Mga Hoben, Girumdomon Nindo an Saindong Kaharohalangkaweng Kaglalang Ngonyan

“Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkahoben na lalaki.”​—ECL. 12:1.

1. Paano ipinapahayag ni Jehova an saiyang pagsarig sa hoben na mga parasamba nia?

MINAMANSAY ni Jehova an Kristianong mga hoben na mahalagang marhay asin nakakarepresko siring sa mga tagdo kan ambon. Sa katunayan, ihinula nia na sa aldaw kan “puersa militar” kan saiyang Aki, an hoben na mga lalaki asin babae “gikan sa boot na magpepresentar kan saindang sadiri” sa paglilingkod ki Cristo. (Sal. 110:3) An hulang iyan maootob sa panahon na an mga tawo sa pangkagabsan bakong interesado sa Dios, bangkag sa sadiri asin kuarta, saka sumbikalan. Pero, aram ni Jehova na mapapalaen an mga hoben na nagsasamba sa saiya. May pagsarig nanggad sia sa saindo hoben na mga tugang na lalaki asin babae!

2. Ano an kalabot sa paggirumdom ki Jehova?

² Imahinaron an kagayagayahan na seguradong namamatean nin Dios kun naheheling nia an mga hoben na ginigirumdom sia bilang saindang Kaharohalangkaweng Kaglalang. (Ecl. 12:1) Naturalmente, bako sanang an pag-isip ki Jehova an kalabot sa paggirumdom sa saiya. Nangangahulogan iyan nin paghiro​—an paggibo kan nakakapaogma sa saiya, na tinotogotan na an saiyang mga ley asin prinsipyo an gumiya sa satong pang-aroaldaw na buhay. Nangangahulogan man iyan nin pagtitiwala ki Jehova, sa pakaaram na nasa puso nia an pinakaikakarahay nanggad niato. (Sal. 37:3; Isa. 48:17, 18) Iyan daw an saboot nindo manongod sa saindong Kaharohalangkaweng Kaglalang?

“Magtiwala Ka ki Jehova sa Bilog Mong Puso”

3, 4. Paano pinatunayan ni Jesus an pagtitiwala ki Jehova, asin taano ta mahalaga na magtiwala ki Jehova ngonyan?

³ Siempre, an pinakamarahay na halimbawa nin saro na nagtiwala sa Dios iyo si Jesu-Cristo. Sia namuhay kaoyon kan sinasabi sa Talinhaga 3:5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Dai nahaloy pakatapos na bautismohan si Jesus, dinolok sia ni Satanas, na nagmaigot na sugotan sia na mag-ako nin kinabanon na kapangyarihan asin kamurawayan. (Luc. 4:3-13) Si Jesus dai nadaya. Aram nia na “an bunga nin kapakumbabaan asin pagkatakot ki Jehova” iyo an tunay na “kayamanan asin kamurawayan patin buhay.”​—Tal. 22:4.

⁴ Nangingibabaw sa kinaban ngonyan an kahanaban asin kaimotan. Sa siring na mga kamugtakan, madonong na sunodon niato an halimbawa ni Jesus. Girumdomon man na gigibohon ni Satanas an ano man tanganing akiton an mga lingkod ni Jehova na humale sa piot na dalan na pasiring sa buhay. Gusto niang maheling na an gabos na tawo naglalakaw sa halakbang na dalan na pasiring sa kalaglagan. Dai kamo magpadaya sa saiya! Imbes, magin desidido na girumdomon an saindong Kaharohalangkaweng Kaglalang. Lubos na magtiwala sa saiya, asin mangapot nin marigon sa “tunay na buhay,” na segurado sagkod harani na.​—1 Tim. 6:19.

Mga Hoben, Magin Madonong!

5. Ano an saindong saboot manongod sa ngapit kan kinaban na ini?

⁵ Madonong na marhay an mga hoben na ginigirumdom an saindang Kaharohalangkaweng Kaglalang. (Basahon an Salmo 119:99, 100.) Huling igwa sinda kan pagmansay nin Dios, lubos nindang naaaraman na an kinaban na ini madali nang mawara. Dawa medyo halipot pa sana an saindong buhay, daing duda na naheheling na nindo mga hoben na nag-oorog an pagkatakot asin kahaditan. Kun kamo nag-eeskuela pa, posibleng marhay na nadadangog nindo an manongod sa polusyon, pag-init kan globo (global warming), pagpalod sa mga kadlagan, asin kaagid na mga problema. An mga tawo nahahadit na gayo sa mga pangyayaring ini, alagad Mga Saksi ni Jehova sana an lubos na nakakasabot na an mga ini kabtang kan tanda na nagpaparisa kan katapusan kan kinaban ni Satanas.​—Kap. 11:18.

6. Paano nadaya an nagkapirang hoben?

⁶ Makamomondo, an nagkapirang hoben na lingkod nin Dios nagpabaya sa pagigin mapagbantay ninda asin liningawan ninda na halipot na sana an panahon na natatada sa kinaban na ini. (2 Ped. 3:3, 4) An iba inakit na gumibo nin grabeng kasalan paagi sa maraot na mga kaibaiba asin pornograpiya. (Tal. 13:20) Makamomondo nanggad kun mawara niato an pabor nin Dios ngonyan na haranihon na kita sa katapusan! Imbes, dapat kitang makanood sa nangyari sa mga Israelita kan 1473 B.C.E. kan sinda nagkakampo sa Kaplanodohan nin Moab, na harani nang marhay palaog sa Dagang Panuga. Ano an nangyari duman?

Sinda Nagpadaog sa Sugot kan Sinda Harani Na sa Saindang Papadumanan

7, 8. (a) Anong estratehiya an ginamit ni Satanas sa Kaplanodohan nin Moab? (b) Anong estratehiya an ginagamit ni Satanas ngonyan?

⁷ Kaidto pa, malinaw nanggad na gusto ni Satanas na olangon an mga Israelita sa pag-ako kan ipinanugang mana sa sainda. Pagkatapos na masudya si Satanas na gamiton si propeta Balaam tanganing sumpaon sinda, sia naggamit nin mas tusong estratehiya; pinagmaigotan niang madiskualipikar sinda sa pag-ako kan bendisyon ni Jehova. Ginamit nia an mapan-akit na mga babae nin Moab tanganing akiton sinda, asin sa panahon na idto medyo nagin mapanggana an Diablo. An banwaan nagpoon na magkaigwa nin imoral na relasyon sa mga aking babae nin Moab asin maghuruhod ki Baal nin Peor! Minsan ngani haranihon na an mahalagang marhay na mana ninda, an Dagang Panuga, mga 24,000 na Israelita an nagadan. Grabe nanggad na trahedya iyan!​—Bil. 25:1-3, 9.

⁸ Ngonyan, marikas kitang nagrarani sa orog karahay na dagang panuga​—an bagong sistema nin mga bagay. Siring kan dati, ginagamit giraray ni Satanas an seksuwal na imoralidad tanganing raoton an banwaan nin Dios. An moral na mga pamantayan sa kinaban nagruro nang gayo kaya an pakikisaro ibinibilang nang normal asin an homoseksuwalidad minamansay na sanang personal na kagustohan. Sarong tugang na Kristiana an nagsabi, “Solamente sa harong asin sa Kingdom Hall na nanonodan kan sakong mga aki na maraot sa pagheling nin Dios an homoseksuwalidad asin pakikidorog sa bakong agom.”

9. Ano an puedeng mangyari durante kan “pagbukad nin pagkahoben,” asin paano ini maaatubang nin mga hoben?

⁹ Aram kan mga hoben na ginigirumdom an saindang Kaharohalangkaweng Kaglalang na an seksuwal na relasyon sarong sagradong regalo na konektado sa buhay asin pangangaki. Huli kaini, nasasabotan ninda na an seksuwal na relasyon maninigong ikaogma sa paagi na kaoyon kan paggiya nin Dios​—sa laog kan areglo nin pag-agoman. (Heb. 13:4) Minsan siring, puedeng magin masakit an pagdadanay na mabini durante kan “pagbukad nin pagkahoben”​—an peryodo na an mga pagmate sa sekso nagigin makosog asin puedeng makaraot sa paghusgar nin saro. (1 Cor. 7:36) Ano an puede nindong gibohon kun minalaog sa isip nindo an salang mga kaisipan? Odok na mamibi ki Jehova na logod tabangan kamo na isentro an saindong isip sa kapakipakinabang na mga bagay. Pirmeng hinihinanyog ni Jehova an mga sinserong minadolok sa saiya. (Basahon an Lucas 11:9-13.) An nakakaparigon na pag-orolay makakatabang man na bagohon an direksion kan satong isip.

Madonong na Pilion an Saindong mga Pasohan!

10. Anong negatibong kaisipan an boot niatong likayan, asin ano an mga puede niatong ihapot sa satong sadiri?

¹⁰ An sarong dahelan na dakol na hoben sa kinaban an nawawaran nin pagpupugol asin namumuhay sa kasingawan sa laman iyo na mayo sinda nin ‘tinatanaw’​—mayo kan paggiya nin Dios o seguradong paglaom para sa ngapit. (Tal. 29:18) Kapareho sinda kan mga Israelita kan panahon ni Isaias na nagpondo na sa pagsunod sa paggiya nin Dios asin namuhay sa “pag-ogma nin labi-labi asin paggayagaya, . . . pagkakan nin karne asin pag-inom nin arak.” (Isa. 22:13) Imbes na maara sa siring na mga tawo, taano ta dai horophoropon an mahalagang marhay na paglaom na itinagama ni Jehova sa mga maimbod sa saiya? Kun ika sarong hoben na lingkod nin Dios, inaantisipar mo daw na marhay an bagong kinaban? Ginigibo mo daw an gabos na paghihingoa tanganing “mamuhay na may toltol na isip . . . mantang [ika] naghahalat sa maogmang paglaom” na itinagama sa saimo ni Jehova? (Tito 2:12, 13) An saimong simbag makakaimpluwensia sa mga pasohan asin prioridad na saimong ibinugtak para sa saimo mismo.

11. Taano ta maninigong magmaigot an Kristianong mga hoben na nag-eeskuela pa?

¹¹ Gusto kan kinaban na gamiton kan mga hoben an saindang kosog sa sekular na mga pasohan. Naturalmente, kamo na mga nag-eeskuela pa maninigong magmaigot na magkaigwa nin marahay na pundamental na edukasyon. Total, an saindong katuyohan bako sanang makakua nin angay na trabaho kundi magin kapakipakinabang man sa kongregasyon asin magin epektibong parabalangibog kan Kahadean. Sa katuyohan na iyan, kamo kaipuhan na nakakakomunikar nin marahay, nakakapag-isip nin rasonable, asin nakakapagrason sa iba sa kalmado saka magalang na paagi. Minsan siring, an mga hoben na nag-aadal sa Biblia asin nagmamaigot na iaplikar sa saindang buhay an mga prinsipyo kaiyan nakikinabang sa pinakamarahay na edukasyon na iyan saka nagbubugtak nin marahay na pundasyon para sa mapanggana patin daing katapusan na ngapit.​—Basahon an Salmo 1:1-3.a

12. Anong halimbawa an maninigong arogon nin Kristianong mga pamilya?

¹² Sa Israel, ipinapaorog na marhay an pag-edukar nin mga magurang sa saindang mga aki. Kaiba sa edukasyon na iyan an haros gabos na aspekto nin buhay, nangorogna an espirituwal na mga bagay. (Deut. 6:6, 7) Huli kaini, an hoben na mga Israelita na naghihinanyog sa saindang mga magurang asin sa iba pang matatakton sa Dios na may edad na nag-aako bako sanang nin kaaraman kundi pati kadonongan, pakarorop, pakasabot, saka kakayahan sa pag-iisip​—pambihirang mga kualidad na ikakatao kan pagtotokdo nin Dios. (Tal. 1:2-4; 2:1-5, 11-15) An Kristianong mga pamilya ngonyan maninigong magtao nin kaparehong atension sa edukasyon.

Maghinanyog sa mga Namomoot sa Saindo

13. Anong klaseng sadol an inaako nin nagkapirang hoben, asin taano ta maninigo sindang magmaan?

¹³ An mga hoben nag-aako nin sadol hale sa gabos na klase nin tawo​—kaiba an mga parakonseho sa eskuelahan (guidance counselors), na sa parate nagsasadol sana sa mga estudyante manongod sa kapangganahan sa sekular na kinaban. Mapagngayongayo tabing turotimbangon an gabos na siring na sadol sa tabang kan Tataramon nin Dios saka kan espirituwal na kakanon na itinatao kan grupong maimbod asin mapagmansay na oripon. Sa pag-adal nindo sa Biblia, aram nindo na an mga hoben asin daing kabatidan iyo an pangenot na punteriya ni Satanas. Halimbawa, sa hardin nin Eden, an daing kabatidan na si Eva naghinanyog ki Satanas, sarong estranghero na dai man lamang nagpaheling nin pagkamoot sa saiya. Magigin laen nanggad kutana an resulta kun sia naghinanyog ki Jehova, an saro na pinatunayan an Saiyang pagkamoot sa saiya sa dakol na paagi!​—Gen. 3:1-6.

14. Taano ta maninigo kitang maghinanyog ki Jehova sagkod sa may pagtubod na mga magurang niato?

¹⁴ Namomotan man kamo kan saindong Kaharohalangkaweng Kaglalang, asin ginigibo nia iyan na may dalisay nanggad na motibo. Gusto nia na kamo magin maogma sagkod lamang, bako sana ngonyan! Sa dahelan na iyan, huling may kapadangatan na siring sa nagmamakolog na magurang, sinasabi nia sa saindo asin sa gabos na nagsasamba sa saiya: “Iyo ini an dalan. Maglakaw kamo dian.” (Isa. 30:21) Kun kamo igwa nin may pagtubod na mga magurang na talagang namomoot ki Jehova, igwa kamo nin dugang pang bendisyon. Magalang na maghinanyog sa saindang hatol kun kamo nagbubugtak nin mga prioridad asin pasohan. (Tal. 1:8, 9) Total, gusto ninda na mag-ako kamo nin buhay, sarong bagay na mas mahalagang marhay kisa sa kayamanan o prestihio sa kinaban na ini.​—Mat. 16:26.

15, 16. (a) Ano an masasarigan niato ki Jehova? (b) Anong mahalagang leksion an manonodan niato sa eksperyensia ni Baruc?

¹⁵ An mga ginigirumdom an saindang Kaharohalangkaweng Kaglalang pinapagdadanay na simple an saindang buhay, na nagsasarig na si Jehova ‘dai nanggad’ sinda babayaan “ni sa ano man na paagi” papabayaan sinda. (Basahon an Hebreo 13:5.) Huling an kapakipakinabang na saboot na ini laen sa kaisipan kan kinaban, dapat kitang mag-ingat na dai pagtogotan na maimpluwensiahan kita kan espiritu kan kinaban. (Efe. 2:2) Mapadapit digdi, estudyaran niato an halimbawa kan sekretaryo ni Jeremias na si Baruc, na nabuhay durante kan masakit na huring mga aldaw sa Jerusalem na suminagkod sa pagkalaglag kan siudad na iyan kan 607 B.C.E.

¹⁶ Tibaad minawot mismo ni Baruc na magkaigwa nin mas marahay na buhay sa materyal na paagi. Narisa ini ni Jehova asin maboot niang pinatanidan si Baruc na dai magparahanap nin “darakulang bagay” para sa sadiri nia. Pinatunayan ni Baruc na sia mapakumbaba asin madonong, huli ta sia naghinanyog ki Jehova saka nakaligtas sa pagkalaglag kan Jerusalem. (Jer. 45:2-5) Sa ibong na lado, an mga katemporanyo ni Baruc talagang nagkaigwa nin “darakulang bagay” sa materyal, kaya si Jehova nagin ikaduwa na sana sa sainda, alagad dai nahaloy nawara iyan gabos kan sakopon sinda kan mga Caldeo (mga Babilonyo). Dakol man sa sainda an nagadan. (2 Cron. 36:15-18) An eksperyensia ni Baruc nakakatabang sa sato na masabotan na an marahay na relasyon sa Dios orog nanggad na mahalaga kisa sa kayamanan asin pagkaprominente sa kinaban na ini.

Arogon an Pinakamarahay na mga Halimbawa

17. Taano ta marahayon na mga arogan si Jesus, Pablo, asin Timoteo para sa mga lingkod ni Jehova ngonyan?

¹⁷ Tanganing tabangan kita sa dalan pasiring sa buhay, an Tataramon nin Dios nagtatao sa sato nin dakol na marahayon na arogan. Halimbawa, si Jesus an pinakamaabilidad na tawo na nabuhay kasuarin man, pero nagkonsentrar sia sa kun ano an makakatabang sa mga tawo sagkod lamang​—“an maogmang bareta kan kahadean.” (Luc. 4:43) Tanganing ikatao ni apostol Pablo ki Jehova an pinakamakakaya nia, binayaan nia an sarong karera na puedeng umasenso asin ginamit nia an saiyang panahon saka kosog tanganing ihulit an maogmang bareta. Inarog ni Timoteo, na “sarong tunay na aki sa pagtubod,” an marahayon na halimbawa ni Pablo. (1 Tim. 1:2) Pinagbasolan daw ni Jesus, Pablo, asin Timoteo an saindang pamumuhay? Dai nanggad! Sa katunayan, sinabi ni Pablo na ibinilang nia na “tapok” an inaalok kan kinaban kun ikokomparar sa pribilehio nin paglilingkod sa Dios.​—Fil. 3:8-11.

18. Anong dakulang mga pagbabago an ginibo nin sarong hoben na tugang na lalaki, asin taano ta dai sia nagbabasol?

¹⁸ Dakol na Kristianong hoben ngonyan an inaarog an pagtubod ni Jesus, Pablo, asin Timoteo. Halimbawa, nagsurat an sarong hoben na tugang na lalaki na dati igwa nin trabaho na halangkaw an sueldo: “Huling namumuhay ako oyon sa mga prinsipyo sa Biblia, dai nahaloy ilinangkaw an sakong posisyon sa trabaho. Sa ibong nin pinansial na mga pakinabang, namatean ko na garo ako naglalapag sa doros. Kan ako makipag-olay sa mga namamahala sa kompanya asin sinabi ko an pagmawot ko na lumaog sa bilog na panahon na ministeryo, inalokan tolos ninda ako nin mas halangkaw na sueldo, na naglalaom na magdadanay ako sa kompanya. Alagad nakapagdesisyon na ako. Dai nasasabotan nin dakol na tawo kun taano ta binayaan ko an halangkaw an sueldong karera tanganing lumaog sa bilog na panahon na paglilingkod. An sakong simbag iyo na gusto ko talagang mamuhay oyon sa sakong pagdusay sa Dios. Huling an sakong buhay nakasentro na ngonyan sa espirituwal na mga bagay, igwa ako nin orog nanggad na kaogmahan asin pagkakontento na dai ikakatao sa sako nin kuarta o prestihio.”

19. Pinaparigon an mga hoben na gibohon an anong madonong na pagpili?

¹⁹ Sa bilog na kinaban, rinibong hoben an naggibo nin kaparehong madonong na mga pagpili. Kaya, kamong mga hoben, kun hinohorophorop nindo an saindong ngapit, papagdanayon nindo na harani sa isip an aldaw ni Jehova. (2 Ped. 3:11, 12) Dai kamo maara sa mga nag-aasenso sa kinaban na ini. Imbes, maghinanyog sa mga tunay na namomoot sa saindo. An pagtipon nin “mga kayamanan sa langit” iyo an pinakaseguradong magigibo nindo asin iyo sana an igwa nin daing katapusan na mga pakinabang. (Mat. 6:19, 20; basahon an 1 Juan 2:15-17.) Iyo, girumdomon an saindong Kaharohalangkaweng Kaglalang. Mantang ginigibo nindo iyan, bebendisyonan kamo ni Jehova.

[Nota sa Ibaba]

Nagigirumdoman daw Nindo?

• Paano niato pinapatunayan an satong pagtitiwala sa Dios?

• Ano an pinakamarahay nanggad na edukasyon?

• Anong mga leksion an manonodan niato ki Baruc?

• Sairisay an nagseserbing marahay na arogan, asin taano?

[Mga Ritrato sa pahina 13]

Itinatao ni Jehova an pinakamarahay nanggad na edukasyon

[Ritrato sa pahina 15]

Si Baruc naghinanyog ki Jehova asin nakaligtas sa pagkalaglag kan Jerusalem. Ano an manonodan nindo sa halimbawang ini?