Si Jehova Nagtatao nin “Banal na Espiritu sa mga Naghahagad sa Saiya”
“Kun kamo, minsan marigsok, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!”—LUCAS 11:13.
1. Noarin niato nangorognang kaipuhan an tabang kan banal na espiritu?
‘DAI ko ini makakaya na ako sana. Solamente paagi sa tabang kan banal na espiritu na matatagalan ko an pagbalong ini!’ Nakapagpahayag na daw kamo nin siring na odok sa pusong saboot? An kadaklan na Kristiano iyo na. Tibaad nasabi nindo iyan pakatapos na maaraman nindo na igwa kamo nin grabeng helang. O tibaad nangyari iyan kan matorog sa kagadanan an saindong agom na kaibaiba nindo sa bilog nindong buhay. O tibaad kan an dating pagkamasinggaya nindo nasalidahan nin mamondong depresyon. Sa makolog na mga panahon sa buhay, tibaad namatean nindo na kamo nakakatagal sana huli ta an banal na espiritu ni Jehova nagtao sa saindo nin “puersa na labi sa ordinaryo.”—2 Corinto 4:7-9; Salmo 40:1, 2.
2. (a) Anong mga kadepisilan an inaatubang kan tunay na mga Kristiano? (b) Anong mga hapot an eestudyaran niato sa artikulong ini?
2 Kaipuhan na atubangon kan tunay na mga Kristiano an nag-oorog na pangigipit asin pagtumang kan bakong diosnon na kinaban ngonyan. (1 Juan 5:19) Dugang pa, an mga parasunod ni Cristo sinasalakay ni Satanas na Diablo mismo, na madahas na nakikipaglaban tumang sa mga “nagkukuyog sa mga togon nin Dios asin igwa kan gibohon na pagpatotoo ki Jesus.” (Kapahayagan 12:12, 17) Kun siring, bakong makangangalas na kaipuhan niato an suporta kan espiritu nin Dios ngonyan nin orog kisa kasuarin man. Ano an puede niatong gibohon tanganing masegurado na padagos niatong aakoon nin abunda an banal na espiritu nin Dios? Asin taano ta makakasierto kita na si Jehova andam na marhay na magtao sa sato nin kosog na kinakaipuhan sa mga panahon nin pagbalo? Makukua niato an simbag sa mga hapot na ini sa duwa kan mga ilustrasyon ni Jesus.
Mamibi na May Pagkamapamirit
3, 4. Anong ilustrasyon an isinaysay ni Jesus, asin paano nia iyan iinaplikar sa pamibi?
3 An saro kan mga disipulo ni Jesus sarong beses nakiolay: “Kagurangnan, tokdoi kami kun paano mamibi.” (Lucas 11:1) Bilang simbag, itinao ni Jesus sa saiyang mga disipulo an duwang magkakonektadong ilustrasyon. An enot manongod sa sarong tawo na nag-iistimar nin bisita, asin an ikaduwa manongod sa sarong ama na naghihinanyog sa saiyang aki. Estudyaran niato an kada saro kan duwang ilustrasyon na ini.
4 Si Jesus nagsabi: “Siisay sa saindo an magkakaigwa nin sarong katood asin maduman sa saiya sa matangang banggi asin masabi sa saiya, ‘Katood, pautangon mo ako nin tolong tinapay, huli ta sarong katood ko an nag-abot pa sana sa sako hale sa pagbiahe asin mayo akong ikakapakakan sa saiya’? Asin an sarong iyan hale sa laog magsasabi bilang simbag, ‘Dai mo ako pagdisturbohon. An pinto serado na, asin an saradit kong aki kaiba ko sa higdaan; dai ako makakabangon asin makakatao sa saimo nin ano man.’ Ako nagsasabi saindo, Minsan ngani sia dai mabangon asin matao sa saiya nin ano man huli sa pagigin saiyang katood, tunay na huli sa saiyang pusoan na pamimirit sia mabangon asin itatao sa saiya an ano man na kaipuhan nia.” Sa siring, ipinaliwanag ni Jesus kun paano minaaplikar an ilustrasyon na ini sa pamimibi, na sinasabi: “Huli kaiyan isinasabi ko sa saindo, Padagos kamong maghagad, asin iyan itatao sa saindo; padagos kamong maghanap, asin iyan makukua nindo; padagos kamong magtuktok, asin iyan bubukasan para sa saindo. Huli ta an gabos na naghahagad nag-aako, asin an gabos na naghahanap nakakakua, asin sa gabos na nagtutuktok iyan bubukasan.”—Lucas 11:5-10.
5. Ano an itinotokdo sa sato kan ilustrasyon manongod sa mapamirit na tawo dapit sa satong saboot kun namimibi?
5 Ipinapaheling kan malinaw na ilustrasyon na ini nin sarong mapamirit na tawo kun ano an maninigong magin saboot niato kun kita namimibi. Mangnoha na sinabi ni Jesus na nahimo kan tawo na makua an kinakaipuhan nia “huli sa saiyang pusoan na pamimirit.” (Lucas 11:8) An pananaram na “pusoan na pamimirit” saro sanang beses na minalataw sa Biblia. Trinadusir iyan hale sa Griegong tataramon na literal na nangangahulogan na “pagkadaing supog.” An pagkadaing supog sa parate nagpaparisa nin makanos na ugale. Minsan siring, kun an pagkadaing supog o pagkamapamirit ginigibo na may marahay na dahelan, puede iyan na magin kaomaw-omaw na kualidad. Iyan an kamugtakan kan kag-istimar nin bisita sa ilustrasyon. Dai sia nakakamate nin ano man na supog sa paghagad na may pagkamapamirit kan saiyang kinakaipuhan. Huling ipinepresentar ni Jesus an kag-istimar na ini bilang halimbawa para sa sato, an satong mga pamibi maninigo man na magin mapamirit. Gusto ni Jehova na kita ‘padagos na maghagad, padagos na maghanap, padagos na magtuktok.’ Bilang simbag, sia ‘matao nin banal na espiritu sa mga naghahagad sa saiya.’
6. Kan aldaw ni Jesus, paano minansay an kostumbre nin pag-istimar sa mga bisita?
6 Ipinapaheling sa sato ni Jesus bako sanang kun paano kita maninigong mamibi—na may pusoan na pamimirit—kundi pati kun taano ta maninigo niatong gibohon iyan. Tanganing masabotan nin malinaw an leksion na iyan, maninigo niatong estudyaran kun paano minansay kan mga naghinanyog sa ilustrasyon ni Jesus manongod sa mapamirit na kag-istimar an kostumbre nin pag-istimar sa mga bisita. Kadakol na teksto sa Kasuratan an nagpapaheling na sa mga panahon kan Biblia, an pag-asikaso sa mga bisita sarong kostumbre na isinaboot na marhay, nangorogna kan mga lingkod nin Dios. (Genesis 18:2-5; Hebreo 13:2) An dai pakapaheling nin pag-istimar sarong kasusupgan. (Lucas 7:36-38, 44-46) Nasa isip iyan, helingon ta giraray an estorya ni Jesus.
7. Taano an kag-istimar sa ilustrasyon ni Jesus ta dai nasupog na pukawon an saiyang katood?
7 An kag-istimar sa ilustrasyon nagkaigwa nin bisita sa kamatangaan nin banggi. An kag-istimar napiritan na magserbi nin kakanon sa saiyang bisita alagad ta ‘mayong ikakapakakan sa saiya.’ Sa saiyang pagmansay, saro ining emerhensia! Kaipuhan na makakua sia nin tinapay, ano man an mangyari. Kaya nagduman sia sa saro niang katood asin dai nasusupog na pinukaw nia ini. “Katood, pautangon mo ako nin tolong tinapay,” an kurahaw kan kag-istimar. Nagpumirit sia sa saiyang kahagadan sagkod na makua nia an saiyang kaipuhan. Kaidto sanang makua nia iyan, kan yaon na sa saiya an mga tinapay, na sia magigin angay na kag-istimar.
Mientras na Orog na Kaipuhan—Orog Man an Paghagad
8. Ano an mapahiro sa sato na mamibi na may pagkamapamirit para sa tabang kan banal na espiritu?
8 Ano an ipinapaheling kan ilustrasyon na ini manongod sa dahelan kun taano ta kita namimibi na may pagkamapamirit? An lalaki padagos na naghagad nin tinapay huli ta naniniwala sia na an pagkaigwa nia kan mga tinapay na idto biyong kaipuhan tanganing magibo an saiyang obligasyon bilang kag-istimar. (Isaias 58:5-7) Kun mayo nin tinapay, may pagkukulang sia. Kaagid kaiyan, huling narerealisar niato na biyong kaipuhan an espiritu nin Dios tanganing magibo an satong ministeryo bilang tunay na mga Kristiano, padagos kitang namimibi sa Dios, na hinahagad an espiritung iyan. (Zacarias 4:6) Kun mayo kaiyan, dai kita magigin mapanggana. (Mateo 26:41) Nasasabotan daw nindo an mahalagang konklusyon na makukua niato sa ilustrasyon na ini? Kun minamansay niato an espiritu nin Dios bilang sarong bagay na kaipuhan niatong marhay, posibleng marhay na magpupumirit kita sa paghagad kaiyan.
9, 10. (a) Iilustrar kun taano ta kaipuhan niato na magin mapamirit sa paghagad sa Dios para sa tabang kan saiyang espiritu. (b) Ano an maninigo niatong ihapot sa satong sadiri, asin taano?
9 Tanganing iaplikar an leksion na ini sa kamugtakan sa presenteng panahon, imahinaron na an saro sa kapamilya nindo nagkahelang sa kamatangaan nin banggi. Pupukawon daw nindo an sarong doktor tanganing hagadon an saiyang tabang? Dai kun bako man na grabe an namamatean kan pasyente. Minsan siring, kun inaatake sia sa puso, dai kamo masusupog na umapod nin doktor. Taano? Huling napapaatubang kamo sa emerhensia. Narerealisar nindo na biyong kaipuhan an ekspertong tabang. An dai paghagad nin tabang puedeng magresulta sa kagadanan. Kaagid kaiyan, an tunay na mga Kristiano napapaatubang sa garo baga nagpapadagos na emerhensia. Total, si Satanas naglalakaw siring sa “nagngangarob na leon,” na naghihingoang sibaon kita. (1 Pedro 5:8) Tanganing kita magdanay na buhay sa espirituwal, an tabang kan espiritu nin Dios biyong kaipuhan. An dai paghagad kan tabang nin Dios puedeng ikagadan. Huli kaini, hinahagad niato sa Dios an tabang kan saiyang banal na espiritu na may pusoan na pamimirit. (Efeso 3:14-16) Solamente paagi sa paggibo kaiyan na mapapagdanay niato an kosog na kinakaipuhan tanganing “makatagal sagkod sa katapusan.”—Mateo 10:22; 24:13.
10 Kun siring, importante na kita pumondo nguna kun beses asin hapoton an satong sadiri, ‘An totoo, gurano kamapamirit kan sakong mga pamibi?’ Girumdomon, kun lubos niatong narerealisar na kaipuhan niato an tabang nin Dios, an satong mga pamibi para sa tabang kan banal na espiritu magigin orog na mapamirit.
Ano an Nagpapahiro sa Sato na Mamibi na May Kompiansa?
11. Paano iinaaplikar ni Jesus sa pamibi an ilustrasyon manongod sa sarong ama asin saiyang aki?
11 Itinatampok kan ilustrasyon ni Jesus manongod sa mapamirit na kag-istimar an saboot kan namimibi—an may pagtubod. Itinatampok kan sunod na ilustrasyon an saboot kan nagdadangog sa mga pamibi—si Jehova Dios. Si Jesus naghapot: “An totoo, siisay na ama dian sa saindo an, kun an saiyang aki humagad nin sira, tibaad tawan sia nin halas imbes na sira? O kun sia humagad man nin sogok, matao sa saiya nin amamatak?” Si Jesus nagpadagos tanganing magtao nin aplikasyon, na nagsasabi: “Kun siring, kun kamo, minsan marigsok, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!”—Lucas 11:11-13.
12. Paano itinatampok kan ilustrasyon dapit sa ama na dinadangog an hinahagad kan saiyang aki an pagigin andam ni Jehova na simbagon an satong mga pamibi?
12 Sa halimbawang ini nin sarong ama na itinatao an hinahagad kan saiyang aki, ihinahayag ni Jesus kun ano an namamatean ni Jehova manongod sa mga minadolok sa saiya sa pamibi. (Lucas 10:22) Enot, mangnoha an pagkakalaen. Bakong arog kan lalaki sa enot na ilustrasyon na habong humiro tanganing itao an hinahagad na tabang, si Jehova siring sa nagmamakolog na tawong magurang, na galagang humiro tanganing itao an hinahagad kan saiyang aki. (Salmo 50:15) Orog pang ihinayag ni Jesus an pagigin andam ni Jehova na tabangan kita paagi sa pangangatanosan na an langitnon na Ama nakakalabi sa tawong ama. Sinabi nia na kun an tawong ama, minsan ngani “marigsok” huli sa minanang pagkamakasalan, nagtatao nin marahay na regalo sa saiyang aki, gurano pa daw na dai niato puedeng asahan an satong langitnon na Ama, na maboot, na dai magtao nin banal na espiritu sa saiyang pamilya nin mga parasamba!—Santiago 1:17.
13. Ano an masesegurado niato kun kita namimibi ki Jehova?
13 Ano an leksion para sa sato? Makakakompiar kita na kun mahagad kita sa satong langitnon na Ama nin banal na espiritu, sia andam na marhay na itao an satong hinahagad. (1 Juan 5:14) Kun paorootro kitang minadolok sa saiya sa pamibi, nungka na garo baga sasabihon ni Jehova: “Dai mo ako pagdisturbohon. An pinto serado na.” (Lucas 11:7) Sa kabaliktaran, si Jesus nagsabi: “Padagos kamong maghagad, asin iyan itatao sa saindo; padagos kamong maghanap, asin iyan makukua nindo; padagos kamong magtuktok, asin iyan bubukasan para sa saindo.” (Lucas 11:9, 10) Iyo, ‘sisimbagon kita ni Jehova sa aldaw na kita mag-apod.’—Salmo 20:9; 145:18.
14. (a) Anong salang ideya an nakakapurisaw sa nagkapira na napapaatubang sa mga pagbalo? (b) Kun napapaatubang sa mga pagbalo, taano ta makakapamibi kita ki Jehova na may kompiansa?
14 An ilustrasyon ni Jesus manongod sa nagmamakolog na ama nagdodoon man na an karahayan ni Jehova nakakalabing marhay sa karahayan na ipinapaheling nin siisay man na tawong magurang. Huli kaini, mayo sa sato an maninigong mag-isip noarin man na an mga pagbalo na tibaad inaagihan niato siertong kapahayagan nin pagkaanggot nin Dios sa sato. An satong pangenot na kaiwal, si Satanas, iyo an gustong papag-isipon kita nin arog kaiyan. (Job 4:1, 7, 8; Juan 8:44) Mayo nin basehan sa Kasuratan para sa siring na nagkokondenar sa sadiring mga kaisipan. Dai kita binabalo ni Jehova paagi sa “marompot na mga bagay.” (Santiago 1:13) Dai sia nagtatao sa sato nin arog sa halas o arog sa amamatak na pagbalo. An satong langitnon na Ama nagtatao nin “marahay na mga bagay sa mga naghahagad sa saiya.” (Mateo 7:11; Lucas 11:13) Sa katunayan, mientras na orog niatong nasasabotan an karahayan ni Jehova asin an pagigin andam nia na tabangan kita, orog man kitang mapapahiro na mamibi na may kompiansa. Mantang ginigibo niato iyan, kita makakapagpahayag man nin mga saboot na kapareho kan sa salmista na nagsurat: “Totoong nagdangog an Dios; nagtao sia nin atension sa tingog nin sakong pamibi.”—Salmo 10:17; 66:19.
Kun Paanong an Banal na Espiritu Iyo an Paratabang sa Sato
15. (a) Ano an ipinanuga ni Jesus mapadapit sa banal na espiritu? (b) Ano an sarong paagi na tinatabangan kita kan banal na espiritu?
15 Dai nahaloy bago an saiyang kagadanan, inotro ni Jesus an pag-asegurar na itinao nia sa saiyang mga ilustrasyon. Nagtataram manongod sa banal na espiritu, sinabihan nia an saiyang mga apostol: “Makikimaherak ako sa Ama asin tatawan nia kamo nin saro pang paratabang tanganing makaibanan nindo sagkod lamang.” (Juan 14:16) Sa siring, nanuga si Jesus na an paratabang, o banal na espiritu, makakaibanan kan saiyang mga parasunod sa mga panahon na maabot, kaiba na an satong panahon. Ano an sarong makahulogan na paagi na naeeksperyensiahan niato ngonyan an siring na suporta? Tinatabangan kita kan banal na espiritu na matagalan an manlaenlaen na pagbalo. Paano? Si apostol Pablo, na napaatubang mismo sa mga pagbalo, isinaysay sa sarong surat sa mga Kristiano sa Corinto kun paano sia tinabangan kan espiritu nin Dios. Estudyaran niato sa halipot an saiyang isinurat.
16. Paano nakakaagid an situwasyon niato sa situwasyon ni Pablo?
16 Enot, prangkang sinabi ni Pablo sa mga kapagtubod nia na sia may inaatubang na “sarong tunok sa laman,” na sarong klase nin pagbalo. Dangan, sia nagsabi: “Ako tolong beses na nakimaherak sa Kagurangnan [na Jehova] na iyan mahale sa sako.” (2 Corinto 12:7, 8) Dawa ngani nakimaherak si Pablo sa Dios na haleon an saiyang helang, dai iyan nawara. Tibaad napapaatubang kamo sa kaagid na situwasyon ngonyan. Arog ni Pablo, tibaad namibi na kamo na may pamimirit asin kompiansa, na hinahagad ki Jehova na logod haleon an sarong pagbalo. Minsan siring, sa ibong kan saindong paorootrong pakimaherak, inaatubang pa man giraray nindo an problema. Nangangahulogan daw iyan na dai sinimbag ni Jehova an saindong mga pamibi asin na dai kamo tinatabangan kan saiyang espiritu? Dai nanggad! (Salmo 10:1, 17) Mangnohon an sunod na sinabi ni apostol Pablo.
17. Paano sinimbag ni Jehova an mga pamibi ni Pablo?
17 Bilang simbag sa mga pamibi ni Pablo, sinabi saiya nin Dios: “An sakuyang dai na kutana maninigong kabootan igo na para sa saimo; huli ta an sakuyang puersa sinasangkap sa kaluyahan.” Si Pablo nagsabi: “Kun siring, ogmahon pa akong maghambog kun dapit sa sakong mga kaluyahan, tanganing an kapangyarihan kan Cristo magdanay sa ibabaw ko na siring sa sarong tolda.” (2 Corinto 12:9; Salmo 147:5) Huli kaini, naeksperyensiahan ni Pablo na paagi ki Cristo, an mapuersang proteksion nin Dios ilinindong sa saiya siring sa sarong tolda. Ngonyan, sinisimbag ni Jehova an satong mga pamibi sa kaparehong paagi. Ilinilindong nia an saiyang proteksion sa saiyang mga lingkod siring sa sarong sirongan.
18. Taano ta nakakaya niatong tagalan an mga pagbalo?
18 Siempre, dai pinapapondo kan tolda an bolos nin oran o an huyop nin doros, alagad talagang nagtatao iyan nin proteksion tumang sa mga elementong iyan. Kaagid kaiyan, an sirongan na itinatao kan “kapangyarihan kan Cristo” dai pinapapondo an mga pagbalo na minaabot sa sato o mga kasakitan na ipinapaabot sa sato. Pero, talagang nagtatao iyan nin espirituwal na proteksion tumang sa nakakadanyar na mga elemento kan kinaban na ini asin sa mga pagsalakay kan namamahala kaiyan, si Satanas. (Kapahayagan 7:9, 15, 16) Kun siring, dawa kun kamo napapaatubang sa sarong pagbalo na dai ‘minahale sa saindo,’ makakasierto kamo na naaaraman ni Jehova an saindong pagmamaigot asin na hinimate nia an ‘tingog kan saindong pagsuriyaw.’ (Isaias 30:19; 2 Corinto 1:3, 4) Si Pablo nagsurat: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”—1 Corinto 10:13; Filipos 4:6, 7.
19. Ano an determinado nindong gibohon, asin taano?
19 Totoo, karakteristiko kan presenteng “huring mga aldaw” kan bakong diosnon na kinaban na ini an “delikadong mga panahon na masakit pakibagayan.” (2 Timoteo 3:1) Dawa siring, para sa mga lingkod nin Dios, an mga panahon na ini bakong imposibleng atubangon. Taano ta bako? Huli sa suporta asin proteksion kan banal na espiritu nin Dios, na andam asin abunda na itinatao ni Jehova sa gabos na naghahagad kaiyan sa saiya na may pamimirit asin kompiansa. Kun siring, logod na kita magin desidido na padagos na mamibi aroaldaw para sa tabang kan banal na espiritu.—Salmo 34:6; 1 Juan 5:14, 15.
Ano an Isisimbag Nindo?
• Ano an kaipuhan na gibohon niato tanganing akoon an banal na espiritu nin Dios?
• Taano ta makakakompiar kita na sisimbagon ni Jehova an satong mga pamibi para sa tabang kan banal na espiritu?
• Paano kita tinatabangan kan banal na espiritu na matagalan an mga pagbalo?
[Ritrato sa pahina 21]
Ano an manonodan niato sa ilustrasyon ni Jesus manongod sa mapamirit na kag-istimar?
[Ritrato sa pahina 22]
Kamo daw namimibi na may pagkamapamirit para sa tabang kan banal na espiritu nin Dios?
[Ritrato sa pahina 23]
Ano an manonodan niato manongod ki Jehova sa ilustrasyon dapit sa may pagmakolog na ama?