Togotan Nindo an Tataramon nin Dios na Magin Liwanag sa Saindong Dalan
“An saimong tataramon . . . liwanag sa sakong dalan.”—SALMO 119:105.
1, 2. Sa anong mga kamugtakan magigin liwanag sa satong dalan an tataramon ni Jehova?
AN TATARAMON ni Jehova magigin liwanag sa satong dalan kun totogotan niatong mangyari iyan. Tanganing kamtan an siring na espirituwal na liwanag, kaipuhan kitang magin maigot na mga estudyante kan nasusurat na Tataramon nin Dios asin iaplikar an hatol kaiyan. Dangan sana niato mamamatean an mga saboot kan salmista: “An saimong tataramon ilawan sa sakong bitis, asin liwanag sa sakong dalan.”—Salmo 119:105.
2 Estudyaran niato ngonyan an Salmo 119:89-176. Kanigoan kaabundang impormasyon an yaon sa mga bersikulong ini, na inareglar sa 11 estropa! Makakatabang sa sato an mga ini na magdanay sa dalan pasiring sa buhay na daing katapusan.—Mateo 7:13, 14.
Taano ta Dapat na Mawili sa Tataramon nin Dios?
3. Paano ipinapaheling kan Salmo 119:89, 90 na makakasarig kita sa tataramon nin Dios?
3 An pagkawili sa tataramon ni Jehova nagbubunga nin espirituwal na karigonan. (Salmo 119:89-96) An salmista nag-awit: “Sagkod sa panahon na daing talaan, O Jehova, an saimong tataramon namumugtak sa kalangitan. . . . Saimong pinasarig an daga, tanganing iyan magdanay.” (Salmo 119:89, 90) Paagi sa tataramon nin Dios—an saiyang “mga reglamento kan kalangitan”—an mga bagay sa kalangitan eksaktong minahiro sa saindang mga orbita asin an daga marigon na nakaestablisar sagkod lamang. (Job 38:31-33; Salmo 104:5) Makakasarig kita sa lambang tataramon na minaluwas sa ngoso ni Jehova; ano man na itinaram nin Dios “siertong magigin mapanggana” sa kaotoban kan saiyang katuyohan.—Isaias 55:8-11.
4. Ano an nagigibo kan pagkawili sa tataramon nin Dios para sa mga lingkod nia na nag-aagi nin makuring sakit?
4 An salmista ‘nagadan na kutana sa saiyang kasakitan kun mayo siang pagkawili sa ley nin Dios.’ (Salmo 119:92) Dai sia pinasakitan kan mga taga ibang daga; an mga paralapas nin ley na Israelita an naongis sa saiya. (Levitico 19:17) Alagad dai sia pinanluyahan nin boot huli kaini, huling namomotan nia an nagsusustenir na ley nin Dios. Sa Corinto, si apostol Pablo kaidto nasa “mga pag-alaman sa tahaw nin bakong tunay na mga tugang,” tibaad kaiba an “labi-labi karahay na mga apostol” na naghahanap nin ikakasahot tumang sa saiya. (2 Corinto 11:5, 12-14, 26) Pero, si Pablo nakatagal sa espirituwal huli ta may pagkawili sia sa tataramon nin Dios. Huling may pagkawili kita sa nasusurat na tataramon ni Jehova asin iinaaplikar an sinasabi kaiyan, namomotan niato an satong mga tugang. (1 Juan 3:15) Maski an pagkaongis sa sato kan kinaban dai nagpapangyari sa sato na malingawan an arin man sa mga instruksion nin Dios. Padagos niatong ginigibo an saiyang kabotan na may mamomoton na pakikisumaro sa satong mga tugang mantang inaantisipar niato an daing sagkod na magayagayang paglilingkod ki Jehova.—Salmo 119:93.
5. Paano hinanap ni Hadeng Asa si Jehova?
5 Sa pagpahayag kan satong debosyon ki Jehova, puede kitang mamibi: “Saimo ako. O ligtasan ako, huling hinanap ko an saimong mga pagboot.” (Salmo 119:94) Hinanap ni Hadeng Asa an Dios asin hinale an apostasiya sa Juda. Sa sarong dakulang katiriponan kan ika-15 taon kan paghade ni Asa (963 B.C.E.), an mga nag-eerok sa Juda “nakipagtipan na hanapon si Jehova.” “Itinogot [nin Dios] na sia makua ninda” asin ‘padagos sindang tinawan nin kapahingaloan sa gabos na lugar.’ (2 Cronica 15:10-15) An halimbawang ini maninigong makaenkaminar sa siisay man na naparayo sa Kristianong kongregasyon na hanapon giraray an Dios. Bebendisyonan asin poprotehiran nia an mga aktibong nakikiasosyar giraray sa saiyang banwaan.
6. Anong paggawe an maprotehir sa sato sa espirituwal na kapahamakan?
6 An tataramon ni Jehova nagtatao nin kadonongan na puedeng magprotehir sa sato sa espirituwal na kapahamakan. (Salmo 119:97-104) An mga togon nin Dios nagpapangyari sa sato na magin mas madonong kisa satong mga kaiwal. An paghimate sa saiyang mga pagirumdom nagtatao sa sato nin pakarorop, asin an ‘pag-otob sa saiyang mga pagboot nagpapangyari sa sato na gumawe na igwa nin orog na pakasabot kisa gurang na mga lalaki.’ (Salmo 119:98-100) Kun an mga tataramon ni Jehova ‘mas suabe sa satong ngaragngag kisa tangguli sa satong ngoso,’ ikakaongis asin lilikayan niato an “lambang salang dalan.” (Salmo 119:103, 104) Magseserbi ining proteksion sa sato sa espirituwal na kapahamakan mientras na nakakaatubang niato an mapaabaw-abaw, maringis, maraot na mga tawo sa huring mga aldaw na ini.—2 Timoteo 3:1-5.
Ilawan sa Satong Bitis
7, 8. Sa pag-otob kan Salmo 119:105, ano an kaipuhan niatong gibohon?
7 An tataramon nin Dios gikanan nin seguradong espirituwal na liwanag. (Salmo 119:105-112) Baga man kita linahidan na mga Kristiano o kairiba ninda na “ibang karnero,” ipinapahayag niato: “An saimong tataramon ilawan sa sakong bitis, asin liwanag sa sakong dalan.” (Juan 10:16; Salmo 119:105) An tataramon nin Dios siring sa sarong ilawan na iniilawan an satong dalan, tanganing dai kita masingkog asin mapukan sa espirituwal na paagi. (Talinhaga 6:23) Pero, kaipuhan na personal niatong togotan an tataramon ni Jehova na magin ilawan sa satong bitis.
8 Kaipuhan kitang magin arog kadeterminado kan kompositor kan Salmo 119. Determinado sia na dai sumuway sa mga pagboot nin Dios. “Nanumpa ako,” an sabi nia, “asin gigibohon ko iyan, na ootobon ko an saimong [ni Jehova] matanos na hudisyal na mga desisyon.” (Salmo 119:106) Nungka niatong pagmenoson an halaga kan regular na pag-adal sa Biblia asin pagpartisipar sa Kristianong mga pagtiripon.
9, 10. Paano niato naaaraman na an mga indibiduwal na nagdusay ki Jehova puedeng ‘mapasuway sa saiyang mga pagboot,’ alagad paano ini malilikayan?
9 An salmista dai ‘suminuway sa mga pagboot nin Dios,’ alagad puede iyan na mangyari sa sarong tawo na nagdusay ki Jehova. (Salmo 119:110) Si Hadeng Salomon suminuway, maski ngani kabilang sia sa sarong nasyon na nagdusay ki Jehova asin sa kapoonpooni guminawe kaoyon kan kadonongan na tao nin Dios. “Dawa sia pinapagkasala kan mga agom na taga ibang daga” paagi sa pag-impluwensia sa saiya na sumamba sa falsong mga dios.—Nehemias 13:26; 1 Hade 11:1-6.
10 An “paradakop nin gamgam,” si Satanas, nagbubugtak nin dakol na silo. (Salmo 91:3) Halimbawa, an sarong dating parasamba tibaad magprobar na sutsutan kita na sumuway sa dana nin espirituwal na liwanag pasiring sa kadikloman nin apostasiya. Kabilang sa mga Kristiano kaidto sa Tiatira “an babaeng si Jezabel,” posibleng sarong grupo nin mga babae na nagtotokdo sa iba na magsagibo nin idolatriya asin magkomiter nin pakikisaro. Dai kinonsinte ni Jesus an siring na karatan, asin maninigo na iyo man kita. (Kapahayagan 2:18-22; Judas 3, 4) Kun siring, mamibi kita para sa tabang ni Jehova tanganing dai kita mapasuway sa saiyang mga pagboot kundi magdanay sa liwanag nin Dios.—Salmo 119:111, 112.
Sinususteniran kan Tataramon nin Dios
11. Segun sa Salmo 119:119, paano minamansay nin Dios an mga maraot?
11 Kun dai kita noarin man masuway sa saiyang mga regulasyon, sususteniran kita nin Dios. (Salmo 119:113-120) Dai niato inooyonan an “mga nag-uurong-sulong,” kun paanong dai inooyonan ni Jesus an gabinhod na naghihingakong mga Kristiano ngonyan. (Salmo 119:113; Kapahayagan 3:16) Huling bilog na puso niatong pinaglilingkodan si Jehova, sia an ‘satong taguan’ asin sususteniran nia kita. Saiyang ‘isisikwal an gabos na minarayo sa saiyang mga regulasyon’ paagi sa paggamit nin pandadaya asin kaputikan. (Salmo 119:114, 117, 118; Talinhaga 3:32) An mga maraot na iyan minamansay nia na siring sa “nagsasabosabong ati nin metal”—mga ati na hinale sa mahahalagang metal arog kan pirak asin bulawan. (Salmo 119:119; Talinhaga 17:3) Pirme logod niatong ipaheling an pagkamoot sa mga pagirumdom nin Dios, huli ta siertong habo niatong makaiba sa mga maraot sa tambak na ati nin metal na lalaglagon!
12. Taano ta mahalaga an pagkatakot ki Jehova?
12 “Huli sa grabeng takot sa saimo [Jehova] nangigirabo an sakong laman,” an sabi kan salmista. (Salmo 119:120) Tanganing susteniran kita nin Dios bilang saiyang mga lingkod, mahalagang marhay an pagkaigwa niato nin nakakarahay na grabeng takot sa saiya, na maheheling paagi sa paglikay niato sa mga bagay na dai nia inooyonan. Reberensial na pagkatakot ki Jehova an nagpangyari ki Job na mamuhay nin matanos. (Job 1:1; 23:15) An diosnon na takot magpapangyari sa sato na magmaigot sa pamumuhay na inooyonan nin Dios ano man an kaipuhan na tagalan niato. Pero, an pakatagal nagkakaipo nin odok na pamimibi na may pagtubod.—Santiago 5:15.
Mamibi na May Pagtubod
13-15. (a) Taano ta makakatubod kita na sisimbagon an satong mga pamibi? (b) Ano an puedeng mangyari kun dai niato aram an sasabihon sa pamibi? (c) Ipaheling kun paano ikakakonektar an Salmo 119:121-128 sa satong ‘mga pag-agrangay na dai masayod’ kun kita namimibi.
13 Makakapamibi kita na may pagtubod na an Dios mahiro para sa kapakanan niato. (Salmo 119:121-128) Arog kan salmista, segurado kita na sisimbagon an satong mga pamibi. Taano? Huling namomotan niato an mga togon nin Dios “nin labi pa kisa bulawan, dawa sa dinalisay na bulawan.” Apuera dian, ‘ibinibilang niatong tama an gabos na pagboot nin Dios mapadapit sa gabos na bagay.’—Salmo 119:127, 128.
14 Dinadangog ni Jehova an satong mga kahagadan huling kita namimibi na may pagtubod asin maingat man na nagsusunod sa saiyang mga pagboot. (Salmo 65:2) Alagad paano kun igwa kita nin nakakatarantang marhay na mga problema kun beses kaya dai na niato aram an sasabihon sa pamibi? Kun siring “an espiritu mismo an nakikimaherak para sa sato na may mga pag-aagrangay na dai masayod.” (Roma 8:26, 27) Sa siring na mga panahon, inaako nin Dios an mga kapahayagan na manonompongan sa saiyang Tataramon bilang mga pamibi na nagrerepresentar sa satong mga pangangaipo.
15 An Kasuratan pano nin mga pamibi asin kaisipan na ikakakonektar sa satong ‘mga pag-agrangay na dai masayod.’ Halimbawa, estudyare an Salmo 119:121-128. An paagi nin mga kapahayagan digdi tibaad bagay sa satong mga kamugtakan. Halimbawa, kun natatakot kita sa mga pandadaya sa sato, puede niatong hagadon an tabang nin Dios arog kan ginibo kan salmista. (Bersikulo 121-123) Halimbawang kaipuhan niatong gumibo nin magabat na marhay na desisyon. Kun siring puede niatong ipamibi na logod tabangan kita kan espiritu ni Jehova na magirumdoman asin iaplikar an saiyang mga pagirumdom. (Bersikulo 124, 125) Maski ngani ‘ikinakaongis niato an lambang dalan nin kaputikan,’ tibaad kaipuhan niatong hagadon sa Dios na tabangan kita na dai madara nin sarong sugot na balgahon an saiyang ley. (Bersikulo 126-128) Kun binabasa niato an Biblia aroaldaw, an siring na nakakatabang na mga teksto tibaad sumabong sa isip niato kun nagngangayongayo kita ki Jehova.
Natatabangan Paagi sa mga Pagirumdom ni Jehova
16, 17. (a) Taano ta kaipuhan niato an mga pagirumdom nin Dios, asin paano niato maninigong mansayon iyan? (b) Ano an tibaad magin pagheling sa sato kan iba, alagad ano talaga an mahalaga?
16 Tanganing dangogon an satong pamibi asin kamtan an pabor nin Dios, kaipuhan na himateon niato an mga pagirumdom nin Dios. (Salmo 119:129-136) Mantang malilingawon kita, kaipuhan niato an marahayon na mga pagirumdom ni Jehova na magpapagirumdom sa sato kan saiyang instruksion asin mga togon. Siempre, nagpapasalamat kita sa espirituwal na liwanag na pinapasirang kan lambang bagong pakasabot sa tataramon nin Dios. (Salmo 119:129, 130) Nagpapasalamat man kita na ‘pinapasirang ni Jehova an saiyang lalauogon sa sato’ bilang pag-oyon, maski ngani ‘mga sulog nin tubig an minaturo sa satong mga mata’ huling linalapas kan iba an saiyang ley.—Salmo 119:135, 136; Bilang 6:25.
17 Seguradong kakamtan niato an padagos na pag-oyon nin Dios kun susunodon niato an saiyang matanos na mga pagirumdom. (Salmo 119:137-144) Bilang mga lingkod ni Jehova, rinerekonoser niato na igwa sia nin deretso na darahon sa satong atension an saiyang matanos na mga pagirumdom asin itao an mga iyan sa sato bilang mga togon na maninigo niatong kuyogon. (Salmo 119:138) Mantang kinuyog kan salmista an mga togon nin Dios, taano ta saiyang sinabi na: “Mayo ako nin halaga asin daing kuenta”? (Salmo 119:141) Minalataw na an pinapanongdan nia iyo an pagheling sa saiya kan saiyang mga kaiwal. Kun dai niato ikinokompromiso an satong paninindogan para sa katanosan, tibaad hamakon kita kan iba. Pero, an talagang mahalaga iyo na inooyonan kita ni Jehova huling namumuhay kita kaoyon kan saiyang matanos na mga pagirumdom.
Tiwasay Asin Matoninong
18, 19. Ano an ibinubunga kan satong pagsunod sa mga pagirumdom nin Dios?
18 An pagkuyog sa mga pagirumdom nin Dios nagpapadanay sa sato na harani sa saiya. (Salmo 119:145-152) Huling tinatawan niato nin atension an mga pagirumdom ni Jehova, suelto kitang nakakaapod sa saiya sa bilog niatong puso, asin makakalaom na dadangogon kita. Tibaad mapagmata kita “nin amay sa kaagahon” asin maghagad nin tabang. Marahayon nanggad na panahon ini tanganing mamibi! (Salmo 119:145-147) Harani man sato an Dios huling linilikayan niato an malaswang gawe asin minamansay an saiyang tataramon bilang katotoohan, arog ngani kan ginibo ni Jesus. (Salmo 119:150, 151; Juan 17:17) An satong relasyon ki Jehova nagsusustenir sa sato sa maribok na kinaban na ini asin sagkod sa saiyang dakulang guerra nin Armagedon.—Kapahayagan 7:9, 14; 16:13-16.
19 Huli sa satong hararom na paggalang sa tataramon nin Dios, nakakamtan niato an tunay na katiwasayan. (Salmo 119:153-160) Bakong arog kan mga maraot, ‘dai kita suminuway sa mga pagirumdom ni Jehova.’ Namomotan niato an mga pagboot nin Dios asin kun siring tiwasay kita sa saiyang mamomoton na kabootan. (Salmo 119:157-159) Pinupukaw kan mga pagirumdom ni Jehova an satong memorya tanganing magirumdoman niato an saiyang mga hinahagad sa sato sa espesipikong mga situwasyon. Sa ibong na lado, an mga pagboot nin Dios mga direktiba, asin gikan sa boot na rinerekonoser niato an deretso kan satong Kaglalang na giyahan kita. Huling aram niato na ‘an kabilogan kan tataramon nin Dios katotoohan’ asin na dai niato kayang giyahan an sadiri niatong lakad na kita sana, maogma niatong inaako an paggiya nin Dios.—Salmo 119:160; Jeremias 10:23.
20. Taano ta igwa kita nin “nagsosopay na katoninongan”?
20 An pagkamoot niato sa ley ni Jehova nagtatao sa sato nin nagsosopay na katoninongan. (Salmo 119:161-168) Dai hinahale sa sato kan paglamag an daing kaparehong “katoninongan nin Dios.” (Filipos 4:6, 7) Pinapahalagahan niatong marhay an hudisyal na mga desisyon ni Jehova kaya huli sa mga iyan inoomaw niato sia nin parate—“makapito sa laog kan aldaw.” (Salmo 119:161-164) “An nagsosopay na katoninongan nasa mga namomoot sa saimong ley,” an inawit kan salmista, “asin sa sainda mayo nin masisingkogan.” (Salmo 119:165) Bilang mga indibiduwal, kun namomotan asin inootob niato an ley ni Jehova, dai kita masisingkog sa espirituwal huli sa ginigibo nin iba o huli sa ano man na ibang bagay.
21. Anong mga halimbawa sa Kasuratan an nagpapaheling na dai kita kaipuhan na masingkog kun may maglataw na mga problema sa kongregasyon?
21 An dakol na indibiduwal sa rekord kan Biblia dai tinogotan an ano man na bagay na magin sarong nagdadanay na singkogan sa sainda. Halimbawa, an Kristianong lalaking si Gayo dai nasingkog kundi ‘padagos na naglakaw sa katotoohan’ sa ibong kan maraot na gawe-gawe ni Diotrefes. (3 Juan 1-3, 9, 10) Sinadol ni Pablo an mga Kristianang si Euodias asin Sintique “na magkasaro sa pag-iisip dian sa Kagurangnan,” huli ta posibleng marhay na may naglataw na mga problema sa pag-oltanan ninda. Minalataw na natabangan sinda na resolberan an saindang problema, asin padagos sindang naglingkod ki Jehova na may kaimbodan. (Filipos 4:2, 3) Kaya dai kita kaipuhan na masingkog kun may maglataw na ano man na problema sa kongregasyon. Magkonsentrar kita sa pag-otob sa mga pagboot ni Jehova, na ginigirumdom na ‘an gabos niatong dalan nasa atubangan nia.’ (Salmo 119:168; Talinhaga 15:3) Sa siring mayo nin makakahale nin permanente kan satong “nagsosopay na katoninongan.”
22. (a) Kun kinukuyog niato an Dios, anong pribilehio an mapapasato? (b) Paano niato maninigong mansayon an nagkapira na naghale sa Kristianong kongregasyon?
22 Kun pirme niatong kukuyogon si Jehova, magkakapribilehio kita na padagos na omawon sia. (Salmo 119:169-176) Paagi sa pamumuhay na kaoyon kan mga regulasyon nin Dios, kita bako sanang nagkakamit nin espirituwal na katiwasayan kundi ‘an satong mga ngabil padagos na nagsusulwak nin pag-omaw ki Jehova.’ (Salmo 119:169-171, 174) Ini an nakakalabi sa gabos na pribilehio na mapapasato sa huring mga aldaw na ini. Gusto kan salmista na padagos na mabuhay asin mag-omaw ki Jehova, alagad sa sarong dai sinabing dahelan, ‘naglagawlagaw sia siring sa sarong nawarang karnero.’ (Salmo 119:175, 176) An nagkapira na naghale sa Kristianong kongregasyon tibaad namomotan pa an Dios asin tibaad gusto pang omawon sia. Kun siring gibohon niato an bilog niatong makakaya na tabangan sinda tanganing tibaad manompongan giraray ninda an espirituwal na katiwasayan asin maeksperyensiahan an kagayagayahan nin pag-omaw ki Jehova sa kaibanan kan saiyang banwaan.—Hebreo 13:15; 1 Pedro 5:6, 7.
Nagdadanay na Liwanag Para sa Satong Dalan
23, 24. Anong mga pakinabang an nakua nindo sa Salmo 119?
23 An Salmo 119 magtatao sa sato nin pakinabang sa manlaenlaen na paagi. Halimbawa, matatabangan kita kaiyan na magsarig nin orog sa Dios, huling ipinapaheling kaiyan na ‘an paglakaw sa ley ni Jehova’ nagbubunga nin tunay na kaogmahan. (Salmo 119:1) Ipinapagirumdom sa sato kan salmista na ‘an kabilogan kan tataramon nin Dios katotoohan.’ (Salmo 119:160) Maninigo ining magpakosog kan satong pag-apresyar sa kompletong nasusurat na Tataramon nin Dios. An paghorophorop sa Salmo 119 maninigong magpahiro sa sato na pag-adalan an Kasuratan na may kaigotan. An salmista paorootrong nakimaherak sa Dios: “Tokdoan sa sako an saimong mga regulasyon.” (Salmo 119:12, 68, 135) Nakimaherak man sia: “Tokdoan mo ako nin karahayan, marahay na kaisipan asin kaaraman mismo, huli ta sa saimong mga togon ako nagtubod.” (Salmo 119:66) Marahay na arog man kaiyan an ipamibi niato.
24 Ginigibong posible kan pagtotokdo ni Jehova na kamtan niato an haraning relasyon sa saiya. Paorootrong inapod kan salmista an saiyang sadiri na lingkod nin Dios. Sa katunayan, kinaolay nia si Jehova sa nakakapukaw sa boot na mga tataramon: “Saimo ako.” (Salmo 119:17, 65, 94, 122, 125; Roma 14:8) Kanigoan na pribilehio an maglingkod asin mag-omaw ki Jehova bilang saro kan saiyang mga Saksi! (Salmo 119:7) May kagayagayahan daw kamong naglilingkod sa Dios bilang parabalangibog kan Kahadean? Kun iyo, makakasegurado kamo na padagos kamong susuportaran asin bebendisyonan ni Jehova sa pribilehiadong aktibidad na ini kun pirme kamong magtitiwala sa saiyang tataramon asin togotan iyan na magin liwanag sa saindong dalan.
Ano an Isisimbag Nindo?
• Taano ta maninigo kitang magkaigwa nin pagkawili sa tataramon nin Dios?
• Paano kita sinususteniran kan tataramon nin Dios?
• Sa anong mga paagi kita natatabangan kan mga pagirumdom ni Jehova?
• Taano ta an banwaan ni Jehova tiwasay asin nasa katoninongan?
[Ritrato sa pahina 16]
An tataramon nin Dios gikanan nin espirituwal na liwanag
[Ritrato sa pahina 17]
Kun namomotan niato an mga pagirumdom ni Jehova, nungka nia kitang ibibilang na siring sa “nagsasabosabong ati nin metal”
[Mga Ritrato sa pahina 18]
Kun aroaldaw niatong binabasa an Biblia, an nakakatabang na mga teksto puedeng sumabong tolos sa isip niato kun kita namimibi