Estorya nin Buhay

An Tamang mga Pagpili Nagbunga nin Bilog na Buhay na mga Bendisyon

Isinaysay ni Paul Kushnir

KAN 1897 nagbalyo an sakong mga apoon gikan sa Ucrania pasiring sa Canada asin nag-istar harani sa Yorkton, Saskatchewan. Nag-abot sinda kaiba an apat na aki—tolong lalaki asin sarong babae. Kan 1923 an babae, si Marinka, nagin sakong ina; ikapitong aki nia ako. An buhay kaidto simple alagad tiwasay. Igwa kami nin masustansiang pagkakan asin maimbong na gubing, asin itinatao kan gobyerno an pundamental na mga serbisyo. An makikatood na kataraed tolos na nagtatarabangan sa darakulang trabaho. Durante kan tiglipot nin 1925, saro sa Mga Estudyante sa Biblia, na apod kaidto sa Mga Saksi ni Jehova, an nagdalaw sa samo. An pagdalaw na iyan an nagpahiro sa samo na gumibo nin mga pagpili na ipinagpapasalamat ko sagkod ngonyan.

An Katotoohan sa Biblia Luminaog sa Samong Harong

Inako ni Nanay an nagkapirang pulyeto gikan sa Estudyante sa Biblia asin dai nahaloy narekonoser nia an tanog nin katotoohan. Nagin marikas an pag-oswag nia sa espirituwal asin nabautismohan sia kan 1926. Kan magin Estudyante sa Biblia si Nanay, nagtao iyan sa samong pamilya nin biyong bagong pagmansay sa buhay. An samong harong nagin sarong lugar nin pagkamapag-istimar. An nagbibiaheng mga paraataman, na inapod pilgrim, asin ibang Estudyante sa Biblia parateng nakikidagos sa samo. Kan 1928 ipinadalan sa samo kan nagbibiaheng paraataman an “Eureka Drama,” sarong pinasimpleng bersion kan “Photo-Drama of Creation.” Nagsubli sia samo na mga aki nin sarong kawatan na talapang na naglalagatik. Pagpinalagatik nia an talapang, iyan man an pagbago kan slide. Ipinag-orgolyo ming marhay an samong kontribusyon!

An sarong nagbibiaheng paraataman na an ngaran Emil Zarysky parateng binibisita kami gamit an saiyang harong na de rueda. Kun beses iniibanan sia kan saiyang husto na sa edad na aking lalaki, na nag-enkaminar sa samo na mga aki na pag-isipan an manongod sa pagigin bilog na panahon na mga ministro, o mga payunir. Dakol na payunir an nagdagos man sa harong niamo. Sarong beses, pinasubli kan sakong ina an sarong payunir nin polo mantang pinapakarhay nia an polo kaini. Dai tinutuyong nadara iyan kan payunir kan maghale sia. Pakalihis nin harohalawig na panahon, ipinadara nia iyan asin naghagad sia nin dispensasyon huli sa pagkaatraso. “Dai ako nin pambayad na dies sentimos para sa selyo,” an surat nia. Minawot niamo na saiya na kutana an polo! Naglaom ako na pag-abot nin panahon maaarog ko an siring na mapagsakripisyong mga payunir. Nagpapasalamat ako sa mapag-istimar na espiritu ni Nanay, na nagparahay sa kualidad kan buhay niamo asin nagpakosog kan pagkamoot niamo sa kasararoan nin magturugang.—1 Pedro 4:8, 9.

Dai nagin Estudyante sa Biblia si Tatay; pero dai nia kami kinontra. Kan 1930 tinogotan pa ngani nia an mga tugang na gamiton an saiyang dakulang kamalig para sa sarong aldaw na asamblea. Minsan ngani siete anyos pa sana ako, an kagayagayahan asin dignidad kan okasyon na iyan nakatudok sa isip ko. Nagadan si Tatay kan 1933. Si Nanay, na kaidto balo na may walong aki, dai suminuway dawa kadikit sa saiyang determinasyon na papagdanayon kami sa dalan nin tunay na pagsamba. Sinesegurado nia na nag-aatender ako sa mga pagtiripon kaiba nia. Kan panahon na iyan, an mga iyan garo baga mayo na nin katapusan, asin minawot ko na kutana makaayon ako sa ibang mga aki, na tinotogotan na magkawat sa luwas. Minsan siring, huli sa paggalang ki Nanay, nagdanay ako sa mga pagtiripon. Mantang si Nanay nagluluto, parateng nagkokotar sia nin teksto dangan hinahapot nia ako kun saen iyan manonompongan sa Biblia. Kan 1933 nakatama kami sa ani, asin ginamit ni Nanay an ekstrang ginanar tanganing magbakal nin kotse. An nagkapirang kataraed krinitikar sia huli sa pagsayang nin kuarta, alagad naglaom sia na makakatabang sa samo an kotse sa teokratikong mga aktibidad mi. Tama sia.

Tinabangan Ako kan Iba na Gumibo nin Tamang mga Pagpili

Minaabot an panahon na an sarong hoben kaipuhan na gumibo nin mga pagpili na makakaapektar sa saiyang ngapit. Kan umabot an panahon na iyan sa sakong matuang mga tugang na babae, si Helen asin Kay, sinda nagpoon na magpayunir. An sarong payunir na naistimar sa samong harong iyo si John Jazewsky, sarong marahayon na hoben na lalaki. Pinakiolayan ni Nanay si John na magdanay nguna samo tanganing magtabang sa oma. Sa huri, naagom ni John si Kay, asin naglingkod sinda bilang mga payunir harani sa samong harong. Kan ako 12 anyos na, inimbitaran ninda ako na ibanan sinda sa paglilingkod sa langtad durante kan bakasyon ko sa eskuelahan. Nagtao iyan sa sako nin oportunidad na manamitan an pagpapayunir.

Pag-abot nin panahon, nakaya ko asin kan sakong tugang na si John na maski paano maneharon an oma. Huli kaiyan nagagamit ni Nanay an mga bulan nin tig-init tanganing maglingkod bilang saro sa inaapod ngonyan na auxiliary payunir. Gamit nia an karetela na may duwang rueda na ginuguyod nin gurang nang kabayo. Saul an inginaran ni Tatay sa sutil na gurang nang kabayo, alagad para ki Nanay iyan sarong masinunod na linalang na kaya niang rendahan. Namotan niamo ni John an oma, alagad kada magpuli si Nanay hale sa paglilingkod sa langtad asin ineestorya nia an mga eksperyensia nia, an samong pagkamoot paorog nang paorog na naparayo sa oma asin napasiring sa ministeryong pagpapayunir. Kan 1938, dinugangan ko an mga aktibidad ko sa paglilingkod sa langtad, asin kan Pebrero 9, 1940, nabautismohan ako.

Paghaloyhaloy, ninombrahan ako bilang lingkod sa kongregasyon. Ako an nag-asikaso sa mga rekord kan kongregasyon asin naggagayagaya ako kada may pag-oswag. Igwa ako nin personal na hinuhulitan na teritoryo sa sarong banwaan na mga 16 kilometros gikan sa harong. Durante nin tiglipot, nagbabaklay ako pasiring duman kada semana asin nagtotorog ako sa laog nin saro o duwang banggi sa kuarto sa ibabaw kan kisame kan harong nin sarong pamilya na nagpaheling nin interes sa Biblia. Pakatapos nin pakikipag-olay sa parahulit na Luterano—na durante kaiyan medyo dai ako nagin mataktika—hinuma nia ako na aapodon nia an pulis kun dai ko babayaan an saiyang aripompon. Lalo logod akong nagin determinado na magpadagos huli kaiyan.

Kan 1942 an tugang ko na si Kay asin an saiyang agom, si John, nagplano na mag-atender sa kombension sa Cleveland, Ohio, sa Estados Unidos. Naogma akong marhay na maimbitaran na umiba sa sainda. An kombension na iyan saro sa pinakamarahay na nangyari kasuarin man sa sako. Pinakosog kaiyan an sakong mga plano para sa ngapit. Kan si Tugang na Nathan Knorr, na kan panahon na idto iyo an nangengenot sa pambilog na kinaban na gibohon, nagpaluwas nin nakakamotibar na pangapodan para sa 10,000 na payunir, tolos na nagdesisyon ako na magin saro sa sainda!

Kan Enero 1943, si Henry, sarong nagbibiaheng ministro, nagdalaw sa samong kongregasyon. Nagtao sia nin nakakapukaw sa boot na pahayag na nagpamate samo nin entusiasmo. Kan aldaw pakatapos kan saiyang pahayag, an temperatura -40 grado Celsio, asin nagin mas malipot pa ngani iyan huli sa makosog na doros hale sa amihanan-solnopan. Sa parate nagdadanay kami sa laog kan harong durante kan siring na biglang paggrabe nin lipot, alagad si Henry gustong-gustong magluwas tanganing maglingkod. Sia asin an iba pa nagsakay sa lunadan na guyod-guyod nin kabayo na may de kahoy na kalan pasiring sa sarong baryo na 11 kilometros an rayo. Solo akong nagdalaw sa sarong pamilya na may limang aking lalaki. Inako ninda an alok ko na adalan sinda sa Biblia, asin pag-abot nin panahon maogmang inako ninda an katotoohan.

Paghuhulit sa Irarom nin Pagprohibir

Durante kan Guerra Mundial II, prohibido an pang-Kahadean na gibohon sa Canada. Kaipuhan niamong itago an samong mga literatura sa Biblia, asin dakol an matatagoan sa oma niamo. Parate kaming dinadalaw kan mga pulis alagad nungka sindang nakakua nin ano man. Mantang naghuhulit, Biblia sana an gamit niamo. Nagtitiripon kami bilang saradit na grupo, asin kami kan sakong tugang na si John an pinili na magin sekretong paradara nin mensahe.

Durante kan guerra, nakikabtang an kongregasyon niamo sa bilog na nasyon na pagdistribwir kan pulyeto na End of Nazism. Nagluwas kami sa kamatangaan nin banggi. Ninerbios akong marhay mantang patago ming dinumanan an lambang harong asin nagwawalat kami nin pulyeto sa may pinto. Idto an pinakamakatatakot na bagay na ginibo ko kasuarin man. Nakakaginhawa nanggad kan ikahatod niamo an huring kopya kan pulyetong iyan! Dangan dali-dali kaming nagbalik sa nakaparadang kotse, sinierto na presente an gabos, asin tolos na naghale sa kadikloman nin banggi.

Pagpapayunir, mga Bilanggoan, Asin mga Asamblea

Kan Mayo 1, 1943, nagpaaram ako ki Nanay. May 20 dolyar sa sakong pitaka asin sarong sadit na maleta, nagbiahe ako pasiring sa enot kong destino sa pagpapayunir. Mapag-istimar na inako ako ni Tugang na Tom Troop asin kan saiyang mamomoton na pamilya sa Quill Lake, Saskatchewan. Kan suminunod na taon, nagduman ako sa sarong napapasuway na teritoryo sa Weyburn, Saskatchewan. Mantang naghuhulit sa tinampo kan Disyembre 24, 1944, inaresto ako. Pakatapos nin harohalawig na panahon sa sarong lokal na karsel, dinara ako sa sarong kampo sa Jasper, Alberta. Kaiba ko an iba pang Saksi duman, na nasa palibot mi an kahangahanga sa kadakulaan na linalang ni Jehova, an Canadian Rockies. Sa enot na kabtang kan 1945, tinogotan kami kan mga opisyal kan kampo na mag-atender sa sarong pagtiripon sa Edmonton, Alberta. Nagtao si Tugang na Knorr nin nakakaogmang report manongod sa pag-oswag kan pambilog na kinaban na gibohon. Hinidaw niamo an aldaw na matatapos an pagdetener sa samo asin lubos na makakapakikabtang giraray kami sa ministeryo.

Kan paluwason ako, ipinadagos ko an pagpapayunir. Dai nahaloy pakatapos kaiyan, iinanunsiar na an “Paghiwas kan Gabos na Nasyon” na Asamblea gigibohon sa Los Angeles, California. An sarong tugang na lalaki sa sakong bagong destino sa pagpapayunir naglaag nin mga bangko sa saiyang trak na magkakaigo an 20 pasahero. Kan Agosto 1, 1947, pinonan mi an sarong dai malilingawan na pagbiahe sa distansiang 7,200 kilometros na nag-aagi sa mga kaomahan, desierto, asin nakakagulat na tanawon, kaiba na an nasyonal na mga parke nin Yellowstone asin Yosemite. An bilog na pagbiahe naglawig nin 27 aldaw—sarong marahayon na eksperyensia!

An mismong kombension saro nang bendisyon na nungkang malilingawan. Tanganing lubos na makikabtang sa okasyon, naglingkod ako bilang attendant kun aldaw asin bilang bantay kun banggi. Pakaatender sa sarong miting para sa mga interesadong maglingkod bilang misyonero, nagllenar ako nin aplikasyon alagad daing gayo ako nag-asang aapodan ako. Mientras tanto, kan 1948, nagboluntaryo akong maglingkod bilang payunir sa probinsia nin Quebec sa Canada.—Isaias 6:8.

Sa Gilead Asin Pakatapos Kaiyan

Kan 1949, ako naogmang marhay na maresibi an imbitasyon na mag-atender sa ika-14 klase kan Paadalan sa Biblia kan Watchtower sa Gilead. An pagsasanay na iyan nagpakosog kan pagtubod ko asin orog akong irinani ki Jehova. Si John asin Kay naggradwar na sa ika-11 klase asin naglilingkod bilang mga misyonero sa Amihanan na Rodesia (ngonyan Zambia). An sakong tugang na si John naggradwar sa Gilead kan 1956. Kaiba an saiyang agom, si Frieda, naglingkod sia sa Brazil sa laog nin 32 na taon sagkod sa saiyang kagadanan.

Sa aldaw kan gradwasyon ko kan Pebrero 1950, naparigon na marhay an boot ko kan duwang telegrama, an saro gikan ki Nanay asin an saro gikan sa pamilyang Troop sa Quill Lake. An telegrama kan ikaduwa, na may titulo na “Sadol sa Naggradwar,” nagsasabi: “Espesyal na marhay an aldaw na ini para saimo. Sarong aldaw na pirme mong papahalagahan na marhay; asin logod na mapasaimo man an kapangganahan saka kaogmahan sa saimong buhay.”

Nakaresibi ako nin asignasyon na maglingkod sa siudad nin Quebec, alagad sa kadikit na panahon nagdanay ako sa Kingdom Farm, sa Estado nin Nueva York, an kinamumugtakan kaidto kan Paadalan nin Gilead. Sarong aldaw, hinapot ako ni Tugang na Knorr kun gusto kong magduman sa Belhika. Minsan siring, pakalihis nin duwang aldaw, hinapot nia ako kun maoyon ako na idestino sa Netherlands. Kan maresibi ko an surat nin asignasyon, sinabi kaiyan na “lingkod kan sangang opisina an magigin trabaho” ko. Nabigla ako.

Kan Agosto 24, 1950, nagpoon an 11 aldaw na pagbiahe ko pasiring sa Netherlands—igong panahon tanganing bilog na mabasa an bagong luwas na New World Translation of the Christian Greek Scriptures. Nag-abot ako sa Rotterdam kan Setyembre 5, 1950, kun saen tinawan ako nin maogmang pag-ako kan pamilyang Bethel. Sa ibong kan mga danyos nin Guerra Mundial II, marahay an ginibo kan mga tugang na ipagpadagos an Kristianong mga aktibidad. Mantang naghihinanyog sa mga salaysay ninda manongod sa pagpapadanay nin integridad sa irarom nin grabeng persekusyon, inisip ko na magigin depisil para sa mga tugang na idto an posibilidad nin paglilingkod sa irarom kan pagdirehir nin sarong daing eksperyensia asin hoben pang lingkod kan sangang opisina. Minsan siring, dai nahaloy nagin malinaw na mayo akong dahelan na mahandal.

Siempre, may nagkapirang bagay na kaipuhan na tawan nin atension. Nag-abot ako bago mismo pumoon an kombension asin napahanga ako na maheling na naakomodar an rinibong delegado sa mismong lugar kan kombension. Sa suminunod na kombension, isinuherir ko na maghanap kami nin mga dadagosan sa pribadong mga harong. Inisip kan mga tugang na marahayon na ideya iyan—alagad bakong angay sa saindang nasyon. Pakatapos na itao an kanya-kanyang rason, nagkaoroyon kami—an kabanga sa mga delegado papadagoson sa mismong lugar kan kombension asin an kabanga naman sa mga harong kan mga bakong Saksi sa palibot kan lugar kan kombension. May pag-orgolyong nasambitan ko an mga resulta ki Tugang na Knorr kan mag-atender sia sa kombension. Minsan siring, tolos na nawara an ano man na pagmate nin nagibo kan paghaloyhaloy mabasa ko an sarong report manongod sa samong kombension sa An Torrengbantayan, na nagsasabi: “Nakakasierto kami na sa sunod an mga tugang may pagtubod na magibo nguna nin mga paghihingoa na ikua nin mga dadagosan an mga kombensionista sa pinakaepektibong lugar para sa pagpapatotoo, sa mga harong kan mga tawo.” Iyan an eksaktong ginibo niamo kan “sunod”!

Kan Hulyo 1961, duwang representante kan sangang opisina niamo an inimbitaran na mag-atender sa sarong miting sa London kaiba an iba pang mga representante nin sangang opisina. Iinanunsiar ni Tugang na Knorr na an New World Translation of the Holy Scriptures iluluwas sa dakol pang lenguahe, kaiba na an Holandes. Nakakaogma nanggad an baretang idto! Marahay sana ta mayo kami nin ideya kun gurano kadakula an proyekto. Pakalihis nin duwang taon, kan 1963, nagin kaogmahan kong magkaigwa nin kabtang sa sarong programa sa kombension sa Nueva York na sa panahon na iyan ilinuwas sa Holandes an New World Translation of the Christian Greek Scriptures.

Mga Desisyon Asin Bagong mga Asignasyon

Kan Agosto 1961, naagom ko si Leida Wamelink. Inako kan bilog niang pamilya an katotoohan kan 1942 durante kan panahon nin persekusyon kan Nazi. Si Leida nagpoon na magpayunir kan 1950 asin naglaog sa Bethel kan 1953. An kahigosan nia sa Bethel asin sa kongregasyon nagparisa sa sako na sia magigin sarong maimbod na kaibaiba sa sakong ministeryo.

Labi sana nin kadikit sa sangtaon pakakasal mi, inimbitaran ako sa Brooklyn para sa sampulong bulan na kurso nin dugang pang pagsasanay. Mayo nin areglo para sa mga agom na babae na ibanan an agom ninda. Minsan ngani bakong marahay an saiyang salud, mamomoton na uminoyon si Leida na maninigo kong akoon an imbitasyon. Paghaloyhaloy, naggrabe an mga problema sa salud ni Leida. Hiningoa niamo na magpadagos na magtrabaho sa Bethel alagad sa kahurihurihi nagdesisyon kami na magigin mas praktikal na ipadagos an samong bilog na panahon na paglilingkod sa langtad. Kaya nagpoon kaming maglingkod sa ministeryong nagbibiahe. Dai nahaloy pakatapos kaiyan, an sakong agom kinaipuhan na umagi nin seryosong operasyon. Huli sa mamomoton na suporta nin mga katood, nakaya niamo an situwasyon, asin pakalihis nin sarong taon nahimo ngani niamong akoon an asignasyon na maglingkod sa gibohon sa distrito.

Ikinaogma niamo an pitong taon nin nakapagpapakosog na paglilingkod sa gibohon na nagbibiahe. Dangan, kinaipuhan na gumibo giraray kami nin magabat na desisyon kan imbitaran ako na magtokdo sa Pang-Kahadean na Paadalan sa Pagmiministro sa Bethel. Nag-oyon kami, minsan ngani depisil na pagbabago idto, huling namotan mi na an ministeryong nagbibiahe. An 47 klase kan paadalan, na an kada saro minalawig nin duwang semana, nagtao sa sako nin marahayon na oportunidad na ihiras an espirituwal na mga bendisyon sa kamagurangan sa kongregasyon.

Durante kan panahon na idto, nag-aandam ako tanganing dalawon an sakong ina kan 1978. Alagad biglaan, kan Abril 29, 1977, nakaresibi kami nin telegrama na ipinapaaram sa samo na nagadan na si Nanay. Namungnan ako huli sa pakarealisar na dai ko na madadangog an maogmang tingog nia ni masasabi ko giraray sa saiya kun gurano an pasasalamat ko sa gabos na ginibo nia para sa sako.

Sa pagtatapos kan kurso sa Pang-Kahadean na Paadalan sa Pagmiministro, hinagad sa samo na magin mga miembro kan pamilyang Bethel. Durante kan suminunod na mga taon, naglingkod ako sa laog nin sampulong taon bilang parakoordinar kan Komite kan Sangang Opisina. Pag-abot nin panahon, nagnombra an Namamahalang Grupo nin bagong parakoordinar, na mas may kakayahan na mag-asikaso kan paninimbagan. Ipinagpapasalamat kong marhay iyan.

Paglilingkod Mantang Itinotogot kan Edad

Pareho na kami ngonyan ni Leida na 83 anyos. Maogma akong naglingkod sa laog nin labing 60 taon sa bilog na panahon na paglilingkod, na an huring 45 taon kaiba ko an sakong maimbod na agom. An suporta nia sa sako sa gabos na asignasyon niamo minansay nia bilang kabtang kan saiyang dusay na paglilingkod ki Jehova. Sa presente, ginigibo niamo an makakaya mi sa Bethel asin sa kongregasyon.—Isaias 46:4.

Sa panapanahon, naoogma kami sa paggirumdom sa nagkapirang tampok na kabtang kan samong buhay. Mayo kami nin pinagbabasolan manongod sa ginibo niamo sa paglilingkod ki Jehova, asin kombensido kami na pinakamarahay an ginibo niamong mga pagpili kan aki pa kami. Determinado kami na magpadagos sa paglilingkod asin pagtao nin onra ki Jehova sa bilog niamong kosog.

[Ritrato sa pahina 13]

Kaiba ko si Bill, an matuang tugang ko, asin si Saul, an kabayo niamo

[Ritrato sa pahina 15]

Sa aldaw kan kasal niamo, Agosto 1961

[Ritrato sa pahina 15]

Kaiba ko si Leida ngonyan