Si Barzilai—Sarong Tawo na Nakakaaram kan Saiyang mga Limitasyon

‘TAANO ta magigin pagabat pa ako sa saimo?’ An 80 anyos na lalaki na nagsabi kaini ki Hadeng David nin Israel iyo si Barzilai. An Biblia nagsasabi na sia “sarong dakulang marhay na tawo,” na daing duda na huli sa saiyang kayamanan. (2 Samuel 19:32, 35) Si Barzilai namuhay sa daga nin Galaad, na sarong mabukid na rehion sa sirangan kan Salog nin Jordan.—2 Samuel 17:27; 19:31.

Sa irarom nin anong mga kamugtakan na sinabi ni Barzilai an tataramon na iyan ki David? Asin taano ta nagtaram sa siring na paagi an may edad nang lalaking ini?

Rebelyon Tumang sa Hade

Nasa peligro si David. Inagaw kan saiyang aki na si Absalon an trono pagkatapos na ‘habonon kaini an puso kan mga taga Israel.’ Malinaw na dai paliligtason ni Absalon an siisay man na maimbod sa saiyang ama. Kaya huminale sa Jerusalem si David asin an saiyang mga lingkod. (2 Samuel 15:6, 13, 14) Kan mag-abot si David sa Mahanaim, sarong lugar sa sirangan kan Jordan, tinabangan sia ni Barzilai.

Si Barzilai asin an duwa pang lalaki buka an palad na nagtao ki David nin dakol na probisyon. Ipinaheling kan tolong maimbod na lingkod na ini na nasabotan ninda an saiyang makamomondong situwasyon kan sinabi ninda manongod ki David asin sa saiyang mga tawohan: “An banwaan gutom asin pagal patin paha sa kaawagan.” Ginibo ni Barzilai, Sobi asin Maquir an bilog nindang makakaya tanganing panigoan an mga pangangaipong iyan paagi sa pagsuplay ki David asin sa saiyang mga tawohan nin mga higdaan, trigo, sebada, harina, sinanglag na tipasi, patani, lentehas, tangguli, mantikilya, karnero, asin iba pang probisyon.—2 Samuel 17:27-29.

Peligroso an pagtabang ki David. Harayo an posibilidad na pabayaan ni Absalon na dai napapadusahan an siisay man na nagsuportar sa lehitimong hade. Kun siring, nagin makosog an boot ni Barzilai sa pagpaheling nin kaimbodan ki David.

Nabaliktad an Situwasyon

Dai nahaloy pagkatapos kaiyan, nakaenkuentro kan rebeldeng hukbo ni Absalon an mga tawohan ni David. Nagkaigwa nin ralaban sa kadlagan nin Efraim, na posibleng nasa palibot kan Mahanaim. Nadaog an hukbo ni Absalon, “asin kadakol kan nagadan duman kan aldaw na idto.” Minsan ngani nagmaigot si Absalon na makadulag, dai nahaloy sia ginadan.—2 Samuel 18:7-15.

Sa giraray, si David an dai kayang daogon na hade nin Israel. An saiyang mga parasunod dai na kaipuhan pang mamuhay bilang mga dulag. Dugang pa, nakua ninda an paggalang asin pagpasalamat ni David huli sa saindang kaimbodan sa saiya.

Kan mabalik na si David sa Jerusalem, “si Barzilai na Galaadita nagdatong hale sa Rogelim tanganing makaduman sia sagkod sa Jordan kaiba an hade tanganing ihatod nia ini sa Jordan.” Sa okasyon na iyan, ipinaabot ni David sa gurang nang si Barzilai an imbitasyon na ini: “Bumalyo ka kaiba ko, asin tatawan taka nanggad nin pagkakan na kaiba ko sa Jerusalem.”—2 Samuel 19:15, 31, 33.

Daing duda na inapresyar na marhay ni David an tabang ni Barzilai. Garo baga dai sana gusto kan hade na balosan si Barzilai paagi sa pagtao sa saiya nin materyal na mga pangangaipo. Dai kaipuhan kan mayaman na si Barzilai an siring kaiyan na tabang. Posibleng gusto ni David na iiba sia sa palasyo huli sa kahangahangang mga kualidad kan may edad nang lalaking iyan. An pagkaigwa duman nin permanenteng lugar saro kutanang onra, na matao ki Barzilai nin oportunidad na makamtan an mga pribilehio kan pakikikatood kan hade.

Kababaan nin Boot Asin Pagigin Realistiko

Sa pagsimbag sa imbitasyon ni Hadeng David, si Barzilai nagsabi: “Siring daw sa ano an mga aldaw kan mga taon kan sakong buhay, tanganing dumuman ako kaiba kan hade sa Jerusalem? Otsenta anyos na ako ngonyan. Mamimidbid ko pa daw an marahay asin maraot, o mananamitan pa daw kan saimong lingkod an kinakan ko asin an ininom ko, o mahihinanyog ko pa daw an tingog kan mga parakantang lalaki asin babae?” (2 Samuel 19:34, 35) Sa siring, magalang na sinayumahan ni Barzilai an imbitasyon asin dai nia inako an sarong marahayon na pribilehio. Alagad taano?

Posible na an sarong dahelan kan desisyon ni Barzilai iyo an saiyang halangkaw nang edad asin an mga limitasyon na kaiba kaiyan. Tibaad namatean ni Barzilai na dai na maghahaloy an saiyang buhay. (Salmo 90:10) Ginibo nia an saiyang makakaya tanganing suportaran si David, alagad aram man nia an mga limitasyon huli sa saiyang halangkaw nang edad. Dai tinogotan ni Barzilai an kaisipan na magin midbid asin prominente na olangon sia sa realistikong pag-ebalwar kan saiyang mga kakayahan. Bakong arog kan ambisyosong si Absalon, si Barzilai may kadonongan na nagpaheling nin kababaan nin boot.—Talinhaga 11:2.

An saro pang dahelan kan desisyon ni Barzilai tibaad iyo an kamawotan na dai makaolang an saiyang mga limitasyon sa aktibidad kan hade na ninombrahan nin Dios. Si Barzilai naghapot: “Taano ta magigin pagabat pa sa kagurangnan kong hade an saimong lingkod?” (2 Samuel 19:35) Minsan ngani nagsusuportar pa man giraray sia ki David, si Barzilai posibleng marhay na naniniwala na sarong mas hoben na lalaki an mas epektibong makakagibo kan mga asignasyon. Posibleng marhay na pinapanongdan an saiya mismong aking lalaki, si Barzilai nagsabi: “Uya an saimong lingkod na si Kimham. Togoti siang bumalyo kaiba kan kagurangnan kong hade; asin gibohon mo sa saiya an ano man na pagmarahayon mo.” Imbes na makolgan an boot, inako ni David an suhestion na ini. Sa katunayan, bago magbalyo sa Jordan, ‘hinadokan ni David si Barzilai asin binendisyonan ini.’—2 Samuel 19:37-39.

Kaipuhan an Pagkatimbang

An kasaysayan ni Barzilai nagtatampok kan pangangaipo na magin timbang. Sa sarong lado, dai niato maninigong sayumahan an sarong pribilehio nin paglilingkod o likayan na aboton iyan huli sana ta gusto niato nin toninong na buhay o naghohona kita na dai niato kayang magsaabaga nin paninimbagan. Puedeng hipnoan nin Dios an satong kakulangan kun mananarig kita sa saiya para sa kosog asin kadonongan.—Filipos 4:13; Santiago 4:17; 1 Pedro 4:11.

Sa ibong na lado, kaipuhan niatong midbidon an satong mga limitasyon. Halimbawa, tibaad an sarong Kristiano sibot nang marhay sa espirituwal na mga aktibidad. Narerealisar nia na kun maako sia nin dugang pang mga pribilehio, isasapeligro nia na mapabayaan an sono sa Kasuratan na mga paninimbagan siring baga nin pagtao kan mga pangangaipo kan saiyang pamilya. Sa siring na situwasyon, bako daw na nagpapaheling sia nin kababaan nin boot asin pagkarasonable kun dai sia maako nin dugang pang mga pribilehio sa presente?—Filipos 4:5; 1 Timoteo 5:8.

Si Barzilai nagtatao nin marahayon na halimbawa, asin maninigong horophoropon niato iyan. Sia maimbod, makosog an boot, buka an palad, asin hababa an boot. Orog sa gabos, determinado sia na enoton an intereses nin Dios kisa sa sadiri niang intereses.—Mateo 6:33.

[Mapa sa pahina 15]

(Para sa aktuwal na format, hilingon an publikasyon)

Ginibo kan otsenta anyos na si Barzilai an mapagal na pagbiahe tanganing tabangan si David

GALAAD

Rogelim

Sucot

Mahanaim

Salog nin Jordan

Gilgal

Jerico

Jerusalem

EFRAIM

[Ritrato sa pahina 13]

Taano ta sinayumahan ni Barzilai an alok ni David?