokdoan kan tama, kundi huli ta an pagtotokdo dai nakataros sa saindang puso—an saindang pagkatawong nasa laog. Nakikipag-agawan an Diablo na makua an puso kan mga aki. Nagpapakana sia tanganing siertohon na sinda malantad sa maraot na mga impluwensia kan saiyang kinaban. Hinihingoa man nia na aprobetsaran an saindang minanang makasalan na tendensia na gumibo nin maraot. (Genesis 8:21; Salmo 51:5) Dapat na rekonoseron nin mga magurang na igwa nin totoong nakikipag-agawan na makua an puso kan saindang mga aki.
7. Taano ta bakong igo an pagsabi sa aki kun ano an tama o sala?
7 An mga magurang parateng sinasabi sa aki an tama o sala, na iniisip na paagi kaiyan natokdoan na ninda sia nin moral na prinsipyo. Tibaad sabihon ninda sa aki na sala an magputik, maghabon, o makidorog sa siisay man na bako niang agom. Minsan siring, kinakaipuhan kan aki na magkaigwa nin mas makosog na motibasyon sa pagkuyog kisa basta sana pagkuyog huli ta iyan an sinasabi kan saiyang mga magurang. Mga ley ini ni Jehova. Maninigong manodan kan aki na an madonong na dapat gibohon iyo an kuyogon an mga togon nin Dios.—Talinhaga 6:16-19; Hebreo 13:4.
8. Anong klaseng pagtotokdo an makakatabang sa mga aki na humiro na may kadonongan?
8 An pagkakomplikado kan uniberso, an pagkalaenlaen kan mga bagay na buhay, an pagbarubago kan mga kapanahonan—an gabos na bagay na iyan makakatabang sa saday na aki na masabotan an pag-eksister kan madonong sa gabos na Kaglalang. (Roma 1:20; Hebreo 3:4) Dugang pa, maninigong tokdoan an aki na an Dios namomotan sia asin naggibo nin probisyon paagi sa atang kan Saiyang Aki tanganing tawan sia nin buhay na daing sagkod asin na mapapaogma nia an Dios paagi sa pagkuyog sa sinasabi Nia. Posibleng marhay kun siring na bobooton kan aki na paglingkodan si Jehova, sa ibong kan mga pagprobar kan Diablo na papondohon sia.—Talinhaga 22:6; 27:11; Juan 3:16.
9. (a) Ano an kaipuhan sa nagliligtas-buhay na pagtotokdo? (b) Ano an ipinagboboot na gibohon kan mga ama, asin ano an kalabot digdi?
9 An klase nin pagtotokdo na nagpoprotehir sa aki asin nagmomotibar sa saiya na gibohon an tama nagkakaipo nin panahon, atension, asin pagpaplano. Nagkakaipo iyan na akoon nin mga magurang an giya hale sa Dios. An Biblia nagsasabi: “Kamo, mga ama, . . . padagos na padakulaon [an saindong mga aki] sa disiplina asin pagtatanos nin isip ni Jehova.” (Efeso 6:4) Ano an kahulogan kaiyan? An “pagtatanos nin isip,” sa orihinal na Griego, nagtatao kan ideya nin “paglaog nin isip.” Kaya an mga ama garo man sana sinasadol na ilaog sa saindang mga aki an isip ni Jehova. Magigin proteksion nanggad iyan para sa mga aki! Kun nakatadom sa isip kan mga aki an mga kaisipan nin Dios, napoprotehiran sinda sa paggibo nin maraot.
Kamawotan na Motibado nin Pagkamoot
10. Tanganing epektibong matokdoan an saindong aki, ano an mahalagang aramon nindo?
10 Minsan siring, tanganing maotob nindo an saindong kamawotan na mapadakula nin tama an saindong aki, kaipuhan na an saindong mga paghihingoa motibado nin pagkamoot. Mahalagang bagay an marahay na komunikasyon. Aramon kun ano an nangyayari sa buhay kan saindong aki asin kun ano an mga nasa isip nia. Sa pamugtak na paagi, mataktikang enkaminaron na magtaram an saindong aki. Kun beses, tibaad mabigla kamo sa sasabihon nia. Magin maingat na marhay na dai sumobra an saindong reaksion. Imbes, maghinanyog na may madinamayon na pagmakolog.
11. Paano magigibo nin magurang na ilaog sa aki an isip ni Jehova?
11 Totoo, tibaad binabasa nindo sa saindong aki hale sa Biblia an manongod sa mga ley nin Dios na nagbabawal sa seksuwal na inmoralidad, na ginigibo pa ngani nindo iyan nin nagkapirang beses. (1 Corinto 6:18; Efeso 5:5) Tibaad ikinatudok kaini sa isip kan saindong mga aki kun ano an nakakapaogma asin dai nakakapaogma ki Jehova. Minsan siring, labi pa dian an kaipuhan tanganing ikalaog sa aki an isip ni Jehova. Kaipuhan na tabangan an mga aki na mangatanosan dapit sa kahalagahan kan mga ley ni Jehova. Kaipuhan na makombensir sinda na an saiyang mga ley tama asin kapakipakinabang asin na an pagsunod sa mga iyan iyo an tama asin mamomoton na dapat gibohon. Masasabi sanang ikinalaog nindo sa sainda an isip ni Jehova kun nangangatanosan kamo sa saindong mga aki basado sa Kasuratan tangani na akoon ninda an punto de vista nin Dios.
12. Paano matatabangan nin magurang an saiyang aki na magkaigwa nin tamang pagmansay dapit sa pagdodorog?
12 Kun pinag-oolayan an manongod sa sekso, puede kamong maghapot: “Sa paghona mo daw an pagkuyog sa ley ni Jehova na dai magdorog bago ikasal maghahale nin kaogmahan sa sarong tawo?” Enkaminaron an saindong aki na ipaliwanag an saiyang simbag. Pakatapos na repasohon an makangangalas na probisyon nin Dios sa pangangaki, puedeng ihapot nindo, “Sa paghona mo daw magibo nin mga ley an satong mamomoton na Dios tanganing halean kita kan kaogmahan sa buhay? O sa paghona mo daw ginibo nia an saiyang mga ley tanganing gibohon kitang maogma asin protehiran kita?” (Salmo 119:1, 2; Isaias 48:17) Aramon an kaisipan kan saindong aki dapit sa bagay na ini. Dangan puede kamong magtao nin mga halimbawa kun paano an seksuwal na inmoralidad nagresulta sa kamondoan asin problema. (2 Samuel 13:1-33) Paagi sa pangangatanosan sa saindong aki tanganing masabotan asin akoon nia an pagmansay nin Dios, dakol na an magigibo nindo tanganing ilaog sa saiya an isip nin Dios. Minsan siring, igwa pang ibang bagay na magigibo nindo.
13. Nangorognang mamomotibar an aki na kuyogon si Jehova kun nasasabotan nia an ano?
13 Madonong nanggad na dai sana nindo itotokdo sa saindong aki an mga resulta nin pagsuway ki Jehova kundi ipapaliwanag man nindo kun paano si Jehova personal na apektado kan satong paagi nin pamumuhay. Ipaheling sa saindong aki basado sa Biblia na puede niatong makolgan an boot ni Jehova kun dai niato gigibohon an saiyang kabotan. (Salmo 78:41) Puede kamong maghapot, “Taano ta habo mong makolgan si Jehova?” asin ipaliwanag: “Sinasabi kan kaiwal nin Dios na si Satanas na naglilingkod kita ki Jehova huli sa paslong mga dahelan asin bakong huli ta namomotan ta sia.” Dangan ipaliwanag nindo na paagi sa pagdadanay na may integridad, napagayagaya ni Job an puso nin Dios, na sa siring pinapahimutikan an putik na sahot ni Satanas. (Job 1:9-11; 27:5) Kaipuhan na masabotan kan saindong aki na depende sa saiyang gawe-gawe, magsalang mapapamondo o mapapaogma nia si Jehova. (Talinhaga 27:11) Ini asin dakol na iba pang mahalagang marhay na leksion puedeng itokdo sa mga aki paagi sa paggamit kan librong Makanood sa Dakulang Paratokdo.a
Nakakaogmang mga Resulta
14, 15. (a) Arin na mga leksion sa librong Paratokdo an nakamotibar sa mga aki? (b) Nagkaigwa nin anong marahay na mga resulta sa saindo an paggamit kan libro? (Helingon man an kahon sa pahina 18-19.)
14 Sarong lolo sa Croatia na binabasa an librong Paratokdo sa saiyang siete anyos na makoapong lalaki an nagsurat na sinabi sa saiya kan aki an minasunod: “May ipinapagibo sako si Nanay, alagad habo kong gibohon idto. Dangan nagirumdoman ko an kapitulong ‘An Pagkuyog Nakapoprotehir sa Saimo,’ kaya nagbalik ako asin sinabihan ko sia na magigin makinuyog ako sa saiya.” Mapadapit sa kapitulong “Kun Taano ta Dai Kita Maninigong Magputik,” sarong mag-agom sa Florida, E.U.A., an nagsabi: “Igwa iyan nin mga hapot na nag-aagda sa mga aki na ipahayag an saindang mga nasa boot asin admitiron an mga sala na dai kutana ninda aadmitiron.”
15 An librong Paratokdo igwa nin labing 230 retrato, asin igwa nin kapsion, o deskripsion, sa kada retrato o grupo nin mga retrato. “Parateng tinuturuhokan kan aki kong lalaki an retrato asin habong bukliton an pahina,” an sabi nin sarong mapag-apresyar na ina. “Bako sanang nakakaakit an mga retrato kundi nagtotokdo man iyan nin mga leksion, o minsan paano nagigin dahelan na maghapot an mga aki. Mapadapit sa sarong retrato na an sarong aki nagdadalan nin telebisyon sa madiklom na kuarto, naghapot an sakong aking lalaki sa tono na nagpaparisa na aram nia na igwa nin sala, ‘Nanay, ano an ginigibo kan aking lalaking iyan?’” An kapsion sa retrato nagsasabi: “Siisay an nakakaheling kan gabos niatong ginigibo?”
Mahalagang Marhay na Edukasyon Para sa Ngonyan
16. Ano an mahalagang marhay na ikatokdo sa mga aki ngonyan, asin taano?
16 Kaipuhan na maaraman kan mga aki an tama asin bakong tamang paggamit kan saindang pribadong mga parte kan hawak. Minsan siring, bakong pirmeng pasil an pakikipag-olay manongod sa bagay na ini. Sarong kolumnista sa peryodiko an nagsabi na nagdakula sia sa panahon na an paggamit sa mga tataramon na nagpapanongod sa mga organo sa sekso ibinibilang na bastos. Mapadapit sa pagtotokdo sa saiyang mga aki, sia nagsurat: “Kaipuhan kong mahale an sakong pagkasupog.” Tunay nanggad, kun huli sa pagkasupog linilikayan nin mga magurang na pag-olayan an sekso, dai iyan nagpoprotehir sa aki. Inaaprobetsaran kan mga paralupig an pagkaignorante nin aki. An Makanood sa Dakulang Paratokdo tinotokar an temang iyan sa kapakipakinabang asin may dignidad na paagi. An pagtaong impormasyon sa mga aki manongod sa sekso dai hinahale an saindang pagkainosente, mantang an dai niato pagtokdo kaiyan sa sainda puedeng magresulta sa pagkawara kan saindang pagkainosente.
17. Paano tinatabangan kan librong Paratokdo an mga magurang na tokdoan an saindang mga aki manongod sa sekso?
17 Sa kapitulo 10, kan tinotokar an maraot na mga anghel na nagdigdi sa daga asin nagkaigwa nin mga aki, hinapot an aki, “Ano an aram mo manongod sa pagdodorog?” An libro nagtatao nin simple asin may dignidad na simbag. Sa huri, ipinapaliwanag sa kapitulo 32 kun paano mapoprotehiran an mga aki sa mga paralupig. Dakol an nagbareta paagi sa surat na mahalagang marhay an siring na pagtotokdo. An saro nagsabi: “Kan darahon ko an sakong aking lalaki na si Javan sa saiyang doktor kan nakaaging semana, an doktor naghapot kun ipinaliwanag na niamo sa aki an tamang paggamit sa pribadong mga parte kan hawak. Napahanga siang marhay na nagibo na niamo ini na ginagamit an bago niatong libro.”
18. Paano ipinapaliwanag kan librong Paratokdo an pagtaong galang sa nasyonal na mga simbolo?
18 An saro pang kapitulo nagpapaliwanag kan kasaysayan sa Biblia kan tolong hoben na Hebreo na si Sadrac, Mesac, asin Abednego, na nagsayumang dumuko sa sarong imahen na nagrerepresentar sa Estado kan Babilonya. (Daniel 3:1-30) Tibaad dai maheling kan nagkapira an koneksion kan pagtaong galang sa sarong imahen asin pagsaludo sa bandera, siring kan ipinapaheling kan librong Paratokdo. Minsan siring, mangnoha an sinabi kan autor na si Edward Gaffney sa sarong interbio kan magasin na U.S. Catholic. Sinabi nia na kan sabihon saiya kan saiyang aking babae pagkatapos kan enot na aldaw kaini sa pampublikong eskuelahan na may nanodan siang “bagong pamibi sa eskuelahan,” ipinaotro nia iyan sa saiya. “Ibinugtak nia an saiyang kamot sa tangod kan saiyang puso,” sabi ni Gaffney, “asin may pag-orgolyong nagpoon, ‘Nanunumpa ako sa bandera . . .’” Nagpadagos si Gaffney: “Bigla na sana, may nagirumdoman ako. Tama an Mga Saksi ni Jehova. Igwa nin aspekto nin nasyonal na pagsamba na ipinapalakop sa satong mga eskuelahan sa amay na marhay na tangga—an lubos na daing kabaing na kaimbodan.”
Bawi an Gabos na Paghihingoa
19. Igwa nin anong mga balos an pagtotokdo sa mga aki?
19 An totoo, bawi an gabos nindong paghihingoa sa pagtotokdo sa saindong mga aki. Napahibi an sarong ina sa Kansas, E.U.A. kan maresibi an sarong surat hale sa saiyang aking lalaki. Sia nagsurat: “Mapalad akong marhay na pinadakula ako sa paagi na nakatabang sa sako na magin medyo marigon asin timbang sa emosyon. Kamo ni Tatay maninigo nanggad na tawan nin komendasyon.” (Talinhaga 31:28) Makakatabang an Makanood sa Dakulang Paratokdo sa dakol pang magurang na tokdoan an mga aki tanganing maprotehiran an mahalagang marhay na manang ini.
20. Ano an maninigong pirmeng girumdomon nin mga magurang, asin ano an maninigong magin epekto kaiyan sa sainda?
20 An satong mga aki maninigo kan gabos na panahon, atension, asin paghihingoa na ikakatao niato sa sainda. Halipot sanang panahon an pagigin aki ninda. Aprobetsaran an lambang oportunidad na makaibanan asin matabangan sinda. Nungka nindong pagbabasolan iyan. Mamomotan ninda kamo. Pirmeng girumdomon, an saindong mga aki regalo nin Dios sa saindo. Kanigoan kahalagang mana sinda! (Salmo 127:3-5) Kaya trataron sinda nin siring, na garo baga kamo maninimbag sa Dios kun paano nindo sinda pinapadakula huling an totoo, paninimbagan nindo iyan.
[Nota sa Ibaba]
a Ipinublikar kan Mga Saksi ni Jehova. Helingon an kapitulo 40, “Kun Paano Mapaoogma an Dios.”
Ano an Isisimbag Nindo?
• Taano ta kaipuhan na protehiran nin mga magurang an saindang mga aki nangorogna ngonyan?
• Anong klaseng pagtotokdo an nagtatao nin kadonongan?
• Ano an mahalagang marhay na mga isyu na ipapakipag-olay nindo sa saindong mga aki ngonyan?
• Paano nakatabang sa mga magurang an librong Paratokdo sa pagtotokdo sa saindang mga aki?
[Kahon/Mga Ritrato sa pahina 18, 19]
Sarong Libro Para sa Gabos
An Makanood sa Dakulang Paratokdo dinisenyo tanganing tabangan an mga magurang o iba pang nasa edad na na basahon asin ipakipag-olay an mga katokdoan ni Jesu-Cristo sa mga aki. Pero, an mga nasa edad na na nakabasa na mismo kan libro nagpahayag nin sinserong pag-apresyar sa nanodan ninda.
Sarong lalaki sa Texas, E.U.A., an nagsabi: “An Makanood sa Dakulang Paratokdo malinaw sa pagigin simple kaiyan, na minomotibar kita ano man an edad niato—dawa sa edad na 76, arog ko. Salamat na marhay, hale sa saro na naglilingkod ki Jehova poon pa sa pagkaniaki.”
An sarong nakabasa hale sa Londres, Inglaterra, nagbabareta: “An magayon na mga ilustrasyon seguradong makakaakit sa puso kan mga magurang asin mga aki. Marahayon an mga hapot asin pagkaareglar kaiyan, asin pambihira nanggad na maheling na tinotokar an sensitibong mga isyu, arog kan nasa kapitulo 32, ‘Kun Paano Prinotehiran si Jesus.’” Sia nagkonklusyon: “Minsan ngani daing duda na an librong ini dinisenyo sa pangenot para sa mga aki nin Mga Saksi ni Jehova, iniisip ko na maoogmang marhay an mga maestra asin iba pa na magkaigwa man nin kopya. Inaantisipar kong gamiton iyan sa maabot na mga bulan asin taon.”
Sarong babae hale sa Massachusetts, E.U.A., an nagkomento manongod sa dakol na “inandam na marhay na retrato.” Sia nagkomento: “Narisa ko na minsan ngani an libro dinisenyo para sa mga aki, an mga temang tinotokar puede man na makatabang sa sato na mga nasa edad na na mag-isip manongod sa personal na relasyon niato ki Jehova.”
“Wow! Kanigoan karahay na libro!” an kagsing nin sarong babae hale sa Maine, E.U.A. “Iyan bako sanang para sa mga aki kundi para sa sato gabos bilang mga aki nin Dios. Naabot kaiyan an sakong panlaog na pagkatawo, asin napahiro an sakong emosyon dangan pinaginhawa iyan, kaya nagkaigwa ako nin katoninongan. An pagmate ko haranihon ako ki Jehova bilang sakong Ama. Hinale nia an gabos na kakologan na nangyari sa nag-aging mga taon asin pinangyari na magin malinaw na marhay an saiyang katuyohan.” Sia nagkonklusyon: “Sinasabi ko sa gabos, ‘Basahon tabi nindo iyan.’”
Sarong babae sa Kyoto, Hapon, an nagbareta na kan nagbabasa sia sa saiyang mga makoapo, naghapot sinda nin arog kan: “‘Ano an ginigibo kan aking lalaking iyan? Taano ta inaanggotan an aking babaeng ini? Ano man an ginigibo kan ina na ini? Ano naman an leon na ini?’ Nagtotokdo iyan nin mga bagay na interesante sa sato, kaya gustohon kong marhay iyan nin orog pa kisa arin man na libro na makukua ko sa libreriya.”
Sarong ama sa Calgary, Canada, an nagsabi na kan maresibi nia tolos an libro, pinonan niang basahon iyan sa saiyang sais anyos na aking babae asin sa saiyang nuebe anyos na aking lalaki. “Ensegidang nagin marahayon an reaksion,” an bareta nia. “An sakong mga aki naghihinanyog asin nagsisimbag sa mga hapot hale sa saindang puso. Namamatean ninda na may kabtang sinda sa pag-adal, asin nagtatao iyan sa sainda nin oportunidad na ipahayag an saboot ninda. Nagin entusiastiko sinda, asin an sakong aking babae nagsasabi na gusto niang mag-adal sa bagong librong iyan barobanggi.”
Pagkatapos nin sarong pag-adal, an ama nagsabi: “Nag-olay kami kan sakong aking lalaki sa laog nin dakol na oras manongod ki Jehova asin sa saiyang mga katuyohan. Kadakol siang hapot hale sa librong iyan. Napaluha ako kan magsabi sia sako na matorog na sia asin naghapot: ‘Tatay puede pong gibohon ta giraray ini? Kadakol po akong hapot, asin gusto ko pong maaraman an gabos manongod ki Jehova.’”
[Ritrato sa pahina 15]
Mga magurang, ano an manonodan nindo sa halimbawa ni Manoa?
[Ritrato sa pahina 16]
Mga aki, ano an manonodan nindo sa halimbawa kan tolong Hebreo?
[Mga Ritrato sa pahina 17]
Mapuersang mga kasangkapan sa pagtotokdo an mga retrato asin kapsion sa librong “Paratokdo”
Anong kaputikan an sinasabi ni Ananias ki Pedro?
Siisay an nakakaheling kan gabos niatong ginigibo?