Ipaheling an Saindong Pag-oswag

“Pensaron mo an mga bagay na ini; magin lubos an atension mo dian, tanganing an saimong pag-oswag maheling kan gabos na tawo.”—1 TIM. 4:15.

1, 2. Ano an aram niato manongod ki Timoteo kan sia aki pa asin sa pagbabago na nangyari kan sia mga 20 anyos na?

KAN si Timoteo aki pa, sia nag-istar sa probinsia nin Roma na Galacia, na ngonyan inaapod na Turkiya. Duman, nagkapirang Kristianong kongregasyon an naestablisar dakol na dekada pagkagadan ni Jesus. Nag-abot an panahon na inako kan hoben na si Timoteo, kan saiyang ina, asin kan saiyang lola an Kristianismo saka nagin sindang aktibo sa saro sa mga kongregasyon. (2 Tim. 1:5; 3:14, 15) Siertong ikinaogma ni Timoteo an saiyang buhay bilang hoben na Kristiano sa pamilyar na mga kamugtakan na iyan. Minsan siring, biglang nagbago an mga bagay-bagay.

² Iyan gabos nagpoon kan ikaduwang pagdalaw ni Pablo sa lugar na iyan. Kan panahon na iyan, si Timoteo posibleng nasa huring mga taon nin pagkatinedyer o labi pa sanang 20 anyos. Durante kan pagdalaw ni Pablo, na posibleng marhay na sa Listra, narisa nia na “marahay an sinasabi dapit [ki Timoteo] kan mga tugang” sa lokal na mga kongregasyon. (Gibo 16:2) Seguradong nagpaheling an hoben na si Timoteo nin pambihirang pagkamaygurang. Dangan, paagi sa paggiya kan banal na espiritu, si Pablo asin an lokal na grupo nin kamagurangan ipinatong an saindang kamot ki Timoteo, na itinagama sia para sa espesyal na gibohon sa kongregasyon.—1 Tim. 4:14; 2 Tim. 1:6.

3. Anong pambihirang pribilehio nin paglilingkod an inako ni Timoteo?

³ Nag-ako si Timoteo nin pambihirang pribilehio—an magin kaibaiba sa pagbiahe ni apostol Pablo! (Gibo 16:3) Imahinara nanggad an pagkasorpresa asin pagkaogma ni Timoteo! Sa maabot na mga taon, si Timoteo mabiahe kaiba ni Pablo asin kun beses kan iba pa, na inootob an manlaenlaen na gibohon bilang representante kan mga apostol asin kamagurangan na lalaki. An pakikikabtang ni Pablo asin Timoteo sa gibohon na nagbibiahe nakakontribwir na marhay sa pagpakosog sa espirituwalidad kan mga tugang. (Basahon an Gibo 16:4, 5.) Huli kaini, si Timoteo midbid na marhay nin dakol na Kristiano huli sa saiyang pag-oswag sa espirituwal. Pakalihis nin mga sampulong taon na pagbiahe kaiba ni Timoteo, nagsurat si apostol Pablo sa mga taga Filipos: “Mayo na ako nin iba na may kaisipan na arog kan [ki Timoteo] na mangangataman nin tunay sa mga bagay mapadapit sa saindo. . . . Aram nindo an prueba na saiyang itinao manongod sa saiyang sadiri, na siring sa relasyon nin sarong aki sa ama, naglingkod sia kaiba ko sa pagpalakop kan maogmang bareta.”—Fil. 2:20-22.

4. (a) Anong magabat na paninimbagan an ipinaniwala ki Timoteo? (b) Ano an mga puedeng ihapot manongod sa mga tataramon ni Pablo na yaon sa 1 Timoteo 4:15?

⁴ Kan panahon na sumurat si Pablo sa mga taga Filipos, ipinaniwala nia ki Timoteo an sarong magabat na paninimbagan—an pagnombra nin kamagurangan asin ministeryal na mga lingkod. (1 Tim. 3:1; 5:22) Malinaw nanggad na si Timoteo nagin masasarigan asin mapagtitiwalaan na Kristianong paraataman. Pero, sa surat man sanang iyan, sinadol ni Pablo si Timoteo na ‘ipaheling an saiyang pag-oswag sa gabos na tawo.’ (1 Tim. 4:15) Bako daw na nakapagpaheling na nin pambihirang pag-oswag si Timoteo? Kaya, ano an boot sabihon ni Pablo sa mga tataramon na ini, asin paano kita makikinabang sa saiyang hatol?

Ipinaheling an Espirituwal na mga Kualidad

5, 6. Paano nameligro an espirituwal na kadalisayan kan kongregasyon sa Efeso, asin paano mapoprotehiran ni Timoteo an kongregasyon?

⁵ Siyasaton niato an konteksto kan 1 Timoteo 4:15. (Basahon an 1 Timoteo 4:11-16.) Bago isurat an mga tataramon na iyan, si Pablo nagbiahe pa-Macedonia alagad pinakiolayan si Timoteo na magdanay sa Efeso. Taano? An nagkapira sa siudad na iyan nag-introdusir nin falsong mga katokdoan, na huli kaiyan nagkaigwa nin pagkabaranga sa kongregasyon. Dapat na protehiran ni Timoteo an espirituwal na kadalisayan kan kongregasyon. Paano nia magigibo ini? An saro, paagi sa pagtao nin marahay na halimbawa na maaarog nin iba.

⁶ Si Pablo nagsurat ki Timoteo: “Sa mga maimbod magin arogan ka sa pagtaram, sa paggawe, sa pagkamoot, sa pagtubod, sa kabinian.” Si Pablo nagsabi pa: “Pensaron mo an mga bagay na ini; magin lubos an atension mo dian, tanganing an saimong pag-oswag maheling kan gabos na tawo.” (1 Tim. 4:12, 15) An pag-oswag na ini may koneksion sa espirituwal na mga kualidad ni Timoteo imbes na sa ano man na katongdan nia na may autoridad. Ini an klase nin pag-oswag na maninigong mawoton na ipaheling nin lambang Kristiano.

7. Ano an inaasahan sa gabos na miembro kan kongregasyon?

⁷ Ngonyan, arog kan panahon ni Timoteo, manlaenlaen an mga katongdan na may paninimbagan sa laog kan kongregasyon. An nagkapira naglilingkod bilang kamagurangan o ministeryal na mga lingkod. An iba nagpapayunir. An iba pa iinaasignar sa gibohon na nagbibiahe, sa paglilingkod sa Bethel, o sa pagmimisyonero. An kamagurangan may kabtang sa manlaenlaen na programa nin pagtotokdo, arog baga sa mga asamblea asin kombension. Minsan siring, an gabos na Kristiano—lalaki, babae, asin hoben—may potensial na ipaheling an saindang espirituwal na pag-oswag. (Mat. 5:16) Sa katunayan, arog sa kamugtakan ni Timoteo, dawa an mga Kristiano na igwa nin espesyal na mga katongdan na may paninimbagan inaasahan na ipapaheling sa gabos an saindang espirituwal na mga kualidad.

Magin Halimbawa sa Pagtaram

8. Ano an epekto kan satong pagtaram sa pagsamba niato?

⁸ An saro sa mga paagi na si Timoteo dapat na magpaheling nin halimbawa iyo an saiyang pagtaram. Paano niato ikakapaheling an satong pag-oswag dian? Ihinahayag kan satong pagtaram an pagkatawo niato. Si Jesus angay sanang nagsabi: “Gikan sa kapanoan kan puso nagtataram an ngoso.” (Mat. 12:34) Inadmitir man ni Santiago, na tugang sa ina ni Jesus, an puedeng magin epekto kan satong pagtaram sa pagsamba niato. Sia nagsurat: “Kun an siisay man naghohona sa saiya man sana na sia pormal na parasamba alagad ta dai binubusalan an saiyang dila, kundi padagos na dinadaya an saiyang puso, an klase nin pagsamba kan tawong ini basang sana.”—Sant. 1:26.

9. Sa anong mga paagi maninigong magin arogan an satong pagtaram?

⁹ An satong pagtaram puedeng ihayag sa iba sa kongregasyon kun gurano na kadakula kan satong pag-oswag sa espirituwal. Huli kaiyan, imbes na magtaram nin mayong dignidad, negatibo, mapagkritika, o nakakakolog, nagmamaigot an maygurang na mga Kristiano na makapakosog, makaranga, makidumamay, asin makaparigon. (Tal. 12:18; Efe. 4:29; 1 Tim. 6:3-5, 20) Puedeng mahayag an satong debosyon sa Dios paagi sa pagigin andam niato na ipakipag-olay sa iba an satong moral na mga kombiksion asin na magtaram bilang pagdepensa sa halangkawon na mga pamantayan nin Dios. (Roma 1:15, 16) Siertong maoobserbaran kan mga tama an kamugtakan nin puso kun paano niato ginagamit an balaog na pagtaram asin tibaad arogon ninda an satong halimbawa.—Fil. 4:8, 9.

Arogan sa Satong Paggawe Asin Kabinian

10. Taano ta mahalagang marhay sa satong espirituwal na pag-oswag an pagtubod na dai nin pagsaginsagin?

¹⁰ Bako sanang nakakapakosog na pagtaram an kaipuhan tanganing magin marahay na halimbawa an sarong Kristiano. Magigin mapagsaginsagin an saro kun sia nagtataram manongod sa tamang mga bagay alagad dai nia ginigibo iyan. Pamilyar nanggad si Pablo sa pagigin mapagsaginsagin kan mga Fariseo asin sa nakakaraot na resulta kan saindang paggawe. Labi sa sarong beses na pinatanidan nia si Timoteo tumang sa siring na pagkabakong sinsero asin pagsaginsagin. (1 Tim. 1:5; 4:1, 2) Alagad bakong mapagsaginsagin si Timoteo. Sa saiyang ikaduwang surat ki Timoteo, si Pablo nagsabi: “Nagigirumdoman ko an pagtubod na yaon sa saimo na dai nin ano man na pagsaginsagin.” (2 Tim. 1:5) Pero, kinaipuhan ni Timoteo na ipaheling sa iba an saiyang pagigin totoo bilang Kristiano. Sia dapat na magin halimbawa sa paggawe.

11. Ano an isinurat ni Pablo ki Timoteo manongod sa mga kayamanan?

¹¹ Sa saiyang duwang surat ki Timoteo, nagtao si Pablo nin sadol dapit sa nagkapirang paagi nin paggawe. Halimbawa, dapat na likayan ni Timoteo an paghihingoang magkamit nin mga kayamanan. Si Pablo nagsurat: “An pagkamoot sa kuarta gamot nin gabos na klase nin nakakadanyar na bagay, asin sa pag-aabot sa pagkamoot na ini an nagkapira nagkaralagalag parayo sa pagtubod asin sinaksak an bilog nindang sadiri nin dakol na kakologan.” (1 Tim. 6:10) An pagkamoot sa mga kayamanan sarong tanda nin espirituwal na kaluyahan. Sa kabaliktaran, nagpapaheling nin espirituwal na pag-oswag an mga Kristianong kontento na sa simpleng buhay, na “igwa nin kakanon asin gubing.”—1 Tim. 6:6-8; Fil. 4:11-13.

12. Paano niato ikakapaheling an satong pag-oswag sa personal na buhay niato?

¹² Sinambit ni Pablo ki Timoteo kun gurano kahalaga para sa mga Kristiana na ‘samnohan an saindang sadiri nin husay na gubing, na may kabinian asin toltol na isip.’ (1 Tim. 2:9) Nagtatao nin marahayon na mga halimbawa an mga babae na mabini asin toltol an isip dapit sa saindang pagpili nin gubing asin pagpakarhay sa sadiri, saka sa iba pang kabtang kan saindang personal na buhay. (1 Tim. 3:11) Aplikado man an prinsipyong ini sa Kristianong mga lalaki. Sinadol ni Pablo an mga paraataman na magin “tama sana sa mga ugale, toltol an isip, areglado.” (1 Tim. 3:2) Kun ipinapaheling niato an mga kualidad na ini sa satong pangaroaldaw na mga aktibidad, maheheling kan gabos an satong pag-oswag.

13. Arog ki Timoteo, paano kita magigin halimbawa sa kabinian?

¹³ Si Timoteo dapat na magin arogan man sa kabinian. Sa paggamit kan terminong ini, an pinanonongdan ni Pablo iyo an espesipikong marhay na paagi nin paggawe, an seksuwal na moralidad. Dapat na daing katuyawan an paggawe ni Timoteo nangorogna sa saiyang pagtratar sa mga babae. Dapat niang trataron “an gurang na mga babae siring sa mga ina, an hoben na mga babae siring sa mga tugang na babae sa bilog na kabinian.” (1 Tim. 4:12; 5:2) Aram nin Dios dawa an imoral na mga gibo na tibaad garo baga hilom, asin pag-abot nin panahon siertong maaaraman iyan nin iba. Alagad totoo man na maheheling nin iba an marahay na mga gibo nin sarong Kristiano. (1 Tim. 5:24, 25) An gabos na miembro kan kongregasyon may oportunidad na ipaheling an saindang pag-oswag sa paggawe asin kabinian.

Mahalagang Marhay an Pagkamoot Asin Pagtubod

14. Paano idinoon kan Kasuratan na kita kaipuhan na magkaminorootmootan?

¹⁴ An pagkamoot sarong pangenot na aspekto nin tunay na Kristianismo. Si Jesus nagsabi sa saiyang mga disipulo: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) Paano niato ipinapaheling an siring na pagkamoot? Pinapakiolayan kita kan Tataramon nin Dios na ‘magpatiriostiosan sa pagkamoot,’ ‘magin maboot sa lambang saro, mapagmalasakit sa mamomoton na paagi, lubos na magpatarawadtawadan,’ asin magin mapag-istimar. (Efe. 4:2, 32; Heb. 13:1, 2) “Sa pagkamoot na sa magturugang magkaigwa kamo nin mamomoton na kapadangatan sa lambang saro,” an surat ni apostol Pablo.—Roma 12:10.

15. Taano an pagkamoot ta mahalagang marhay na ipaheling kan gabos, nangorogna kan Kristianong mga paraataman?

¹⁵ Kun si Timoteo nagin maisog o bakong maboot sa pagtratar sa saiyang mga kapwa Kristiano, nawaran kutana nin saysay an marahay na mga ginibo nia bilang paratokdo asin paraataman. (Basahon an 1 Corinto 13:1-3.) Sa ibong na lado, naheling nanggad an espirituwal na pag-oswag ni Timoteo paagi sa mga pagpahayag nia nin tunay na kapadangatan sa saiyang mga tugang, kaiba na an saiyang mga pag-istimar asin marahay na mga gibo sa kapakanan kan mga tugang. Kun siring, angay nanggad na sa saiyang surat ki Timoteo, espesipikong sinambit ni apostol Pablo an pagkamoot bilang saro sa mga kualidad na dapat na magin arogan si Timoteo.

16. Taano ta kinaipuhan ni Timoteo na magpaheling nin makosog na pagtubod?

¹⁶ Kan nasa Efeso si Timoteo, nabalo an pagtubod nia. May mga nagpapalakop nin mga doktrina na bakong oyon sa Kristianong katotoohan. An iba nagpapalakop nin “falsong mga estorya” o nagsisiyasat nin mga ideyang dai nakakakontribwir sa espirituwalidad kan kongregasyon. (Basahon an 1 Timoteo 1:3, 4.) Ilinadawan ni Pablo an siring na mga indibiduwal na “maabhaw huli sa pag-orgolyo, na mayo nin ano man na nasasabotan, kundi nagkakadiperensia an isip dapit sa mga pagkuestion asin debate manongod sa mga tataramon.” (1 Tim. 6:3, 4) Totogotan daw ni Timoteo na maimpluwensiahan sia kan nakakaraot na mga ideya na nakakalaog sa kongregasyon? Dai, huling sinadol ni Pablo si Timoteo na ‘makipaglaban kan marahay na pakilaban kan pagtubod,’ asin likayan “an basang na orolay na minalapas sa banal asin an mga pagkakaturumang kan falsong inaapod na ‘kaaraman.’” (1 Tim. 6:12, 20, 21) Mayong duda na sinunod ni Timoteo an madonong na sadol ni Pablo.—1 Cor. 10:12.

17. Paano puedeng mabalo ngonyan an satong pagtubod?

¹⁷ Interesante nanggad, si Timoteo sinabihan na sa “huring mga panahon an nagkapira masuhay sa pagtubod, na nagtatao nin atension sa nakakalagalag na ipinasabong na mga tataramon asin katokdoan nin mga demonyo.” (1 Tim. 4:1) An gabos na miembro kan kongregasyon, kaiba na an nasa mga katongdan na may paninimbagan, kaipuhan na magin arog ki Timoteo sa pagpaheling nin makosog asin marigon na pagtubod. Paagi sa marigon na paninindogan asin desididong paghiro tumang sa apostasiya, ikakapaheling niato an satong pag-oswag asin magigin kitang halimbawa sa pagtubod.

Pagmaigotan na Ipaheling an Saindong Pag-oswag

18, 19. (a) Paano nindo ikakapaheling sa gabos an saindong pag-oswag? (b) Ano an sunod na pag-oolayan?

¹⁸ Malinaw nanggad, an espirituwal na pag-oswag nin tunay na Kristiano mayong koneksion sa saiyang personal na itsura, natural na mga abilidad, o pagkaprominente. Asin dai man iyan pirmeng nababanaag huli sa dakol na taon nin paglilingkod sa kongregasyon. Imbes, naheheling an tunay na espirituwal na pag-oswag paagi sa satong pagigin makinuyog ki Jehova sa pag-isip, pagtaram, asin paggawe. (Roma 16:19) Maninigo niatong himateon an pagboot na magkaminorootmootan asin pataluboon an makosog na pagtubod. Iyo, pensaron niato an mga tataramon ni Pablo ki Timoteo asin magin lubos an atension dian tanganing an satong pag-oswag maheling kan gabos.

¹⁹ An saro pang kualidad na nababanaag an satong espirituwal na pag-oswag asin Kristianong pagkamaygurang iyo an kagayagayahan, na kabtang kan bunga kan banal na espiritu nin Dios. (Gal. 5:22, 23) Ipapaliwanag kan sunod na artikulo kun paano niato mapapatalubo asin mapagdadanay an kagayagayahan durante kan masakit na mga panahon.

Ano an Isisimbag Nindo?

• Ano an puedeng marisa nin iba manongod sa sato huli sa pagtaram niato?

• Paano naheheling an satong pag-oswag sa paggawe asin kabinian niato?

• Taano ta dapat na magin arogan an mga Kristiano sa pagkamoot asin pagtubod?

[Ritrato sa pahina 11]

Nagpaheling an hoben na si Timoteo nin pambihirang pagkamaygurang

[Mga Ritrato sa pahina 13]

Naheheling daw nin iba an saindong pag-oswag?